Mata 25
25
Karabu ata Kǝra Madar Nkwai Kumɛ
1 #
Luk 12:35
“Ata saka ǝnda kuhyikur nam atahyal ata siya ndzai apa madar nkwai kumɛ nam tara fati pitǝlar dar yarɛ ka tǝra lǝba ka thla kǝma sal kǝduwa. 2Ntufu akwa ntsa dar dlang-dlang, ba ntufu tsuwɛ dar bǝrkawa. 3Nam dlang-dlang yarni kǝtǝ pitǝlar dar yarɛ ama dar ta kǝtsi mal damwa aka dar wɛ. 4Ndzǝ nam bǝrkawa ni, tsuwɛ, dar kǝtsi mal akwa mpǝla aka dar kaka pitǝla dar yarɛ. 5Sal kǝduwa ni kǝ sǝkar kura ta si sam, ba dar sang siya ngǝɗǝ hanyi ba hanyi ka fati tǝ dar.
6“Ata kǝrathlǝr vǝri ndǝ ka kǝga: ‘Animɛ sal kǝduwa ni kǝ si! Sǝbamɛ ka gǝri lǝka thla kǝmari!’
7“Antǝ sanga madar nkwai ni kǝ hyati ka mǝmǝrti pitǝlar dar. 8Ndzǝ nam dlang-dlang yarni ka nkǝrɛ ala ndzǝ nam bǝrkawa-bǝrkawa yarni, ‘Kǝtsimɛ ala yar malǝr gǝri ni; pitǝlar yar angwa kurntadzi.’
9“Dar ka sǝnau, ‘A'a, akuya bisu adi ata siya mǝzi tǝ yar kaka gǝri gyapu wɛ. Ata vuiya ǝni, mwaramɛ adzǝ ndzǝ nam ada ɗǝlti mal ka gǝri ɗǝlba ala kǝr gǝri.’
10“Ama sakatǝ dar ata kǝra whalǝr ɗǝl mal ni, sal kǝduwa ni ka si. Madar nkwai nam tara ɗǝmhǝdzi ni ka livi kaka dza akwa wudzǝr kǝldzi ni. Ba ndǝ ka harti nyavǝr ni.
11 #
Luk 13:25
“Aghǝla ǝnda laka nkwai yarɛ ni tsuwɛ ka si. Dar ka nkǝrɛ, ‘Thlaku! Thlaku! Mburnta ala yar nyavǝr!’
12“Ama dzǝ ka sǝnau, ‘Yi ada gha ala gǝri dzǝri, Yi ta zǝndi tǝ gǝri wɛ.’
13“Kadǝbar ǝni ka gǝri ndzai aka ɗǝmhǝdzi, kadǝbar gǝri ta zǝndi vǝri wala saka wɛ.
Karabu ata Kǝra Madar Kǝi Makǝr
(Luk 19:11-27)
14 #
Luk 19:11-27
“Kadamwa, ata ndzai apa sal nam ata tǝra akwa buraburá, tǝ dzǝ kǝgati madar kǝiyirni yarɛ ka hau kariyirni akwa tsiya dar. 15Ala ndǝ pathlu dzǝ lari kwapa kumthlani kumɛ ka ntufu, ala ndǝ damwa kwapa kumthlani kumɛ sǝɗɛ, ba ala ndǝ damwa kwapa kumthlani kumɛ pathlu, kǝlara ndɛ apa tǝ dǝnarni tara mǝzi. Antǝ dzǝ ka tǝrarni akwa buraburá. 16Ndǝ nam tara dlutsi kwapa kumthlani kumɛ ntufu ni kǝ tǝra tǝkǝma ka lǝka 'ya fǝli akǝri dzǝ ka ɓui ɗǝruwur kwapa kumthlani kumɛ ntufu damwa. 17Ani tsuwɛ, ndǝ nam tara dlutsi kwapa kumthlani kumɛ sǝɗǝ ni dzǝ ɓui ɗǝruwur sǝɗɛ damwa. 18Ama ndǝ nam tara dlutsi kwapa kumthlani kumɛ pathlu ni dzǝ ka tǝra alǝba, ka laba kau ka ɗǝwar kwapar thlakǝrni ni akwa.
