Madiu 26

Kalu alinumi Yesu duame rapisaya ei

(Maka 14:1-2; Luka 22:1-2; Dioni 11:45-53)

1Yesumi go angelenu lo pereyaisaya naarena nipuna kou nane raluaisimiya alinu para lalore gupi lisaya. 2Nimi kone wimi yapi laapo peredeandare Pasopa naare epelea. Alina Si Nakiri mo ekeraisa wape pi repana polopema mandaa ikokome lu andiainyaya yanda runguli alinuna ki nane su monedeme lisaya.

3Go naarena mo alinau puaisimiya kalu alinu pange Isaraeli wenaalinuna kalu alinu raayo mo alinau puaeme alinuna kalu ali nipuna bi Kaiapasi nipuna anda para mombelisimiya. 4Gupuma nimuna kunuma yanda rombalo ara Yesu kundiripu ripinyuma luma komena laminya lisimiya. 5Gupuma nimumi lalore, Go Pasopa naarena na-paminya akepeandare wenaalimi yanda ma-rekalimi lisimiya.

Wena mendame Bedani anda para Yesuna kaluna roropo pi wambala koyaisaya ei

(Maka 14:3-9; Dioni 12:1-8)

6-7Yesumi ambala kindi yainya aisaya ali Saimonona anda para pirinya loma wena menda nipu para ipuma mo kaname wapi bodolo roropo pi wambala ma-piraoma ma-ipuma ande roropo pi wambala Yesu enda nala pirinyaloma Yesuna kaluna epa koyaisaya. Go ipare muni ora andaaimi kambe ipa. 8Yesuna kou nane raluaisimiya alinumi go ei andoma rono engisimiya pange nimumi lora puma ara lalore, Go wename mo roropo pi wambala akepeanda ma-koyada ara piapae lisimiya. 9Mo roropo pi wambala mo wenaali mendame kambena demandare gore yango andapu milima pange go muniri mo narali wenaali para adema lisimiya.

10Yesumi mo nimumi lisimiya ei kone suma nimu para lalore, Go wena nipuna rana pea ei pinyadapa lisaya. Go wename ni para ora epe au pulu ara pia lisaya. 11Naare raayo mo narali wenaalinu nimi rapu ao-ala pemepare niri naare raayo nimi rapu na-ao-alua lisaya. 12Go wename na dona mo roropo pi wambala koyaripa eiri gore neme mo ali dapana repara polope eina lele pu sialo ara pia, lisaya. 13Go peandare go ei kone waru wi pape. Su kuni raayona go Godena epe yaakopi angele walari pamilimi pange mo wename pande au pange kone waru siari pamili, lisaya.

Diudasimi Yesu rombisaya ei

(Maka 14:10-11; Luka 22:3-6)

14Yesuna kou nane raluae alinuri ki laapo pereyaoma angena laapopu aisimiya. Go ali menda nipuna bi Diudasi Isakariodi nipu mo kalu alinu para paisaya. 15Gupuma lalore Neme Yesu nimina ki nane gulandare ni para ale gilimiyapae lisaya. Go lisayanda nimumi ali ria pereyoma ali mendana ki laapo silipa muni yarepema alisimiya. 16Go naarena Diudasimi Yesu mo alinuna kina adoame pora aisa puma pamisaya.

Yesumi pange nipuna kou nane raluaisimiya alinu rapu Pasopa enda nisimiya ei

(Maka 14:12-21; Luka 22:7-14,21-23; Dioni 13:21-30)

17Gupuma ririna yapina mo Yaakopi Beredi naarena mo nipuna kou nane raluaisimiya alinu Yesu para ipuma epa lalore, Naame mo Pasopa endare a para wamopu siamonoyapae lisimiya.

18Gupuma nipumi nimu para lalore, Nimimi mo ree anda rupara pulupa pange nimimi ali menda para pua lalore, Waloae alimi lalore, Na naarele repara ipula pange nimi na Pasopa enda na kou nane raluaisimiya alinu rapu nena anda para piri enda nelema dapape lisaya.

19Monde nipuna kou nane raluaisimiya alinumi Yesumi lisaya ei pangoma mo Pasopa enda analao pirisimiya.

