Markusu 1

Yawhana Ndǝr 'Ya Bamtizǝma ni Ɗǝmhǝ Whal ni

(Mat 3:1-12; Luk 3:1-18; Yaw 1:19-28)

1Əni ani baditsǝni ndǝrǝr Hyal nam sǝɗa ni ata kǝra Yɛsu Kǝrsti, Zǝr Hyal ni.#1:1 Laka rǝbwa tsai yarɛ adi aka Zǝr Hyal ni wɛ.

2 # Mal 3:1 Apa tǝ nabi Isaya tara rǝbwai apǝri, “Hyal gha,

“Yi ata hyanti ndǝr hyarna akǝma gǝ,

ndǝ nam ata ɗǝmhǝ whalǝr ngɛ”—

3 # Isa 40:3 “Kuɗaha ndɛ ada kǝga akwa ntakǝr i'ya,

‘Ɗǝmhamɛ whalɛ ala Thlaku ni;

mǝrtamɛ whal yarni daɗu alari.’ ”

4Ba ani Yawhana ka ndǝlaba, tǝ dzǝ ada 'ya bamtizǝma akwa ntakǝr Yahudiya ba nkǝr ndǝrǝr Hyal nǝr bamtizǝmar tubi akuya ka kyifǝnta biku yarɛ. 5Sanga ndzǝr palaiyir diyir Yahudiya ba sanga ndzǝr Ursalima lǝba adzǝni. Dar ada nkǝrba bikǝr dar, dzǝ ada 'ya ala dar bamtizǝma akwa Kyaghar Urdun. 6#2Kuh 1:8Yawhana hadzǝ lǝkutu tǝ ndǝ 'ya aka sǝsǝr dlugwam, dzǝ mbwai kusarari aka kutsi tǝ ndǝ ntaba, sǝr sǝmǝr ni ani ntsǝwha ba mǝmǝr ntaku. 7Ba ǝni ani labarǝrni, “Ndǝ nam ata si aghǝlawai ni dzǝ ɓwalta yɛ, Yi ta mǝzi ntsǝkuni ka Yi mpǝli sǝwur ɓǝɓaiyirni ma wɛ. 8Yi 'ya ala gǝri bamtizǝma aka yimi, ama dzǝ ata 'ya ala gǝri bamtizǝma aka Mambǝl Kartǝ.”

Bamtizǝma ba Nkǝrti Yɛsu

(Mat 3:13; 4:11; Luk 3:21-22; 4:1-13)

9Ta sǝkar wɛ tǝ Yɛsu tara si tǝbwar mǝlmǝr Nazarat akwa diyir Galili, antǝ Yawhana 'ya alari bamtizǝma akwa kyaghar Urdun. 10Kura aka santa sakatǝ Yɛsu sǝba akwa yimi, dzǝ wula atahyal tara mburntadzi antǝ Mambǝl ni sǝgǝl ata kǝrari apa adlakukyala. 11#Bad 22:2; Zab 2:7; Isa 42:1; Mat 3:17; 12:18; Mar 9:7; Luk 3:22Antǝ kuɗahu si ati, “Gǝ dza Zǝrna nam tǝ yǝ yiɗɛ.” Yi ada kutsari aka gǝ.

12Kura aka santa saka antǝ Mambǝl ni ka mwari aka dza akwa ntaku. 13Tǝ dzǝ ka ndzai vǝr fwaɗǝthlani, antǝ Satan ada nkǝrti tǝni. Mawi nam dzau-dzau yɛ adai akwanda. Tsuwɛ ndzǝr hyantǝr Hyal si ka mbana tǝni.

Yɛsu Kǝga Ndǝr Nuwɛ nam Tangkǝma ni

(Mat 4:12-22; Luk 4:14-15; 5:1-11)

14Aghǝla tǝ ndǝ mbwai Yawhana akwa fǝrsǝna, Yɛsu mwari akwa Galili ka nkǝr ndǝrǝr Hyal nam sǝɗa. 15#Mat 3:2Tǝ dzǝ gha, “Saka nam dzǝri kǝ si, kuhyikur Hyal kǝ 'ya kudzǝghɛ, tubiyamɛ ta biku ka gǝr mbǝrsa aka ndǝrǝr Hyal nam sǝɗa!”

