Mata 26

Mbwai nya ata Kǝra Yɛsu ni

(Mar 14:1-2; Luk 22:1-2; Yaw 11:45-53)

1Sakatǝ Yɛsu tara kurai sanga ndǝr yarni, dzǝ ka nkǝrɛ ala ndzǝr nuwurni, 2#Sǝb 12:1-27“Apa tǝ gǝri zǝndi, Wudzǝr Ngǝmba mbi vǝr sǝɗɛ—ba ndǝ ata hamnta Zǝr Ndɛ ka ndǝ kukwanta tǝni.”

3Antǝ nggar fǝrist yarni kaka ndzǝ nam ngga-ngga ka tsaɓtsǝnidzi akwa kǝiyir kuhyir fǝrist ni, nam tǝ thlǝmari Kayafas, 4ba dar ka 'ya sawari ka dar ngǝti Yɛsu akwa ɗǝwa-ɗǝwa ka dar tsi tǝni. 5Dar ka nkǝrɛ, “Ama adi akwa Wudzǝr ni wɛ akuya ta mpa ta hyati akwa ntsa ndzi.”

Ndǝ Pukǝr Mal ala Yɛsu akwa Baitanya

(Mar 14:3-9; Yaw 12:1-8)

6Sakatǝ Yɛsu akwa Baitanya akwa kǝiyir sal nam tǝ ndǝ zǝndi aka Simaun ndǝr pǝbai ni, 7#Luk 7:37,38mwala laka si adzǝni aka gira tǝ ndǝ 'ya tǝ alabasta ghǝi-ghǝi aka wardi nam tǝ ɗǝlari dzau, nam tǝ dzǝ pukǝr ala Yɛsu akwa kǝrari sakatǝ dzǝ ada ndzai akwa vui sǝm sǝr sǝmɛ.

8Ama sakatǝ ndzǝr nuwurni tara wula ǝni, ka sǝwati ɗǝfa dar. Dar ka yuwɛ, “Kami tǝ ndǝ ada gyalnta ǝni? 9Mal ǝni ndǝ ata mǝzi ka ɗǝlnta ka kwapa nam hang ka ndǝ ndǝghǝnta ala ngudi yarɛ.”

10Ama dzǝ zǝndi sǝ nam tǝ dar ada nkǝrɛ, Yɛsu ka nkǝrɛ ala dar, “Kami tǝ gǝri ada damitsǝni mwala ǝni? Dzǝ 'yati sǝ nam ɗaku alai. 11#Mab 15:11Gǝri kaka ngudi yarɛ adzǝ gǝri tatang, ama gǝri adi tatang aka Yi wɛ. 12Sakatǝ dzǝ pukǝr wardi ǝni alai, dzǝ 'yati ka dzǝ ɗǝmhǝ tǝra ka harɛ. 13Yi ada gha ala gǝri dzǝri, kǝlara vui nam tǝ ndǝ nkǝr ndǝrǝr Hyal nam sǝɗa ǝni akwa dunya, sǝ nam tǝ dzǝ 'yati ni ndǝ ata gha tsuwɛ, ka ɗǝngati tǝni.”

Yahuda Yiɗɛ ka Ɓǝlai Yɛsu

(Mar 14:10-11; Luk 22:3-6)

14Antǝ pathlu akwa ntsa kumɛ kapu sǝɗǝ ni—tǝ ndǝ ada ka tǝ Yahuda Iskaryauti—ka mwari adzǝ nggar fǝrist yarni, 15#Zak 11:12ka yuwɛ, “Mǝ tǝ gǝri ata lai ma Yi ɓǝlai tǝni ala gǝri?” Ani dar tsǝgaba alari kwapa mwapu makǝr thlani. 16Baditsǝni ka lǝkǝma Yahuda ada wul whal nam tǝ dzǝ ata hamnta tǝni ala dar.

Sǝr Sǝmǝr Tǝhaku nǝr Thlaku ni

(Mar 14:12-21; Luk 22:7-13,21-23; Yaw 13:21-30)

17Akwa vǝr nam tangkǝma nǝr Wudzǝr Mantsǝkǝl kura Thlǝlam, ndzǝr nu yarni ka si adzǝ Yɛsu ka yuwɛ, “Ama tǝ gǝ ada bara ka yar ɗǝmhǝi ala gǝ ka sǝm sǝr sǝmǝr Ngǝmba?”

