Maka 7

Ambaisena aya kasuanumi walisimiya ei

(Madiu 15:1-9)

1Parisi alinumi mo Diurusaleme ree anda para aoma ipumare Mosesimi Rudule Angele Waloaisimiya alinu menda parame, Yesu repara mombelisimiya. 2Go para nimumi Yesuna kou nane raluaisimiya alinumi ki koae eimi enda nala-ainya andisimiya. Na-randepele kinu andisimiya. Ki randepedoamere mo Parisi alinu nimuna randepeaisimiya rupa, na-randepelisimiya. 3Gore akepeanda mo Parisi alinumi pange Isaraelimi mandu rangala pae alinu raayomere nimuna apa kasuanumi pi ei pula ara enda nolamere ki ambala randepeaisimiya. 4Gupuma mo makedi nane aoma ipumare ipa ambe na-ili ara enda ambe na-nala puaisimiya. Nimuna apa kasuanumi pi einu waru siamba ara puaisimiya. Kapo, sininu pange ipa kenengenu nimuna apa kasuanumi randepeae rupa, randepeaisimiya. 5Mo Parisi alinumi pange mo Mosesimi Rudule Angele waloaisimiya alinumi Yesu para angaa meala ara lalore, Nena kou nane raidame alinumiri nimuna apa kasuanumi pi ei na-pange. Akepeanda koae kimi enda noaemepae, lisimiya. 6Yesumi nimuna angele yangi liada ara lalore, Nimiri pereke pereke au pimi alinuae, lisaya. Aisayame nimi para angele walala ara gurupa wape pisaya.

Go wenaalinumi nimuna angaa kambulumi komea

nina bi loaeme.

Go peapare nimuna pu konenuri ni rapu na-ae

papare ala pea.

7Nimumi suna ae alinumi wari rudule angelenuri

neme wari einu leale waloaeme.

Go peme einare ni repara rumu yaruaome

panda punyadore ana na-pea lisaya.

8Godena rudule einuri giomare nimina apa kasuanumi pi einu siamba-ao-aeme, lisaya.

9Yesu nipumi nimu para wala lalore, Nimina apa kasuanuna au wadoame, Godena angele wanduaeme rupare ora pereke rupa wanduaeme, lisaya.

10Ambaisenande Mosesi nipumi lalore,

Nena apa ama laapo para nena pumi

epe kone suma ara nena apa amana angele

pangoma rambamuape lea, Yesumi lisaya.

Gupuma ara angi para koae angele dea aliri

ora komena liiape lea, Yesumi lisaya.

11Go lisayapare ali mendame nipuna apa ama laapo para lalore, Niipi para gula pawa alere Gode para alalo loma niipi laapo para ale menda na-ge lea. Nimimi walala ara lalore, Go eiri epelea leme, lisaya. Go eiri Kopani leme, lisaya. (Go Kopani lee eina reere gurupa. Go alendare Godena ei loma lisimiya). Nimimi lalore, Apa amanu para adoa kone wimi alenuri wala Gode para adaminya kone suma loaeme, lisaya. 12Gupuma nimimiri mo alimi nipuna apa ama na-rambaminya loaeme, lisaya.

13Gupuma nimina apa kasuanuna aunu wadame eimi, Godena ora Rudule Angelere rambuaeme, lisaya. Go ei komea diayapare go lawande rupa, au ambuna waru puaeme, lisaya.

Wenaali ma-koyada ei

(Madiu 15:10-20)

14Yesumi mo wenaalinu waru andapu nipu repara wala epenaya wi la mipi pisaya. Gupuma nimu para lalore, Nimi raayo na angele pangoma kone sialepape, lisaya. 15Wenaaliri kama nane wia alenumi wenaali runane pua koyape-na-yae, lisaya. Mo runane sialeme konenumi kama nane opalumba pupula ara wenaali ma-koyapeya, lisaya. 16[Angele pangalepae, lisaya. Kale ayale deandare gore pangape, lisaya.]

