Maka 11
11
Yesu kini ali mandana Diurusaleme ree anda para kondo pambisaya ei
(Madiu 21:1-11; Luka 19:28-40; Dioni 12:12-19)
1-2Nimu Diurusaleme ree anda repara pula ara mo Bedapasi pange Bedani enge andasi laapo para opapala paisimiya. Mo anda laapore mo Olipi su rundu repara aisipiya. Gupuma Yesumi nipuna kou nane ralisipiya ali laapo ambala rapada ara lalore, Mongo niipina weno ririna aya onge anda para pulupa, lisaya. Go anda para opapala puma go gole pena dongi mena, ali mendame ambe na pira pami dongi mena apo andibaoainya andelepe, lisaya. Koya muma one ma-ipulupape, lisaya. 3Mendame niipi para Akepeanda pipipae, deandare gurupa dapape, lisaya. Realimi angaaya au pulame, pua mealepa landa pipa dapape, lisaya. Nipuna kone pea au pumare wala ambala rapanedea dapape, lisaya. 4Gupuma pumare mo pena dongi mena pora nembona aisaya anda pora gape para andibaoainya pua koya misipiya. 5Go lena aisimiya alinumi niipu laapo para lalore, Mo dongi mena akepeanda kodapepae, lisimiya. 6Niipu laapome Yesumi dapape layande ei, la alisipiya. Go lisipiya ei pangoma mo alinumi dongi mena ma-pena, lisimiya. 7Gupuma Yesu para ma-pumare gore nimuna maa akanu mo dongi menana kouna ma-rambolaomare Yesu mandaa pirisaya. 8Wenaali waru andapumi nimuna maa akanu pora lepolona rambolama rambolama pisimiya. Mendane wenaalinumi kera waru mandi repana palanu rondope meala puma rambolama rambolama pisimiya.
9Mo ririna pulu aisimiya wenaalinumi pange werepe nane ipulu aisimiya wenaalinumi Godena bi minyasiada ara wi loma lalore,
Ranae, ranae, la eiri puala pisimiya.
Godena bina epelea aliri Godeme ora epe aunu
andapu walena, lisimiya.
10Godeme naana kasua Deipidi para la wisayande
Ki Rambuao-aya Ei ipulandare nipuna angele
laminyae, lisimiya.
Gode para ranae angele laminya, lisimiya.
11Yesumi Diurusaleme ree anda para pumare Isaraelimi mandu rangala pae wenaalinuna Gode repara alinau puaisimiya andaa anda rupara konda pambola paisaya. Nipumi alenda alenda raayo andama andama pumare naare pambala ara rimbalape nono pisayanda monde ki laapo pereyoma angena laapopu kou nane raluaisimiya alinu rapu Bedani anda nane paisimiya.
Yesumi poke repana para kili na-elena lisaya ei
(Madiu 21:18-19)
12Gupuma yapi kepea nane mo Bedani ree anda minyapalaoma ipula ara Yesumi reame komisaya.
13Nipumi poke repana komea kera mainda wi ei mo para le ainya andomare kili elea pa leeme andola paisaya. Mo repana repara opola paisayapare keranu komea andisaya. Poke kili elape naare ambe diaeyanda pisaya. 14Gupuma Yesumi mo poke repana para lalore, Nena kilinuri wenaali mendame na-ralo neleae, lisaya. Go angele lisaya ei, nipuna kou nane raluaisimiya alinumi pangisimiya.
Yesu mo Gode repara alinau puae andaa anda para paisaya ei
(Madiu 21:12-17; Luka 19:45-48; Dioni 2:13-22)
15Nimu Diurusaleme ree anda para opapala pumare Yesumi mo Gode repara alinau puaisimiya andaa anda rupara konda pambisaya. Mo anda rupara alenda alenda ropanali puaisimiya alinu kama nane ralu lumare muni ropo puaisimiya alinuna dapanu pange mo yaa malipu kamboaisimiya alinuna piri rapulumanu pange lapalu rumbepe pisaya. 16Go au pisayanda nipumi mendame alenda alenda go Gode repara alinau puaisimiya andaa anda rupara na-ma-ria epena, lisaya. 17Gupuma Yesumi mana angele lala ara nimu para lalore, Go Godena angele wia bukana gurupa wape pea, lisaya.
