Luka 5

Yesumi nipuna kou nane ralinyaya ririna alinu misaya ei

(Madiu 4:18-22; Maka 1:16-20)

1Rana menda Yesu nipu mo Genesarede#5:1 Genesaredere Galili leena bi menda. ipa lee wi ipa ree nane ainyaloma wenaali andapumi Godena angele pangolameya wenaali kepea mone mone puma riri arere pisimiya. 2Go au pisimiyanda Yesu nipumi mo ipa reepa lena kawaso laapo wisaya ei andisaya. Gupuma mo kawaso realinuri nimuna kawaso laapo minyapalaoma nimuna angona nu andapu randepeala pirisimiya. 3Gupuma Yesu nipu Saimono nipuna kawasona pua opasiao piri Saimono para lalore, Nena kawaso mo ipa kouna ongepusi mo parelele pu ma-puae, lisaya. Gupuma Yesu nipu mo kawasona piruma wenaalinu para Godena angelenu walisaya.

4Gonde angelenu walisaya ei pereyaomare Yesu nipumi Saimono para lalore, Neeme nena kawaso mo ipa kendo wia lena nena kawaso dalimi awari puae, lisaya. Gupuma nee pange nena anda muma ae nena amenu rapu nimina angona nu raayo go ipa para repali mealiminya lopalepae, lisaya.

5Gupi lisayanda Saimono nipumi nipuna angele yango liada ara lalore, Andaa alio, go rimbala andasuna naa raayosimi go angona nu raayo rana andapu go ipa para loparimapare repali ora komea mendasinda pange na-meama, lisaya. Go pamapare neeme lalore, Nimina angona nu raayo wala ipa para lopalepa, lalendare ora epeleale lopamonoae, lisaya. 6Go au pisimiya dinare nimumi repali ora waru andapu misimiyandare monde angona nu raayore rumbialumboma runguduame rapisaya. 7Gupisayanda mo kawaso mendana nimuna anda muma aeme amenu repara ki wangepuma nimu rambamula epenaya wi lisaya. Nimu ipumare mo repalinu raayosi mo kawaso laapona mu wisimiya eimi monde kawaso laapore ipa para kungiduame rapisipiya. 8Gupisaya ei andoma Saimono Pida nipumi yalame komala ara nipuna kalu andainyaoma Yesu para lalore, Realio, niri koae aunu puayo ali ayole, ni giaoma puae, lisaya.

9Saimono nipu rapu aisimiya alinu nimuna angona nu raayosi para repali waru andapu mu wisimiya ei andoma pururumi komala ara rungula mealo pambisimiya. 10Saimono nipuna anda muaisaya ameaya laapo niipuna bi Dieimusi para Dioni laapo niipu laapona arana bi Sepedi laapome pange rungula mealo pambisipiya. Go dinare Yesu nipumi Saimono para lalore, Neeme paala na-komape, lisaya. Akepeandare ambia go aoma puare neeme repali muaripi ei pereyala arare neeme wala alinu mealiae, lisaya.

11Go einare mo kawaso yolama mo ipa repaa lena ma-sumare nimuna olemole raayo minyapalaoma nipuna kou nane ara Yesu raluma paisimiya.

Yesumi kindi yainya ae ali menda ma-epeaisaya ei

(Madiu 8:1-4; Maka 1:40-45)

12Rana menda Yesu nipuri ree anda menda para aisaya. Go nipu aisaya anda parare kindi yainya komisaya ali menda aisaya. Go alimi Yesu andomare nipu repara epa kongeyala ara lalore, Andaa Alio, neeme rana pilindare ni ma-epealindare ana piliae, lisaya.

13Go lisaya angele pangoma Yesu nipumi nipuna ki rindapeaoma mo alina dona waraoma nipumi nipu para lalore, Na rana pea eiri nee ma-epealua, lisaya. Neme lalole nena kindi yainya komele ei pereya, lisaya. Go lisayandare go gole mo kindi yainya komisaya ei perelisaya. 14Yesu nipumi angele puri paloma nipu para lalore, Neme lalole neeme go pi eiri ali menda para ora na-la alape, lisaya. Neemere mo Gode repara alinau puaisimiya ali para puma nena do nipu para pua walapeae, lisaya. Gupuma mo wenaali mendame nena kindi yainya komele ei pereyana kone winya neeme Mosesi nipumi wape pea rupa neeme alinau pi ei ora pape, lisaya.

