Madiu 27

Yesu mo Pailadi para karu popisimiya ei

(Maka 15:1; Luka 23:1-2; Dioni 18:28-32)

1Yapi kepelisayandare alinau puaisimiya alinu pange Diu kalu alinumi Yesu ora lu komaminya loma nimumi nimuna gole yanda rombesimiya. 2Nipuna ki kopeme ma-rongaoma Pailadi mo anda andere piri ali pua alisimiya.

Diudasi komisaya ei

(Aposolo 1:18-19)

3Diudasi monde Yesu ripinilisaya alimi mo Yesu para koso loma Nee ora komainya angele lalo ara kenda pi aunu nipu para alisimiya einu andoma nipuna kone lekeyao suma misaya ali ria komea pereyaoma ali mendana ki laapopu silipa muni muma monde alinau puaisimiya alinu pange Diu kalu ali para wala epa ma-alisaya. 4Nipumi nimu para lalore, Neme koae koae aunu ora andaai pawa lisaya. Go aliri koae au menda na-pi ali gole ora ma-liado lisaya. Gupisayapare nimumi lalore, Go ei naana ale menda diayapare nena ale komea lisimiya.

5Gupuma Diudasimi monde muni mo anda rupara rumbuma kama nane puma kope nola paisaya.

6Mo alinau puaisimiya alinumi mo muni muma lalore, Gore alina weeme waraya muni ae lisimiya. Rudule Angeleme lalore muni mo alinau puaeme anda rupara sialore ora ana na-pea lisimiya. 7Gupuma angele menda lala ara lalore, Go munimiri sini warula alina su kambaminya pange go sunare papare ipuma komeleme wenaalinuna dapa su siaminya lisimiya. 8Go peandare mo su biri Wee Su lisimiya. Go suri ambia pange pa wia.

9Gupuma poropedi Dieremayame lisaya eiri ora ipisaya.

Nimumi monde ali ria komea pereyoma ali mendana

ki laapo silipa muni muma pange

Isaraeli wenaalimi la sialore go muniri mo ali

kambalo ara yango meape muni lisimiya.

10Gupuma mo muniri mo sini warisaya alina

su kambisimiya.

Go auri ande Godeme pilia loma ni la gisaya rupa

angele Dieremayame lisaya.

Pailadi Yesu lora pisaya ei

(Maka 15:2-5; Luka 23:3-5; Dioni 18:33-38)

11Yesu mo andasu rumbe alina lee angaana reka-ainyaloma mo ririna gapamani alimi Yesu lora pulu ara lalore, Neere Diu alinuna Kini aliyapae loma lora pisaya. Yesumi nipu para lalore, Nena gole go lalera lisaya. 12Mo alinau puaisimiya kalu alinumi pange anda rili alinumi Yesumi na-pisaya aunu raayo ma-ao-lisimiyapare Yesumi nimuna angele na-lisaya.

13Pailadimi nipu para lalore, Neeme go alinumi dame angelere na-pangoma pilipae lisaya. 14Go lisayapare Yesumi angele menda na-yokambo lisayanda mo ririna gapamani alimi rungulu mealo pambisaya.

Yesu komainya liisimiya ei

(Maka 15:6-15; Luka 23:13-25; Dioni 18:39–19:16)

15Pasopa naare kuni gipa komea pereyala pisaya naarenare mo gapamani alimi mo dipula anda para pirala pame alinuri mo wenaalinumi go ali rapaminaloma bi wi lala pamenda nipumi anda nane rapala puaisaya. 16Go naarena koae ali menda nipuna bi Barabasi pirisaya. 17Mo wenaali raayo mombelisimiyanda Pailadimi mo wenaali lora pulu ara lalore, Nimina konemere ali api rapanoyapae. Barabasi o Yesu mo Keriso loaeme ali rapanoyapae lisaya. 18Nipumi ambala kone wisaya. Yesuri wenaalimi raname waru komisimiyanda rono pangoma ni para karu epamende kone wisaya.

19Mo Pailadi ali mo koso laisimiya seana pirinyaloma nipuna wename angele rapada ara lalore, Go epe rendepona ali para ale menda na-pape lisaya. Akepeare ambia rimbala upame nipu andawa pange neme kendame waru komawa lisaya.

20Mo alinau puaisimiya alinumi pange kalu alinumi mo wenaali para ki kinyalu kondoli angele lalore, Mo Pailadi para puma wi andapu loma Barabasi rapainya dapape pange Yesu ora komena lu andiainya wi dapape loma mo wenaali para lisimiya. 21Gupuma mo gapamani alimi nimu lora pulu ara lalore, Go ali laapoyale api rapano kone widamepae lisayapare mo wenaalinumi lalore Barabasi lisimiya.

