Maka 4

Wai alenu poae alina siapi angele lea ei

(Madiu 13:1-9; Luka 8:4-8)

1Mo rungulapa piri Galili ipa lee reena, Yesumi angele wala walisaya. Wenaalinu ora andapu mombelisimiyanda angele walape para marisayanda mo ipa para wi kawaso mendana pua pirisaya. Wenaalinu ipa repaa lena pambo pirinyaloma angele walisaya. 2Yesumi nimu para siapi angelenumi loma waru walisaya. 3Gupuma angele walala ara lalore, Pangalepae, lisaya. Ali mendame wai alenu randadoame pae, lisaya. 4Randala eiri puapare mendane wainuri porana lopala pame. Go porana lopala pame einuri yaanumi epa yarepe name, lisaya.

5Mendane wainu kana mandaa rale kengena lopame einuri wangepu rakupi lapeame. Go eiri su waru wia lena poainyao poaya einu diayala ara pame, lisaya.

6Gupuma so naare rala pida waru ma-puaoma na-ope einu yala ara pauroma kapuyainyala pame, lisaya.

7Mendane wainuri reke reke ayale pida para lopala pame. Gupuma mo reke reke aya leenu opala ara monde wainu opala pi einuri rambuala pame, lisaya. Go au pa einuri kilinu na-elame, lisaya. 8Mendane wainuri epe suna lopame, lisaya. Gurupa lopa einuri opoma nape waru elame. Mendane einumi ali ria komea mendane ki laapo rupa, mendane einumi ali ria repo rupa, mendane einumiri ali ria ki komea rupa elala pame, lisaya. 9Go loma Yesumi wala lalore, Kale ayale deandare gore pangape, lisaya.

Yesumi siapi angelenu kama lisaya einuna ree lisaya ei

(Madiu 13:10-17; Luka 8:9-10)

10Wenaalinu paisimiya dinare nipuna kunuma ainyaloma nipuna angele pangoma lekeya ipisimiya wenaali menda parame pange monde ki laapo pereyoma angena laapopu alinu rapu, monde siapi lisayande ei angaa misimiya. 11Yesumi angele yangi liada ara lalore, Godeme nipuna Ki Rambuao-aya Eina kundiri angelenuri nimi para penameyao waleapare wenaalinu menda para Godena wenaalinu na-ao-aeme wenaalinu parare siapi angeleme walalo, lisaya.

12Neme pamu pi einuri waru anda eiri

pamualemepare na go pi einuna ree na-anda

siademeae, lisaya.

Neme pamu walalo angelenuri waru panga eiri

pamualemepare go walalo angelenuna ree

na-anda siademe, lisaya.

Na pamu pi einuna ree pange pamu walalo

angelenuna ree pange anda siala pamere

Gode para mandana perekeya ipuma

Godeme nimuna koae koae aunu mandana

rambuala pae, lisaya.

Mo wai alenu randalisaya ei siapi angele Yesumi walisaya ei

(Madiu 13:18-23; Luka 8:11-15)

13Gupuma Yesumi nimu para lalore, Go siapi lalo einuri kone na-sialemepae, lisaya. Go siapi lalo ei raayo akipuma kone wilimipae, lisaya. 14Monde wai alenu randalea alimi Godena angelenu randalao-aya lisaya. 15Mo rendaa pi porana wai alenu lopea eiri, pu puri pale wenaalinumi Godena angele pangaleme einu manda meaya, lisaya. Go pu puri pale wenaalinumi Godena angele pangelemendare Sadanimi nimuna punu ma-puri palaoma Godena angelenu yoka mipi pea, lisaya. 16-17Mo kana mandaa rale kengere wenaalinu menda parame Godena angele midame wenaalina pu mandana, lisaya. Go wenaalinumiri Godena angele raname komoma midamepare pena wai alenu kana mandayala ara pida waru na-ma-puaonyaoma opala ei mandana, lisaya. Pena para Godena angele pangala arare raname komelemepare Sadanina ki para aeme wenaalinumi nimu para rendaa pi einu ademendare go gole lopeleme ei mandana, lisaya. 18-19Reke reke ayale opea suri, Godena angele waru pangoma mea maida wenaalina pu mandanayapare engeisi airi pumare wala go suna alenu para pange muni andapu para wee wala pamboaya. Go pea eimi pange ale menda menda siawe kone wida eimi pange Godena angele rongaya. Go angele rongaya eimi kili waru na-maidala ei mandana, lisaya. 20Mo epe suri, wenaalinu menda para, nimuna pu mandana, lisaya. Epe wai ale ope ei mandana, lisaya. Nimumi Godena angele waru pangoma pimi, lisaya. Mendane wenaalinumi Godena wenaalinu ali ria komea mendane ki laapo rupa meademe ei pange mendane wenaalinumi ali ria repo rupa meademe ei pange mendane wenaalinumi ali ria ki komea rupa meademe ei mandana, lisaya.