15Go angele lisayaparere wenaali raayome Yesu nipumi pisaya einu andasu raayo para la eiri pamisimiya. Go einare wenaali andapumi Yesu nipuna lisaya angelenu pangolame pange nipumi nimuna yainyanu ma-epeainya ipisimiya. 16Go pisimiyapare Yesu nipumi mo wenaalinu minyapalaoma mo weambi pi su para wenaali na-ae para puma Gode para yainya pulame puala pisaya.

Yesumi ki ange lupawi ali menda ma-epeaisaya ei

(Madiu 9:1-8; Maka 2:1-12)

17Rana menda Yesu nipumi wenaali para Godena angele walala-ainyare Parisi alinu menda para pange mo Rudule Angele waloaisimiya alinu pange pirisimiya. Go alinuri Galili andasu nane pange Diudia andasu nane pange Diurusaleme ree anda para aisimiya wenaali raayo ipuma epa pirisimiya. Go naarenare mo yainya komisimiya wenaalinu raayosi Yesu nipumi ma-epeainyayanda Realimi nipuna puri pale eiri Yesu para alisaya. 18Alinu menda parame ali menda nipuna ki ange lupawi ali menda rekena ma-ria ipisimiya. Nimumiri mo anda rupara ria puma Yesuna lee rona pua ruu sulameya pisimiya.

19Gupisimiyapare pola pisimiya porare wenaali waru andapumi rumbilisayandare mo ali nipuri anda rupara ria pope pora menda na-wisaya. Go einare mo alinumi anda kuluna opasiaoma pondea ma-siaoma mo alina do rekena ma-suma kopeme andima no wenaali angalapuna ora pawasi pingapema siainyada ara Yesu aisaya lena siainyaisimiya. 20Yesumi mo alinuna kone rulaisimiya ei andoma nipumi go ki ange lupawi ali para lalore, Alio, neme nee para lalo, neme nena koae einu raayosi pereyado, lisaya.

21Go au andoma mo Mosesimi Rudule Angelenu waloaisimiya alinu pange mo Parisi alinu pange nimuna nimunale angele angele waru andapu lalore, Mo Gode para ero lae angelenu lada aliri apiyapae, lisimiya. Ali mendame koae einu pea ei Godeme komea mandana kone na-wiliae, lisimiya.

22Gupuma mo alinumi kone wisimiya eina Yesu nipumi ambala kone suma nimu para lalore, Akepeanda nimina kone para go konenu sialemepae, loma angaa misaya. 23Go eina Yesu nipumi mo alinu para lalore, Go angele laapona yapa pi eiri ayapiyapae, lisaya. Nena koae aunu pele ei Godeme kone na-wilia lape ei yapa peapae, o rekoma pu lape ei yapa peapae, loma angaa misaya. 24Go peapare neme nimi repara Alina Simi go suna koae aunu kone na-siape eina puri wia lo nimi repara neme wadoa, lisaya. Go einare Yesu nipumi monde ki ange lupawi ali para lalore, Neme nee para lalole ambia rekoma nena reke ma-ria nena anda puae, lisaya.

25Go einare goleme mo wenaalina lee rona monde ali rekoma mo nipu palisaya reke ma-ruma nipuna anda nane pula arere Godena bi ma-minyasia eiri paisaya.

26Go ei andoma monde wenaalinuri rungula mealo waru pamboma nimu pururumi komala ara Godena bi minyasiaisimiya. Go pula ara nimumi lalore, Ambiare naame na-ande epe aunu waru andamae, lisimiya.

