Maka 6
6
Nasarere wenaalinumi Yesu giaisimiya ei
(Madiu 13:53-58; Luka 4:16-30)
1Yesuri go para giaoma ora nipuna andasu nane ipisaya. Nipuna kou nane raluaisimiya alinu pange mendaa paisimiya. 2Mo Isaraelimi mandu rangala pae wenaalinuna koro piri naarena mo Isaraelimi mandu rangala pae alinuna Godena angele kuruaeme anda rupara angele walisaya. Gupuma wenaali raayome pangoma rungula mealo pambala ara lalore, Go wada ei raayore nipumi a para pangoma peapae, lisimiya. Go ali nipumi epe konenuri akipuma muma peapae, lisimiya. Naame na-andoaema einu nipumi akipuma piapae, lisimiya. 3Go aliri anda eloae diaeyapae, lisimiya. Mearina naki diaeyapae, lisimiya. Dieimusi pange Diosese pange Diudasi pange Saimono, go alinu nimuna ame diaeyapae, lisimiya. Go angele loma lalore, Nipuna balinuri naasi go para aemepae. Ee. Naa rapu aeme, lisimiya. Gupuma nimumi nipu giaisimiya. 4Go eina Yesumi nimu para lalore, Godena angele lao-aeme alinuri pa mendana andare waru andasiaore waru ando-aemepare nipuna ree anda para pange nipuna repaame pange wenaali raayome kou wale au kama puaeme, lisaya. 5Yesumi go para puri pale einu komea, pape-na-lisayapare pa yainya ae wenaalinu menda para nimuna dona nipuna ki suma nimuna yainya randalaisaya. 6Nimumi nipuna angele na-pangisimiya ei andala ara Akipuma pemepae, lisaya. Gupuma mo enge enge andasinu para pamuala ara angele wala eiri pamisaya.
Yesumi nipuna wele kongapu aloma nipuna kou nane raluaisimiya alinu rapaisaya ei
(Madiu 10:5-15; Luka 9:1-6)
7Yesumi nipuna ki laapo pereyoma angena laapopu kou nane raluaisimiya alinu nipu repara epenaya wi la mipi pisaya. Go dina laapo laapopu rapa rapa pisaya. Gupuma nipuna puri pale einumi mo koae remonu ralu liinyayanda mo alinu para nipuna wele kongapu alama alama puma rapaisaya. 8Yesumi mana lala ara lalore, Alenda menda na-mea ripinya pulupape, lisaya. Rimapu komea mea ripinya pulupape, lisaya. Enda pange muni pange nunu menda pange na-ma-maida pulupape, lisaya. 9Angele menda loma lalore, Ange anda pambaomare aka laapo na-arilio pambaoma pulupape, lisaya. 10Yesumi nimu para lalore, Ali apimi nimi para lalo, Na anda para epa konda pambaoma paidapa deandare ora go anda para komea paliala pipape, lisaya. Ree anda menda nane pelemendare gore go anda giala pulupape, lisaya. 11Ree anda menda nane pelemendare gore anda ree wenaalimi nimi na-lamu miliminda pange nimina angele na-pange gialimindare nimimi gioma pelemendare nimina angena ralea do kenge randalo rumbumare pulupape, lisaya. #6:11 Mo Yesuna kou nane raluae alinumi go au pisimiya eiri gore go anda para aeme repaame koae au go piminda loa walalo pisimiya. Go kingi pi au pilimindare gore werepe nane naa para ale menda pilia kone wilimi, lisaya. 12Gupuma mo alinumi pumare wenaalinu para angele walala ara lalore, Nimina pa aunu giaoma kone menda perekeyo sialepape, lisimiya.
13Nimumi wenaalinuna lo para piri koae remonu opalumba pupu lisimiyandare opalumba popisimiya. Nimumi yainya komeme wenaali pange wambalame ande ale koyaomare nimuna yainya randalaisimiya.
Dioni Baparaisi komisaya ei
(Madiu 14:1-12; Luka 9:7-9)
14Mo kini ali Erodimi mo pisimiya einu pangisaya. Wenaalimi Yesuna bi kende waru ma-laisimiyanda pangisaya. Mendane wenaalinumi lalore, Mo baparaisi pao-aripande ali Dioniri komoma wala rekoma panae, lisimiya. Go pea eimi go kongapu pi einu pula ara piae, lisimiya. 15Go lisimiyapare mendane wenaalinumi lalore, Nipuri Ilaidiayanae, lisimiya. Gupuma mendane wenaalimi lalore, Nipuri Godena poropedi ali mendayanae, lisimiya. Nipuri Godena poropedi ambaisena ali mandanae, lisimiya. 16Go lisimiya ei Erodimi pangoma lalore, Nipuri Dioni ae, lisaya. Monde neme kalu rungulawande ali wala endoma panae, lisaya.