22Mo Pailadimi lora pulu ara lalore, gupi lisaya. Go peandare go ali Yesu loma Keriso loaeme aliri ake panoyapae lisayanda nimu raayome lalore Ekeraisa wape pi repanana ikokome lu andia lisimiya.

23Gupuma Pailadimi lora pulu ara lalore, Koae au mendare ake au paepae lisayapare mo wenaalinumi wi ora andapu lala ara lalore, Ekeraisa wape pi repanana ikokome lu andiae lisimiya.

24Pailadimi kone wisayapare nipumi dia dapayalore ora rendaa andaai rekolapa kone suma nipumi wenaalina lee rona pa muma nipumi nipuna ki randepe rumbala ara lalore gupi lisaya. Go ali komeleandare ni pepe na-dapape lisaya. Go au pimi eiri nimina komea pimi lisaya.

25Mo wenaali raayome nipuna angele yango liada ara lalore, Go alina rendaare naa para pange naana nongo nakinu para epena la lisimiya.

26Gupuma monde ali Barabasi pena lisaya pange Yesuri kalipumi kundu liina lomare mo wenaalina kina aloma ekeraisa wape pi repanana lu andiaisimiya.

Ami alinumi Yesu para ewaisa paisimiya ei

(Maka 15:16-20; Dioni 19:2-3)

27Mo gapamani alina ami alinumi Yesu mo gapamani alina anda para karu puma mo ami alinu raayo Yesu para epe mombea aisimiya. 28Nipuna aka koyo muma weepi aka menda ma-yamaisimiya. 29Gupuma kalu akare reke reke aya leme waruma Yesuna kaluna ma-pambaisimiya pange repana kuli komea nipuna popeke ki nane ma-ripinyaisimiya pange rumu yaruaoma pange panda pulu ara ewaisa pada ara lalore, Neere Diu alinuna Kini alenda naare nena enda kirao-aema ali mu gonda lisimiya. 30Nimumi nipu para dupi risimiya pange monde repana kuli muma kaluna liisimiya. 31Monde ewaisa paisimiya ei perelisayandare mo yamaisimiya aka runguli wala koyo muma nipuna ora aka ma-yamaisimiya pange kama penaloma ekeraisa wape pi repanana lu andialuame karu paisimiya.

Yesu ekeraisa wape pi repanana lu andiaisimiya ei

(Maka 15:21-32; Luka 23:26-43; Dioni 19:17-27)

32Kama nane paisimiya dinare mo Sairini ali menda nipuna bi Saimono mandaisimiya pange nipu para angele andapu lala ara lalore Yesuna ekeraisa wape pi repana ma-ria liisimiya. 33Gupuma mo su menda nipuna bi Golokoda nane opapaisimiya. Go biri ali kalu su ae su loma lisimiya. 34Go para Yesumi waini ipa nenaya reropi ale menda ma-piraoma alisimiyapare na-andoma gole rero pisayanda ora na-nisaya.

35Nimumi ekeraisa wape pi repanana ikokome lu andiaisimiya pange nipuna akanu rali rali puma bedi puma kase lisimiya. 36Go au perelisayandare werepe nane mo lena piri nipu andambo pirisimiya. 37Go nipuna kalu mandaare wape puma andiada ara lalore,

Gore Yesu Isaraelimi mandu rangala pae wenaalinuna Kini Ali

loma wape pu andiaisimiya. 38Gupuma pake noaisipiya ali laapo pange lu andiaisimiya pange ali mendare Yesuna popeke ki nane andiaisimiya pange ali mendare nipuna koaeya ki nane andiaisimiya.

39Mo epala puala pisimiya wenaalimiri Yesu andoma ewaisa pala pisimiya. Go pulu ara gupi lisimiya. 40Neemere ande alinau puae anda lakipidoame rapaende yapi repona wala edoa laende aliyale nena gole nee rambamea pange neere Godena Naki deandare, apo ekeraisa repana gioma kolopepa lopa lisimiya.

41Mendaa rupa monde Rudule Angele waloaisimiya alinumi pange ande alinau puaisimiya alinumi pange kalu alinu raayome Yesu para ewaisa pi angele lisimiya. 42Nipumi wenaali menda rambamisayapare nipuna gole rambameape ana na-pea pange nipuri Isaraeli wenaalina Kini ali diapae lisimiya. Nipumi mo ekeraisa wape pi repana minyapalaoma ambia go epeleandare gore naame nipu kone rulalima lisimiya. 43Nipumi Gode para kone rulaoma lalore Niri Godena Naki loaya. Go peandare Godeme rambamida paleme ambia andaminya lisimiya.