18Dzǝ ka sǝnau, “Mwaramɛ alǝkwa kuta mǝlmǝ ni adzǝ sal laka ka gǝri gha alari, ‘Malǝm ni gha: Sakar ni tsanti apǝri kǝ 'ya kudzǝghɛ. Yi ata mwari ka sǝm sǝr sǝmǝr Ngǝmba ni kaka ndzǝr nuwurna ahar ngɛ.’ ” 19Ani ndzǝr nu yarni kǝ 'yati apa tǝ Yɛsu tara nkǝrɛ ala dar ba dar ka mwari ka ɗǝmhǝ sǝr sǝmǝr Ngǝmba ni.

20Sakatǝ tǝhaku 'ya, Yɛsu ada ndzai ata tɛbǝr kaka ndzǝr nuwurni kum kapu sǝɗǝ ni. 21Ba sakatǝ dar tsu ada sǝmɛ, dzǝ ka nkǝrɛ, “Yi ada gha ala gǝri dzǝri, pathlu akwa ntsa gǝri ata siya ɓǝlai tǝra.”

22Ɗǝfa dar ka sǝwa ba dar ka baditsǝni yu tǝni tǝ duku tǝ duku, “Dzǝri adi Yi wɛ Thlaku?”

23 # Zab 41:9 Yɛsu ka sǝnau, “Dzǝ ndǝ nam tǝ yar ada sǝmɛ akwa kwatǝm ani ata ɓǝlai tǝra. 24Zǝr Ndɛ ni ata nti tsu apa tǝ ndǝ rǝbwai ata kǝrari. Ama bwasam ala ndǝ ǝnda nam tara ɓǝlai Zǝr Ndɛ ni! Ata 'ya kudzǝ ala ndǝ ni kura ndǝ ta ya tǝni.”

25Antǝ Yahuda, ndǝ nam ata siya ɓǝlai tǝni ni, ka nkǝrɛ, “Kǝna Yi ya, Thlaku?”

Ani Yɛsu ka sǝnau, “A, ani gǝ.”#26:25 Wala “Gǝ tǝ kǝrngɛ kǝ nkǝrba.”

26Sakatǝ dar ata kǝra sǝm sǝr sǝmɛ, Yɛsu kǝtǝ mantsǝkǝl, ka usar Hyal dzǝ ka pupwasi, ba dzǝ la ndzǝr nuwurni, dzǝ ka nkǝrɛ, “Dlutsamɛ ka gǝri sǝmɛ; ǝni ani dzawai.”

27Antǝ dzǝ ka kǝtǝ kapu ni, dzǝ ka usar Hyal dzǝ ka hamnta ala dar, dzǝ ka nkǝrɛ, “Ka sanga gǝri sa akwa ǝni; 28#Sǝb 24:8; Iri 31:31-34Əni ani masǝrna nǝr sǝ mbwa-mbwa ni#26:28 Laka rǝbwar tsai yarɛbǝlin ni., nam ndǝ tara puntadzi akuya ndzǝ hang ka kyifǝnta biku yarɛ. 29Yi ada gha ala gǝri, Yi adi ata ɓakta sa yimǝr munyar fu ǝni kulini ka la vǝr ǝnda saka nam tǝ Yi ata sa nam bǝlin kaka gǝri akwa Kuhyikur Bana.”

30Sakatǝ tǝ dar tara kurai har hǝm Thlaku, dar ka mwari alǝba adzǝ Payar Zaitun.

Yɛsu Nkǝrɛ apǝri Bitrusu ata Ɓwalnta Nyarni

(Mar 14:27-31; Luk 22:31-34; Yaw 13:36-38)

31 # Zak 13:7 Antǝ Yɛsu ka nkǝrɛ ala dar, “Asǝna avǝrvǝri sanga gǝri ata siya whui atǝra ka ngyar tǝra, akuya rǝbwa-rǝbwa apǝri:

“ ‘Yi ata tsi ndǝr ɓǝla ni,

ba tǝma yarni nam akwa mǝtsǝɓǝ ni ata kikilntadzi.’