17Ambala ririnare Erodimi Dioni yola ma-epenaya alinu rapaoma Dioni dipula ma-lopaisaya. Go au pisaya eiri, nipuna wena Erodiasi nipuna pisaya ei. Mo wena Erodiasiri, wala kini Erodimi nipuna ame Pilipi nipuna wena ralu pa lamisaya. 18Dionimi kini Erodi para ambala ririna angele gurupa loaisaya. Nena amena wena ralu lopao lamuale eiri ana na-pea, loaisaya. Go eiri Godena angele rungulale, loaisaya. 19Go loaisayandare Erodiasi nipumi Dioni para rono pangala ara duame rapisayapare, kini Erodimi sese puaisayanda liiape rupa ma-marisaya. 20Kini Erodimi Dionina epe au puaisaya ei pange nipuri yaakopi ali aisaya ei andomare Erodimi Dioni andere-ao-aisaya. Dioni para paalame komala ara nipu yoloma aisaya. Dionimi puri pale angelenu walala pisayanda Erodimi pangomare paalame waru komala pula ara waru pangala pisaya.
21Gupisayapare Erodimi nipuna maindi naare ipisayandare enda pambolame nipuna gapamani alinu andaa alinu pange nipuna yanda mundu alinu pange mo Galili nane ae bi wia alinu pange wi la mipi pisayandare ande wena Erodiasimi kone sialore, Na naarele ipulae, kone wisaya. 22Erodiasi nipuna wane ipula ara rimbu ria eiri ipisayanda kini Erodi pange mo wi la mipi pisayanda ipisimiya alinu pange raname ma-komaisaya. Gupisayanda mo kini alimi mo nongo para lalore, Nena kone peale ni para konge dendare ora gulae, lisaya. 23Gupuma mo nongo para wili mandaa siala ara lalore, Nena kone peale ni repara konge dendare ora gulae, lisaya. Nina andere-ayo su pange rikirana rombo suma, mendane neme andere-ainya mandana gurupa gulae, lisaya.
24Gupuma mo nongome pumare nipuna ama para pua angele angaa muma lalore, Ale kongeyanopae, lisaya. Gore mo wename lalore, Mo baparaisi pao-aya ali Dioni nipuna kalu ginyae, lisaya. 25Gore mo nongome go gole mo kini ali para ora wangepu epa kongeyala ara lalore, Nina kone pealere gole, lisaya. Mo baparaisi pao-aya ali Dioni nipuna kalu runguluma kopona suma ambia gosi giainya, lisaya. 26Go angele pangisayanda kini alimi nipuna pumi rendaame waru komisayapare mo wili mandaa siala ara la wia angele lisaya ei mo wi la mipi pisayande alinumi pangabao-ainya lisaya eimiyalo, nipuna angele wala rungulape yalame komala ara Dioni Baparaisi ali rambameape ei kone na-wisaya. 27Go eina go gole mo kini alimi endali mini ali menda para angele lomare Dionina kalu rungula ma-epenaya rapaisaya. Gupuma mo alimi pumare mo dipula anda para Dioni nipuna kalu rungulisaya. 28Dionina kaluri kopona ma-suma ma-ipuma mo nongo para epa alisaya. Go ei mo nongome nipuna ama para ma-puma alisaya.
29Dioni nipuna kou nane raluaisimiya alinumi Dioni liisimiya ei pangomare Dioni ro mula pumare kana rombema ali dapa puae para pua dapa pisimiya.
Yesumi daoseni ki komea alinu para enda alisaya ei
(Madiu 14:13-21; Luka 9:10-17; Dioni 6:1-14)
30Ande Yesumi angele walenaya laapo laapolo rapa rapa pisayande angele ma-puao-aya alinu wala ipumare nimuna angele wale einu raayo pange nimuna pi einu raayo, Yesu para epa lisimiya. 31Yesumi nimu para lalore, Nimi komea, bainya ipulupae, lisaya. Wenaali angele na-pi kapa para ma-embea pida bainya, lisaya. Wenaali waru wala epala puala, wala epala puala kama pisimiya. Go eimi enda nape-nae-lisimiya. 32Gupuma mo kawaso andaaina piruma nimuna gole mo wenaali angele na-pi kapa para paisimiya.