44Monde pake noaisipiya ali lu andiaisimiya ali laapome pange Yesu para monde wenaalimi lamende angele rambamu mendaai lisaya.

Yesu ora komisaya ei

(Maka 15:33-41; Luka 23:44-49; Dioni 19:28-30)

45Naare kalu rikirana-ainyaloma mo andasu raayo rimba ora andaai lisaya pange go au pa pinyaloma gaepame nane repo koloko perelisaya. 46Naarele repona ainyaloma Yesu ora wi waru andapu lala ara lalore, Eloi Eloi lama sabakadani loma angele lisaya. Go eiri gurupa, Na Gode, na Gode, Niri akepeanda giadepae loma lisaya.

47Mo lena reka aisimiya wenaalimi go angele pangoma lalore, Nipumi Ilaidia wi da lisimiya. 48Go gole ali mendame alo puma kongore ipa muma angaa likine waini ipa rapu menda para suma lumbimi ande alena rengeloma monde repana kuli kunina andi lopoma Yesumi nenaya walo andisimiya.

49Go pisimiyapare menda parame lalore, Ilaidia ipuma epa rambamili au andaminya pa maisambo aminya pa lisimiya.

50Yesumi ree ora andaai wi loma lisaya dina nipuna pomo perelisaya.

51Gupuma monde alinau puaisimiya anda pora gapena andiaisaya akare runa laapo rekele pula paisaya pange su momani pisaya pange mo alena aisaya kananu pange rekele rekele pisaya. 52Mo ali dapa pisimiya dapanu rekele puma lombisaya pange Godena wenaali komisimiya einu wala rekoma aisimiya. 53Mo ali dapa minyapalaoma Yesu komoma wala rekisayandare Diurusaleme nane paisimiya ei wenaali waru andapumi ora andisimiya.

54Mo ami kalu ali pange mo ami alinumi monde Yesu andere-aisimiya alinumi monde su momani pisaya ei pange olemole raayo pisaya ei andoma paalame ora waru komisimiya pange nimumi lalore, Nipuri ora Godena Nakiyanae lisimiya.

55Go para wenanu waru andapu Galili nane aoma Yesu raluma pamisimiya wenanumi aisimiya pange Galili minyapaloama Yesu papare ara Yesu andisimiya. 56Mo wenanu angalapunare Makedala ree anda wena Meari pange Dieimusi pange Diosepa nipuna ama Meari pange Sebedina naki laapona ama puma Yesu andola paisimiya.

Yesu dapa pisimiya ei

(Maka 15:42-47; Luka 23:50-56; Dioni 19:38-42)

57Gaepame nane ipisayandare amo ali menda mo Arimadia ali nipuna bi Diosepa ipisaya pange nipuri Yesuna kou nane rali ali aisaya ali ipisaya. 58Gupuma mo Pailadi ali para ipuma Yesu ro mulame epa lora pisayanda mo alinu para lalore, Yesuna dore Diosepa adapape lisaya. 59Gupuma Diosepame Yesuna do muma pena akana ma-koraisaya. 60Gupuma nipumi ambala nipuna dapa nipuna gole kana aoma wisaya para Yesuna do suma kana andaaimi pora gape ma-poma paisaya. 61Makedala wena Meari pange mo Meari menda laapore mo dapa andere pirisipiya.

Mo dapa para ami alinumi andere-aisimiya ei

62Wala yapina koro piri di ipisaya. Ande alinau puaisimiya kalu alinumi pange Parisi alinumi Pailadi rapu angele epa lisimiya. 63Gupuma nimumi lalore, Andaa alio lisimiya. Go yayapi angele loaya ali ambe na-kome arare yapi repo peredeandare ni wala rekola lande ei kone widama lisimiya. 64Go peandare mo ami alinumi mo dapa su andere-ala pena pange yapi repo peredeandare andaminya, lisimiya. Akepeandare nipuna kou nane rali alinu ipuma Yesuna do epa pake muma mo wenaali para lalore ande Yesu wala rekande lapana. Ambala ririna yayapi angele lisande eiri nipu ande Keriso ali lisaya. Werepe nane lisimiya angelere gore Yesu wala rekaya angele. Go werepe leme angelemere gore ririnai lu angulaliae.

65Mo Pailadimi lalore, Mo ali dapa andere-ala peme alinu lamualepa pange mo ali dapa ora waru andere-alepape pange ale menda ora na-popape nono ma-palepape, lisaya. 66Pailadina anda minyapalaomare monde ali dapana puma monde ali dapa mandaa rudule wi ei suma mo ami alinumi andere-aisimiya.

Currently Selected:

Madiu 27: POLENT23

Highlight

Copy