Madiu 24

Gode para alinau puaeme andaa anda ma-koyalimi lo Yesumi lisaya ei

(Maka 13:1-2; Luka 21:5-6)

1Yesumi mo alinau puaeme anda giaoma pulu-ainyaloma nipuna kou nane rali alinu nipu mo alinau puaeme anda wadoameyare ipisimiya. 2Gupuma nimu para lalore gupi lisaya. Nimi go alenu raayo andalepa. Nimi repara ora angele lalo lisaya. Go anda wareme kanasi menda pa na-wandula peapare ora raayo ma-rumbeleme lisaya.

Yesumi lalore kenda pi au ora epelea lisaya ei

(Maka 13:3-13; Luka 21:7-19)

3Yesu nipuna kunuma so Olipi kana rumu para pirinya-lomare nipuna kou nane rali alinu ipuma nipu para lalore, Go lale aunuri andepele piliayapae lisimiya. Gupuma nee epola pele naare pange su yaa peredoameyandarepare aunu ale andelemeyapae lisimiya.

4Yesumi nimu para lalore, Wenaali mendame nimina ange yolapana waru andere-alepape lisaya. 5Akepeandare ali andapumi lalo ara nimuri ande Keriso loma angele deme eimi wenaali raayo makiralimi lisaya. 6Nimi repara yanda pilimi einu pange papare yanda pilimi einu pange pangeleme lisaya. Go peapare nimi na-keyalepape. Akepeare go aunuri ora pape aunu pia. Go aunu pilia einu andomare su yaa repara peredea kone na-sialepape. 7Anda menda alimi repaa menda para yanda dimi pange kini alina repaame kini alina repaa menda para yanda pilimi pange andasu menda menda para rea waru pambelea pange su momoni andaai pilia lisaya. 8Go eiri ande wenanumi naki manduameyanda pimi dina ririna naki kou nala rupa manda lisaya.

9Gupumare nimi epa milimi pange wenaali menda para ademe pange go wenaalimi nimi ora lu komalimi.

Nina bina amendare wenaali andapumi nimi rapu rono waru pangeleme pange yanda waru lu pilimi. 10Go naarena wenaali andapu Gode para nimuna kone rulaeme einu gialimi pange nimuna amenu para gole yanda runguli alinu repara mena yapa pilimi pange nimuna gole nimuna amenu repara yanda runguli ali mandana alimi. 11Payapo poropedi alinu andapu ipuma nimi epa makiralimi. 12Roae aunu raayo ora andaai epelea pange wenaali andapumi nimuna yangonu repara pu ada ei kongo relea. 13Go au puainya gole pa puri paloma alia wenaaliri Godeme su yaa peredea dina epa milia. 14Gupuma go Godena Ki Rambuao-aya Eina Epe Angelere su yaa kuni raayona walalimi pange wenaali raayome pangelemendare gore su yaa go dina peredea.

Yesumi ora koae au epola pea eina angele lisaya ei

(Maka 13:14-23; Luka 21:20-24)

15Nimimi go anda ma-koyala pea ale andeleme. Ambala ririna poropedi Daniolome la wisaya rupa mo alinau puaeme yaakopi alena reka alia. Ali menda apimi go angele yarepedeandare gore kone waru winya. 16Go peandare mo Diudia andasu nane aeme wenaaliri pongola so rumu naini pulupape. 17Ali mendame so nipuna anda kulu mandaa piruma kolopema nipuna olemolenu mula pono kone na-siape. 18Ali menda nipuna mapuna aoma wala lekeya nipuna aka mula pono kone na-siape. 19Ambia go naarena naki andu naleme wenanu pange naki do rombe wenanu para yarame waru komalo. 20Gode para yainya pipa. Akepeare mo koro piri naarena pange kongo rala naarena na-pongola pamualiminya. 21Go naarena epelea rendaare ora andaai epelea. Ambala ririna pange werepe epola pea naarena kenda pi einu raayo lu angulaya. 22Godeme mendapare naare ambala rungulu rumbea. Go au na-pulupayalore gore wenaali raayo pereda pame. Go peapare nipuna yarepe mea wenaali rondona yandare naarele mendapare rungulu rumbilia.

23Gupuma repaa mendame lalore ande Keriso monda ande Keriso gonda deme alinuna angele na-pangalepape. 24Gupuma nimu yayapi Keriso loaeme alinu pange payapo poropedi alinu opa pilimi. Gupuma wenaalimi andenaya nimu na-ande aunu andapu epa wademe. Gupumare Godena rali puma ma-ae wenaali pange epa makiraluame rapaleme. 25Mo naare ambe na-epena ambala ririna go angelenu la guaripunde.

