Mata 27

Yahuda Hai Kǝrni

(Mar 15:1; Luk 23:1-2; Yaw 18:28-32)

1Tsu kula-kula mbǝk, sanga nggar fǝrist yarni ba ndzǝ ngganggar ndzi ka mbwai nya ata kǝra Yɛsu ka dar tsi tǝni. 2Dar ka mbwai tǝni, ka pwar tǝni alǝba ka hamnta tǝni ala Pǝlatus, gumna ni.

3 # 'YaSu 1:18,19 Sakatǝ Yahuda, ndǝ nam tara ɓǝlai tǝni, tara wula apǝri ndǝ kǝ kurta mbwai ka thlanta tsi Yɛsu, dzǝ ka pali ɗǝngar ni ka ɓakta ɓiti aka kwapa mwapu makǝr thlani ni ala nggar fǝrist yarɛ ba ndzǝ ngga-ngga yarni. 4Dzǝ ka nkǝrɛ, “Yi kǝ 'ya biku, akuya Yi kǝ ɓǝlai ndǝ nam kura aka aibai ka ndǝ tsai.”

Ama dar ka nkǝrɛ alari, “Mǝ lambwar yar akwa?” ndǝ dar. “Ənda mbi nǝngɛ.”

5Ani Yahuda ka punta kwapa mwapu ni akwa fǝr Hyal ka ngyar. Antǝ dzǝ ka tǝra alǝba ka hai kǝrni.

6Nggar fǝrist yarni ka ɗǝmnti kwapa mwapu ni ka nkǝrɛ, “Adi kal-kal ala mabari ni ka ndǝ pu ǝni akwa bitǝmbal wɛ, kadǝbar dzǝ kwapar masi.” 7Ani dar ka ɗǝmhǝi ka kǝthlǝr aka kwapa ni ka ɗǝlba babalǝr ndǝr hǝn tughum ka dzǝ ndzai vui har mǝthlǝɓi yarɛ. 8Ani sǝ nam tara 'ya tǝ ndǝ ada kǝga Babalǝr Masi ni har asǝna. 9#Zak 11:12,13Antǝ sǝ nam tǝ ndǝ gha atar Irimiya nabi ni kǝ ghǝiyabadzi: “Dar kǝtǝ kwapa mwapu makǝr thlani ni, nam kǝ ndzai lǝbaya ni nam tǝ ndzǝr Izǝraila tara ɗǝlnta tǝni kari, 10ba dar kǝthlǝr akǝri ka ɗǝlba babalǝr ndǝr hǝn tǝghum ni apa tǝ Thlaku tara tsau alai.”#27:10 Wul Iri. 19:1-13; Iri. 32:6-9

Yɛsu Akǝma Pǝlatus

(Mar 15:2-5; Luk 23:3-5; Yaw 18:33-38)

11Antǝ Yɛsu ka hyati akǝma gumna ni, ba gumna ni ka yu tǝni, “Gǝ dza kuhyir ndzǝr Yahudi ni ya?”

Yɛsu nkǝrɛ, “A, apa tǝ gǝ gha.”

12Ama sakatǝ nggar fǝrist yarni ba ndzǝ nam ngga-ngga 'ya bǝrkwɛ ata kǝrari, dzǝ ta nkǝr mima wɛ. 13Antǝ Pǝlatus ka yu tǝni, “Gǝ ta ngati sǝ yar nam tǝ dar ada nkǝrɛ ata kǝra gǝ ni wɛ?” 14Ama Yɛsu ta kalaktsǝni wɛ, wala ala kǝlara bǝrkwɛ ni wɛ—gumna ni ka ndatǝdzi aka dǝna.

15Akwa sakar Wudzǝr Ngǝmba gumna ada sǝnta ndǝr fǝrsǝna pathlu nam tǝ dlamiyir ndzi ni tara bara. 16Ata saka ǝnda dar aka ndǝr fǝrsǝna laka pathlu nam tǝ ndzǝ hang tara zǝndi tǝni aka 'ya kulɗakur, tǝ ndǝ ada ka tǝ Barabas. 17Ani sakatǝ dlamiyir ndzi ni tara tsaɓtsǝnidzi, Pǝlatus ka yu tǝ dar, “Ndǝ madi tǝ gǝri ada bara ka Yi sǝnta ala gǝri: Barabas kǝna Yɛsu nam tǝ ndǝ ada kǝga Kǝrsti?” 18Akuya dzǝ kurta zǝndi apǝri ndzǝr Yahudi kǝ hamnta Yɛsu alari akuya tǝ dar ada sǝlku ata kǝrari.

