Luka 6

Diu wenaalina koro piri naarena pupudengi nala eina lora pisimiya ei

(Madiu 12:1-8; Maka 2:23-28)

1Rana menda Yesuri Isaraelimi mandu rangala pae wenaalina koro piri naarena guni e mapu runa wisaya porana paisaya. Go dinare Yesu nipuna kou nane raluaisimiya alinumi mo guni kilinu rungula muma nimuna kinumi okopema go guni kilina yongale rumbala ara go guni kilisinu rangema nisimiya.

2Gupumare go para aisimiya Parisi alinumi nimu para angaa meala ara lalore, Naana Mosesimi Rudule Angeleme lala ara naana koro piruae naarena naana Rudule Angeleme na-pipape lea aunuri akepa pimipae, loma angaa misimiya.

3Yesumi nimuna angele yango liada ara lalore, Nimimi mo Godena angele wia buka rupara Deipidi nipumi nipuna alinu rapu koro mendana reame komala ara pisaya eiri na-yarepeamepae, lisaya. 4Deipidi nipuri mo Godena anda para konda pambala puma nipumi Gode para alisimiya enda pua muma nipuna alinu para alisayandare nimu raayosimi pange pa nisimiya, lisaya. Gupisimiyapare naana Mosesimi Rudule Angeleme lalore, Go endare wenaali mendame na-napeyapare Gode repara alinau puaisimiya alinumi komea mandana neleme, leapare nimumi reame ora komala ara pa nisimiya, lisaya.

5Go einare Yesu nipumi angele pereyada ara lalore, Alina Si Nakiri mo koro pia naarena Reali ayae, lisaya.

Ki lupawi alina angele lea ei

(Madiu 12:9-14; Maka 3:1-6)

6Isaraelimi mandu rangala pae wenaalinuna koro piri naare mendana Yesuri Godena angele kuruaisimiya anda rupara pua konda pamboma anda rupara pirisimiya wenaali para Godena angele walisaya. Gupuma popeke nane ki lupawi ali menda go para aisaya. 7Mo Mosesimi Rudule Angele waloaisimiya alinu pange Parisi alinu menda parame nimuna koro piri naarena Yesumi wenaali menda ma-epeadapae, lo andae wisimiya. Akepeare Yesu nipumi papenaya au pia, loma ma-rialuame andae wisimiya. 8Gupisimiyapare Yesumi go alinuna kone wisimiya einu kone suma mo ki lupawi ali para lalore, Mo wenaalina lee wilina epa reka ae, lisaya. Go einare monde aliri rekoma mo wenaalina lee wilina pua reka aisaya. 9Gupuma Yesu nipumi mo alinu para lalore, Neme nimi angaa mealo, lisaya. Naana Mosesimi Rudule Angeleme mo koro piri naarena pipape lisaya alenu ale rapunuyapae, lisaya. Naana koro piri naarena naame wenaalinu rambamilimapae o ma-koyalima. Naame ali menda komapanaya rambamilimapae o lu ma-komalima, loma angaa misaya. 10Gupuma Yesu nipumi mo wenaali raayome nipuna angele yango diamepae loma andomare monde ki lupawi ali para lalore, Nena ki rindapea, lisaya. Mo ali nipumi nipuna ki rindapeaisayandare nipuna ki epelisaya.

11Go einare mo alinumi nimuna wili para londo awanda nimuna nimunale Yesu para ake au paminyapae, lisimiya.

Yesumi aposolo alinu misaya ei

(Madiu 10:1-4; Maka 3:13-19)

12Go dina Yesu nipuri Gode para yainya pulame su runduna paisaya. Go rimbala raayore nipumi yainya pa palainya yapi kepelisaya. 13Naare opisayandare mo nipuna kou nane raluaisimiya alinu raayosi wi loma mombelisimiya dinare go rupara ki laapo pereya angena laapo alinu mealo ara lalore, Nimiri na angele ma-puao-aeme alinu alepape, loma lisaya. 14-16Go Yesu nipuna angele ma-puao-aeme alinuna binuri go ei. Saimono, nipuna bi mendare Pida pange Pidana ame nipuna biri Anduru pange Dieimusi pange Dioni pange Pilipi pange Badolomiu pange Madiu pange Domasi pange Alipiasina naki Dieimusi pange Saimono nipuna bi mendare Selode pange Dieimusina naki Diudasi pange Isakariodina naki ande Yesu liinyayanda yanda rombisayande ali nipuna bi Diudasi pange alinu raayo Yesumi muma ma-isaya.

