Madiu 28
28
Yesu komoma rekisaya ei
(Maka 16:1-10; Luka 24:1-12; Dioni 20:1-10)
1Ande koro piri naare pereyoma Sande ora ambala palumusi Meari pange Makedala wena Meari niipu monde Yesu dapa pisimiya alena andola paisipiya. 2Go papeyapare su momoni ora andaai paya. Go aleme gole rana komeasi epeni nane aoma Godena eindiolo ali ande Yesuna dapa kea pisimiya kana pane ma-rumbuma monde kana mandaa epa pirisaya. 3Monde eindiolo alina lee angaa andapere lee yaru yaru pisaya. Gupumare nipuna yamaya akanuri ora kaake pu rumbaya. 4Monde Yesuna dapa andere-aisimiya endali mini alinumi go ei andomare nimu ora paala andaaimi komoma ki ange pururu liaoma kome alinu manda andameya.
5Monde eindiolo alimi monde wena laapo para lalore, Paalame na-komalepape lisaya. Niipiri neme kone sialopare Yesu ande lu andiariminde ali waisalo ara pipi lisaya. 6Go peapare nipuri ambiare go para na-pia lisaya. Nipuri Godeme wala ma-rekaripande. Ande rekola lande rupa ora go au pa. Ande nipu ma-siamande guli para niipu epa andalepa lisaya. 7Go einare ambe wangepulu puma nipuna kou nane rali alinu para go au pua dapape lisaya. Yesu Godeme wala ma-rekayandare nipu guli para pa na-pia dapape. Gupuma nipu ambala Galili anda nane ririna puluaya dapape lisaya. Go parare nipu andeleme dapape lisaya. Neme ande la giawande ei kone sialepape.
8Monde wena laapome monde angele pangomare paalame waru komapeyapare wala kone menda sialore raname waru komapeya. Gupuma monde Yesuna kou nane rali alinu doameyanda paisipiya.
9Go aleme gole monde wena laapo puluapeya lena Yesumi niipu mandaoma lalore gupi lisaya. Kuma pi ei niipi rapu winya ae lisaya. Monde wena laapome nipu repara ipumare nipuna ange minyuma Godena bi minyasiaisipiya. 10Yesumi niipu para lalore gupi lisaya. Niipimi paalame na-komalepape lisaya. Niipi puma nina amenu pua lomare Galili andasu nane pupulupa dapape. Go parare ni andeleme lisaya.
Yesu dapa andere-ae alinumi angele lea ei
11Ande wena laapo pulu-ainyalomare ande Yesu andere-aisimiyande endali mini alinu mendapare monde ree anda para wala puma monde alinau puaeme andaa alinu ande paya aunu raayo pua la alisimiya. 12-13Ande alinau puaisimiya alinuna kalu alinu monde anda rili alinu rapu mombema angele lo koro wisimiya. Gupumare monde endali mini alinu parare gupi dapape lisimiya. Yesuna dore nipuna kou nane rali alinumi rimba u palia rumurumuna epa pake muma pua dapape lisimiya. 14Gupuma monde andaa gapamani alimi go angele da pangeleandare gore naame nipu para lalore mo endali mini alinumi ora angele lalo ara dame lomare nimina yanda lialimale paalame na-komalepape lisimiya.
15Ande endali mini alinumi monde kalu alinumi lisimiya angele pangalo arare monde kana pange misimiya. Go einare ambia pange go angele monde Diu wenaalimi pange pa lari pamuaeme.
Yesu nipuna kou nane raluaisimiya alinu para ipisaya ei
(Maka 16:14-18; Luka 24:36-49; Dioni 20:19-23; Aposolo 1:6-8)
16Ande ki laapo pereyoma komea alinu ande Yesumi lisaya rupa monde su rundu menda mo Galili anda para wi alena paisimiya. 17Monde alinumi Yesu andomare mendane alinumiri kone laapo laapo wisimiyapare gole pa Godena bi minyasiaisimiya. 18Yesu repara pulu arare monde alinu parare gupi lisaya. Nina Apame go suna pange yaa nane wia puriri ni para gea lisaya. 19Go einare alenda alenda raayosi para puma wenaali para nina kou nane ralina dapape. Gupuma ande Apa Godena bina pange Si Nakina bina pange Yaakopi Sipiridina bina baparaisi au palepape, lisaya. 20Gupumare ande neme nimi repara walawa aunu raayosi mongeriaomare pamu pinya dapape. Niri nimi rapu aripuma su yaa pa peredea lisaya.
Currently Selected:
Madiu 28: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
