Maka 9

1Gupuma nipumi nimu para wala lalore, Nimi para ora angele laloae, lisaya. Go para aeme wenaalinu menda para ambe na-kome, pa ainyaloma Godena Ki Rambuao-aya Ei wele kongapu rapu epelea ei andeleme, lisaya.

Yesu Mosesi pange Ilaidia nimuna angele wia ei

(Madiu 17:1-13; Luka 9:28-36)

2Naare su mindipu aoma Yesumi Pida, Dieimusi, Dioni ali ambo repo anda mumare ora andaa kana rumu para opasiao pumare nimunasi aisimiya. Go dina nimumi Yesu andala-ainya nipuna do akanu raayo rando menda aulisaya. 3Nipuna aka rongona, naare mandana roma ora kake waru pisaya. Go su raayona aya ali mendame go pisaya rupa ipame randepema ma-kake pape-na-ya. 4Go dina Ilaidia Mosesi laapo opola ipumare Yesu rapu epa angele angele loaisimiya. Go au pula-ainya go ali repome andisimiya. 5Gupuma Pidame Yesu para lalore, Realio, go para aemapare ora epeleae, lisaya. Ria andasi repo pamonolae, lisaya. Menda Mosesi nipuna ei komea nena ei, menda Ilaidia nipuna ei puma pamonolae, lisaya. 6Pida, Dieimusi, Dioni pururumi komala ara Pidame angele doame rapisayapare kone na-wisaya. 7Gupuma kake pi koaame nimu wasupa ma-embaisayapare mo koaa rupara angele koma lainyada ara lalore, Gore na Nakiae, nipu para raname komaloae, lainyaisaya. Nipuna angele pangoalepape, lainyaisaya. 8Go lisayanda go gole mo ali repome leeme leeme pisimiyapare ali mendanda na-ande. Yesu komea andisimiya.

9Gupuma mo porana kolopinyada ara Yesumi nimu para mana lala ara lalore, So andamende au wenaali menda para na-dapape, lisaya. Alina Si Naki ora komoma wala rekoma aliandare gore anana deme, lisaya. 10Go eina nimunale Yesuna angele sia ara monde ora komoma wala rekola pea ei para mo nipuna kou nane raluaisimiya ali repo nimunale lora lora pisimiya. 11Gupuma Yesu para gurupa lora pisimiya. Mo Mosesimi Rudule Angele waloaisimiya alinumi lalore, Ilaidia ambala ririna epeleae, loaeme, lisimiya. Akepeanda loaemepae, lisimiya. 12Yesu nipumi nimu para lalore, Ilaidia ririna ambala ora alenda alenda mu ana laluame epola payalore mo Alina Si Naki para wape puma wia einuri akipumayapae, lisaya. Rendaa andaai mula pea ei pange nipu yalame komala pea einu, mo Godena angele wia bukana wape puma wia einuri, akipumayapae, lisaya. 13Neme nimi para laloae, lisaya. Ilaidia ambala epa, lisaya. Gupuma nimuna kone pea einu nipu para pameae, lisaya. Nipu para Godena angele wia bukana wape puma wia einu wenaalimi pameae, lisaya.

Yesumi koae remo piri naki menda ma-epeaisaya ei

(Madiu 17:14-21; Luka 9:37-43)

14Gupuma mo nipuna kou nane raluaisimiya alinu aisimiya lena opola pumare wenaali waru andapu ainya andisimiya. Mo Mosesimi Rudule Angele waloaisimiya alinumi Yesuna kou nane raluaisimiya alinu menda para angele yokanali pulaisimiya. 15Go gole mo wenaali raayome Yesu andomare rungula mealo pamboma nipu para alo pumare ki alisimiya. 16Yesumi nipuna kuou nane raluaisimiya alinu para gurupa lora pisaya. Mo alinu rapuri alena angele yokanali pimipae, lisaya.