32 # Mat 28:16 Ama aghǝla tǝ ndǝ hyanti tǝra akwa ntǝnti, Yi ata mwari kǝma ta gǝri akwa Galili.”

33Ama Bitrusu ka sǝnau, “Wala ma sanga dar ata siya whui atǝra ka ngyar tǝngɛ, Yi adi saga whui tǝm wɛ.”

34Yɛsu nkǝrɛ, “Yi ada gha ala gǝ dzǝri, asǝna avǝrvǝri, kabutu vukum ta tuwa gǝ ata nkǝrɛ apǝri gǝ ta saga ta zǝndi tǝra wɛ ka makǝr.”

35Ama Bitrusu ka nkǝrɛ alari, “Wala ma Yi ata nti aka gǝ, Yi adi ata ɓwalnyar ngɛ wɛ.” Ba sanga laka ndzǝr nuwurni yarni nkǝrɛ tsu apani.

Gatsamani

(Mar 14:32-42; Luk 22:39)

36Antǝ Yɛsu ka mwari kaka ndzǝr nuwurni ata vui laka nam tǝ ndǝ ada ka tǝ Gatsamani, ba dzǝ ka nkǝrɛ ala dar, “Ndziyamɛ akwani, Yi ata mwari akwanda ka Yi 'ya aduwa.” 37Dzǝ ka tǝra aka Bitrusu ba madar Zabadi sǝɗɛ Yakubu ba Yawhana ata dǝrbari, ɗǝfari ka baditsǝni sǝwa ba damitsǝnidzi dzau. 38Antǝ dzǝ ka nkǝrɛ ala dar, “Ɗǝfawai dlidzi dzau har ka tsǝbti apa Yi awa nti. Ndziyamɛ akwani ka gǝri sǝkɛ kaka yɛ.”

39Dzǝ ka mwari alǝkǝma nkyiɗǝ laka, dzǝ ka dla tǝ kǝmari ata dai ka 'ya aduwa, “Bana, ma awa 'ya, ka gǝ kǝlnta kapǝr bwanai ǝni ata kǝrawai. Wala ahani adi apa tǝ Yi ada bara wɛ ama apa tǝ gǝ ada bara.”

40Antǝ dzǝ ka ɓakta si adzǝ ndzǝr nuwurni ka ɓui tǝ dar ada hanyi, dzǝ ka nkǝrɛ ala Bitrusu, “Dakurai gǝri adi ata mǝzi sǝkǝba su kaka yɛ nǝr auwur pathlu wɛ? 41Ka gǝri sǝkɛ ba 'ya aduwa ani ka ta gǝri ta ɗu akwa sǝr nkǝrti. Mambǝl ni ada bara, ama kumǝr dzɛ adi aka dǝna wɛ.”

42Dzǝ ka mwari tǝra nǝr sǝɗǝkur ka 'ya aduwa, “Bana, ma kapu ǝni nǝr bwanai ni adi ata kǝlntadzi wɛ tar Yi sa tǝni ka sǝ nam tǝ gǝ yiɗɛ ka dzǝ 'yatǝdzi.”

43Sakatǝ dzǝ ɓakta si, dzǝ ka ɓui tǝ dar kadamwa ada hanyi, kadǝbar hanyi akwa ntsa dar. 44Ani dzǝ ka ngyar tǝ dar ka mwari tǝra, kadamwa ka 'ya aduwa nǝr makǝrkur ni, tǝ dzǝ ada nkǝr su dzǝli duku.

45Antǝ dzǝ ka ɓakta si adzǝ ndzǝr nuwɛ ka nkǝrɛ ala dar, “Gǝri tsu ada hanyi ba ghǝrbadzi ya? Wulɛ, saka ni kǝ 'ya kudzǝghɛ, ba ndǝ ata ɓǝlai Zǝr Ndɛ akwa tsiya ndzǝr biku. 46Hyatamɛ, ngyar ka muri tǝra. Ani ndǝr ɓǝlai tǝra ada si!”