19Sakatǝ Pǝlatus ada ndzai ata sǝr ndzaiyir haka ni, mwalarni ka hyanti alari kuɗahu ǝni, “Ta gǝ ta 'ya kǝlara su ala ndǝ nda kura aka aibai ni, akuya Yi kǝ ɗar bwanai nam dzau asǝna akwa sǝni kadǝbar ni.”

20Ama nggar fǝrist yarni ba ndzǝ nam ngga-ngga yarɛ ka mbuti ɗǝfa dlamiyir ndzi ni ka dar kǝgyɛ ka Pǝlatus mpǝlnta ala dar Barabas ka ndǝ tsi Yɛsu.

21“Madi akwa ntsa ndzǝ ni sǝɗǝ ni tǝ gǝri ada bara ka Yi sǝnta ala gǝri?” tǝ gumna ni yuwɛ.

Dar ka puti lǝlɛ, “Barabas!”

22Pǝlatus ka nkǝrɛ, “Mǝ tǝ Yi awa 'ya, dzá, aka Yɛsu nam tǝ ndǝ ada kǝga Kǝrsti?”

Sanga dar ka puti lǝlɛ, “Ka ndǝ kukwanta tǝni!”

23Ama Pǝlatus ka yu, “Kami? Sǝr mi kulɗa tǝ dzǝ tara mǝrti?”

Ama dar sang ka haɓǝti kuɗahu aka dǝna, “Ka ndǝ kukwanta tǝni!”

24 # Mab 21:6-9 Sakatǝ Pǝlatus tara wula apǝri sǝ tǝ dzǝ tsu awa 'yati kǝra adi wɛ, ama tar mpa ani ata hyati, dzǝ ka kǝtsi yimi ka kǝtsǝnta tsiyari akǝma dlamiyir ndzi ni. Dzǝ ka nkǝrɛ, “Yi adi aka aibaiyir masǝr ndǝ ǝni wɛ. Kǝ mbi nǝgǝri!”

25Sanga ndzǝ ni ka sǝnau, “Ngyar ka masǝrni ndzai ata kǝra yar ba ata kǝra madar yar!”

26Antǝ dzǝ ka sǝnta Barabas ala dar. Ama dzǝ hau ka ndǝ ngurtsǝni Yɛsu, ba dzǝ hamnta tǝni ka ndǝ kukwanta tǝni.

Saudza yarni Ɓǝl Magular Zǝla Yɛsu ni

(Mar 1:5; 16:20; Yaw 19:2-3)

27Antǝ saudzar gumna ni ka mwari aka Yɛsu ata whurkǝiyir gumna ni ka tsaɓtsǝni sanga hangkur saudza yarni ka dlǝti tǝni. 28Dar ka ngunta lǝkutǝrni ka hadzǝ lǝkutu magza alari, 29ba dar ka mǝrti aliyapǝr ntsǝkǝɗa ka ntsakur ata kǝrari. Dar ka hau zuwa akwa tsisǝmari ba dar ada zǝɗi akǝmari ka ɓǝl magula alari. Dar ka nkǝrɛ “Bundi, akwa kuta barka ngɛ, kuhyir ndzǝr Yahudi!” 30Dar ada kifǝ nkyǝli ata dza, ba dar ada dlutsi zuwa nam akwa tsiyari ka tsa tǝni akwa kǝrari atakǝr-atakǝr. 31Aghǝla tǝ dar tara kurai ɓǝl magular zǝla tǝni, dar ka ngunta lǝkutu ni ka hadzɛ alari lǝkutǝrni. Antǝ dar ka tǝra aka dza abǝla akuya ka dar lǝka kukwanta tǝni.