17Go lisayanda mo wenaalinu rapu aisaya ali komeame Yesuna angele yangi liada ara lalore, Waloae alio, na naki nee repara karu epawa, lisaya. Nipu para koae remo piri angele na-ma-laya, lisaya. 18Mo remome rengepeminyu sia piri, suna ma-lopao-ayae, lisaya. Gupuayandare na nakina angaa para rako supi andaai waru ipuaya pange nipuna angaa lengere laoma nipuna dore rindulalumboma puri palapa puayae, lisaya. Nena kou nane raluaisimiya alinumi ralu linyaya kongeyawapare mo alinumi ralu rumbape ana na-pae, lisaya.

19Yesu nipumi nimu para lalore, Nimiri Gode repara kone na-rulae wenaaliae, lisaya. Nimi rapu rana andepele rapo aluapae, lisaya. Nimimi ni rendaa andepele rapo gualimiyapae, lisaya. Mo naki ni repara karu ipulupa, lisaya. 20Gore nimuri mo naki Yesu repara karu ma-paisimiya. Go gole mo remome Yesu andomare mo naki pururu ma-liaisaya. Gupisayandare mo nakiri nipuna angaa para rako supi ralupao lopala-ainya suna lopoma perere pamisaya.

21Gupuma Yesumi nipuna apa para lora pula ara lalore, Go auri kuni gipa akipurapo popeapae, lisaya. Gore nipuna apame lalore, Pena nakisi dina puma epea eiye, lisaya. 22Mo remome naare raayo repana lenga para pange ipa para nipu koyaluame mea waro lopala puayae, lisaya. Go peapare neeme rambameape ana pilindare naa para yarame komoma rambameae, lisaya. 23Gupuma Yesumi nipu para lalore, Neeme naa rambamilindare neme nee rambamula, lisaya. Angele pangoma siambaya alimi au raayo papeyae, lisaya. 24Go gole mo nakina apame wi loma lalore, Angele siambayo, lisaya. Na angele siambayo ei ana na-piliandare neeme rambameae, lisaya. 25Gupuma Yesumi wenaali waru alo ipisimiya ei andomare mo koae remo para angele rendaa pimi lalore, Nee go naki kale ma-poaoma angele na-ma-lale koae remo, lisaya. Neme nee para lalo, Go naki gioma opalumba pupu, lisaya. Gupuma nipuna lo para wala na-popa pirape, lisaya. 26-27Mo koae remome e wi lomare mo naki waru luma keomare minyapalaoma opalumba popisaya. Gupuma mo naki ora kome ali ro leale wisaya. Go eina wenaali raayome lalore, Nipuri ora komeae, lisimiyapare Yesumi mo naki nipuna ki yola muma ma-rekaisayandare mo naki wala rekisaya.

28Gupuma Yesuri mo anda rupara konda pambisayandare wenaali menda na-ainyaloma Yesu nipuna angurapo ara nipuna kou nane raluaisimiya alinumi nipu para gurupa lora pisimiya. Naamere mo remo ralu liape-na-ya eiri akepeandayapae, lisimiya.

29Yesu nipumi nimu para lalore, Gupi remore Gode repara yainya pi eimi (pange Gode para kone siala ara enda na-ne palu mipi pa alinda) komeare gupi remo ralu diae, lisaya.

Yesumi nipuna komola pea eina angele wala lisaya ei

(Madiu 17:22-23; Luka 9:43-45)

30Go andasu gioma pumare mo Galili andasu nane lombae pupa pumare wenaalinumi nipu na-andena, kone wisaya. 31Go eiri nipuna kou nane raluaisimiya alinu para angurapo angele wadoame pisaya. Angele gurupa walisaya. Ali komea mendame mo Alina Si Nakiri rombo luma nipuna yanda runguli alinu para ma-aloma nipu dimi, lisaya. Gupilimindare ora komeleapare koro repo peredeandare wala rekelea, lisaya. 32Go lisayapare mo alinumi kone na-wisimiyapare paalame komoma nipu na-lora pisimiya.