Ndǝ Ngǝti Yɛsu

(Mar 14:43-50; Luk 22:47-53; Yaw 18:3-12)

47Sakatǝ dzǝ tsu ata kǝra ndǝrɛ, Yahuda, dzǝ pathlu akwa ntsa kumɛ kapu sǝɗǝ ni, kǝ si. Dzǝ kaka dlamiyir ndzi hang ndzǝr mpa kaka katsakar yarɛ ba zuwa yarɛ, tǝ nggar fǝrist yarɛ ba ndzǝ nam ngganggar ndzi ni ani tara hyanuba tǝ dar. 48Kulini ndǝr ɓǝlai tǝni ni kǝ ɗǝmhǝ parsu kaka dar apǝri: “Ndǝ nam tǝ Yi vǝdzǝ kutsǝr nyawai alari ani ndari ka gǝri ngǝti tǝni.” 49Ani dzǝ ka hakǝma Yɛsu daɗu, Yahuda ka nkǝrɛ, “Ka ndzai lapiya ndzai adzǝ ngɛ, Malǝm!” ba dzǝ ka tsǝkwar tǝni aka kutsǝr nyari.

50Yɛsu ka sǝnau, “Pazi, 'ya sǝ nam tǝ gǝ si kari.”#26:50 Wala “Pazi, kami tǝ gǝ si?”

Antǝ sǝli yarni mwari alǝkǝma, ka ngǝti Yɛsu ka ngǝzi tǝni ɓaɓal. 51Pathlu akwa ntsa ndzǝr nuwur Yɛsu ka ngǝzi katsakarǝrni, ka ndǝrba ka dlɛ zǝr kǝiyir kuhyir fǝrist ni, ka thlanta thlǝmari nǝr bwa tsisǝmɛ.

52Antǝ Yɛsu ka nkǝrɛ alari, “Ɓakta hau katsakar ngɛ akwa kǝiyari, akuya sanga ndzǝ nam tara mpa aka katsakar tsu katsakar ani ata tsi tǝni. 53Gǝri ta zǝndi apǝri Yi ata mǝzi ka kǝgyǝ Bana, ka dzǝ hyanuba ndzǝr hyantǝrni tǝkǝma nam ɓwalta ndzǝr mpa nam kum kapu sǝɗǝ yarni wɛ? 54Ama mǝmi dzá tǝ Kakadǝr Hyal awa ghǝiyabadzi nam tara nkǝrɛ apǝri ntsakǝr ata 'ya akwa whal ǝni?”

55 # Luk 19:47; 21:37 Ata saka ǝnda Yɛsu ka nkǝrɛ ala dlamiyir ndzi ni, “Yi ndǝr lǝkǝma ala ndzǝr lǝkǝdzǝkur ya, nam tǝ gǝri sǝba kaka katsakar yarɛ ba zuwa yarɛ ka gǝri ngǝzǝ tǝra? Kǝlara vǝri Yi ada ndzai akwa babalǝr fǝr Hyal ada hyipɛ, ba gǝri ta ngǝzǝ tǝra wɛ. 56Ama ǝni sang kǝ 'yatǝdzi nam tǝ rǝbwa yarni nǝr nabi yarni ata ghǝiyabadzi.” Antǝ sanga ndzǝr nuwurni ka whui atǝra ka ngyar tǝni.

Akǝma Ndzǝr Hakar Ndzǝr Yahudi ni

(Mar 14:53-65; Luk 22:54-55; Yaw 18:13-14)

57Ndzǝ nam tara ngǝti Yɛsu ni ka kǝtǝ tǝni ka mwari aka dza ala Kayafas, kuhyir fǝrist ni, akwa vui nam tǝ malǝmǝr mabari yarni ba ndzǝ ngga-ngga yarɛ ni tara tsaɓtsǝnidzi. 58Ama Bitrusu ada nu tǝni pǝɗǝm aghǝla dar, har ka la babalǝr kuta kǝiyir kuhyir fǝrist ni. Dzǝ ka livi ka ndzai kaka ndzǝr ɓǝla yarni ka dzǝ wula sǝ nam ata 'ya.

59Nggar fǝrist yarni ba sanga Ndzǝr Hakar Yahudi ada bara sǝr hawi ata kǝra Yɛsu ani ka dar tsi tǝni. 60Ama dar ta ɓui wala duku wɛ, wala tǝ ndzǝr sakǝidar hawi hang kǝ sǝkǝma.

