Maka 3
3
Ki lupawi alina angele lea ei
(Madiu 12:9-14; Luka 6:6-11)
1Yesuri mo Isaraelimi mandu rangala pae alinuna Godena angele kuruaeme anda rupara pua konda pambisaya para ki lupawi ali komea go para ainya andisaya. 2Mo alinu menda parame Yesu waru andere-aisimiya. Nimuna koro piri naarena Yesumi mo alina ki epealiapae, na-epealiapae loma andae suma rudu lee ei rungudae doame andae wisimiya. 3Yesumi mo ki lupawi ali para lalore, Go para ipuae, lisaya. 4Gupuma mo wenaali raayosi para lalore, Mo koro piri naarena angele wi einu para laloae, lisaya. Wenaali epealuandare ana piliapae, o koyaluandare ana piliapae, lisaya. Wenaali ma-endaluandare ana piliapae, o komaluandare ana piliapae, lisayanda angele na-le pa pamboaisimiya. 5Mo Parisi alinumi monde ki lupawi ali para yarame na-komisimiyanda Yesumi nimu para rono pangala arale yarame pange komala ara lee polopeao andisaya. Gupuma monde ki lupawi ali para lalore, Nena ki rindapeae, lisaya. Mo alimi nipuna ki rindapeaisaya dina, nipuna ki epelisaya. 6Go para mo Parisi alinumi kama opolumbomare goleme mo Erodi alinu rapu Yesu duameyanda rombisimiya.
Galili ipa lee para mombelisimiya ei
7Yesuri nipuna kou nane raluaisimiya alinu rapu, mo Galili ipa lee nane paisimiya. Gupisimiyapare Galili wenaali waru andapumi raluma paisimiya. 8Diudia wenaali pange Diurusaleme ree anda wenaali pange Idumia andasu wenaali pange Diodani ipa mone pane aisimiya wenaali pange mo Daya Saidoni ree anda laapo nane aisimiya wenaali ora andapumi Yesumi pisaya einu raayo pangomare Yesu para ipisimiya. 9Go dina Yesumi nipuna kou nane raluaisimiya alinu para lalore, Mo wenaali waruyale ni rengepeala epapana, kawaso menda ma-ipuma ipa para andibalepae, lisaya. 10Yesumi wenaali waru epeaisayandare mo yainya yainya komisimiya wenaali raayome Yesu ambe waraluame riri arere pisimiya. 11Gupumare mo koae remonu piri wenaalinumi Yesu andala pula ara nipu repara panda punyada ara e wi gurupa lala pisimiya. Neere Gode Nipuna Nakiae, lala pisimiya. 12Yesumi mo koae remonu andala ara angele rendaa pimi mana lalore, Na bi na-dapape, lisaya.
Yesumi nipuna aposolo alinu misaya ei
(Madiu 10:1-4; Luka 6:12-16)
13Gupumare Yesumi mo kana rumu para opasia eiri pumare nipuna kone pisaya alinu wi la mipi pisayanda nipu repara ipisimiya. 14Yesumi ki laapo pereyaoma angena laapopu alinu nipu rapu ao-ainyaya misaya. Yesumi mo alinumi auri nimumi nipuna angele walala puala pinyaya, misaya. 15Mo alinumi gole koae remonu ralu liala pinyaya Yesu nipuna wele kongapu nimu para alisaya. 16Mo alinuna binuri Saimono le, nipuna bi menda Pida, lisaya. 17Dieimusi Dioni ameayare, Sebedina naki laapo ae. Yesumi nipuna bi menda gurupa alisaya. Boanasi lisaya. Mo ameaya nipuna Yesumi alisaya bi Boanasiri, ruru dia alinu manda loma alisaya. 18-19Anduru pange Pilipi pange Badolomiu pange Madiu pange Domasi pange Alipiasina naki Dieimusi pange Dadiasi pange mo Kaenani ali mendare Saimono pange Diudasi Isakariodi ande Yesu rombo lisayande ali pange go alinu raayo Yesumi wi la mipi paisaya. Gupuma anda menda rupara paisimiya.
Yesu pange Bielesepulu nipuna angele lisimiya ei
(Madiu 12:22-32; Luka 11:14-23; 12:10)
20Gupisayapare wenaali waru andapu wala epa mombelisimiya. Go eimi Yesu pange nipuna alinu rapu enda nape naarele dialisaya. 21Wenaali andapumi Yesuri keyaoma pamuala lisimiya ei nipuna ama amenumi pangoma go gole Yesu lamu mula paisimiya.
22Mo Mosesimi Rudule Angele waloaisimiya alinumi Diurusaleme ree anda nane aoma ipuma lalore, Bielesepulumi #3:22 Bielesepuluri Sadanina bi menda. Yesuna lo para ralalo pea, lisimiya. Menda parame lalore, Mo koae remo kalu remome Yesumi mo koae remonu ralu liiala pinyaya kongapu, nipumi alalo pea, lisimiya. 23Yesumi mo alinu nipu repara epena lisayanda nimu para siapi angele lala ara lalore, Sadanimi Sadani yangore akipuma raidiapae, lisaya. 24Su menda wenaalinumi komea pila na-ae, nimuna nimunale yanda yanda pualimindare nimuna andasu puri na-paloma lopelea, lisaya. 25Komea anda repaa wenaalinumi nimunale ruma lapaoma yanda yanda pualimindare go anda repaare epe rupa na-alimiae, lisaya. 26Gurupare Sadanina kou nane raluaisimiya remonumi nimunale yanda yanda puma epe rupa komea pila na-alimindare Sadanina ki rambuao-aya ei lopelea, lisaya. Go au piliandare Sadanina ki rambuao-aya ei ora rore pilia, lisaya. 27Ali mendame puri waru pale ali mandana anda para puma nipuna leenu pa na-ma-pelea lisayapare mo anda reali nipuna ki ange ambala ma-rongao suma werepe gurupa ma-pelea, lisaya.
28-29Kone sialepae, lisaya. Wenaalinumi nimuna koae koae einu pange koae koae angelenu para yalame komala-ainya Godeme nimuna koae koae einu pange koae koae angelenu kunulapepare ali menda apimi Epe Yaakopi Sipiridi nipu para koae angele deandare Godeme nipuna go koae au na-kunaluapare naare raayo ora pa sualia, lisaya. 30Yesumi go angele lisaya eiri, alinu menda parame nipu para koae remo pia lisimiyanda, lisaya.
Yesuna ama pange amenuna angele wia ei
(Madiu 12:46-50; Luka 8:19-21)
31Go dina Yesuna ama, nipuna amenu ipuma kama nane epa ara Yesu epenaya angele rapaisimiya. 32Gupuma wenaalinumi Yesu rupara ma-piraoma mombea piri, nipu para lalore, Panga, nena ama, nena amenumi kama nane epa ara nee maisambao-aeme, lisimiya. 33Yesumi angele yangi liada ara lalore, Na ama amenuri apirapoyapae, lisaya. 34Gupuma Yesumi mo mombea pirisimiya wenaalinu andala ara lalore, Andalepa. Gore na ama, na amenu go pimindae, lisaya. 35Godena kone pea au pao-aya wena o ali nipuri na ame, na ainya, na ama aya, lisaya.
Currently Selected:
Maka 3: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