Yesu nipumi yainya ae wenaalinu ma-epeaisaya ei

(Madiu 4:23-25)

17-18Gupuma Yesu nipumi muma ma-aisayande alinu rapu monde su runduna aoma ipuma nimuri epe rendepole palu menda wisaya lena nipuna kou nane raluaisimiya alinu waru andapu rapu Yesu pua reka aisaya. Go dinare Diudia andasu raayo wenaali andapu pange Diurusaleme ree anda wenaali andapu pange Yesu para ipisimiya. Gupuma mo ipa lee andaaina repara aisipiya ree anda laapo menda niipuna bi Daya pange Saidoni para aisimiya wenaali pange andapupe ipisimiya. Nimumiri Yesu nipumi wada angele pangolame pange nipumi nimuna yainya komoaya einu ma-epeainyayanda go lena epa mombea aisimiya. Go dinare mo koae remome kenda ma-paisaya wenaalinu pange Yesu para ipisimiyandare Yesu nipumi mo wenaali ma-epeaisaya. 19Gupuma yainyanu ma-epeape puri kongapu Yesu para aoma opalumba ipuma mo wenaalinu ma-epeaisaya. Go pisaya ei andoma mo wenaali raayome Yesu waraluame rapisimiya.

Raname komape ei pange ree lape ei walisaya ei

(Madiu 5:1-12)

20Gupuma Yesu nipumi nipuna kou nane raluaisimiya alinu andala ara lalore,

Nimi narali wenaali nimiri

Godena Ki Rambuao-aya Eiri nimina eiyandare

nimiri yakili wenaali aemeae, lisaya.

21Nimi ambia reame komaleme wenaali

nimiri yakili aya.

Akepeare reesi para

nimiri romba ma-alia, lisaya.

Nimi ambia ree dame wenaali nimiri yakili aya.

Akepeare nimimi reesi para giri deme, lisaya.

22Gurupa alinu menda parame

nimi go Alina Si Naki raluaemenda nimi para

rono pangoma koae konenu wilimi pange

nimi raidimi pange ero angelenu nimi para deme

pange nimina binu pa rupa ma-alimindare

nimi yakili aya, lisaya.

23Gode nipumi nipuna aya naneyame nimina yangi

ora andaai andere-ayale, ali mendanumi nimi para

go koae au pilimindare gore nimi ki liala ara

yaisanu loma raname komalepape, lisaya.

Ambaisenande monde koae au puaeme alinuna

apa kasuanumi pange mo Godena poropedi alinu

para pange ora mendaa au puaisimiya, lisaya.

24Go peapare nimi ambia naarena aeme

amo wenaalinuo, yarae.

Nimimi ambia keae la ao-paluaeme eiri

go peredandae, lisaya.

25Nimi ambia naarena enda no ma-rumbiao

paluaeme wenaalinuo, nimi yarayoae.

Werepe nane nimimi enda nape ale diayoma

reame komeleme, lisaya.

Nimi ambia raname komoma

ao-paluaeme wenaalinuo, yarayoae.

Nimimi nimina pumi yarame komoma kamo kiruma

ree deme, lisaya.

26Ambia wenaalinumi nimina angele

lao-alimindare nimi yarayoae.

Akepeandare ambaisena gonde wenaalinuna apa

kasuanumi mo Godeme angele ropo puma

wenaali makeada ara payapo angele loaisimiya

alinuna bi mea minyasiaisimiya rupae, loma lisaya.

Yanda runguli alinu para pumi komala ei

(Madiu 5:38-48; 7:12)

27Go eina neme nimi neme lalo angele pangopa pimi wenaalinu nimi para lalo. Nimina yanda rungulu-ao-aeme alinu para pumi komalepape. Gupuma nimi para yanda lulolo pu-ao-aeme alinu parare epe aunu komea pipape, lisaya. 28Nimi ma-ademe repaare nimu yakili alepape pange nimi ma-koyao alimi repaare Gode para yainya pala pipape, lisaya. 29Ali mendame nena pae mendane diandare mendane pange liinya walape, lisaya. Ali mendame nena mandaa aka miliandare nena oro para aka pange nipumi pa minya alape, lisaya. 30Ali mendame nee repara ale menda gi loma konge demendare nimu para alape, lisaya. Ali menda nena ale menda miliandare nipu para na olemole wala ginya na-lape, lisaya. 31Nimimi ali yangonumi nimi repara nimumi pinya kone suaeme rupa mandana nimimi nimu repara mendaa au pipape.

32Nimimi nimi para pumi komaleme wenaalinu repara komea pumi komelemendare nimiri gore Godeme yangi akepea giliayapae. Nimi pange rando menda dia. Koae aunu puaeme alinumi nimu para pumi komeme alinu repara pange pumi komoaeme.

