Maka 5
5
Yesumi koae remo piri ali menda ma-epeaisaya ei
(Madiu 8:28-34; Luka 8:26-39)
1Mo Galili rungulupa wi ipa ree nane puare mo Gerasene andasu wenaalinu ao-paluaisimiya su nane paisimiya. 2Mo kawaso andaai minyapaoma ipumare goleme lo para koae remo piri ali menda mandaisaya. Mo aliri ali kuli suae apenda para aoma opapala ipuma Yesu mandaisipiya. 3Monde aliri go kana apenda paranu ao-aisaya. Gupuma ali mendame seinipunumi nipu kawambu pape-nae-lisaya. 4Ambala ririna naare raayo nipuna ki ange laapo seinipunu kawambu pala pisimiya einuri rungulala pisaya. Gupisaya eimi nipuna ange kawambu puaisimiya seinipunu rungulu rumbepe pala pisaya. Gupumare ali mendame puri paloma kuma ma-pape-na-lisaya. 5Mo kana apenda paranu pange mo kana rumu paranu rimbala andasu pange naarena pange naare raayo e wi lala ara nipu nipuna gole, kaname liala ara ao-aisaya.
6Gupuma papare ara Yesu andoma alo pumare nipu repara pua panda punyaoma yainya pisaya.
7Angele andapu e lala ara lalore, Yesuo, neere Gode su yaa laapo waruma alenda alenda raayo Ki Rambuao-aya Godena Nakiae, lisaya. Ni para aki pulame ipuma pilipae, lisaya. Godena bina nee para kongeyaloae, ni rendaa rendaa na-giapeae, lisaya. 8Yesumi ambala ririna nipu para lalore, Koae remo, go ali minyapalaoma ipu lisayanda mo alimi e lala ara gupa lisaya. 9Gupuma Yesumi nipu para angele angaa meala ara lalore, Nena biri apiyapae, lisaya. Nipumi lalore, Na biri Andapuae, lisaya. Naare waru andapu aemanda laloae, lisaya. 10Yesu para konge kongeyoma mimi waru pisaya. Mo koae remonu go su minyapalaoma na-penalapeae, lisaya.
11Go dina menanu waru andapumi mo raida ree nane enda nala aisimiya. 12Monde koae remonumi Yesu para kongeyala ara lalore, Mo menanuna lo para pida pomonolae, lisimiya. 13Go eina Yesumi pida pena, lisaya. Gupuma mo koae remonumi mo ali minyapalaoma monde menanuna lo para pida paisimiya. Gupisimiya dina mo menanuri daoseni laapo rupa, mo andaa raida ree nane alo puma kolopinyaoma mo ipa para pua pongoloma ipa noma komisimiya.
14Mo menanu andere-aisimiya alinumi paala pa puma mo ree anda nane aisimiya wenaali pange mo enge enge andanu para aisimiya wenaali pange la eiri pamisimiya. Gupuma wenaalimi monde pisaya ei andolame ipisimiya. 15Yesu repara ipumare ambala ririna monde lo para koae remo piri ali go para piri, aka yamoma epe kone suma go para pirisaya ei andisimiya. Ande ambala remo ambuna pirisaya ali andoma paalame komisimiya. 16Gupuma ambala monde koae remonu piri ali para pi einu pange mo menanu para pi einu andisimiya wenaalinumi mo andola ipisimiya wenaalinu para la alisimiya. 17Gore goleme Yesu nimuna anda gioma penaya pupu lisimiya.
18Yesumi mo kawaso andaaina pua pirinyaloma ambala monde koae remonu pirinde alimi Yesu para lalore, Sana apanae, loma angele waru lisaya. 19Go lisayapare Yesumi Na-epape, loma nipu para lalore, Realimi nee para pi einu pange nee para yarame kome einu, nena yangonu para pua lape, lisaya. 20Gupuma mo alimi mo andaa ree anda ki laapopu aisimiya su nane pumare Yesumi nipu repara pi einu wada puala pisaya. Gore wenaali raayome pangomare rungula mealo pambisimiya.