17Yesumi mo wenaali minyapalaoma mo anda rupara konda pambisayandare nipuna kou nane raluaisimiya alinumi monde siapi lea eina nipu para lora pisimiya. 18Go eina Yesumi nimu para lalore, Gore nimi pange mo angelena ree kone na-sialemepae, lisaya. Kama nane wia alenumi wenaali runane peleandare koyape-na-ya, lisaya. Go eiri kone na-sialemepae, lisaya. 19Akepeanda mo endare nipuna pu para na-pe nipuna lo para pupumare koae ale popelea, lisaya. (Go angele lisayandare mo enda raayo pa napeya loma ora lisaya.) 20Gupuma nipumi lalore, Wenaalina runane sialeme konenumi kama nane opalumba pupula ara wenaali ora ma-koyao-aya, lisaya. 21-22Mo wenaalina kone runane piruma kama nane opalumba ipula alenumi, wenaali koyadae lisaya. Go alenuri koae kone wida einu wenaalinu raayome nimuna do koyademe einu, pake nala einu, ali dia einu, ali mendame wena menda pake nolameya panda liada einu, lee polopeao andoma koae au pi einu, koae koae einu puaeme einu raayo, pereke pereke au pi einu, wenaali mendame koae au pi eina mendane wenaali yala ma-komada einu, kundipa kone wida einu, wenaali mendana angele lada einu, ako liada einu, keyada rupa kone wida einu pange, lisaya. 23Go au pimi einu raayomere wenaali runane opalumba kama nane ipula ara wenaali koyademe, lisaya.

Wena mendana kone rulaisaya ei

(Madiu 15:21-28)

24Gupuma go anda minyapalaoma Daya pange Saidoni ree andasu laapo nane paisaya. Wenaalinu gimi komoma engeisi koro piduameya kone winya, Yesumi anda menda para pua konda pambisayapare wenaalinumi ambala andisimiya. 25Goleme wena mendame Yesumi pi einu pangoma Yesu repara ipumare nipuna ange para epa panda punyaisaya. Go wenana nongosiri lo romba para koae remo pirisayanda pisaya. 26Mo wenare Siria andasu nane Penisia andasu rupara aoma epea Isaraelimi na-mandu rangala pae wena aisaya. Nipuna nongosina lo romba rupara piri koae remo, Yesumi mo koae remo ma-lombo rapainyayanda, konge lisaya.

27Yesumi mo wena nipuna angele yangi liada ara lalore, Nongo nakisinumi enda ambala nenae, lisaya. Go nongo nakisinuna enda yanasinu para ma-lopalimandare ana na-pilia, lisaya.

28Go lisayapare mo wename lalore, Realio, ora lalepare mo naki nongosinumi deipolo rolea para piriri lopa lopa pimi einu mo yanasinumi noaeme, lisaya.

29Yesumi mo wena para lalore, Go angele laende eiri epe angele laendele, nena anda lekeya puae, lisaya. Mo koae remore nena nongo giala pua, lisaya. 30Monde wena nipuna anda lekeya puma nipuna nongo anda panda para palie winya andisayapare monde koae remo ambala opalumba paisaya.

Yesumi kale poma angele na-le ali ma-epeaisaya ei

31Gupuma mo Daya nane perekeyomare mo Saidoni nane pange mo Ree Anda Ki Laapo nane pange lombae pupa puma mo Galili ipa lee para opapala paisaya. 32Go dinare wenaalimi kale poma angele lo koya koya puae ali komea Yesu para karu ipisimiya. Yesumi nipuna kimi mo alina do warainyaya, konge lisimiya. 33Yesumi nipu ongesinda mo para le wenaalinu na-ae para karu ma-pumare nipuna ki mala laapo mo alina kale para yondopeaisaya. Gupuma supi roma nipuna ki mala yola mumare mo alina eekena rako supi ma-kiraisaya. 34Gupuma so yaa nane andasiada ara pomome komomare Yesumi nipu para mendane angeleme loma lalore, Esepasa, lisaya. (Esepasa lea eiri Pole angelemere Lomba loma lea.) 35Go gole nipuna kale laapo lomboma nipuna eeke go dina rindapeaoma angele epe rupa lisaya. 36Yesumi mo wenaalinu para angele rendaa pimi lalore, Menda para na-dapape lisayapare mo wenaalinumiri Yesu nipuna angele na-pange menda para la eiri pamisimiya. Nipumi wala sese pula-ainyalomare ora la la eiri pamisimiya. 37Yesuna pisaya einu pangoma wenaalinumi lee waru opoma pangoma ara lalore, Au raayo nipumi epe rupa piae, lisimiya. Kale poae wenaalinu nipumi angele pangena dae, angele na-le alinu pange angele lena dae, lisimiya.

Currently Selected:

Maka 7: POLENT23

Highlight

Copy