Maka 12

Waini e andabao-aisimiya alinuna siapi angele lea ei

(Madiu 21:33-46; Luka 20:9-19)

1Go dina Yesumi nimu para siapi angelenu la aloaisaya. Nipumi nimu para angele walala ara lalore, Ali mendame waini yoko pomare puri pale pape puma kuda pumbaisaya. Mo e kuda rupara mo waini ipa mulame singipiape neka awo suma andalu anda puma ali menda so anda rupara piri mo waini e andere-ao-aisaya. Alinu menda para mo waini e andere-ainyaya mu ma-aoma lalore, Waini kilinu menda para einuri nimina meala ara andapuri na ei meala pipape, lisaya. Go loma nipu su menda nane paisaya. 2Kuni gipana mo ena kili nape wisayandare mo e realimi nipuna pupudengi noae ali menda, mo nipuna waini e andere-aisimiya alinu para kilinu mendane einu meainyayanda rapaisaya. 3Mo e andere-aisimiya alinumi mo e realina pupudengi noae ali mumare podeyao luma alenda na-ma-ale, ki kama para rapaisimiya. 4Gupuma mo e realimi pupudengi noae ali menda rapaisaya. Mo waini kili e andere-aisimiya alinumi mo pupudengi noae alina kaluna raki luma nipu para koae au waru pisimiya. 5Gupuma mo e realimi nipuna pupudengi noae ali menda rapaisayapare go ali ora liisimiya, lisaya. Nipuna pupudengi noae alinu gurupa rapa rapa pisayapare mo e andere-aisimiya alinumi menda parare kundulu rapala pula ara menda parare ora ma-komao liala pisimiya. 6-7Werepe nane mo e reali rapu ali komea pa aisipiya. Go aliri nipuna pumi na-rapae naki aisayapare ora werepe nane go naki rapalua, kone wisaya. Nipuna konemere, na naki para kuma puma nipuna angele pangeleme, kone suma rapaisayapare monde e andere-aisimiya alinumi nimuna nimuna lalore, Go aliri ara alona ala pea aliyale, ambe wangepu liiaminya, lisimiya. Nipu dimandare nipumi mulapa alenuri naana minyambalima, lisimiya. 8Go lisimiyandare mo ali muma ora lumare nipu rore mo waini kili e pape ree nane ma-rumbisimiya, lisaya.

9Go lisayapare Yesumi lora pula ara lalore, Mo e realimi ake au piliapae, lisaya. Nipumi mo e andere-aisimiya alinu ora lu diayaomare alinu menda para muma nipuna e andere-ainya dea, lisaya.

10Mo Godena angele wia bukana wape puma wi eiri yarepeda pisimira, lisaya. Gurupa lea.

Ande anda eloaeme alinumi pakama kana

kone wisimiyapare ande kanare wala puri pale

kana auda popayae.

11Go au pi auri ande Realimi pinya lisaya.

Ora epe au pisaya, lea, lisaya.

12Mo Isaraelimi mandu rangala pae wenaalinuna kalu alinumi Yesuna siapi angele kone siala ara Naana koae koae einu puaema einu penameyao mongo wadae, lisimiya. Go loma Yesu duame rapisimiyapare wenaalinu waru pamboaisimiyanda paalame komala ara Yesu go dina na-lii, giala paisimiya.

Sisa para dakisi muni alamonoyapae, lo Yesu para lora pisimiya ei

(Madiu 22:15-22; Luka 20:20-26)

13Gupuma mendane Parisi alinu pange Erodina kou nane raluaisimiya alinu Yesu para rapaisimiya. Nimumi Yesu pereke pereke angele ma-laluame angele lora lora pinyaya, rapaisimiya. 14Nimumi Yesu para epa lalore, Waloale Alio, neeme ora angelenu loale eiri pangoaema, lisimiya. Neeme alinu andolamere raayo ora komea kandana andoale, lisimiya. Bi andaai wia alinu pange paalame na-kome nimu para Godena au painyayanda angele waloale, lisimiya. Mo gapamani andaa ali Sisa para, dakisi muni aloaema eiri naana Isaraelimi mandu rangala pae wenaalinuna Rudule Angele wi ei runguluaemapae, lisimiya. Muni alamonopae, lisimiya.