Ora ririna bi wi aliri apiyapae, lea ei ape lisimiya ei

(Madiu 18:1-5; Luka 9:46-48)

33Kapeneame ree anda para pumare anda rupara piri, Yesu nipumi nipuna kou nane raluaisimiya alinu para gurupa lora pisaya. Mo porana ipula ara alena angele angele lamepae, lisaya. 34Go lisayapare angele na-le, pa pirisimiya. Mo porana ipula arare Naa rapu bi wia aliri api ayapae, loma angele angele lisimiyanda pa pirisimiya. 35Gupuma Yesu piruma mo nipuna kou nane raluaisimiya ki laapo pereyoma ange mendana laapo alinu wi loma nimu para gupi lisaya. Ali apimi ririna ni aluae, kone wiliandare mo aliri ora kou nane ao pora poainya, lisaya. Nipumi wenaali raayona pupudengi nao-aya ali ainyae, lisaya. 36-37Go lisayanda nipumi nakisi menda muma nimu rupara ainyalomare mo nakisi kupi muma mo nipuna kou nane raluaisimiya alinu para lalore, Ali menda apimi go nongo nakisinu para ipulupa loma pora lomba sialimindare gore ni pange ipu loma pora lombo siademe lisaya. Gupuma ali apimi ni anda miliandare ni komea na-anda midapare ni rapaya Gode pange anda midae, lisaya.

Ali apimi naa para yanda na-pi aliandare gore nana ame ao-aya, lisaya ei

(Luka 9:49-50)

38Dionimi Yesu para lalore, Waloale Alio, ali mendame nena bina koae remonu ralu liala papare mo aliri nena kou nane na-rali aliyanda naame Go au na-pape, loma sese pama, lisaya. 39Go lisayapare Yesumi lalore, Wala sese na-pipape, lisaya. Ali apimi na bi lala ara puri pale einu piliandare werepena go alimiri na bi na-ma-koyalia, lisaya. 40Nana dama angelenu pange nana pima einu yoka yoka na-da aliri nana ame ayae, lisaya. 41Nimi para ora angele laloae, lisaya. Nimiri Keriso bi memendare ali apimi ipa noma giliandare nipuna epe yangi ora milia, lisaya.

Pa aunu pimi wenaalimi wenaali mendana Yesu para kone rulao ei ma-koyao-aeme

(Madiu 18:6-9; Luka 17:1-2)

42Ali mendame ni para kone rulaeme naki nongosinu nimuna ni para kone rulaeme einu ma-koyaliandare alinumi go ali muma nipuna maa para kana kopena andi lopaoma ipa lee para lopalimindare go eiri rendaa andaai pea ale menda nipu repara pia. Go peapare nipu repara go au piliandare gore epedea. Akepeare nipu pa arare pena Keriso wenaalinu ni repara kone rulaeme ei ma-bembolaliandare gore Godeme nipu para ada pea rendaare ora go ei pange wanduaoma ora andaaipe adea, lisaya. 43Nena ki mendame koae au painya deandare go ki rungulu rumbape, lisaya. Gupuma ki komea ara endoaya ei milindare epedea, lisaya. Ki laapo arare repana roae lena pelendare kodea, lisaya.

44[Go alenare kome wenaali noaeme kimanu

na-komoaeme pange mo repana na-kundini,

naare raayo pa roaya, lisaya.]

45Nena ange mendame koae au painya deandare go ange rungulu rumbape, lisaya. Gupuma ange komea ara endoaya ei milindare epedea, lisaya. Ange laapo ara repana roae lena nee ma-lopalimindare kodea, lisaya.

46[Go alenare kome wenaali noaeme kimanu

na-komoaeme pange mo repana na-kundini,

naare raayo pa roaya, lisaya.]

47Nena lee mendame koae au painya deandare go lee yoko ma-rumbape, lisaya. Lee komea ara Godena Ki Rambuao-aya Ei para pelendare epedea, lisaya. Lee laapo alindare mo repana roae lena nee ma-lopalimindare kodea, lisaya.

48[Go alenare kome wenaali noaeme kimanu

na-komoaeme pange mo repana na-kundini,

naare raayo pa roaya, lisaya.]

49Naare mendana repana sula wenaali raayo para pelea. Go eiri aipa mandana. 50Aipare epe rende pialeyapare nipuna rende pi ei mareleandare akipuma wala rende pinya demepae, lisaya. Nimina nimina gole aipa sia alepape, lisaya. Gupuma nimina nimina gole yanda paliala ara alepape, lisaya.

Currently Selected:

Maka 9: POLENT23

Highlight

Copy