Madiu 25
25
Ki laapo nongonuna siapi angele lea ei Alina Si Naki epola pea eina angele lea ei
(Maka 13:24-27; Luka 21:25-28)
1Go naarena yaa nane wia Godena Yaa Nane Wia Ki Rambuao-aya Eiri ki laapo nongonu nimuna lamepanu muma porana wena lamula pa ali maisambao-aisimiya rupa manda. 2Mendane ki nongonuri kone na-wisimiyapare mendane ki nongonumi komea kone ora waru wisimiya. 3Mo kone waru na-wisimiya nongonumiri nimuna lamepare ma-paisimiyapare nimumi waira komea na-ma-paisimiya. 4Mo kone ora waru wi nongonumiri nimuna lamepanu pange waira pange ma-paisimiya. 5Gupuma monde wena lamuape ali maisambao piruma u paluma paisimiya.
6Go pisimiyapare u rumu rumuna duma wi lalo ara lalore ande wena lamuape ali go ipulandae lisimiya. Epa mandalepae lisimiya. 7Monde ki laapo nongonu rekoma nimuna lamepanu wamo pisimiya. 8Monde waira na-ripinilisimiya mendane ki nongonumi lalore, Akinuo naana lamepa kundinidale waira menda koyo pambalepae lisimiya. 9Monde nongonumi nimuna angele yango lialo arare gupi lisimiya. Nimi pa giape ei menda diale mo kamboame anda para pua kambalepa lisimiya. 10Monde mendane ki nongonu mo kamboame anda para waira mula pulu-ainyalomare ande ali opopaisaya. Monde kone suma waira pa ripinyameyande nongonu epa karu mumare anda para pua kondo pambomare enda nola paisimiya pange pora po siaisimiya.
11Werepe nane monde nongonu ipuma lalore Andaa alio, andaa alio naa epomona pora lombalepa loma ree ora andaai lisimiya. 12Monde alimi nimu para lalore, Ni nimi na-andoaripunde lisaya. 13Yesumi angele lo pereyado ara lalore, Go peale nimi waru andambao-alepa lisaya. Akepeare ande Reali epola pea naare mendame kone na-wilia.
Pupudengi noaeme ali repona siapi angele lisaya ei
(Luka 19:11-27)
14Go naarenare Godena Yaa Name Wia Ki Rambuao-aya Eiri gurupa manda. Ali mendame nipu pora kimisu polameyanda mo nipuna pupudengi nao-aisimiya alinu para nipuna olemolenu andere-alapa lisaya. 15Nipu polameyandare muni aleale pisaya. Mo alinu nimuna andema rupa mandana alisaya. Ali mendare 5000 kina alisaya pange ali mendare 2000 kina alisaya pange ali mendare 1000 kina alisaya. 16Mo ali paisaya dinare monde 5000 kina alisaya alimiri pupudengi nari pa mumare wala 5000 kina menda nipumi yango meaisaya. 17Monde 2000 kina meaisayande alimi mendaa rupa pupudengi nari pa muma wala 2000 kina andawisaya. 18Monde 1000 kina misaya alimiri mapu para puma monde kana kili raayo su romboma pua panga wisaya.
19Naare andapu aomare nimuna reali ipuma lalore ande guma puawande muninu andano ma-ipulupa lisaya. 20Monde 5000 kina misayande alimi ipulu ara lalore, ande 5000 kina gisindepare neme pupudengi naomare wala 5000 kina menda go andasiayondae lisaya. 21Monde realimi lalore, Neere ora epe rupa pupudengi noale ali pange neeme olemole ongepusi andere-aripindepare epe rupa andere-aripinale nee mo andaa olemolenu andere-ainya doale ni rapu raname komapana lisaya.
22Monde 2000 kina alisayande ali ipumare, Ande nena 2000 kina giaendepare neme pupudengi naomare wala 2000 kina menda go andasiayondae lisaya. 23Mo realimiri Ora epelea lisaya. Neere raname komoma pupudengi noaripinya pi nipuna realimi lisaya. Neme raname komalo ara olemole ongepusi andere-ainya giawandepare epe rupa andere-aripinyale ora andaa olemole andere-ainya gulale ni rapu raname komapana ipu lisaya.
24Monde 1000 kina misaya alimiri gupi lisaya. Ni kone waru wi lisaya. Neere ali mendame e poae para puma na-pe alenu waru muale lisaya. Gupuma mendane su nane ali mendame wai alenu loparipare neeme na-pe muale lisaya. Gupumare nee ora rendaa waru pele ali lisaya. 25Neme paalame waru komoma nena muni ma-alu papeya su para panda pawale nena muni ande giande rupa gonda lisaya.
