'Ya Su 4

Ndǝ Ngǝti Bitrusu aka Yawhana

1Sakatǝ Bitrusu aka Yawhana ada 'ya labar ala ndzi, fǝrist yarni ba katsala nǝr ɓǝla fǝr Hyal ni ba ndzǝr Saduki yarni ka si. 2Ndzǝ ni ɗǝfa dar sǝwa kadǝbar ndzǝr hya yarɛ ada hyipɛ ala ndzi apǝri ndzǝ ntǝnti ata hyati akwa nti, apa tǝ Yɛsu tara hyati akwa ntǝnti. 3Ani dar ngǝti tǝ dar ka pu tǝ dar akwa fǝrsǝna har tǝ vǝr kuri kadǝbar tǝhaku kurtaka 'ya. 4Ama hang akwa ntsa ndzǝ nam tara ngati labar ni dar ka mbǝrsa, ani hangkur sal nam tara mbǝrsa dar kudzǝghɛ dzǝ ndzǝ kumthlani kumɛ ka ntufu.

5Sǝbar arpɛ nggar fǝrist yarni, ndzǝ ngga-ngga yarɛ, kaka malǝmǝr mabari yarni dar ka tsaɓtsǝnidzi akwa Ursalima. 6Dar kǝɓai aka Hanas kuhyir fǝrist, ba Kayafas, Yawhana, Alizanda, ba laka sǝli nam akwa yalǝr kuhyir fǝrist ni. 7Dar si aka ndzǝr nuwɛ sǝɗǝ ni akǝma dar ka yuwɛ, “Aka dǝna madi kǝna akwa thlǝma wa tǝ gǝri ada 'ya sǝni?”

8Antǝ Bitrusu, ghǝi aka Mambǝl Kartǝ, ka sǝnau ala dar: “Ndzǝr kuhyi yarɛ ndzi ba ndzǝ ngga-ngga yarɛ! 9Ma apǝri ndɛ ada yu tǝ yar asǝna ata kǝra 'ya sǝ nam ɗaku tǝ ndǝ 'ya ala ndǝ ni ngurngudi ni, ba mǝmi tǝ dzǝ tara mbǝtǝdzi, 10antǝ gǝri sang kǝ zǝndi, ba sanga ndzǝr Izǝraila kǝ zǝndi, apǝri ndǝ ni ada hyati akwani akǝma gǝri dzǝ 'ya kalang atar dǝnar thlǝma Yɛsu Kǝrsti ndǝr Nazarat, ndǝ nam tǝ gǝri kukwanta ama Hyal hyanti tǝni akwa ntǝnti. 11#Zab 118:22Yɛsu dzǝ dza ndǝ nam tǝ Labar Hyal tara nkǝrɛ:

“ ‘Paya nam tǝ gǝri ndzǝr tsa kǝi tara ngǝla ni,

kǝ siya 'ya nggar payar kuɗǝma.’

12Yɛsu ɗiɗi dza ani aka dǝnar mbati! Thlǝmari duku ɗiɗi akwa sanga dunya nam ata mbati kǝlara ndɛ.”

13Sakatǝ dar wula dǝnar Bitrusu aka Yawhana, ba tǝ dar kwamtsǝni apǝri dar ndzǝ nam kura ta 'ya makǝranta, dar ka ndatǝdzi dzǝr dzǝri dar ka ɗǝngati apǝri ndzǝ ni dar ndzai kaka Yɛsu. 14Ama dar ta mǝzi ngǝla sǝ nam tǝ ndǝ 'ya ni wɛ. Kadǝbar ndǝ ni tǝ ndǝ mbati ni ada hyati ata ngwama ndzǝr hya ni. 15Ani dar nkǝrɛ ala Bitrusu aka Yawhana ka dar lǝba ka ngyar Ndzǝr Hakar Yahudi ni. Ba dar ka 'ya sawari akwa ɓwanga dar, 16dar ka yu, “Mǝmi tǝ muri awa 'ya aka ndzǝ ni? Kǝlara ndɛ akwa Ursalima zǝndi ata kǝra sǝr ndati nam tǝ dar 'yati muri adi ata mǝzi ɓwalnta nya wɛ. 17Ama ka muri kanti kura sǝ ǝni awa kikilntadzi kǝra akwa ntsa ndzi, ntsakǝr ka mur ɗǝmnya ala ndzǝ ǝni ta dar ta ɓakta labar ala waima akwa thlǝma Yɛsu.”

