Maka 13
13
Gode para alinau puaeme andaa anda ma-koyalimi, lo Yesumi lisaya ei
(Madiu 24:1-2; Luka 21:5-6)
1Yesumi mo Gode repara alinau puaisimiya andaa anda minyapalaoma kama nane opalumbala ara nipuna kou nane raluaisaya ali komeame nipu para lalore, Waloale Alio, mo kananuri andaainuyale andae, lisaya. Go epe kananumi peme andanuri ora epe andanuae, lisaya. 2Yesumi nipuna angele yangi liada ara lalore, Go andaa andanuri andalepae, lisaya. Alinu menda parame go kaname pi Gode repara alinau puaisimiya andaa anda lakipima ma-lopalimindare kana ora laapo pange menda na-wilia, lisaya.
Yesumi lalore kenda pi au ora epelea, lisaya ei
(Madiu 24:3-14; Luka 21:7-19)
3Yesu nipuri so Olipi su rundu raidana pa piri, Pida Dieimusi Dioni pange Anduru, nimuna kunumasi ara Yesu para epa lora pisimiya. Mo Gode repara alinau puaisimiya andaa anda andamone aisimiya. 4Nimumi lora pula ara lalore, La giae, lisimiya. Ande laende eiri andepele epeleapae, loma lora pisimiya. Mo epola pea dinare ake au pilia ei andelemapae, loma lora pisimiya.
5Yesumi nimu para angele menda lalore, Waru andere-alepape, lisaya. Ali mendame nimi karu pu koyapana, waru andere-alepape, lisaya. 6Alinu waru andapumi na bi lala ara lalore, Niri Kerisoae deme, lisaya. Gupuma wenaali andapu karu pu koyalimiae, lisaya. 7Nimimi repara pange papare pange yanda pimi angele pangelemendare paalame na-komalepape, lisaya. Gupilimipare pereda pea naarere ambe diadea, lisaya. 8Go eina waru palea anda rurumi rekoma waru palea anda ruru menda para yanda pilimiae, lisaya. Anda menda nane aeme gapamani komeame rekoma anda menda nane aeme gapamani rapu yanda pilimi, lisaya. Anda rera rera paranu sumi sumi pulapedea, lisaya. Anda menda nane pange anda menda nane ala peme wenaalinu para rea gipa epelea, lisaya. Go au pula pea einuri wenanumi naki maiduame ririna kini pu naki kuou nala ei mandana pilia, lisaya. 9Kalesoro alinu menda parame nimi ma-karu peleme pange mo Godena angele kuruaeme andanu rupara nimi waru raki dimiae, lisaya. Gupuma na bina, gapamani andaa alinuna pange kini alinuna lee angaa nane ara na angele la deme, lisaya. Go eina niminale waru andere-alepape, lisaya. 10Ririna wenaali menda parame Godena angele wenaali raayome pangenaya la deme, lisaya. 11Gupuma nimi para koda pulame nimi ma-karu pelemendare nimina da peme angele ambala kone na-wi, pu rendaame na-komalepape, lisaya. Lape angele kone na-wi pelemepare nimina kone para epelea angele dapape, lisaya. Nimina kone suma na-da pemepare nimina kone para Epe Yaakopi Sipiridimi angele gilia, lisaya. 12Amenu menda parame nimuna ora mendaa para amenu rombo luma ora komena deme, lisaya. Apanumi pange gurupa nimuna nongo nakinu para mendaa au pilimi, lisaya. Nongo nakinumi pange rekoma nimuna apa amanu gioma yanda rungulala ara ora komena deme, lisaya. 13Nimimi ni para kone rulaoma raminyekepao alimindare wenaalinu menda parame nimi para rono waru pangoma yanda dimi, lisaya. Gupilimipare pereda pea naarena ambe na-epea-ainya ali menda apimi ni gimi na-kome, na bina puri paloma pa ao-aliandare gore Godeme nipu rambamilia, lisaya.
Yesumi ora koae au epola pea eina angele lisaya ei
(Madiu 24:15-28; Luka 21:20-24)
14Werepe nane nimimi ora koae ei andeleme lisaya. Ambala ririna Godena poropedi ali Daniolome la wisaya rupa Go koae ale nipu na-ape nono pia lena epa alia, lisaya. (Ali menda apimi go angele yarepedeandare kone waru winya.) Gupuma mo Diudia andasu para aeme wenaalinuri mo kana paranu pindipia penae, lisaya.