15Go lisimiyapare Yesumi nimuna pereke pereke angele lisimiya ei pename andala ara lalore, Niri akepeanda makeademepae, lisaya. Dakisi muni komea andano ma-ipulupa, lisaya. 16Nimumi muni komea ma-ipisimiyanda nipumi nimu para lalore, Go munina wia lee angaa pange biri apinayapae, lisaya. Nimumi Yesu para yangi liada ara lalore, Sisana lee angaa pange bi wia, lisimiya. 17Go ei pangoma Yesumi nimu para lalore, Sisana alenu Sisa para wala adapape pange Godena alenu Gode para wala adapape, lisaya. Go ei pangoma rungula mealo pambisimiya.

Komoma wala reke eina, Yesu para lora pisimiya ei

(Madiu 22:23-33; Luka 20:27-40)

18Gupuma Sadiusi alinumi ora komeme wenaalinu wala na-rekeleme loaisimiya alinumi Yesu para ipisimiya. 19Nimumi nipu para lora pula ara lalore, Waloale Alio, Mosesimi naa para gurupa wape pea, lisimiya. Ali mendame nipuna ame mupa alina wena pa ainya, nongo naki na-maindi komeleandare mo werepe nane ameme monde waisa wena lamumare nipuna mupa ame kome alina naki maidainya lena lea ei wape pea, lisimiya. 20Amealu warapu arimiya, lisimiya. Mupa alimi wena lamuma naki nongo na-mandi, ali komaya, lisimiya. 21Go eina nipuna kou para ameme monde waisa wena lamumare naki nongo na-mandi, ali komaya, lisimiya. Go alina kou para ameme mendaa au paya, lisimiya. 22Monde amealu raayome mo wena pa ainya nongo naki na-mandi alinu komea komeapu komameya, lisimiya. Gupuma komo pereyaisimiya dinare monde wena pange werepena komaya, lisimiya. 23Mo warapu amealumi mo wena komea lamuameyandare wenaalinu wala rekeleme naarenare apina wena aliapae, lisimiya.

24Yesumi nimu para lalore, Nimina kone su koyademe eiri na-andalemepae, lisaya. Godena angele wia bukana wape pupa wi einu yarepelisimiyapare nipuna ree kone waru na-suaeme, lisaya. Godeme puri waru pale einu pange nimi na-andeme, lisaya.

25Ambala komeme wenaalinumi wala rekeleme dinare alimi wena na-lamu, wename ali na-pu. So Godena Aya Lena eindiolo alinu aeme rupa ao-alimiae, lisaya.

26Monde komeme wenaalinu wala rekola peme eiri, Mosesimi wape pea Godena angele wia bukana na-yarepeamepae, lisaya. Monde repanana ralae para Godeme angele gurupa lea, lisaya.

Niri Eparame nipuna Gode ayo,

Aisake nipuna Gode ayo pange

Dieikopo nipuna Gode ayo, lea, lisaya.

27Go Godena angele wia bukamere gurupa leanda nimu repo komisimiyaparere nimuna remonu pa aeme. Godere komeme wenaalina Gode na-ayapare gurupa pa aeme wenaalina Gode aya lea. Go peandare nimina kone su koyaoma angele lo koyademe, lisaya.

Godena ora kalu Rudule Angele lisaya ei

(Madiu 22:34-40; Luka 10:25-28)

28Go dina mo Mosesimi Rudule Angele waloaisaya ali komea ipuma Sadiusi repaa alinu Yesu rapu angele yokanali lisimiya ei pangaba aisaya. Yesumi mo alinuna lora pisimiya angelenu epe rupa yangi lisaya ei pangoma mo Sadiusi repaa alimi Yesu para epa lora pula ara lalore, Godena ririna Rudule Angelere aiyapae, lisaya. 29Yesumi nipuna angele yangi liada ara lalore, Ririna eiri go ei, lisaya.

Isaraeli wenaalinuo, pangalepae.

Naana Reali Godere kome komea aya, lea, lisaya.

30Reali nimina Gode para nimina pu raayome

nimina remo raayome nimina kone raayome

nimina kongapu raayome pange raname komoma

kone waru sualepape wape pea, lisaya.

31Go eina kou para wia eiri go ei, lisaya.

Nimina gole nimi raname komale rupa

nimina yangonu pange go au palepape, lea, lisaya.

Go angele laapore ririna angele laapoyapare pa einuri werepe nane epeme, lisaya.

