Maka 10

Repaalu aeme wenaalinu ali giaya ei pange wena giao-aeme eina angele lea ei

(Madiu 19:1-12; Luka 16:18)

1Gupuma Yesu go lena gioma mo Diodani ipa angulaoma mo Diudia andasu nane wi kenge nane paisaya. Wenaali waru andapu Yesu para wala epa mombelisimiyanda nipumi angele ambala waloaisaya rupa, wala walisaya.

2Go dina Parisi alinu mendane alinumi Yesuna ange yolalo ara epa gurupa lora pisimiya. Godena Rudule Angele wape pea eimiri ali mendame nipuna wena gialiandare ana peapae, lisimiya. 3Nipumi nimuna angele yangi liada ara lalore, Mosesi nipumi nimi parare ake au pipape leapae, lisaya. 4Mo alinumi lalore Mosesi nipumiri angele loma lalore, Alimi wena gialuamere ramayona wape pinyaloma gurupa alainya lea, lisimiya. 5-6Yesumi nimu para lalore, Nimimi Godena angele meapeya gimi komoae menda Mosesi nipumi go au pipape loma wape peapare Godeme go su yaa laapo warisaya dinare ali wena laapo warisaya, lea, lisaya.

7Go einare ali mendame nipuna apa ama laapo

giaoma nipuna lamea wena rapu komea para

raminyekepa ali pi, lea, lisaya.

8Go peandare nipuri laapo dia. Komea rupa ao-aepe, lisaya.

9Go einare Godeme ma-runaeya alere su wenaalimi na-keralimi, lisaya.

10Gupuma anda rupara konda pambo pumare Yesumi monde lisaya ei, nipuna kou nane raluaisimiya alinumi nipu para wala lora pisimiya. 11Yesumi nimu para lalore, Ali apimi nipuna wena gioma wena menda lamiliandare go pena lamilia wenare wena menda pake nala ei mandana, lisaya. 12Gurupare wala wena menda apimi nipuna ali ora gioma ali menda para peleandare go pena pelea aliri ali menda pake nala ei mandana, lisaya.

Yesu pange enge nongo nakisinu nimuna angele lea ei

(Madiu 19:13-15; Luka 18:15-17)

13Gupuma menda para wenaalimi nongo nakisinu Yesumi warainyaya, karu ipisimiya. Gupisimiyapare Yesuna kou nane raluaisimiya alinumi mo wenaalinu para Na-ipulupape, loma rudu lisimiya. 14Gupisimiya ei Yesumi andoma rono pangala ara nimu para lalore, Go nongo nakisinu ni para epena, rudu na-dapape, lisaya. Godena Ki Rambuao-aya Eiri gurupa repaana ei, lisaya. 15Neme ora angele la gialo, lisaya. Go nongo nakisinumi pimi rupa ali mendame Godena angele raayo na-miliandare Godena Ki Rambuao-aya Ei para na-konda pambeleme, lisaya. 16Gupuma Yesumi mo nongo nakisinu nipuna ki laapome kupi muma siamba ara wamo puma puma pisaya. Gupula ara Gode para lalore, Go nongo nakisinu rambameae, lisaya.

Amo ali Yesu para ipisaya ei

(Madiu 19:16-30; Luka 18:18-30)

17Yesumi wala porana polameya ainya, ali mendame alo ipumare Yesu para rumu yaruaoma piri gurupa lora pisaya. Epe Waloale Alio, lisaya. Endoaya ei mulameyare ake au punupae, lisaya. 18Yesumi nipuna angele yangi liada ara lalore, Ni para epe ali akepeanda lalepae, lisaya. Ali mendanda epe ali na-ayapare Gode komea ora epelea, lisaya. 19Neere Godena Rudule angele wi einuri kone wiliae, lisaya.

Ali menda ora komena rupa na-liape.

Ali pe wena pake na-nape.

Wena lami ali rapu pake na-nape.

Alenda alenda pake na-nape.

Yango na-pi na-laopape.

Na-makirape.

Nena apa pange nena ama laapo raname

waru komape loma wi einuri nee kone wili, lisaya.