26Go peandare nimi para ipuma nipuri mo weambipi suna mo pianda demenda pange go anda para go pianda deme einu pange na-pangalepape. 27Nimimi go ando-aeme kari yapare so naare ipula naneyame aoma no naare pambala nane pua pambala nane puaya. Go ei mandare Alina Si Naki go suna epolape eiri go kari yapa andale rupa mandana wenaali raayome andeleme.

28Mo kome ronu wilia lenare yaa idayamanu pange andele lisaya.

Alina Si Naki epola pea eina angele lea ei

(Maka 13:24-27; Luka 21:25-28)

29Go naarena kenda pi einu raayo peredea dinare wangepu mo naareme rimbadea pange sumbame paa na-pilia pange mo kumba raayo yaa nane aoma lopeleme pange so yaa nane wia puri pale alenu raayo nimuna aeme rupa na-alimi. 30Go naarenare mo Alina Si Naki so yaa nane epola pea ei wada peapare au wadea pange suna aeme wenaali raayo ree waru deme pange Alina Si Naki so yaa naneyame aoma Godena puri pale ei pange wele kongapu rapu epelea. 31Gupuma bu kenange dia pange nipuna eindiolo alinu rapaoma mo su kuni raayona nipuna ambala yarepemi wenaali su kuni menda para meala meala puma pua peredea.

Anga repaname wada aunu

(Maka 13:28-31; Luka 21:29-33)

32Anga sulameyanda keranu para piliandare gore nena konemere pena ropa pi ipula kone wili. Go au pilia dinare gore nimi kone wimi. 33Go au pia rupa mandare one monepare aunu piliandare gore ande Realina naare repara ipula ae kone wilimi. 34Nimi para ora angele lalo. Ambia go aeme wenaali raayo ambe na-kome-ainyaloma go aunu pilia. 35Su yaa raayo pereda peapare nina angele komea pa sualia.

Yesumi lalore Wenaali mendame nina epola pea di kone na-wia lisaya ei

(Maka 13:32-37; Luka 17:26-30,34-36)

36Wenaali mendame pange yaa nane aeme eindiolo alinumi pange Si Nakimi pange ande Alina Si Naki epola pea di kone na-wimipare Apa Godeme komea kone wia. 37Alina Si Naki epola pea eiri monde Noa nipuna naarena pisimiya einu manda. 38Monde ipa ambe na-risaya dinare wenaali andapumi repaalu au lala enda ipanu nala puaisimiya. Go au pa pairi pulu-ainyare Noa mo kawaso para pua kondo pambisaya.

39Go aunu pulu-ainya golere monde wenaalimi na-andisimiyapare ande ipa ra ipuma nimu munyaisaya ei andisimiya. Ande Alina Si Naki epelea dinare go au manda pilia. 40Go naarenare ali laapo mapuna e polepepare komea komea ma-pulu arare menda pa ainya dea. 41Wena laapo palawa waru aeme alepara palawa wamo puluainya komea ma-pulu ara komea pa ainya dea.

42Waru andere-alepape. Akepeare monde nena Reali epola pea naare nee kone na-wilinda lawa. 43Ande anda realimi monde pake nala ali epola pa naare kone sula payalore gore mo pake nala ali manda surombola pa. 44Go einare nimimi pange waru andere-alepape. Akepeare ande Alina Si Naki go naarena na-epelea kone suma ainya epelea.

Epe rupa pupudengi noaisaya ali pange koae rupa pupudengi noaisaya ali laapona angele lea ei

(Luka 12:41-48)

45Go einare ora angele waru pangoma kone waru wi pupudengi noae aliri apiyapae. Go au puaya aliri ande nipuna andaa alimi monde nipuna menda e poaeme alinu andere piri enda pange ipa laapo ora nape naarena nenayanda ma-aya ali komea. 46Monde nipuna andaa ali anda nane ipuma go alimi go au pulu-ainya epa andola pea ali nipuri raname waru komelea. 47Neme nimi para go angele lalo. Go epe rupa pupudengi nao-aya ali nipuri nipuna andaa alimi olemole raayo andere-ainya wadea. 48Go peapare nipu koae rupa e poae ali deandare gore nipuna lalore nipuna andaa ali andaa ambe na-epelea kone wilia. 49Gupuma monde menda para pupudengi noaeme repaa lu yambumare ande koae ipa noma keyao-aeme repaa rapu enda pange koae ipanu waru nala paliala pualia. 50Go au pumare monde alimi nipuna andaa aliri go dina epelea kone suma lele na-pilia dinare gore monde ali oponedea lisaya. 51Monde andaa ali ipumare mo ali epa lumare yambilia. Monde repaame noariminde rendaa nipumi pange nelea. Go alena rendaa no ara e ora andaai loalia.

Currently Selected:

Madiu 24: POLENT23

Highlight

Copy