19“Aghǝla tara kǝtǝ saka hang thlakǝr madar kǝi yarni ka si, ba ka dzǝ tsǝgaba sǝ nam tǝ dar 'ya aka kwapa ni. 20Ndǝ nam tara dlutsi kwapa kumthlani kumɛ ka ntufu ni ka nkǝrɛ, ‘Thlaku, gǝ lai kwapa kumthlani kumɛ ka ntufu. Ndza, Yi ɓui ɗǝru ntufu damwa.’
21“Thlakǝrni ka sǝnau, ‘Gǝ 'yati ɗaku, gǝ zǝr kǝi nam ɗaku ba aka dzǝrkur! Gǝ 'ya dzǝrkur aka sǝ nam nkyiɗu; Yi ata vǝkǝr tǝngɛ ata kǝra sǝ nam hangkurari. Azǝrɛ ka gǝ ɓui kutsariyir thlakǝr ngɛ!’
22“Ndǝ nam tara dlutsi kwapa kumthlani kumɛ ka sǝɗǝ ni tsuwɛ ka si. Dzǝ ka nkǝrɛ, ‘Thlaku, gǝ lai kwapa kumthlani kumɛ aka sǝɗɛ; ndza Yi ɓui ɗǝru sǝɗɛ damwa.’
23“Thlakǝrni ka sǝnau, ‘Gǝ 'yati ɗaku, gǝ zǝr kǝi nam ɗaku ba aka dzǝrkur! Gǝ 'ya dzǝrkur ata kǝra sǝ nam nkyiɗu; Yi ata vǝkǝr tǝngɛ ata kǝra sǝ yarɛ nam hang. Azǝrɛ ka gǝ ɓui kutsariyir thlakǝr ngɛ!’
24“Antǝ ndǝ nam tara dlutsi kwapa kumthlani kumɛ pathlu ni ka si. Dzǝ ka nkǝrɛ, ‘Thlaku, Yi zǝndi apǝri gǝ ndǝ nam dzau, gǝ ada dli su ata vui nam kura gǝ dza thlǝka, ba tsaɓtsǝni ata vui nam kura gǝ dza ɓutsǝ kulfɛ. 25Ani Yi ka hyivǝr ba Yi ka tǝra lǝka ɗǝwar kwapar ngɛ akwa dai. Wulɛ, nda sǝr ngɛ.’
26“Thlakǝrni ka sǝnau, ‘Gǝ kǝmangar, zǝr kǝi nam sǝrwai! Ani gǝ zǝndi apǝri Yi ada dli su ata vui nam kura Yi dza thlǝka ba tsaɓtsǝni ata vui nam kura Yi dza ɓutsǝ kulfɛ? 27Ɗaku dzá, kami kura gǝ ta mwar lǝka pu kwaparna akwa bitǝmbal, ani ka sakatǝ Yi si ka Yi dlutsi sǝrna aka ɗǝru.
28“ ‘Dlutsamɛ kwapa ni akari ka gǝri la ndǝ nam aka kwapa kumthlani kumɛ ni. 29#Mat 13:12; Mar 4:25; Luk 8:18Akuya kǝlara ndǝ nam aka su ndǝ ata lari hang, ba dzǝ ata 'ya akǝri hangkurari. Ndǝ nam kura akǝri, wala sǝ nam tǝ dzǝ akǝri ma ndǝ ata dlutsi akari. 30#Mat 8:12; 22:13; Luk 13:28Ba ndǝ ata ɗalba zǝr kǝi nam kura paida nda abǝla, alǝkwa kuthlɛ ni, vui nam tǝ ndǝ ata tuwa ba ɗǝhyir.’