Diairasina wane pange wee pupuaisaya wena, Yesumi ma-epeaisaya ei
(Madiu 9:18-26; Luka 8:40-56)
21Yesu mo kawaso andaaina piruma mone ree nane wala lekeya puma ipa repaa lena ainyaloma wenaali waru andapu nipu repara epa mombelisimiya. 22-23Go dina mo Isaraelimi mandu rangala pae wenaalinuna Godena angele kuruaeme anda andere-aisaya kalu ali komea nipuna biri Diairasi ipuma epa, Yesu andoma nipuna ange para epa panda punyao piri kongeyala ara lalore, Nina nongosi ora komolame rapala piae, lisaya. Go peale ma-endainya nee ipuma nipuna dona nena ki epa siapeae, lisaya. 24Gupuma Yesu mo ali lapo paisipiya.
Wenaali waru andapu Yesu rapu menda pula ara riri arere pua eiri paisimiya. 25Go para wena menda aisaya. Nipuri wee pa pupuae wena aisaya. Mo wenana kuni gipa ki laapo pereyaoma angena laapo rupara go wee pa pupu-ao-aisaya. 26Dokeda riri waru andapumi mo wenana mulamula alala-ainya pu rendaame waru komisaya. Mo wena nipuna muni raayome mulamula kamboaisayapare nipuna wee na-rungulisayapare ora andapu pa pupuaisaya. 27-28Wenaalimi Yesu para lisimiya angele mo wename pangomare Yesuna kou nane puma mo wenaali angalapu para pumare Yesuna kou nane pua ara nipuna koneme gole lalore, Nipuna aka waraluandare ni epealia, kone wisaya. 29Go kone suma Yesuna aka kuni waraisaya. Goleme ande wee pupuaisaya ei rungulisaya. Nipuna kone rupara kone sialore, Ande yainya pereyanda ambiare ni endawa, kone wisaya. 30Yesu nipuna kongapu opalumbisaya ei, nipuna gole andoma mo wenaalinu para perekeyaoma lalore, Na akare, apimi wararipapae, lisaya. 31Nipuna kou nane raluaisimiya alinumi nipuna angele yango liada ara lalore, Go wenaalinumi nee riri arere pimi eiri go andala arale, neeme lalore, Niri apimi wararipapae, laleae, lisimiya. 32Go lisimiyapare nipu waraisayale andolame leme leme pisaya. 33Gupisaya ei mo wename andoma nipu epeaya ei kone siala ara paala komola ara pururumi koma eiri ipuma Yesuna ange para epa panda punyaisaya. Gupuma mo wename Yesu para ora angele epa lisaya. 34Yesumi nipu para lalore, Na waneo, nena kone ni para rulale eimi nee ma-epearipa, lisaya. Wala endoma pa ao-alili raname komoma pope, lisaya.
35Yesumi go angele pa lala-ainyaloma alinu menda para monde ali Diairasi nipuna anda nane aoma ipuma epa ara lalore, Nena nongore ora komale, akepeanda mo Waloaya Ali konge dandere pilipae, lisimiya. 36Yesumi mo alinuna angele na-pange, mo Isaraelimi mandu rangala pae alinuna Godena angele kuruaeme andana kalu ali para lalore, Paalame na-kome. Ni para komea kone rulape, lisaya. 37Gupuma Yesumi pa aisimiya alinumi nipu na-ralinya lisayapare Pida pange Dieimusi Dioni ameaya, go ali repo komea Yesu nipuna kou nane ralinya, lisaya. 38Nimumi Diairasina anda para opapala paisimiyapare Yesumi wenaali waru andapumi ree lala ara wi waru lalolo pula-ainya andisaya. 39Yesumi anda rupara konda pambomare mo wenaalinu para lalore, Akepeanda koma su ree damepae, lisaya. Go nongore ora na-komeapare pa u paliala ara pea, lisaya. 40Go ei pangoma nimu raayome nipu giri laisimiya. Gupisimiyapare Yesumi mo wenaali raayosi kama ralu lisaya. Gupuma mo nongona ara angi pange mo Yesu nipusi aisimiya alinu, mo nongo koma pa wia lena karu paisaya. 41Yesumi mo nongona ki minyu muma lalore, Ralida kumao, lisaya. Ralida kumao lisaya eiri, Nongosi, nee rekae laloae, loma lisaya. 42Goleme mo nongo endoma reka pamulopisaya. Nipuna kuni gipare ki laapo pereya, angena laapopu perelisaya. Go ei andisimiya wenaalinu waru rungula mealo pamboma pomome komisimiya. 43Yesumi mo wenaalinu andala ara angele rendaa pimi lalore, Wenaali menda para na-dapape, lisaya. Go peale mo nongo enda nena, ma-adapa, lisaya.
Currently Selected:
Maka 5: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