Na andare su rando rando wenaali raayome
yainya puala peme andame pea, lisaya.
Go peapare nimimi go andare pake nola peme
alinuna anda mandana ma-ainya dame, lisaya.
18Wenaali raayome Yesumi walisaya angelenu pangomare rungula mealo pambisimiya. Go ei andoma mo Gode repara alinau puaisimiya alinuna kalu alinu pange mo Mosesimi Rudule Angele waloaisimiya alinumi paalame komisimiya. Monde kalu alinumi Yesumi pisaya ei pangomare nipu liape pora aisa pisimiya. 19Go naarena naare pamboma rimba rimbayala-ainya Yesu pange nipuna kou nane raluaisimiya alinu rapu Diurusaleme ree anda minyapalaoma paisimiya.
Monde ma-kapuyaripaya poke repanana Yesumi angele walisaya ei
(Madiu 21:20-22)
20Yapi kepea nane porana pupula ara monde poke repana anda eiri paisimiyapare kera pange pala pange pida raayo kapuyala paisaya. 21Pidame go kone suma Yesu para lalore, Realio, andae, lisaya. Nena angeleme ande koyaripinde poke repana go kapuya ayandae, lisaya. 22-23Yesumi Pidana angele yangi liada ara nimu para lalore, Ali apimi Godeme ora pilia kone wiliandare kone laapo na-wi, kone komea siamba ara go aya kana para lalore, Nena gole lasu ria, no dawalaina pua lopa deandare Godeme ora pilia, lisaya. 24Go einare neme nimi para ora angele laloae, lisaya. Yainya pula ara Gode para alenda menda konge demendare Godeme ora ambala giande kone suma kone laapo na-wi, kone komea siala ara yainya pilimindare Godeme ora gilia, lisaya.
25Gupuma Gode para rekoma yainya pulame pula-ainya ali mendame nimi para koae au pi eina go ali para rono pangeleme ei niminyalimindare yainya ambe na-pi, nimina koneme gole go ali para ki muma nipu para rono pangeleme ei ambala pereyalepape, lisaya. Go au pilimindare Godeme nimina koae koae aunu peme ei kone na-wi, rambualia lisaya. 26[Go peapare nimimi go ali para rono pangeleme ei na-pereyalimindare nimina apa Godeme pange nimina koae au peme einu na-rambualia, lisaya.]
Yesuna puri angaa misimiya ei
(Madiu 21:23-27; Luka 20:1-8)
27-28Go lisayanda nimu Diurusaleme ree anda nane wala ipisimiya. Go dina mo Gode para alinau puaisimiya andaa anda rupara pula-ainya mo Gode repara alinau puaisimiya alinuna kalu alinu pange mo Mosesimi Rudule Angele waloaisimiya alinumi pange mo kalu alinumi nipu para ipuma lalore, Mo puale einuri apimi landa pualepae, lisimiya. Neeme go au painyayare puri apimi giapae, lisimiya. 29Yesumi nimuna angele yangi liada ara lalore, Neme nimi para ambala lora pula ei nimimi la yoko gilimindare gore nina puayo einuna puri me para la gula, lisaya. 30Dionimi baparaisi au paya puriri a para ipuma peapae. Gode para ipuma pea o ali para ipuma peapae, lisaya.
31-32Go lora pisayapare mo alinumi nimuna nimunale angele gurupa lisimiya. Gode para aoma epea demandare gore naa para Dionimi loaya angelenuri akepea waru na-pangamepae dea, lisimiya. Go peapare su alinu para aoma epea piri akipu laminyapae, lisimiya. (Wenaali raayome Dioniri Godena poropedi aliae, loaisimiyanda mo wenaalinu para paalame komisimiya.) 33Go eina mo alinumi Yesu para lalore, Naa marea, lisimiya.
Go eina Yesumi nimu para lalore, Ni pange nina puayo einu pulame puri me para na-la gula, lisaya.
Currently Selected:
Maka 11: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
