Maka 8
8
Yesumi daoseni malapu alinu enda alisaya ei
(Madiu 15:32-39)
1-2Go dinare wenaali menda para waru epa mombemare nape endanu dialisaya. Yesu nipuna kou nane raluaisimiya alinu nipu para epenaya wi la mipi puma nimu para lalore, Go wenaali para na pumi ree dae, lisaya. Naare repo ni rapu arimipare ambiare nape enda menda diae, lisaya. 3Nemere nimuna anda reame komapale rapa rapa pulandare pora runa lemalalumi komeleme, lisaya. Mendane wenaaliri papare aoma ipuma pemeae, lisaya. 4Nipuna kou nane raluaisimiya alinumi Yesu para lalore, Go wenaali na-ae, enda ipa kapulea lena arare go alinu para endare a para ma-ademapae, lisimiya. 5Gupuma nipumi nimu para gurupa lora pula ara lalore, Palawa kiri akipurapo siaemepae, lisaya. Mo alinumi lalore, Warapu siambaemae, lisimiya.
6Yesumi mo wenaali raayo para suna pida pae, lisaya. Nipumi mo palawa kiri warapu mumare Gode para ranae angele ambala lisaya. Gupisayanda mindi mindi puma nipuna kou nane raluaisimiya alinumi wenaali para ale ale pinyaya alisaya. Nimumi mo wenaali para ma-ale ale pisimiya. 7Repali ongepusi pange siambaisimiya. Go eina pange Gode para ranae angele lomare nipuna kou nane raluaisimiya alinu para lalore, Go repalinu pange ma-ale ale pipa, lisaya.
8Wenaali raayome go enda nisimiyandare nimu raayo romba risaya. Gupuma mindi mindi pi ei purupili wi eiri mumare mandali nu andaai warapu ma-rumbiaisimiya. Mo wenaaliri daoseni malapu rupa mombelisimiya. 9-10Gupuma Yesumi mo wenaali rapa rapa pumare go gole nipuna kou nane raluaisimiya alinu rapu mo kawaso para pua pirisimiya. Nimuri mo Dalamanuda andasu nane paisimiya.
Parisi alinumi na-andoaema ei andamonolae lisimiya ei
(Madiu 16:1-4)
11Mo Parisi alinumi Yesu para angele yokanali pulame ipuma nipuna ange yolala ara lalore, Gode nee repara raname komena naame na-andoaema ei menda andamono walae, lisimiya. 12Gupuma Yesu nipuna pumi kendame waru komala ara lalore, Ambia go aeme wenaalinumi na-andoaeme ei menda akepeanda aisa pimipae, lisaya. Nimi para ora angele laloae, lisaya. Ambia go aeme wenaalimi na-andoaeme ei menda na-andeleme, lisaya. 13Go dinare mo alinu minyapalaomare kawasona pua piruma mone ree nane polame paisaya.
Parisi alinu pange Erodina alinuna pereke einu Yesumi walisaya ei
(Madiu 16:5-12)
14Yesuna kuou nane raluaisimiya alinumi palawa kirinu kone rungulaoma na-ma-ipisimiya. Gupuma mo kawasona palawa kiri komea siamba pirisimiya.
15Go eina Yesumi mana lala ara nimu para lalore, Waru alepape, lisaya. Mo Parisi alinuna palawa ma-andayadale pange mo Erodina palawa ma-andayadale pange waru andalepape, lisaya. 16Gupuma nimuna nimunale kone suma angele angele lisimiya. Gurupa naare palawa kiri kone rungulaoma na-ma-epa mandea eina dapae, lisimiya. 17Yesumi nimuna kone wisimiya einu andomare nimu para lalore, Enda diadeanda alendana angele angele damepae, lisaya. Neme lalo ei kone ambe na-sialemepae, lisaya. Nimi kone maralapae, lisaya. Nimina kone ongeyala ara neme pi einu maralapae, lisaya. 18Nimina lee ayapare na-andalemepae, lisaya. Nimina kale lombeapare na-pangalemepae, lisaya. Kone na-sialemepae, lisaya.
19Monde palawa kiri supu mo daoseni supu alinuna mindi mindi paripu dinare purupiliri nu akipu rumbiaoma meamepae, lisaya. Nimumi nipu para lalore, Ki laapona, ange laapoyande, lisimiya. 20Monde palawa kiri warapu mo daoseni malapu wenaalina mindi mindi paripu dinare purupilinuri mandali nu andaai akipu rumbiao meamepae, lisaya. Nimumi nipu para lalore, Warapuyande, lisimiya. 21Go lisimiyanda Yesu nipumi nimu para lalore, Ora kone waru na-widamepae, lisaya.
