Gimpuunan 34

Linugus si Dina

1Sa usa ka sirang, ginminan si Dina kay anak daraga ni Hakub sa kan Liya. Sinabang niya ti manga kababayihan taga Kanaan. 2Nakitan siya ni Sikim kay anak ni Hamur usa ka Hibiyu, takinan sa tunda pag rugar. Kay pinilit ikinuyug si Dina bag-u kay linugus. 3Dapat naibug kay tagipusuun sa kan Dina ag kay yi pagkaibgan inda, nakan kay sinuyu ti daraga. 4Magkun si Sikim sa kay ama sa kan Hamur, “Amang, buwati paraan hampay maasawa niku inda pag babayi.”

5Igu naalaman ni Hakub inuringan ni Sikim ti pagkababayi ni Dina, unman dap siya nagsungyaw dahil ati di waya sa tanman kay manga anak lalaki magbantay sa kay manga hayup. 6Nag-ati kay ama ni Sikim si Hamur sa kan Hakub hampay manpakihampang.

7Igu naalaman manga anak ni Hakub ti nangyari, rargu sida nuli ginan sa tanman. Daut gid kanda buut ag subra gid magkagalit sa kan Sikim dahil sa kay binwat balaw gid dapat buwatun, imaw ti nagdara kakay-ahan sa magtal-anakan ni Hakub.#34:7 magtal-anakan ni Hakub: sa Hibriyu, Israil.

8Dapat magkun si Hamur sa kanda, “Naibug kang anak si Sikim sa kanyu daraga, nakan magpakihampang aku pasnui niyu siya maasawa niku anak. 9Mayad waya maasawa manga kalay-awan lalaki nimi kanyu manga daraga ag maasawa diman niyu manga kalay-awan lalaki kanmi manga daraga. 10Mahimu kamu mangulian kaibahan nimi una naan pag rugar kanyu gustu. Mahimu diman kamu magnigusyu una naan ag man-apu sitay pag daga.”

11Nanpakihampang diman si Sikim sa kay ama ag manga patar-ari ni Dina, “Nu mahimu duy maasawa niku si Dina kanyu patar-ari. Ipakaun duy niku ti una hintay kanyu hagadun. 12Kamu duy ti bahala nu pira kanyu hagadun ag nu hintay kang ipakaun hampay maasawa niku kanyu patar-ari. Bayadan duy niku kamu una pira kanyu hagadun basta maasawa lang niku si Dina.”

13Dapat dahil sa inuringan ni Sikim ti pagkababayi ni Dina, pinaumang manga anak ni Hakub si Sikim hanggan kay ama si Hamur. 14Magkun sida, “Balaw kami magpasnu mag-asawa si Dina sa usa ka tawu balaw tinuri, dahil makakaray-a tunda para sa kanmi. 15Pumasnu lang kami nu ti tanan taga atay pag lalaki manpaturi parihu sa kanmi. 16Nu manpaturi kamu, mahimu niyu maasawa ti manga daraga nimi ag mahimu diman maasawa nimi kanyu manga daraga. Ag mangulian kami kaibahan niyu hampay usa yi kanta banwa. 17Dapat nu unman kamu magpasnu, bul-un nimi si Dina ag guminan yi kami.”

18Nakitan nida ni Hamur ni Sikim bilang ga mayad diman ngani ti pagsabihun manga anak ni Hakub. 19Nakan dahil sa daka kay pagmahal ni Sikim sa kan Dina, balaw yi siya nag-uyang udas sa pagsunud sa manga sinabi manga anak ni Hakub.

Si Sikim pag-igalang gid sa magtal-anakan niya ama. 20Susun nag-ati si Sikim hanggan kay ama sa puwirtahan banwa ag nagbagaw sa tanan lalaki sa kanda banwa. 21Magkun sida, “Mayad kay magpakiusa inda pag manga tawu. Nakan sitay yi lang sida pag pauliun nita ag pasnuan magnigusyu una naan. Daka di waydi kanta daga. Mahimu nita maasawa kanda manga daraga hanggan mahimu diman maasawa nida ti manga daraga nita. 22Dapat pumasnu lang sida mangulian sitay kaibahan nita bilang usa ka banwa nu pumasnu ti tanan lalaki nita manpaturi parihu sa kanda. 23Nu sitay sida pag muli, kanta diman ti tanan hayup hanggan kasiyunan nida hampay mangulian sida sitay kaibahan nita.”

24Nagpasnu ngani ti tanan lalaki sa banwa sa sinabi ni Hamur ag niya anak ni Sikim. Nakan napaturi ngani sida tanan.

25Pagkalawuy tulu ka sirang, habang masakit waya ti manga biyag manga lalaki, sinmulud sa banwa ti duwa ka anak ni Hakub sida ni Simyun ni Libi, kay manga patar-ari ni Dina. May dara sida baladaw ag pinanmatay nida ti tanan lalaki sa unman may kaalam-alam. 26Minatay diman nida si Hamur hanggan kay anak si Sikim. Bin-ul diman nida si Dina sa balay ni Sikim, ag ginminan. 27Bag-u sinaka diman iba waya ka anak ni Hakub ti banwa ag bin-ul ati ti manga kasiyunan. Binwat nida inda dahil inuringan ti pagkababayi nida patar-ari si Dina. 28Bin-ul nida ti manga karanidu, baka, asnu hanggan ti tanan mab-ul nida ati sa banwa ag tanman. 29Bin-ul diman nida ti tanan kasiyunan banwa, hanggan ti manga kasiyunan sa sulud manga balay. Bag-u binihag nida ti tanan babayi ag anak.

30Taynguna, magkun si Hakub sa kanda ni Simyun ag ni Libi, “Pinakan-an niyu aku daka pagka dahilan. Manbalun galit sa kanta ti manga Kananiyu hanggan ti manga Pirisiyu sa inda pag daga. Mamatay kita tanan nu magkarausa sida girahun kita dahil pira-pira wata kita.”

31Dapat sinmagut ti duwa, “Pabay-anan lang aw lugud nimi kanmi patar-ari kilalan-un usa ka babayi baraydan?”

Currently Selected:

Gimpuunan 34: HNN

Highlight

Copy