33Gupisimiyapare wenaali waru andapumi nimu paisimiya ei andoma Yesu nipu pula kone wisimiya. Go eina mo ree andanu raayo minyapalaoma wanduala pumare Yesu ambe na-pope-ainya, nimu ambala opapala popisimiya. 34Yesumi mo kawaso andaai minyapalaoma suna opola pula ara wenaalinu waru andapu andisaya. Nimuri sipisipi menanu rupa andere-ape ali diale, sipisipi menanu mandana kone wisaya. Nipuna pumi ree lala ara nimu para yarame waru komisaya. Gore angelenu waru mo wenaalinu para walisaya. 35Naare pena pambala-ainyaloma nipuna kou nane raluaisimiya alinumi Yesu para epa lalore, Go parare enda meape para marea, lisimiya. Ambiare naare pena pambala, lisimiya. 36Nimu pena rapa rapapae, lisimiya. Mo enge enge andasinu para pange mo anda nani nimuna enda kambola pena, rapa rapapae, lisimiya. 37Go lisimiyapare Yesumi nimu para lalore, Nimimi endanu adapape, lisaya. Nimumi Yesu para angele angaa meala ara lalore, Naamere kina ali ria ki laapopu ma-puma palawa kiri kambomare nimuna nenaya epa ademapae, lisimiya. 38Yesumi nimu para lalore, Mo palawa kiri akipu wiapae, lisaya. Andola pulupa, lisaya. Nimumi andoma Yesu para lalore, Palawa kiri supu pange repali laapopu wia, lisimiya.
39Go eina Yesumi wenaali raayo para angele lala ara lalore, Mo epe kanga rekele nomana, rera reralo pidapa, lisaya. 40Gupuma mo wenaalinuri rera reralo pirisimiya. Ale mendana ali ria laapo pereyoma mendane ki laapopu wenaalinu mombea pirala, ale mendana ali ria ki komeapu wenaalinu mombea piralapu pirangaisimiya. 41Yesumi monde palawa kiri supu pange monde repali laapo siamba ara yaa nane andasiaoma ara Gode para Ranae, lisaya. Monde palawa kirinu mindi mindi puma nipuna kou nane raluaisimiya alinumi mo wenaalinu para ale ale pinyaya ale ale pisaya. Gupuma monde repali laapo pange mo wenaalinu raayosi para mindi mindi paisaya. 42Monde wenaali raayome palawa kiri pange repali nisimiyanda nimu raayosina romba aisaya. 43Gupuma mo wenaalimi nomare pa winyale palawa repali puru pilinu mumare nu ki laapo pereyoma angena laapopu rumbiaisimiya. 44Monde palawa kirinu nisimiya alinuri daoseni ki komeapu alinu rupame nisimiya.
Yesu ipa mandaa angena paisaya ei
(Madiu 14:22-33; Dioni 6:15-21)
45Go gole Yesumi nipuna kou nane raluaisimiya alinu para lalore, Mo andaa kawasona piruma mone reena mo Bedesaida anda nane nimi ambala pulupape, lisaya. Go loma monde wenaali raayosi werepe rapaisaya. 46Yesumi nimu Pulupape, loma minyapaomare mo kana rumu mendana opaisiaoma Gode para yainya pula paisaya. 47Rimbalisayandare mo kawaso andaai ipa runa pula-ainyaloma nipuna kunumasi one repaa lena aisaya. 48Mo po andaai weno nane masu ipisayanda Yesuna kou nane raluaisimiya alinuna dali awala ara lo wee waru pisimiya. Yesumi go ei andisayanda naare ambe na-ope-ainya nipuri mo alinu para ipa mandaa angena paisaya. 49Mo alinu wanduaoma popolame kone wisayapare mo alinumi Yesu ipa mandaa angena paisaya ei andomare, Koae remo, kone siala ara paalame komala ara e waru wi lisimiya. 50Raayome nipu andala ara pururumi waru komisimiyapare pa goleme Yesumi nimu para angele lala ara lalore, Gore niae, lisaya. Puri padapa, paalame na-komalepape, lisaya. 51Gupuma Yesu nipu mo kawasona mo alinu nimu rapu pua pirisayandare gore monde po andaai rungulisaya. Mo alinumi rungula mealo pambisimiya. 52Monde palawa kiri ma-rali paya eiri kone waru na-wisimiya. Kone maraoma nimuna kone na-wisimiya eimi pisimiya.
Yesumi Genesarede andasu yainya komisimiya wenaali ma-epeaisaya ei
(Madiu 14:34-36)
53Yesu pange nipuna kou nane raluaisimiya alinu ipana monde kawasona mone reena puma Genesarede#6:53 Genesaredere Galili leena bi menda. andasu nane opopala pumare mo kawaso ipa reena andibaisimiya. 54Nimu mo kawaso andaai minyapalada-ainya pa goleme mo wenaalimi nipuna lee wili andoma Yesuyanae, kone wisimiya. 55Monde wenaalinumi go anda naini alo pa mumare yainya ae wenaalinu rekena ma-mu sumare Yesu pami para raluma pamisimiya.
56Gore Yesu pamuala pisaya lena wenaali raayo para pange mo anda naini pange andaa ree anda paranu pange enge enge andanu para pange mo makedi naini mo yainya ae wenaaliri go para siala pisimiya. Gupuma Yesuna aka kuni waraluame Yesu kongeyala pisimiya. Mo waraisimiya wenaali raayore yainya ma-epeala pisaya.
Currently Selected:
Maka 6: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