16Sakatǝ Yɛsu ada mwari ata nya mandar Galili dzǝ ka wula ndzǝr tamu kulfa sǝɗɛ, Simaun aka zǝrangǝri, Andǝrawusu ada tamu kulfa aka sǝr tamu kulfa. 17Yɛsu ka nkǝrɛ, “Azǝramɛ, ka gǝr nu tǝra, Yi ata mǝrti tǝ gǝri ndzǝr fa ndzi.” 18Tǝkǝma dar ka ngyar lambusǝr dar yarɛ ka nuti tǝni.

19Dar ntǝrkǝmadzi nkyiɗǝ laka antǝ Yɛsu ka wula madar mama damwa sǝɗɛ, Yakubu aka Yawhana, madar Zabadi, dar akwa sarǝr dar, tǝ dar ɗǝmhǝdzi aka sǝr tamu kulfar dar. 20Sakatǝ Yɛsu wula tǝ dar, dzǝ kǝga tǝ dar, dar ngyar tada dar Zabadi akwa sar aka ndzǝ nam tǝ ndǝ nkyinta tǝ dar antǝ dar tǝra kaka Yɛsu.

Yɛsu Kǝdlǝba Mambǝl nam Kulɗa

(Luk 4:31-37)

21Yɛsu kaka ndzǝr nuwurni si akwa mǝlmǝr Kafarnahum, ba sakatǝ vǝr Sǝbdu si, Yɛsu mwari akwa fǝr vǝkǝr sǝlai ka baditsǝni hyipɛ. 22#Mat 7:28,29Ndzǝ nam tara ngati tǝni dar ndatǝdzi aka whal nam tǝ dzǝ ada hyipɛ, kadǝbar dzǝ adi apa malǝmǝr mabari yarni wɛ, ata vuiya ǝni dzǝ ada hyipɛ apa ndǝ nam aka wada. 23Aghǝla ǝnda sal laka akwa fǝr vǝkǝr sǝlaiyir dar aka mambǝl nam kulɗa akwa dzari ka lǝlɛ, 24“Mǝ tǝ gǝ ada bara aka yar, Yɛsu ndǝr Nazarat? Gǝ si ka gǝ santa tǝ yar ya? Yi zǝndi wa ani gɛ—gǝ dza Ndǝ Kartǝ nǝr Hyal ni.”

25Yɛsu ntsǝha mambǝl nam kulɗa ni apǝri, “Ndzi kǝɗǝk! Sǝba akwa dzá ndǝ ni!” 26Mambǝl nam kulɗa ni ka kǝngǝrti ndǝ ni aka dǝna ba dzǝ ka sǝba akwa dzá ndǝ ni aka lǝlɛ. 27Sanga ndzǝ nam akwanda ndatǝdzi ka baditsǝni labar ala kǝma dar, “Mǝrɛ ǝni? Ká ǝni dzǝli hyipǝ nam bǝlin ya? Ndǝ ni dzǝ aka wada tǝ dzǝ ada tsau ala mambǝl yarɛ nam kulɗa, antǝ dar ada ngandǝrǝrni!” 28Ani labar ata kǝra Yɛsu ka kikilntadzi akwa sanga diyir Galili.

Yɛsu Mbǝti Ndzǝ Hang

(Mat 8:14-17; Luk 4:38-41)

29Yɛsu aka ndzǝr nuwurni, kaka Yakubu ba Yawhana, ngyar fǝr vǝkǝr sǝlai antǝ dar mwar ahar Simaun aka Andǝrawusu. 30Angǝra mwalar Simaun akwa dǝgǝl aka dzǝkdzǝku, sakatǝ Yɛsu si antǝ ndǝ gha alari ata kǝrari. 31Dzǝ mwari adzǝni ka ngǝzi tsiyari, ka hyanti tǝni, kasuwari ka ngyar tǝni, dzǝ ka hyati ka la dar sǝr sǝmɛ.