20Mo ali nipumi Yesu para lalore, Waloale Alio, go rudule angelenu raayo, naki arale pangoma kone wiae, lisaya. 21Yesumi nipu andala ara kone waru siala ara nipu para lalore, Neemere au komea na-pele, lisaya. Puma, nena siambale olemole pua ropo pumare mo muniri narali wenaalinu para ale ale pilindare neere so Godena Aya Lena nena yangi andaai sialiae, lisaya. Go einare na kou nane raliape, lisaya. 22Yesumi go lisayanda mo alimi nipuna siambae olemole waru andapuyanda nipuna pumi kendame ora waru komala ara Yesu minyapalaoma paisaya.

23Gupuma Yesumi perekeyo andoma nipuna kou nane raluaisimiya alinu para lalore, Alenda aienda waru siambaeme amo wenaalinumi Godena Ki Rambuao-aya Ei para konda pambolame pape eiri, pu rendaa waru pilia, lisaya. 24Yesuna kou nane raluaisimiya alinumi go angele pangoma rungula mealo pambisimiyapare Yesumi nimu para wala lalore, Na nakinuo, Godena Ki Rambuao-aya Ei para konda pambolame pape eiri, pu rendaa waru pilia, lisaya. 25Gamelo mename nira pondea para puluri rendaa pilia. Go peapare amo alimi Godena Ki Rambuao-aya Ei para puluri ora rendaa andaai pea, lisaya 26Yesuna kou nane raluaisimiya alinumi go lisaya angele pangoma nimumi waru rungula mealo pamboma Yesu para lalore, Gore, apimi endoaya ei meapeyapae, lisimiya. 27Yesumi nimuna lee angaa para waru andae siala ara lalore, Wenaalinumi nimuna gole go einu pape-na-yapare Godeme au raayo papeyae, lisaya.

28Pidame Yesu para angele doameya lalore, Pangae, lisaya. Naamere alenda alenda raayo gioma nena kou nane raidama, lisaya. 29Yesumi lalore, Nimi para ora angele laloae, lisaya. Ali apimi ni para pange Godena epe angele para kone sulame nipuna anda, amenu, ainyanu, apa, ama, nongo nakisinu, su raayo pange raayo gialiandare gupilia dina mo alimi andapu menda milia, lisaya. 30Gore suna arale andanu ali ria ki komeapu rupa, pange amenu pange ainyanu pange anginu pange nongo nakisinu pange su raayo pange ali ria ki komeapu rupa miliapare rendaa rendaa pi einu pange miliae, lisaya. Gupuma epola pea dina pange na-kome pa ao-aliae pange Godena endoaya ei milia, lisaya. 31Go peapare wenaali andapu ambia kalu alinu aeme repaare werepe nanere bi na-wi repaa alimi, lisaya. Gurupare ambia bi na-wi repaare werepe kalu alinu alimi, lisaya.

Yesumi nipuna komola pa eina angele rana repo wala lisaya ei

(Madiu 20:17-19; Luka 18:31-34)

32-33Yesu nipuna kou nane raluaisimiya alinu Diurusaleme ree anda nane porana pula-ainya Yesu ambala ririna paisaya. Go dina mo kou nane raluaisimiya alinu nimumi pururumi waru komisimiya pange rungula mealo pambisimiya. Werepe raluma ipisimiya alinumi pange paalame komisimiya. Gupuma monde ki laapona angena laapopu alinu ongesi mo para le wala karu puma Yesu nipu para pula pisimiya einu go alinu para angele la ale ale pula ara lalore, Waru pangalepae, lisaya. Naare Diurusaleme ree anda nane pulumae, lisaya. Mo Gode repara alinau puaisimiya alinuna kalu alinumi pange mo Mosesimi Rudule Angele waloaisimiya alinumi pange Alina Si Naki milimi. Nipu para lalore, Neere komainyae deme, lisaya. Gupuma nipuri mo anda repaa alinu menda para ma-ademe, lisaya. 34Monde anda repaa alinumi nipu giri giri lao pange nipuna dona supi raoma nipu waru lu podeaoma dimi, lisaya. Gupuma nipuri naare repo suma peredeandare wala endoma rekalia, lisaya.

Dieimusi pange Dioni laapome andaa ali alipa lisipiya ei

(Madiu 20:20-28)

35Go lisayandare Sebedina naki laapo Dieimusi Dioni laapome Yesu repara puma lalore, Waloale Alio, saana kone peale menda nee repara konge depandare giainyae, lisipiya. 36Yesu nipumi niipu laapo para lalore, Niipi para ake au panoyapae, lisaya.