15Go dina ali menda nipuna anda kuluna aliandare koae einumi nipu epa lu rambuapana, kolopenyaoma nipuna nu pindi mulame nipuna anda para na-konda pambenae, lisaya. 16Ali mendame nipuna e para aliandare koae einumi nipu epa lu rambuapana, nipuna maa aka mulame nipuna anda nane wala na-alo pena, lisaya. 17Go naare naniri, naki panda pidimi wenanu pange naki andu pena nala alimi wenanumi pu rendaame waru komeleme, lisaya. Go eina, yarame waru komaloae, lisaya. 18Go lalo einu kupa gipana epapana pange kale pera naini epapana, yainya pipape, lisaya. 19Go naare nani milimi rendaare ora kenda waru pi ei milimiae, lisaya. Ambalande ririna Godeme su yaa laapo warisayande dina pange ipuma ambia go naare rupara gupi kenda waru pi rendaa menda na-andemae, lisaya. Werepe nane pange gurupa kenda waru pi rendaa menda na-epelea, lisaya. 20Go rendaame kome naare, Godeme ma-andalu pala pisare wenaalinu raayo rore pula pisimipare nipu repara kone rulao-aeme wenaalinu para kone suma mo rendaame kome naare ma-peao paisaya. 21Go di naniri ali mendame nimi para gurupa deandare Andalepae, Keriso gone ayae, o Andalepae, Keriso mone ayae, deandare na-pangalepape, lisaya. 22Alinu menda parame lalore, Ni Keriso ayo, loma payapo angelenu epa deme pange alinu menda parame lalore, Ni Godena poropedi ali ayo, loma payapo angele laoma aloaeme makirao-aya alinu ipuma rungula mealo pambola peme leenu pange puri pale leenu walomare monde Godena yarepe mea wenaalinuri karu pu koyaluameya rapeleme, lisaya. 23Epola pea einu raayore ririna nimi para ambala la giawandele, nimimiri waru andere-alepape, lisaya.
Alina Si Naki epola pea eina angele lea ei
(Madiu 24:29-31; Luka 21:25-28)
24Monde kendame waru komala ei andaai peredeandare go naare naniri so naare pange rimbalo pambomare so sumba pange nipuna paa na-pilia, lisaya. 25Gupuma so yaana aeme kumba danganu lopa galimi, lisaya. So yaa nane puri waru pale alenu pange lewa lewa pupira wilimi, lisaya. 26Gupiliaparere Alina Si Nakiri koaa rupara wele kongapu rapu pange lee yaru yaru pi paa rupara ipula-ainya andeleme, lisaya. 27Go dina Alina Si Naki nipuna eindiolo alinu naare opala nane pange naare pambala nane pange perali laapo nane, rapa rapa pilia, lisaya. Gupuma eindiolo alinumi su yaa kuni kuni para ao-aeme Godena yarepe mea wenaalinu komea lena mombealimi, lisaya.
Anga repaname wada aunu
(Madiu 24:32-35; Luka 21:29-33)
28Anga repana mendame puaya eiri kone sialepape, lisaya. Nipuna pala maa paranu ipa pange rumbima pena kera rakupi lapedeandare nimimi kone wimiae, lisaya. Ropa pi epolame pia kone suaeme, lisaya. 29Gupuma pange ande lawande alenu ipula-ainya andelemendare Alina Si Naki repara epolameya, pora gape para le epa aya kone wilimiae, lisaya. 30Nimi para ora angele laloae, lisaya. Go dina alimi wenaali raayo na-kome-ainya, ande lawande alenu raayo ambala epelea, lisaya. 31Su yaa laapore pereda peapare na angele komeare ora na-perele pa sualiae, lisaya.
Yesumi lalore Wenaali mendame nina epola pea di kone na-wia lisaya ei
(Madiu 24:36-44)
32Yesumi lalore, Go epola pea yapi pange naarele, mendame kone na-wia, lisaya. So yaa nane aeme eindiolo alinu pange Godena Nakimi pange kone na-wiapare Apa Godeme komea kone wia, lisaya.
33U na-pali, waru andere-alepape, lisaya. Akepeandare mo epola pea diri nimi marea, lisaya. 34Yesumi manda meada ara lalore, Gurupae, lisaya. Ali menda kimisu polameya nipuna pupudengi noae alinu para nipu penaloma pula peme pupudengi ne ei alama alama pea lisaya. Gupuma nipuna anda pora gape para ara andere-ape pupudengi noae ali menda mu ma-aoma lalore, Ni epola pe naare mareale, waru andere-ape lea ei mandana, lisaya. 35Go einare nimi waru andere-alepape, lisaya. Monde anda reali epola pea dinare nimi marea, lisaya. Rimba rimbalala-ainyapae, o rimbala rumu rumunapae, o kokoloko e lala-ainyapae, o yapi kepeala-ainyapae o pa marea, lisaya. 36Nimi u paliae sialiminya loma ma-roleao epapana, lisaya. 37Gupuma neme go lalo eiri wenaalinu raayo nimi pange para lalole, Waru andere-alepape, lisaya.
Currently Selected:
Maka 13: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