33Gupuma nimimi nimi para epe aunu pimi wenaalinu repara komea epe aunu pilimindare gore Godeme yangi akepea giliayapae, lisaya. Nimi pange rando menda dia. Mo koae aunu puaeme alinumi pange go aunu go rupa puaeme, lisaya. 34Nimimi ale menda mo rundu wala giapeya alinu para komea rundu ademendare, nimina koneme mo alinumi wala ni parare wala gilimi, kone sialemendare akepeanda nimiri gore Godeme yangi akepea giliayapae, lisaya. Nimi pange rando menda dia. Mo koae aunu puaeme alinumi pange mo koae aunu puaeme alinu para olemole rundu ademendare nimumi go mendaa rupa olemole wala mulameyanda puaeme, lisaya. 35Gurupa na-pipape, lisaya. Nimimi nimina yanda rungulu-ao-aeme alinu para pumi komoma nimu para epe aunu komea pipape, lisaya. Nimimi wenaali menda para ale menda rundu ademendare nimimi go ale menda wala ginya, kone na-sialepape, lisaya. Go aunu pilimindare Gode nipumi nimi para yangi andaainu guma pange so yaa mandaa puri waru pale ora ririna Godeme nimi ora nipuna si nakinu ao-alimi, lisaya. Akepeandare Gode nipumiri nipuna angelenu na-pangoma ranae angele na-loaeme wenaalinu pange mo koae remona ree aunu waru pimi alinu para pange epe au komea puaya, lisaya. 36Go einare nimina Apa nipumi nimi para yarame komala ara rambamea rupa nimimiri alinu menda para pange yarame komola ara rambamealepape, lisaya.

Wenaalimi gole wenaali rali pi eina Yesumi angele lee ei

(Madiu 7:1-5)

37Yesumi lala ara lalore, Wenaalinu na-rali pipape. Nimimi wenaalinu rali pulolo pilimindare gore Godeme nimi rali pilia. Wenaalinu na-ma-rialepape. Nimimi wenaalinu ma-rialimindare gore Godeme nimi mendaa au pilia. Menda mendame koae aunu pilimi einu repara kone na-wilimindare gore Godeme nimimi koae aunu pilimi einu repara pange kone na-wilia. 38Menda repara ale menda pakama ademendare gore Godeme nimi repara nipu epeala ara andapupe nimi repara mandu gilia. Akepeare nimina ademe rupa manda mumare Godeme nimi gurupa gilia.

39Go lisayandare Yesu nipumi nimu para siapi angele menda lala ara lalore, Lee rumbu pi ali mendame lee rumbu pi ali menda karu pula ara pora walalore ana na-pilia, lisaya. Go aliri gurupa peleandare niipu laapore ipa angena para lopelepe, lisaya. 40Mo waloae alina angele pangoae ali menda paramere nipuna waloaya ali angulape-na-ya, lisaya. Go peapare go waloae alimi nipuna kou nane raluae ali para wada einu raayo peredeandare nipumi nipuna waloae ali mandana alia, lisaya.

41Nena lee para polopelea repana rombe na-ande arare wala nena yangona lee para ralea onge kodosiri akepea andaluameya lalepae. 42Neeme mo nena lee para polopelea repana rombe pa polopele-ainyare nena ame para lalo ara lalore Neme nena kodosi pea ei kunu rumbano lea auri akepa lalepae. Neere yayapi angele waru loale ali ae. Ririnare nena lee para polopelea repana rombe ambala pane mupape. Gupuma nena leeme waru andala arare gurupa mo nena yangona lee para ralea kodo gurupa werepe wamopape, lisaya.

Repana pange nipuna kili laapona angele lee ei

(Madiu 7:16-20; 12:33-35)

43Yesumi lala ara lalore, Epe repana mendamere koae kilinu na-edea pange koae repana mendamere epe kilinu na-edea, lisaya. 44Repana raayore go repanayana lore nipuna kilimi la gilia, lisaya. Nimimi poke kili radoameyare mambo reke aya repanana poke kilinu na-rademe pange waini kilinu radoameyare mo kapa para ao-aya kalipu rekena mo waini kilinu na-rademe, lisaya. 45Epe alimiri nipuna pu para wia epe aunu kama nane penameyao wadea, lisaya. Koae alimiri nipuna pu para wia koae aunu kama nane penameyao wadea, lisaya. Nipuna angaa para dea alenuna reere nipuna pu para wia, lisaya.

Anda eloaepe ali laapona angele lee ei

(Madiu 7:24-27)

46Yesu nipumi lala ara lalore, Nimimi neme lalo aunu na-piri wala ni para Reali, Reali, piri akepea loaemepae, loma angaa misaya. 47Menda apimi ni repara ipuma na angele pangoma piliandare neme nimi nipu go aliyana lo neme wadoa, lisaya. 48Nipuri ali menda nipuna anda edoameyare su ambala awoma anda keeranu nongopema kana ma-mu pamboma puri ma-palaisaya ali mandana. Ipa raa ipulu ara ande anda epa lande awo rumbisayapare ande anda na-yoko ria paisaya. Akepeare mo andare epe rupa elesiaya. 49Go peapare menda apimi na angele na-pangoma piliandare gore nipuri ali mendame anda edoameyare su na-awoma kana pange na-mu pamboma anda keera koma nongopelisaya ali mandana. Monde ipa raa ipisaya dinare ande anda rana kome epa yoko rumbisaya. Ande anda rombala ara ee andapu laya, lisaya.

Currently Selected:

Luka 6: POLENT23

Highlight

Copy