32Aghǝla tǝ tsǝtsi ɗi, antǝ vǝr ka 'ya, ndzǝ si aka sanga ndzǝ nam kura ngga kaka ndzǝ nam aka mambǝl nam kulɗa. 33Sanga ndzǝr mǝlmɛ ka tsaɓtsǝnidzi anyavǝr. 34Yɛsu mbǝti ndzǝ hang nam kura kalang aka kasuwa pam-pam ka kǝdlǝba mambǝl yarɛ nam kulɗa. Dzǝ ta ngyar ka mambǝl yarɛ nam kulɗa ka dar gha mima wɛ, akuya dar zǝndi tǝni.

Yɛsu 'Ya Aduwa akwa Vui nam Kura Ndǝ Akwa

(Luk 4:42-44)

35Kula-kula mbǝk sǝbar arpɛ kabutu paraku awa 'ya, Yɛsu hyati ka ngyar kǝi. Dzǝ sǝba akwa mǝlmɛ ka mwari akwa vui kura ndǝ akwa tǝ dzǝ ada 'ya aduwa. 36Antǝ Simaun kaka ndzǝrni mwara lǝba bara tǝni. 37Sakatǝ dar ɓui tǝni dar gha alari, “Sanga ndzi ada bara tǝngɛ.”

38Ama Yɛsu gha, “Muri ata tǝra akwa mǝlmǝ hang nam tara dlǝti vui ni. Ka Yi nkǝr labar Hyal akwa vui yarni, akuya ani tǝ Yi si kari.” 39#Mat 4:23; 9:35Ani dzǝ mwari akwa sanga diyir Galili tǝ dzǝ ada nkǝr labar akwa fǝr vǝkǝr sǝlai tǝ dzǝ ada kǝdlǝba mambǝl yarɛ nam kulɗa.

Ndɛ nam Aka Dǝlima

(Mat 8:1-4; Luk 5:12-16)

40Ndǝ laka nam aka kasuwar dǝlima si adzǝni ka zǝɗi aka ɓungyari yarɛ ka kǝgyɛ, “Ma gǝ yiɗɛ, gǝ ata mǝzi mǝrtǝ tǝra kǝtsǝkǝtsi.”

41Yɛsu ghǝi-ghǝi aka kalhur, Yɛsu ka harar tsiyari ba dzǝ ka tsǝkwar ndǝ ni. Dzǝ ka nkǝrɛ, “Yi kǝ yiɗɛ. Ka gǝ ndzai kǝtsǝkǝtsi!” 42Ata saka duku antǝ kasuwa ni ngyar ndǝ ni antǝ dzǝ ka 'ya kǝtsǝkǝtsi.

43Yɛsu ndǝr thlǝmari ka hyanti tǝni atǝra apǝri, 44#Fǝr 14:1-32“Si thlǝmɛ, ta gǝ ta gha ala waima ata kǝra sǝ ǝni, ama mwari adzǝ fǝrist ka dzǝ wula tǝngɛ, mwari ka gǝ 'ya kǝdlǝrsu apa tǝ Musa tara gha. Ani ata tsanti apǝri gǝ kǝ mbǝtǝdzi.” 45Ama ndǝ ni tǝra ka baditsǝni kikil labar ni akwa kǝlara vui. Dzǝ labar hang wur-wur nam tǝ Yɛsu adi ata mǝzi lǝkwa kuta mǝlmɛ ata babal wɛ, kadǝbar ǝni dzǝ ndzai akwa vui ɗǝwa-ɗǝwa, antǝ ndzǝ ada si adzǝni akwa sanga bwa.

Currently Selected:

Markusu 1: CKL

Highlight

Copy