20Gupuma gaepame nane ipisayandare monde ki laapo pereyaoma angena laapopu alinu pange Yesu rapu enda nolame pirisimiya. 21Mo enda nisimiya naarena Yesumi lalore, Nimi para la gialo, ali komea neeme ni mo yanda runguli alinuna ki nane ma-ala monede lisaya.

22Mo alinumi nimuna lo romba para yarame komala ara menda mendame Yesu epa lora pulu ara lalore, Andaa alio, nemere manda go aunu na-pula angele lalolo pisimiya.

23Gupuma Yesumi nimuna angele yango liada ara lalore, Ali menda ni rapu ambia go enda nala alimi gole go au pilia lisaya. 24Mo Godena angele wia bukame lalore Alina Si Nakiri komelea lea rupa ora komelea. Go peapare mo Alina Si Naki linaya ma-ala moneda pea aliri ora koae yanda waru andelea. Go au pula pea eimiri go ali nipuna amame nipu na-mainda payalore ora epeda pa lisaya.

25Diudasi mo Yesu liinaya ma-ada pea alimi Yesuna angele yango liala ara nipumi lalore, Waloale Alio, ni para lalepae lisaya. Yesumi nipu para lalore, Nena gole go lalera lisaya.

Yesumi nipuna kou nane raluaisimiya alinu para enda ipa alisaya ei

(Maka 14:22-26; Luka 22:14-20; 1 Korindi 11:23-25)

26Mo enda nala pirinyaloma Yesumi mo palawa kiri muma Gode para ranae lisaya. Nipumi polo polo puma nipuna kou nane rali alinu para ale ale puma lalore, Nalepa lisaya. Gore na do mindi ae lisaya.

27Gupuma kapo menda waini ipame ma-rumbiaoma muma Gode para ranae loma nimu para ale ale puma lalore, Nimi raayo nalepa lisaya. 28Gore na wee ipa lisaya. Godeme nimi rapu angele go lo kora widanda. Go weeme wenaali andapuna koae einu randepealia lisaya. 29Nimi para la gialo, neme go waini ipa wala na-nola. Wala ne auri nimi rapu piri na Apana Ki Rambuao-aya Ei nane piri komea wala nelema lisaya.

30Gupuma yaisa komea loma perelisayandare so Olipi kana rumu para paisimiya.

Yesumi Pida para lalore Ni para kou wade lisaya ei

(Maka 14:27-31; Luka 22:31-34; Dioni 13:36-38)

31Gupuma Yesumi nimu para lalore, Ambia go rimbala nimi raayo pongola peleme pange ni minyapalalimi, lisaya. Akepeandare Godena angele wia bukame la wia eiri go lea. Godeme mo sipisipi andere-aya ali diandare mo sipisipi menasinu raayo pongola peleme lea, lisaya. 32Go peapare komoma wala rekoma mo Galili nane ni ambala ririna pola lisaya.

33Pidame angele yokambo Yesu para lalore Mo mendane alinumi pilimi rupa nee na-minyapalalua lisaya.

34Yesumi nipuna angele lialo arare gupi lisaya. Ambia go rimbala kokola ambe na-rekena loma ara rana repo lalore, Ni Yesu na-ande deae lisaya.

35Pidame nipuna angele yango liada ara lalore gupi lisaya. Nee komelendare ora ni manda nee rapu mendaa komolapepare neme nee ora na-ande pi akepea lanoyapae lisaya. Mo Yesuna kou nane rali ali raayome mendaa angele kama lisimiya.

Yesu Gesemani mapu para yainya pisaya ei

(Maka 14:32-42; Luka 22:39-46)

36Gupuma Yesumi nipuna kou nane raluaisimiya alinu rapu so mapu bi Gesemani nane karu puma nipumi nimu para lalore, Ni mongo lena yainya pula pono, go lena ando pidapa lisaya. 37Gupuma Pida pange Sebedina naki laapo karu paisaya. Gupuma nipuna lo romba kendame komisaya. 38Gupuma nimu para lalore, Na lo para kenda ora andaai pia lisaya. Go peale lee opoma ni rapu andere-aminya.