Ndǝ Kukwanta Yɛsu ni

(Mar 15:21-32; Luk 23:26-43; Yaw 19:17-27)

32Sakatǝ dar ata kǝra lǝba, dar ka kǝɓai aka ndǝr Kairani laka nam tǝ thlǝmari Simaun, ba dar ka ntsakǝr alari ka dzǝ kǝl undzum kadlǝkadlɛ ni. 33Dar ka si ata vui nam tǝ ndǝ ada kǝga Gwalgwathla (nam ada nkǝrɛ Vui ni nǝr Hahai Kǝr). 34#Zab 69:21Akwanda dar ka la Yɛsu yimǝr inabi ka dzǝ sa, gwazǝgwazi aka sǝ nam ɗǝwatu; ama aghǝla tǝ dzǝ ɗar tǝni, dzǝ ka ngǝla sa. 35#Zab 22:18Sakatǝ dar tara kukwanta tǝni, antǝ dar ka ndǝghǝi lǝkutǝrni yarɛ atar dza nǝbwa. 36Ba dar ada ndzai akwanda ka ɓǝla tǝni. 37Ati ata kǝrari dar kukwai rǝbwa-rǝbwa sǝ nam tǝ ndǝ bǝrku tǝni kari apǝri: ƏNI ANI YƐSU, KUHYIR NDZƏR YAHUDI NI. 38Ndǝ ka kukwanta ndzǝr fa whalɛ sǝɗɛ adzǝni, pathlu tǝbwar tsisǝmari ba pathlu tǝbwar tsi aghyari. 39#Zab 22:7; 109:25Ndzǝ nam ada kwatsǝni akwanda ada kǝngǝrnta kǝra dar, ka ngǝngǝl tǝni 40#Mat 26:61; Yaw 2:19ka gha apǝri, “Gǝ nam ata whuzanta fǝr Hyal ka tsati tǝni akwa vǝr makǝr, mbati kǝrngɛ dzá! Ka gǝ sǝgǝl ata undzum kadlǝkadlɛ ni, ma gǝ dza Zǝr Hyal!”

41Tsu akwa whal ǝni nggar fǝrist yarni, malǝmǝr mabari yarni ba ndzǝ ngga-ngga yarɛ ka 'ya magular zǝla tǝni. 42Dar ka nkǝrɛ, “Dzǝ kǝ mbati ndzǝ laka, ama dzǝ ta mǝzi mbati kǝrni wɛ! Dzǝ ani Kuhyir ndzǝr Izǝraila ni! Ngyar ka dzǝ sǝgǝl ata undzum kadlǝkadlɛ ni kulini, ani muri ata mbǝrsa aka dza. 43#Zab 22:8Dzǝ mbǝrsa aka Hyal. Ngyar ka Hyal mbuli tǝni ma apǝri dzǝ yiɗǝ tǝni kulini, akuya dzǝ nkǝrɛ, ‘Yi ani Zǝr Hyal.’ ” 44Tsu akwa Whal ǝni ndzǝr fa whal yarni nam tǝ ndǝ tara kukwanta tǝ dar kaka dza ni yɛ dar kǝ ngǝngǝl tǝni.

Ntǝr Yɛsu ni

(Mar 15:33-41; Luk 23:44-49; Yaw 19:28-30)

45Ata saka kum kapu sǝɗɛ tǝ tsǝtsi talangkǝr, kuthlɛ ka mbui dai ni sanga har ka la saka makǝr nǝr tǝhaku. 46#Zab 22:1Apa saka makǝr Yɛsu ka haɓǝti kuɗahu nam ngga ka nkǝrɛ, “Ɛlaui, Ɛlaui, lama sabaktani?”—nam ada nkǝrɛ, “Hyalǝrna, Hyalǝrna, kami tǝ gǝ ngǝla tǝra?”

47Sakatǝ ndzǝ laka nam ada hyati akwanda tara ngati ǝni, dar ka nkǝrɛ, “Dzǝ ada kǝga Iliya.”

48 # Zab 69:21 Tǝkǝma pathlu akwa ntsa dar ka whuiya lǝka kǝtǝ sausau. Dzǝ ka ntsu akwa yimǝr inabi nam mwamwasu, ka barti ata zuwa nam dzǝgam, dzǝ ka haɓǝti ala Yɛsu ka dzǝ sa. 49Mambiya dar nkǝrɛ, “Kulini ngyar tǝni. Ngyar ka muri wula tar Iliya awa si ka dzǝ mbati tǝni.”