Lamepa bakedi oro para wisaya ei

(Luka 8:16-18)

21Gupuma Yesumi nimu para angele angaa meala ara lalore, Ali mendame lamepa kidiandare lamepa kiruma kopo oro nane wiliayapae, o badi rolea para wiliayapae, lisaya. Dia, lisaya. Mandaa suaya lena siapeya, lisaya. 22Ali mendame ale menda pangawiliandare ali mendame andasuma kama nane ma-epelea, lisaya. Ali mendame ale menda kea pumbaliandare ali mendame wape wilia lisaya.

23Angele pangape kale lombeleandare waru pangae, lisaya. 24Nimimi na angele pangelemendare neme go lalo einu pualepape, lisaya. Nimimi wenaali menda para angele yokanali puaeme rupa Godeme nimi para pange angele yokanali gurupa piliapare nipuna eimiri ora angulalia, lisaya. 25Mida ali para mendane einu Godeme ora adea, lisaya. Na-mida alimiri ora na-milia, lisaya. Nipuna ambala siambaya einu gole wala perameapeya lisaya.

Wai alenu ope ei siapi angele go ei

26Yesumi lalore, Godena Ki Rambuao-aya Eiri, ali menda nipuna ena wai alenu randaloaya ali mandana, lisaya. 27Rimbale para u paliala, naarena pupudengi nala puaya dinare monde wai alenu rakupi lapema opemepare nipumi go rupa opemelo na-andea, lisaya. 28Monde wai alere sumi gole ma-opaya pange kili ma-elaya, lisaya. Ririnare kera ambala rakupi eiri epa opomare yari ridia, lisaya. Gupumare pena guni nape mimi mandea, gupumare guni napere werepe na-pelea, lisaya. 29Guni napele dinare mo e realimi guni nape meala ara kepereme rungulu pambelea, lisaya. Go au pi eiri guni na-pelea dinayanda pea, lisaya.

Masidadi repana kilisina siapi angele lee ei

(Madiu 13:31-32; Luka 13:18-19)

30Yesumi wala loma lalore, Gode nipuna Ki Rambuao-aya Ei anda eiri aleme manda kone wilimapae, lisaya. Ale siapi angele demapae, lisaya. 31-32Godena Ki Rambuao-aya Eiri masidadi kilisimi andea, lisaya. Masidadi kilisi rapu anda go suna omo ale kilinu rapu manda meadore masidadi kilisiri ora engeisi poapeyapare go engeisi gole ali mendame polea ei opeleandare repana pala repaa repaapu opelea, lisaya. Go masidadi repaa rapu pa ale menda repananu rapu manda meadore masidadi repaare ora andaa repaa pea. Gupuma pala andaainu piliandare go eiri ropanumi kera rupara anda alendare pilimi, lisaya.

33Siapi gurupa einumi Yesumi Godena angele wenaalinu para walisaya. Nimumi pangoma kone sula pisimiya rupa walisaya. 34Pa wenaalinu para angele wadoamere siapi angeleme komea waloaisayapare nipuna kou nane raluaisimiya alinu rapu angurapo ara ande siapimi walawande angelena ree gupa walawande lo la alala pisaya.

Yesumi pokiki andaai ma-loraisaya ei

(Madiu 8:23-27; Luka 8:22-25)

35Go naarena gaele para Yesumi nipuna kou nane raluaisimiya alinu para lalore, Naa ipa anguloma mone ree nane balepa, lisaya. 36Gupuma mo wenaalinu minyapalaoma Yesuri mo kawaso andaaina pa pirisayande rupa pa pirinyaloma mo alinu rapu ma-paisimiya. Kawaso andaai mendaa para aperaoma paisimiya. 37Go dina rendaa pi pokiki andaai waru ipisaya. Gupuma mo ipa kangalu pape puma mo kawaso rupara epa angulupa lopala pisaya. Go eina mo andaa kawaso ipame epa rumbi siama siama pisaya eimi, kawaso none nonepu kunginyamanyama pisaya. 38Gupisayapare Yesuri mo andaa kawaso apu nane kalu kanda suma palie wisaya. Gupisayapare nimumi Yesu ma-rekoma nipu para lalore, Waloale ali, naa komelema kone na-sialepae, lisimiya. 39Go lisimiyanda Yesumi rekoma mo pokiki para pange mo ipa para angele rendaa pimi mana lala ara lalore, Wa. Mandanayale na-epape, lisaya. Go angele lisayanda go gole mo ipa rendaa na-pi pirisaya pange mo pokiki wala na-ipisaya. 40Gupuma nipumi nimu para lalore, Alena paalame komalemepae, lisaya. Pa marea nimiri ni para kone na-rulademepae, lisaya. 41Mo kou nane raluae alinumi pururumi komala ara nimuna nimuna angele lala ara lalore, Go aliri apiyapae, lisimiya. Mo pokiki pange mo ipame nipuna angele pangoma rungudae, lisimiya.

Currently Selected:

Maka 4: POLENT23

Highlight

Copy