Tǝma ni ba Kwai ni
31 #
Mat 16:27;
Mat 19:28
“Sakatǝ Zǝr Ndɛ ni ata si akwa nggakurni, ba sanga ndzǝr hyantǝr Hyal ni adzǝni, dzǝ ata ndzai ata dǝgǝlǝr nggakurni atahyal ni. 32Ndǝ ata tsaɓtsǝni sanga ndzǝr dunya akǝmari, ba dzǝ ata ndǝghǝba ndzi pam-pam apa tǝ ndǝr ɓǝla ada ndǝghǝba tǝma akwa ntsa kwai yarɛ. 33Dzǝ ata pui tǝma yarni ata bwar tsisǝmari ba kwai yarni ata bwar tsi aghyari.
34“Antǝ Kuhyi ni ata nkǝrɛ ala ndzǝ nam ata bwar tsisǝmari ni, ‘Azǝramɛ, gǝri nam tǝ babarna vǝkǝr ala gǝri barka; ka gǝri dlutsi wartar gǝri, kuhyikur ni nam tǝ ndǝ ɗǝmhǝi ka gǝri tǝng tǝ ndǝ hǝnti dunya ni. 35Akuya Yi aka mi ba gǝri ka lai su tǝ Yi sǝmɛ, Yi aka thlǝlai ba gǝri ka lai su tǝ Yi sa, Yi mǝthlǝɓi ba gǝri ka kǝgati tǝra alivi, 36Yi anghyaɗu antǝ gǝri ka alai sǝr hati, Yi kura kalang gǝri wulhǝ tǝra, Yi akwa fǝrsǝna gǝri si adzǝra.’
37“Antǝ ndzǝ nam kal-kal ni ata kalaktsǝni alari, ‘Thlaku, nama tǝ yar tara wula tǝngɛ aka mi yar ka la gǝ sǝr sǝmɛ, kǝna tǝ gǝ aka thlǝlai yar ka la gǝ sǝr sa? 38Nama tǝ yar wula tǝngɛ mǝthlǝɓi ba yar ka kǝgati tǝngɛ asivi, kǝna gǝ anghyaɗu yar ka la gǝ sǝr hati? 39Nama tǝ yar tara wula tǝngɛ kura gǝ kalang wala akwa fǝrsǝna ba yar ka mwari adzǝ ngɛ?’
40“Kuhyi ni ata kalaktsǝni, ‘Yi ada gha ala gǝri dzǝri, kǝlara sǝ nam tǝ gǝri 'yati ala pathlu akwa ntsa madar mana nam nkyǝnkyiɗu yarni, kalapa gǝri 'yati alai.’
41“Antǝ dzǝ ata nkǝrɛ ala ndzǝ nam ata bwar tsi aghyari, ‘Tǝramɛ adzǝra, gǝri nam tǝ Hyal tara sǝwunta tǝ gǝri, alǝkwa u'u kura kuri tǝ ndǝ tara ɗǝmhǝi ala Satan ba ndzǝr hyantǝrni. 42Akuya Yi aka mi ama gǝri ta lai mima tǝ Yi sǝm wɛ, Yi aka thlǝlai ama gǝri ta lai mima tǝ Yi sa wɛ, 43Yi mǝthlǝɓi ama gǝri ta kǝgati tǝra asivi wɛ, Yi anghyaɗu ama gǝri ta lai sǝr hati wɛ, Yi kura kalang ba Yi akwa fǝrsǝna gǝri ta lǝka wula tǝra wɛ.’
44“Dar yɛ dar ata sǝnau, ‘Thlaku, nama tǝ yar tara wula tǝngɛ aka mi wala aka thlǝlai wala mǝthlǝɓikur wala anghyaɗu wala kura kalangkur wala akwa fǝrsǝna, ba kura yar ta mbana tǝngɛ?’
45“Dzǝ ata kalaktsǝni, ‘Yi ada gha ala gǝri dzǝri, kǝlara sǝ nam kura gǝri ta 'ya ala pathlu akwa ntsa ndzǝ nam nkyiɗu yarni, ka la apa gǝri ta 'ya alai wɛ.’
46 #
Dan 12:2
“Antǝ dar ata mwari akwa bwanai nam kura kurkuri, ama ndzǝ nam kal-kal yarni dar ata mwari akwa mpikǝ nam kura kurkuri.”
Currently Selected:
Mata 25: CKL
Highlight
Share
Copy
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association