39Nipumi ongesinda mo parele puma lee angaa ambala andainyao suna lopoma yainya pulu ara lalore, Na Apao lisaya. Ana piliandare gore go rendaa pane mupa. Go eiri na rana pi ei diapare nena rana pi ei komea raliape lisaya.

40Gupuma monde ali repo para wala lekeya paisayapare u palina loma pua anda suma nipumi Pida para lalore, Go onge naarelesina komea ni rapu na-reka ariminale akepea pamepae lisaya. 41Nimi landala eimi ma-lopapana yainyanu waru puma andere-alepape. Nimina konemere ora epe aunu pape eina raname komeapare nimi go au pape eina puri menda na-wimi, lisaya.

42Wala rana laapo Yesumi puma yainya pua pisaya. Go lalo ara gupi lisaya. Na Apao lisaya. Go nolame pi rendaare ora nena kone wilindare gore ora pa nolae lisaya. 43Gupuma nipu wala lekeya puma ande rupa mo alinu u paliai winya pua andisayapare nimuna leenu na-kilisimiya.

44Wala Yesumi nimu minyapalaoma wala puma rana repo mo yainya pulu ara mendaa angele komea lisaya. 45Gupuma mo nipuna kou nane rali alinu para lekeya ipuma lalore, Nimiri u pa palimena pange koro pa piramena lisaya. Andalepae, ande Alina Si Naki mo yanda runguli alinuna ki nane polopea naare go epe andalepa, lisaya. 46Rekoma ambe balepa. Monde ni romboma yanda runguli alinu ma-adapea ali mandamina balepae lisaya.

Yesu epa ripinyisimiya ei

(Maka 14:43-50; Luka 22:47-53; Dioni 18:3-12)

47Yesumi angele pa lala-ainyaloma nipuna kou nane raluae ali menda nipuna bi Diudasi opopaisaya pange nipu rapu ali andapu rai pange dolo endalinu ma-ipisimiya. Go repaare monde alinau puaisimiya kalu alinumi pange anda rili alinumi rapaisimiya. 48Diudasimi mo wenaali para lalore, Neme puma pua nunu pulandare gore nimina lamende aliyale ipuma epa ripinalepape lisaya.

49Diudasi opopaoma Yesu para go gole puma pua lalore, Waloale Alio epe rimbaloma pua nunu pisaya.

50Yesumi nipu para lalore, Ameo lisaya. Nena mulame epaelere ambe wangepu mea lisaya.

Go lisaya ei pangomare Yesu epa ripinyuma irulu siamba aisimiya. 51Gupuma Yesu rapu aisimiya ali mendame nipuna raimi mo kalu alina pupudengi noaisaya alina kale raimi rape poasiaya. 52Gupuma Yesumi nipu para lalore, Nena rai mo nipuna meae para wala sia lisaya. Akepeare rendaa pi eimiri ora rendaa pi yanda kama sembe sia pidia. 53Neme ni epa rambaminyayanda nina Apa wi doa naarenare eindiolo alinu ora waru andapupe rapalia. Go eiri nee kone na-wilipae. 54Nina Apa go aunda piliandare gore ande Godena angele wia bukame ora pinya leande ei ora na-pilia.

55Gupuma Yesumi mo ali waru andapu para lalore, Ni pake ne aliyanda nimimi ni duameyanda endali rai para epamepae lisaya. Niri naare raayosi mo alinu puaeme anda para piri angele walala pawapare ni na-epa ripinyala pame lisaya. 56Go peapare go au pia eiri monde poropedi alinumi Godena angele wia bukana wape pisimiya ei ora minyaya pimi lisaya.

Gupuma mo nipuna kou nane rali alinu Yesu minyapalaoma pongola pane paisimiya.