37Niipumi Yesuna angele yangi liada ara lalore, Neeme nena Ki Rambuao-aya Ei ipuma nena wele kongapumi ki rambuao alindare saa menda nena popeke ki nane ma-piraoma mendare nena koaya ki nane ma-pirapeae, lisipiya.

38Go lisipiyapare Yesumi niipu para lalore, Niipina konge dape eiri kone waru na-widape, lisaya. Neme rendaa pi kapona ipa nola rupare niipimi pange mandana nelepeyapae, lisaya. Baparaisi au neme pula rupare niipimi pange gurupa pilipiyapae, loma Yesumi gurupa lisaya.

39-40Niipumi Yesu para lalore, Saare ana pea, lisipiya.

Gupuma Yesumi niipu laapo para lalore, Neme rendaa pi kapona ipa nola rupara nola pepeparere pange neme pula rupa baparaisi au pange pula pepeparere na popeke ki nane pirape ei, pange na koaya ki nane pirape eiri, na Apana ei komea, lisaya. Go eiri, neme pape ei dia, lisaya.

41Monde ki laapo alinu menda parame go ei pangomare Dieimusi Dioni laapo para rono pangolame kone wisimiya. 42Gupumare Yesumi mo alinu nipu para epenaloma nimu para lalore, Nimimi andaleme, lisaya. Mo su menda nane wenaalinu andere-ao-aeme alinumi wenaalinu lu minyambaoma aeme, lisaya. Nimuna andaa alinumi wenaalinu mana mana waru loma angele waru loaeme, lisaya. 43Go loaemepare nimimi go au na-pipape, lisaya. Nimi para ali apimi nipuna bi andaai winya kone wiliandare nimina pupudengi ne ei rambamuape ali ao-alia, lisaya. 44Gupuma nimi para ali apimi ni ora ririna ali alua kone wiliandare nimi raayona pupudengi nao-ae ali mandana ao-ainya, lisaya. 45Mo Alina Si Naki gole go suna epea auri, wenaalinumi nipuna pupudengi nainyaya na-epea, lisaya. Nipu epea eiri wenaalina pupudengi naluame pange nimu rambamulame nipu komolameyanda epea pange nimu rambamulameyanda ei, lisaya.

Yesumi lee rumbu pi ali Badimiasi nipuna lee ma-kiyaisaya ei

(Madiu 20:29-34; Luka 18:35-43)

46Nimu Dieriko ree anda para opapala ipisimiya. Gupuma Yesuri nipuna kou nane raluaisimiya alinu pange wenaali waru andapu Dieriko ree anda minyapalada-ainya Dimiasi nipuna naki Badimiasi lee rumbu pi ali muni kongeyoae aliri mo pora nembona nipuna puaisaya rupa pirisaya. 47Badimiasi nipumi Yesuri mo Nasarere anda ali pupula angele pangoma nipumi e waru loma wi lala ara lalore, Yesuo, Deipidina anda repaa alio, ni para yarame komala ara rambameae, loma wi lisaya. 48Gupuma wenaali andapumi rono pangoma lalore, Angele na-lape lisimiyapare nipumi wi ora andapu gurupa lisaya. Deipidina anda repaa alio, ni para yarame komala ara rambameae, loma wi lisaya. 49Yesu ipuma epa ara lalore, Widapa, lisaya. Gupuma wenaalinumi mo lee rumbu pi ali wi loma nipu para lalore, Nee wi dale wangepu kongapu paloma rekae, lisimiya. 50Go eina Badimiasi nipuna maa aka koyo rumbumare wangepu rekoma Yesu para paisaya. 51Gupuma Yesumi nipu para lalore, Nena kone pea eiri, ake au panoyapae, lisaya. Lee rumbu pi alimi Yesuna angele yangi liada ara lalore, Realio, na lee laapo kiyae, lisaya. 52Gore Yesumi nipu para lalore, Nee puae, lisaya. Nena koneme, ni ora epealia kone siande eimi, nee ma-epeadale puae, lisaya. Go gole nipuna lee kiyaisaya. Gupuma porana Yesu raluma paisaya.

Currently Selected:

Maka 10: POLENT23

Highlight

Copy