26Nipuna andaa alimi monde ali parare gupi lisaya. Neere koae ali pange neere pupudengi na-pe gimi komoale ali lisaya. Nemere ande ali mendame poaya mapuna wai alenu muayo pange mendame kili randalea para gole neme pua na-pe manduayo eiri neeme kone wili lisaya. 27Neeme niri go au puayo kone sumare nina muniri mo muni suaeme anda para na-siae auri poropedi siainya akepeanda paepae lisaya. 28Go einare apo 1000 kina gi lomare monde 10,000 kina siamba ae ali para pua ma-adapa lisaya. 29Akepeare menda apimi ale menda siamba alia repaare Godeme go repaa olemole waru andapu adea. Go peapare menda apimi ale menda na-sialiandare gore nimumi ora onge alesinu sialimi alenu gole Godeme pane mupalia. 30Go einare go nina pupudengi no koyada aliri mo kama rimbale para yoloma puma puama rumbalepa lisaya. Nipumi ree andaai loma e waru loalia lisaya.
Alina Si Nakimi wenaali rali pilia lea ei
31Werepe nane Alina Si Naki Kini ipumare nipuna eindiolo alinu rapu nipuna piruaya seana epa pidia. Go seare kini alinu komea piruaeme sea. 32Gupuma wenaali raayo nipuna lee angaana epa mombedeme. Ande sipisipi menanu pange nanigosi menanu andere-aeme repaamere sipisipi pange gosi menanu mendaa para aemendare sipisipi mendane gosi mendane pu rumao-aeme. Gurupa mandare Realimi wenaali rumalia.
33Mo rendepona ao-aeme repaare popeke ki nane ma-alia. Gupuma mo mendane repaare koaeya nane ki nane ma-alia. 34Gupuma mo Kini Alimi mo nipuna popeke ki nane pimi wenaalinu parare, Nimiri na Apame epepe aunu pilia dea. Go su yaa ambe na-wari-ainyaloma gole nina Apame nimina Ki Rambuao-aya Einu wamopu siaripale mealiminya ipulupa dea. 35Ni ipa nalame komawanda ipa giame pange reame komawandare enda giamende pange ni kimisu epawandare nimina anda para karu meamende lisaya. 36Ni aka na-yamawandare aka giamende pange yainya komawandare waru epe rupa andere-ariminde pange dipula anda para pirawandare ni andolandi pamende lisaya. 37Ora epe rendepona aeme alinumi go angele yango liada ara lalore 38Andaa alio, neme reame andepele komae ei naame andoma enda giama pange ipa nalame komae ei andoma nee ipa andepele giamapae deme. Andepele nee kimisu epaenda nee naana anda para karu meamapae deme pange nee aka na-yamaenda aka andepele giamapae deme lisaya.
39Dipula anda para pirainya nee andepele andola epamapae deme. 40Mo Kini Alimi nimuna angele yango liado arare gupi lisaya. Nimi para ora angele lalo lisaya. Ande nina amenu go komape endapenu para go au pisimindere ni para gole pisiminde lisaya.
41Gupuma mo nipuna koae nane kina pimi repaa parare gupi dea. Nimiri koae yandanu andelemele no repana na-kundini pa roaya para pulupa dea lisaya.
Go parare nina Apa Godeme mo Sadani pange nipuna eindiolo alinu ma-kiduame pea repena lengaa. 42Ni reame komawapare enda na-giande pange ipa nalame komawapare ipa na-giande dea. 43Ni neme lee para na-ande ali epawande pange ni nena anda para na-karu puande pange ni aka na-yamawanda aka na-yamaripinde pange dipula anda para pirano loma pange yainya komono loma pange na-andola epaende dea.
44Nimumi nipuna angele yango lialo arare gupi deme. Nee reame komainyaloma enda na-gi auri andepele pamapae pange ipa nalame komainya ipa na-gi au pange kimisu epainyaloma na-karu me au pange yainya komopa siainyaloma na-andola epama pange dipula pirainya loma na-andola epama aunu raayo andepele paya deme. 45Mo Kini Alimi nimuna angele yango lialo arare gupi dea. Nimimi komape endapenu rambameapeyanda gimi komamende eiri gore ni gole rambameapeyanda pisiminde dea. 46Gore go koae au pame wenaaliri mo rendaa andaai naare raayo mualimi. Go peapare mo rendepona wenaaliri na-kome endoaya ei mumare naare raayo pa ao-alimi. Yesumi go angelenu lo pereyaisaya.
Currently Selected:
Madiu 25: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