Ata dǝnta ndzǝ sǝɗɛ ka sǝkǝma 61#Yaw 2:19ba dar ka nkǝrɛ, “Ndǝ ǝni nkǝrɛ, ‘Yi ata mǝzi ka whuzanta fǝr Hyal ni ba ka Yi ɓakta tsati tǝni akwa vǝr makǝr.’ ”

62Antǝ kuhyir fǝrist ni ka hyati ka nkǝrɛ ala Yɛsu “Gɛ adi ata sǝnau wɛ? Mi ani sakǝida nam tǝ ndzǝ yarni si akǝri ata kǝra gǝ ni?” 63Ama Yɛsu ndzi kǝɗǝk.

Kuhyir fǝrist ni ka nkǝrɛ alari, “Yi ada paktsǝni tǝngɛ aka Hyal nam aka mpikɛ: Gha ala yar ma gǝ dza Kǝrsti#26:63 Wala Masiha: tsuwɛ akwa vǝrsu 68. ni, Zǝr Hyal ni.”

64 # Dan 7:13 Yɛsu ka kalaktsǝni, “A, ani apa tǝ gǝ gha. Ama Yi ada gha ala sanga gǝri: Akwa saka nam alǝkǝma gǝri ata wula Zǝr Ndɛ ada ndzai ata bwa tsisǝma Hyal nam Ɓwaltasang ba dzǝ ata si ata dlamba yarɛ atahyal.”

65 # Fǝr 24:16 Antǝ kuhyir fǝrist ni ka thlǝkwanta lǝkutǝrni ka nkǝrɛ, “Dzǝ kǝ nkǝrba sǝ nam kulɗa ata kǝra Hyal! Kami tǝ muri ada bara sakǝida yarɛ kǝra? wulɛ, kulini gǝri kǝ ngati gha su kulɗa ata kǝra Hyal ni. 66Mǝ tǝ gǝri nkǝrɛ?”

Dar ka nkǝrɛ, “Kǝ mǝzi ka ndǝ tsi tǝni.”

67 # Isa 50:6 Antǝ dar ka kikifu nkyǝli akwa kǝmari ba dar ka tsa tǝni aka tsiya dar. Ndzǝ laka yarɛ lar mandaɓa 68ka nkǝrɛ, “Ya ala yar nabikur, Kǝrsti. Wa tsa tǝngɛ ni?”

Bitrusu Ɓwalnta nyar Yɛsu

(Mar 14:66-72; Luk 22:56-62; Yaw 18:15-18)

69Bitrusu ada ndzai abǝla akwa babalǝr kuta kǝi, ba nkwar kǝi laka ka si adzǝni. Dzǝ ka nkǝrɛ, “Gǝ yɛ gǝri kaka Yɛsu ndǝr Galili ni.”

70Ama dzǝ ka ɓwalnya akǝma dar sang. Dzǝ ka nkǝrɛ, “Yi ta zǝndi sǝ nam tǝ gǝ ada gha ni wɛ.”

71Antǝ dzǝ ka mwari alǝba nyatǝfu, vui nam tǝ nkwa damwa wula tǝni ka nkǝrɛ ala ndzǝ nam akwanda, “Ndǝ ǝni dar kaka Yɛsu ndǝr Nazarat ni.”

72Dzǝ ka ɓakta ɓwalnya kadamwa, aka mbǝrɛ: “Yi ta zǝndi ndǝ ni wɛ!”

73Aghǝla saka nkyiɗǝ laka, ndzǝ nam ada hyati akwanda ka mwari adzǝ Bitrusu ka nkǝrɛ, “Dzǝri gǝ pathlu akwa ntsa dar, akuya ndǝrǝr ngɛ kǝ tsanǝba tǝngɛ.”

74Antǝ dzǝ ka baditsǝni sunta kǝrni ba dzǝ ka mbǝrɛ ala dar, “Yi ta zǝndi ndǝ ni wɛ!”

Tǝkǝma ata saka nda vukum ka tuwa. 75Antǝ Bitrusu ka ɗǝngati labar nam tǝ Yɛsu tara gha nda, “Kabutu vukum ta tuwa, gǝ ata ɓwalnyar zǝndi tǝra ka makǝr.” Antǝ Bitrusu ka alǝba ka tuwa nam dzau aka dǝna.

Currently Selected:

Mata 26: CKL

Highlight

Copy