32Mo Mosesimi Rudule Angele waloaisaya alimi Yesu para lalore, Waloale Alio, ora lale, lisaya. Reali komea ora Gode aya eiri ora laende, lisaya. Menda diae. Nipu komea, lisaya. 33Gupuma ali mendame Gode para nipuna pumi, nipuna koneme, nipuna kongapumi pange raname komoma kone waru winya. Nipumi kopa kopa li-ao-aya wena o ali para nipuna gole kone suaya rupa nimu para pange gurupa raname komoma kone waru winya. Go ei laapo komea ririna painyapare Gode para sipisipi menanu alinau pada einu pange Gode para alenda alenda menda ale eiri werepe nane painya, lisaya.

34Yesumi mo alimi kone waru rekele pu suma epe rupa lee angele pangomare nipu para lalore, Neere Godena Ki Rambuao-aya Ei repara reka ale, lisaya.

Yesumi go angele lisaya ei pangoma monde alinumi Yesu para angele menda na-lora pi paalame komoma giala paisimiya.

Keriso apiyapae, loma Yesumi lora pisaya ei

(Madiu 22:41-46; Luka 20:41-44)

35Go dina Yesumi mo Gode repara alinau puaisimiya andaa anda rupara ara angele walala ara lalore, Mo Mosesimi Rudule Angele waloaisimiya alinumi lalore, Kerisore Deipidina anda repaa Nakie piri akipu lemepae, lisaya. 36Epe Yaakopi Sipiridimi Deipidi nipu para walala-ainya Deipidi nipumi lalore,

Reali Godeme nina Reali parare gupi lea,

Neere nina popeke ki nane pira lea.

Go au pumare werepenare nena yanda runguli

alinuri nena rolo para ma-piralua lea.

37Deipidi nipuna gole Keriso para Reali, leale, Keriso wala Deipidi nipuna Naki dame eiri akipuma damepae, lisaya.

Mo Mosesimi Rudule Angele waloaisimiya alinuna au waru andere-alepape lisaya ei

(Madiu 23:1-36; Luka 20:45-47)

Gupuma mo wenaali waru andapumi Yesuna angele rendeme komoma pangisimiya. 38Yesumi angele walala ara lalore, Mo Mosesimi Rudule Angele waloaisimiya alinuna au waru andere-alepape, lisaya. Andalu akanu pambomare pamuaeme, lisaya. Gupuma mo makedi nani ara wenaalinumi nimu para raname komoma ki wange pinyaya pamuaeme, lisaya. 39Nimumi mo Isaraelimi mandu rangala pae wenaalinuna Godena angele kuruaeme andanu rupara epe sea nani andena rupa ririna piduameya kone wimi, lisaya. Enda pambaleme paranu pange amo alinumi pimi rupa na bi winyaloma wenaalinumi andena rupa sopopare seana pongola siao piduame kone waru suaeme, lisaya. 40Go au puaeme pange waisa wenanuna alenda alenda pakama muaeme, lisaya. Nimumi andainya au pula ara yainya pu andalu pao-aeme, lisaya. Go au puaemenda mo alinumi nimuna koae ei yangore waru andaai menda werepe nane milimiae, lisaya.

Waisa wena mendame Gode para muni alisaya ei

(Luka 21:1-4)

41Yesumiri mo Gode repara alinau puaisimiya andaa anda rupara muni pamboaisimiya bokisi repara rilao pirinya, mo wenaalinumi go para epa, muni lopaisimiya ei andisaya. Amo ali waru andapumi muni andapu ma-ipuma epa lopala pisimiya. 42Gupuma alenda menda diale narali waisa wenasimi ipumare weepi muni laapo peni komea manda ma-ipuma epa lopaisaya. 43Yesumi nipuna kou nane raluaisimiya alinu nipu para epenaya wi la mipi puma nimu para lalore, Nimi para ora angele lalo, lisaya. Mo wenaali raayome epa lopademe muniri andapu lopademepare go muniri mo alenda menda diale waisa wename epa lopada munimi raayo angulaya, lisaya. 44Mo wenaali raayome nimuna muni andapu purupima purupili wi einu mea loparimi, lisaya. Go pamepare monde waisa wename nipuri narali wena arale, nipuna siambaya ei raayo ma-loparipa, lisaya. Nipuna enda kambape eiri ma-loparipa, lisaya.

Currently Selected:

Maka 12: POLENT23

Highlight

Copy