Yesu mo Kalesoro alinu para karu paisimiya ei

(Maka 14:53-65; Luka 22:54-55,63-71; Dioni 18:13-14,19-24)

57Monde Yesu ripinilisimiya alinumi mo kalu ali Kaiapasina anda para karu paisimiya pange mo Rudule Angele waloaisimiya alinu pange kalu alinu raayo mo anda para mombea pirisimiya. 58Pidame papare raluma puaisaya. Gupuma nipumi mo kalu alina anda pape para pua kondo pamboma pange kondo pamboma mo pupudengi nao-ae alinu rapu pua piri Yesu para ake au pilimipae lo andolame pirisaya. 59Mo alinau puaisimiya kalu alinu pange kalesoro alinumi Yesu nipumi na-pi angelenu menda ma-riaoma Yesu lu komaluameyanda pora aisi pisimiya. 60Gupisimiyapare ale menda na-andawisimiya pange andapu ipuma payapo angele epa lisimiya. Werepe nane ali laapo ipisipiya. 61Gupuma niipumi lalore, gupi lisipiya. Go alimi lalore, Neeme Godena alinau puaeme anda manda lakipidua pange yapi repona wala edoa la ali aya lisipiya.

62Mo alinau puae kalu ali rekoma ara Yesu para lalore, Go nee para dame angelere yango liape ana na-peanda pilipae lisaya. 63Go lisayapare Yesumi angele na-lisaya pange wala monde kalu alimi lalore, Gode ora na-kome pa aya Alina bina lalole, Neere Keriso ande Godena Naki lo naa la gi lisaya.

64Yesumi nipuna angele yango liada ara lalore, Neeme go landepare neme go angele nimi para lalo. Ambia ora go kini puma ora werepe pange pa pualua. Nimimi ni ande Alina Si Naki Gode ora ande Puri Waru Pale Alina popeke ki nane pidua ei andeleme. Gupuma Alina Si Nakiri epeni nane aoma yaa para koaa rapu epola ei andeleme, lisaya.

65Go gole mo kalu alimi nipuna aka singipuma lalore, Gode para ewaisa paripande lisaya. Go peale wala ma-kondo liape ei angele lape ali menda na-waisaminya. Akepeare nipumi go lande angele nimina gole go pangamende. 66Monde alimi mo alinu para lalore, Nimimiri ale kone widamepae lisayandare nimumi angele yango liada ara lalore, Nipumi koae au piale ora lu komaminya lisimiya.

67Gupuma Yesuna lee angaa para dupi raisimiya pange lu yambisimiya pange mo nipuna lee angaa paranu ki parame liisimiya. 68Mo ki parame liisimiya alinumiri gupi lisimiya. Keriso neeme naa repara werepe pula pea aunu menda la gi lisaya. Naame nee diama alinuna bi naa la gi lisimiya.

Pidame Yesu ni na-ande lisaya ei

(Maka 14:66-72; Luka 22:56-62; Dioni 18:15-18,25-27)

69Pidare mo koso laisimiya anda kama pirinyaloma mo kalu alina pupudengi noaisaya wenasi menda ipuma epa lalore, Pida nee pange Yesu mo Galili li rapu pamulopo aripinde ali lisaya.

70Gupuma Pidame mo alinu raayona lee angaana ara lalore, Ni marea pange neeme go lale angelere payapo lale loma nimu para lisaya. 71Gupuma Pidame mo koso laisimiya andana pora gape para puma so pora para paisayanda mo pupudengi noaisaya nongo mendame monde lena pamboaisimiya alinu para lalore, Nipuri Nasarere ali Yesu rapu pamulopa ali lisaya.

72Mendaa rupa nipuna angele yango liada ara Pidame lalore, Gode ora lalole, niri go ali ora na-ande lisaya.

73Ongesinda aoma mo lena reka aisimiya ali Pida para ipuma lalore, Neere Yesu rapu pamulopo aripi alie loma lisimiya. Nena lale angeleme gole la gida lisaya.

74Pidame puri pale angele loma lalore, Godena bina lalo lisaya. Ni go ali rapu na-pamulopo aripu. Go eina payapo angele doandare gore Godeme ni para rendaa ginya lisaya pange go lala-ainyaloma monde kokola rekisaya.

75Go gole Pidame monde Yesumi lisaya angele kone wisaya. Kokola ambe na-reke-ainyaloma neeme rana repo ni rapu na-pamuaripi dee lisaya. Go au ora pisayanda Pidame kama puma ree ora waru andaai pua lisaya.

Currently Selected:

Madiu 26: POLENT23

Highlight

Copy