50Ba sakatǝ Yɛsu kǝ haɓǝti kuɗahu nam ngga kadamwa, ani mpikari ka sǝba.

51 # Sǝb 26:31-33 Ata saka nda, lapǝlai nam tara ndǝghǝba kuta fǝr nam akwa fǝr Hyal ni ntaudzi aka palai sǝɗɛ baditsǝni ati ka sǝgǝl aghǝli. Dai ni kǝngǝrtǝdzi ba paya yarɛ ka ntǝntantadzi. 52Kul yarɛ ka mbugǝrntadzi ba dzǝ yarɛ nǝr ndzǝr Hyal nam tara nti hang hyati aka mpikɛ. 53Dar ka sǝba akwa kul yarni, ba aghǝla hyatǝr Yɛsu akwa ntǝnti dar mwari alǝkwa mǝlmǝr Ursalima ba dar tsantǝdzi ala ndzǝ hang.

54Sakatǝ katsalar saudza kumthlani ni ba ndzǝ nam kaka dza nam ada ɓǝla Yɛsu tara wula kǝngǝrǝr dai ni ba sanga sǝ nam tara 'ya, dar kǝ ndatǝdzi aka dǝna, “Dzǝri dzǝ ani Zǝr Hyal!”

55 # Luk 8:2,3 Mwahyi hang akwanda, ada wulɛ tsu pǝɗǝm. Tǝ dar tara nu Yɛsu tsu akwa Galili akuya ka wulhǝ tǝni. 56Akwa ntsa dar ani Maryamu Magǝdaliya, Maryamu angǝra Yakubu ba Yusufu, ba angǝra madar Zabadi ni.

Har Yɛsu ni

(Mar 15:42-47; Luk 23:50-56; Yaw 19:38-42)

57Sakatǝ tǝhaku tara 'ya, ndǝ bǝrba laka tara hyati akwa Armathliya, thlǝmari Yusufu, nam tǝ dzǝ tǝ kǝrni dzǝ ndǝr nuwur Yɛsu. 58Ka mwari adzǝ Pǝlatus, dzǝ ka kǝgyǝ saiyir Yɛsu, ba Pǝlatus ka tsau apǝri ka ndǝ lari. 59Yusufu ka kǝlghǝl sai ni ka baru tǝni akwa bakta nam kǝtsǝkǝtsi, 60ka hau tǝni akwa kulǝrni nam bǝlin nam tǝ dzǝ thlaba akwa paya ni. Dzǝ ka bagǝlti paya nam ngga ka vǝnya ala kulɛ ni ka tǝrarni. 61Maryamu Magǝdaliya aka Maryamu nam damwa nda ada ndzai akwanda ata ngwama kul ni.

Ndǝr Sǝkɛ ata Nya kulɛ ni

62Sǝbar arpɛ, nam ani vǝr Sǝbdu, nggar fǝrist yarni kaka ndzǝr Farisi ka mwari adzǝ Pǝlatus. 63#Mat 16:21; 17:23; 20:19; Mar 8:31; 9:31; 10:33,34; Luk 9:22; 18:31-33Dar ka nkǝrɛ, “Bundi, yar ɗǝngati apǝri sakatǝ dzǝ tsu ata mpikɛ ndǝr hawi ndari nkǝrɛ, ‘Aghǝla vǝr makǝrkur Yi ata hyati kadamwa.’ 64Ani ka gǝ tsau ka ndǝ ɓǝlahǝ kulɛ ni ɗaku har ka la vǝr makǝrkur. Ani ka, ta ndzǝr nuwurni ta si ka hǝlti saiyirni atǝra ka dar gha ala ndzi apǝri dzǝ kǝ hyati akwa ntǝnti. Zǝla ǝni nam ata dǝnta ni ata 'ya dzau ta nam tangkǝma ni.”

65Pǝlatus ka nkǝrɛ, “Ka gǝri fatsi ndzǝr sǝkɛ, mwaramɛ, ka gǝri ɓǝlahǝ kul ni apa tǝ gǝri mǝzi.” 66Ani dar ka tǝra ka lǝka ɓǝlahǝ kul ni atar hyirti paya ni ka pui ndzǝr sǝkɛ.

Currently Selected:

Mata 27: CKL

Highlight

Copy