Yesu nipumi Lipai misaya ei

(Madiu 9:9-13; Maka 2:13-17)

27Gupuma werepena Yesu kama opalumba pula ara dakisi muni muaisaya ali menda nipuna bi Lipai#5:27 Lipairi Madiu nipuna bi menda. andisaya. Go aliri mo dakisi muni muaisimiya anda para pirisaya. Yesu nipumi Lipai para lalore, Ni ralu ma ipuae, lisaya. 28Go eina Lipai rekoma nipuna alenda alenda raayosi giaoma Yesu raluma paisaya.

29Gupuma Lipai nipumi nipuna anda para Yesuna enda andaai menda pambaisaya. Go dinare mo dakisi muni muaisimiya alinu andapu pange pa alinu menda pange Lipai nipuna anda para piri Yesu rapu enda nisimiya. 30Parisi ali menda parame pange Parisi alinuna repaa Mosesimi Rudule Angele waloaisimiya alinumi Yesu nipuna kou nane raluaisimiya alinu para angeleme awanali pisimiya. Nimumi mo alinu para angaa meala ara lalore, Mo dakisi muni muaeme alinu pange mo wenaalimi raname na-komoaeme wenaalinu nimi rapu mendaa para piri enda ipanu akepeanda nalemepae, loma angaa misimiya.

31Go einare Yesu nipumi nimuna angele yango liada ara lalore, Mo wenaalinu menda para yainya na-komelemendare dokeda alinu para na-puaemepare ora yainya komoaeme wenaalinu komea dokeda ali para puaeme, lisaya. 32Ni epe auri epe rupa aema leme wenaalinu nimuna ambala ao-paluae rupa giaoma nimuna koae aunu kepedapa doameya na-epawapare ni epe auri wenaalimi raname na-komoaeme repaa nimuna ambalana ao-paluae rupa giaoma nimuna pa aunu kepedapa doameya epawa.

Gode para kone sulameyanda koro menda enda na-noaisimiya eina angaa misimiya ei

(Madiu 9:14-17; Maka 2:18-22)

33Gore wenaali menda paranumi Yesu para gurupa lisimiya. Dioni nipuna kou nane raluaeme alinumi pange mo Parisi alinu nimuna kou nane raluaeme alinumi pange rana andapu Gode para kone sulameyanda enda na-nala pala puaeme pange Gode para yainya pala puaeme, lisimiya. Go peaparere nena kou nane raluaeme alinumiri go au na-pi nimumi enda ipanu pa noaeme, lisimiya.

34Go eina Yesu nipumi nimuna angele yango liala ara go angele lisaya. Nimina konemere ali mendame wena pena lamuma piri enda pambala ara nipuna andami wenaali wi deandare mo ali pena pa pirinya pange mo wenaali enda na-nelemepae, lisaya. Ora diae, lisaya. 35Go peapare mo ali pena wenaali mendame pane karu polapeme naare menda epelea dinare gore go naarenare Gode para kone siala ara nimimi enda na-nala pilimi, lisaya.

36Ali menda nipumi nipuna ambalana aka ma-indipiaomare nipumi nipuna pena aka rungulu muma na-rambudia, lisaya. Nipumi go au piliandare gore nipumi nipuna pena aka rungudia pange mo pena aka mo ambalana aka mandaa rambudiandare mendaa yongalena ridia, lisaya. 37Gurupare ali mendame ambaisena mena yongaleme wari karumbi para kanga waini ipa na-koyo pambelea, lisaya. Go au piliandare mo pena waini ipa rari pupula ara mo ambaisenande mena yongale karumbi ma-koyalia, lisaya. Go au piliandare mo mena yongale karumbi padulalumboma mo waini ipa koyalumbelea. Gupuma mo mena yongale karumbi rongona mo penande waini ipa rongona koyalia, lisaya. 38Go einare pena waini ipare pena mena yongale karumbina koyo pambelea, lisaya. 39Mo ambalana waini ipa noae alimiri mo pena waini ipa na-nelea, lisaya. Akepeandare nipumi ambalana waini ipare epelea, dea, lisaya.

Currently Selected:

Luka 5: POLENT23

Highlight

Copy