Mata 28

Hyati akwa Ntǝnti ni

(Mar 16:1-10; Luk 24:1-12; Yaw 20:1-10)

1Aghǝla vǝr Sǝbdu ni, tǝ daka baditsǝni mpǝli ata vǝr nam tang nǝr magu, Maryamu Magǝdaliya aka Maryamu nam damwa nda ka mwari lǝka wul kul ni.

2Tǝkǝma ndǝ ka 'ya kǝngǝrǝr dai, akuya tǝ ndǝr hyantǝr Hyal nǝr Thlaku ni tara sǝgǝl atahyal, ka mbiyanta paya nam ata nya kulɛ ni ka ndzai ata kǝri. 3Dludzǝrni ani apa makǝi, ba lǝkutǝrni mwapu tǝyal apa mpurpwawa. 4Ndzǝr sǝkɛ yarni kǝ hyivǝr tǝni aka dǝna nam tǝ dar kǝgǝdzi ka ndzai apa ndzǝ ntǝnti.

5Ndǝr hyantǝr Hyal ni ka nkǝrɛ ala mwahyi yarni, “Ta gǝri ta hyivǝr mai, akuya Yi zǝndi apǝri gǝri ada bara Yɛsu, nam tǝ ndǝ tara kukwanta ni. 6Dzǝ adi akwani wɛ; dzǝ hyati, tsu apa tǝ dzǝ tara nkǝrɛ. Azǝramɛ ka gǝri wula vui nam tǝ ndǝ tara panyi tǝni akwa. 7Antǝ mwaramɛ bǝtǝbǝtu ka gǝri lǝka gha ala ndzǝr nuwurni apǝri, ‘Dzǝ hyati akwa ntǝnti ba dzǝ ata mwari akwa Galili kǝma ta gǝri. Gǝri ata lǝka wula tǝni akwanda.’ Nda Yi kǝ kurta gha ala gǝri.”

8Ani mwahyi yarni ka tǝra ka ngyar kul ni aka dzala, ba hyivǝr tǝ dar ka ghǝi aka kutsari, ba dar ka whuiya lǝka gha ala ndzǝr nuwurni. 9Tǝkǝma Yɛsu ka kǝɓai aka dar. Dzǝ ka nkǝrɛ, “Ka ndzai lapiya ndzai adzǝ gǝri,” Dar ka si adzǝni, ka thlaba thlǝlari ka vǝkǝr sǝlai alari. 10Antǝ Yɛsu ka nkǝrɛ ala dar, “Ta gǝri ta hyivǝr mai. Mwaramɛ ka gǝri lǝka gha ala madar mana ka dar mwari akwa Galili; dar ata wula tǝra akwanda.”

Ndzǝr Sǝkɛ ni Si aka Labar

11Sakatǝ mwahyi yarni ata kǝra mwari, laka ndzǝr sǝkɛ ni ka mwari akwa kuta mǝlmɛ ka nkǝrɛ ala nggar fǝrist yarni sanga sǝ nam tara 'ya. 12Sakatǝ nggar fǝrist yarni ka tsaɓtsǝnidzi kaka ndzǝ nam ngga-ngga yarɛ ka ɗǝmhǝ apǝri dar ata la kwapa hang ala saudza yarni, 13dar ka gha ala dar, “Ka gǝri gha ala ndzi apǝri, ‘Ndzǝr nuwurni ani si avǝrvǝri ka hǝlti tǝni sakatǝ yar ata hanyi.’ 14Ma labar ǝni ɓui gumna ni, yar ata nkǝrɛ alari ka kǝlba tǝ gǝri akwa bwanai.”

15Ani saudza yarni ka dlutsi kwapa ni ka 'yati apa tǝ ndǝ tara gha ala dar. Ba ndǝr ǝni ka kikilntadzi akwa ntsa ndzǝr Yahudi har ba asǝna.

Yɛsu Tsantǝdzi ala Ndzǝr Nuwurni

(Mar 16:14-18; Luk 24:36-49; Yaw 20:19-23; 'YaSu 1:6-8)

16 # Mat 26:32; Mar 14:28 Antǝ ndzǝr nuwurni kumɛ kasutang ni ka tǝra akwa Galili, ata paya vui nam tǝ Yɛsu tara gha ala dar ka dar mwari. 17Sakatǝ dar tara wula tǝni, dar ka vǝkǝr sǝlai alari; ama laka akwa ntsa dar tsu aka dzamɛ akwa ɗǝfa dar. 18Antǝ Yɛsu ka si adzǝ dar ka nkǝrɛ, “Sanga wada nam atahyal ba akwa dunya ndǝ kǝ hamnta alai. 19#'YaSu 1:8Kadǝbar ǝni mwaramɛ ka gǝri mǝrti sanga ndzi ka dar ndzai ndzǝr nuwɛ, ka gǝri 'ya bamtizǝma ala dar akwa thlǝma Tada ba nǝr Zǝr ba nǝr Mambǝl Kartǝ, 20ba ka gǝri hyipɛ ala dar ka dar ngandǝrǝr kǝlara sǝ nam tǝ Yi tsau ala gǝri. Ba dzǝri Yi kaka gǝri tatang, har kurǝr zaman.”

Currently Selected:

Mata 28: CKL

Highlight

Copy