Bedesaida ree anda para Yesumi lee rumbu pi ali ma-epeaisaya ei
22Nimuri Bedesaida ree anda opapala paisimiya. Go para wenaali menda parame lee rumbu pi ali menda Yesu para karu ipumare mo ali warainyayanda Yesu para epa konge lisimiya. 23Go eina Yesumi mo lee rumbu pi alina ki minyu mumare mo onge ree anda minyapalaoma mo para le ma-karu paisaya. Gupuma nipuna lee para supi romare nipuna ki laapome mo alina dona waraoma lora pula ara lalore, Alenda alenda menda andelepae, lisaya. 24Mo lee rumbu pi alimi andasiada ara lalore, Alinuri andalopare repananu mandana pamulopaleme, lisaya. 25Gore Yesumi nipuna ki laapome mo alina lee laapo wala waraisaya. Goleme mo alimi waru andisayandare nipuna lee laapo ralipuna wala epelisaya. Nipumi alenda alenda raayo epe rupa andisaya. 26Gupuma Yesumi mo ali anda rapada ara lalore, Mo onge ree anda nane ambe na-pe ora nena anda lombae pupa puae, lisaya.
Pidame Yesuri ora Keriso ali lisaya ei
(Madiu 16:13-20; Luka 9:18-21)
27Gupuma Yesumi nipuna kou nane raluaisimiya alinu rapu mo Sisaria Pilipai andasu para ae enge enge andasi paranu paisaya. Gupuma porana pula ara Yesumi nimu para gurupa lora pisaya. Wenaalimiri ni para angele lala ara niri apiyapae loaemepae, lisaya. 28Nimumi nipuna angele yangi liada ara lalore, Mendane wenaalimi lalore, Neere mo Dioni Baparaisi pao-aripande ali ae, loaeme, lisimiya. Mendane wenaalimi lalore, Neere mo nena koneme Godena poropedi ali Ilaidiae, loaeme. Mendane wenaalimi lalore, Godena poropedi ali mendae loaeme, lisimiya. 29Gupuma Yesu nipumi nimu para pange lora pula ara lalore, Wenaali mendame go loaemepare nimimiri ni para angele lala ara niri api damepae, lisaya. Go lisayanda Pidame nipuna angele yangi liada ara lalore, Neere Kerisoae, lisaya. 30Gupuma Yesu nipumi nimu para rudu lala ara lalore, Ni para go da angele menda para na-dapape, lisaya.
Yesumi nipu rendaa noma komola pa eina angele lisaya ei
(Madiu 16:21-28; Luka 9:22-27)
31Go loma pena angele menda Yesumi nipuna kou nane raluaisimiya alinu para walala ara lalore, Alina Si Naki rendaa andaai waru milia, lisaya. Mo kalesoro alinumi, mo yainya pao-aeme kalu alinumi, mo Mosesimi Rudule Angele waloaisimiya alinumi pange nipu gioma dimindare komelea, lisaya. Gupilimindare koro repo sumare wala rekelea, lisaya. 32-33Yesumi go angelenuri siapi na-le, ora angele walisaya. Pidame go angele pangoma Yesu ongesi mo parele karu ma-pumare nipu para angele yokanali pula ara lalore, gupi lisaya. Gupa angele na-lape lisayapare Yesumi perekeyoma nipuna kou nane raluaisimiya alinu andomare Pida andala ara nipuna angele liala ara lalore, gupi lisaya. Neere Sadaniyale, nee pu, lisaya. Ni repara na-ape, lisaya. Godeme wia kone rupa kone na-wili, lisaya. Pa wenaalimi wimi kone rupa wili, lisaya.
34Gupuma mo wenaali waru andapu pange nipuna kou nane raluaisimiya alinu pange nipu repara epenaya wi la mipi pisaya. Nimu para lalore, Ali menda ni repara epolame piliandare nipuna rana pi einu minyapalaoma nipuna ekeraisa wape pi repana ma-ruma ni raluma epelea lisaya. 35Akepeare ali menda nipuna endoaya ei alu papanaya sese pili ali nipuna endoaya eiri ora alu pilia lisaya. Go peapare ali mendame ni maana nipuna endoaya ei ma-alu paliandare nipumi endoaya ei ora milia, lisaya. 36Ali menda go suna wia olemolenu raayo minyabaoma nipuna endoaya ei ma-alu paliandare go nipuna olemolenumi nipuna endoaya ei manda ma-adeapae lisaya. Ora dia ae lisaya. 37Ali menda nipuna endoaya ei wala mula kone wiliandare aleme ropa puma miliapae. Ora wala meape-na-ya, lisaya. 38Go naarena ao-aeme wenaali koae wenaali aeme pange Gode gioma nimuna kone pea aunu puaeme. Ali menda apimi endoaya ei pange koae ei runa ara ni repara yalame komeleandare werepe nane Alina Si Naki epeleandare nipumi mo ali epa andala ara yalame epa komola lea. Go wala epelea dina nipuna yaakopi eindiolo alinu rapu pange nipuna apana wele kongapu pange lee yaru yaru puae paa rapu epelea, lisaya.
Currently Selected:
Maka 8: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