18Antǝ dar ka kǝga tǝ dar kadamwa ka tsanya mabari ala dar apǝri ta dar ta labar wala hyipɛ akwa thlǝma Yɛsu. 19Ama Bitrusu aka Yawhana sǝnau ala dar, “Ata ndzai kal-kal akǝma Hyal ka ndǝ kǝlǝngkǝr ala gǝri ta Hyal ya? 20Akuya yar adi ata ngyar labar ata kǝra sǝ nam tǝ yar wula ba ngati wɛ.”

21Aghǝla tǝ dar dzakti tsanya mabari ala dar kadamwa, dar ka sǝntá tǝ dar. Dar ta zǝndi whal nam tǝ dar awa hakatsǝni tǝ dar wɛ kadǝbar ndzǝ sang ada hǝm Hyal ka sǝ nam tara 'ya. 22Akuya ndǝ nam tǝ ndǝ tara mbǝti akwa whal sǝr ndati fárni kwatsǝni, fwaɗu thlani aka ya.

'Ya Aduwar Ndzǝ nam tara Mbǝrsa

23Sakatǝ ndǝ sǝntá tǝ dar, Bitrusu aka Yawhana ka ɓitasi adzǝ ndzǝ nam aka mbǝrsa ka nkǝrnta ala dar sanga sǝ nam tǝ nggar fǝrist yarni kaka ndzǝ nam ngga-ngga yarɛ tara nkǝrɛ ala dar. 24#Sǝb 20:11; Nahi 9:6; Zab 146:6Sakatǝ dar ngati ǝni dar ka haɓǝti kuɗaha dar ala Hyal aka ɗǝfu duku. Ka nkǝrɛ, “Thlaku Kuhyir yar, gǝ dza tara mǝrti atahyal aka aghǝli ba manda kaka sanga sǝ nam akwa kuta dar. 25#Zab 2:1,2Gǝ ndǝrɛ atar Mambǝl Kartǝ, aka nya kakár yar Dauda zǝr kǝiyir ngɛ:

“ ‘Kami tǝ ɗǝfa ndzǝr ndzǝli yarni sǝwa?

Kami tǝ ndzi ada ɗǝmhǝ sǝr dlangkur?

26Kuhyir dunya yarɛ ɗǝmhǝdzi akuya mpa,

ba ndzǝr kuhyi yarɛ tsaɓtsǝnidzi atakǝmaduku,

tǝ dar ada ngǝla Thlaku

ba ngǝla Ndǝ nam tǝ Ndǝ Pukǝr Mal Alari.#4:26 Nam ani, Kǝrsti wala Masiha. ’

27 # Luk 23:7-11; Mat 27:1,2; Mar 15:1; Luk 23:1; Yaw 18:28,29 Dzǝr dzǝri Hirudus ba Pauntiyus Pǝlatus tsaɓtsǝnidzi atakǝmaduku kaka ndzǝ kura Yahudi ba ndzǝr Izǝraila akwa Ursalima ka ɗi nya ata kǝra zǝr kǝiyir ngɛ nam tsartsari Yɛsu, ndǝ nam tǝ gǝ pukǝr alari mal dzǝ ani Kǝrsti ni. 28Dar tsaɓtsǝnidzi ka 'ya kǝlara sǝ nam tǝ gǝ kurta ɗǝmhǝ aka dǝnar gɛ ba bǝrkawakur. 29Kulini Thlaku, wula hyivǝra nam tǝ dar 'ya, ba ka gǝ la madar kǝiyir ngɛ dǝnar nkǝr labar ngɛ ata babal. 30Munta tsiya gɛ ka gǝ mbǝti ba ka gǝ 'ya parsu nǝr ndatǝdzi ba sǝr kudǝra yarɛ atar thlǝma zǝr kǝiyir ngɛ nam tǝ gǝ hyanti, Yɛsu.”

31Sakatǝ dar kurai 'ya aduwa, vuiyari kǝgǝdzǝtǝdzi vui nam tǝ dar tsaɓtsǝnidzi ati. Ba dar sang ghǝiyatǝdzi aka Mambǝl Kartǝ, dar nkǝr ndǝrǝr Hyal ata babal.

Ndzǝ nam tara Mbǝrsa ada Ndǝghǝi Kariyir Dar

32 # 'YaSu 2:44,45 Sanga ndzǝ nam tara mbǝrsa aka ɗǝfu duku ba ɗǝnga duku. Ndɛ adi nam tara nkǝrɛ apǝri kǝlara sǝ nam tǝ dzǝ akǝri kǝ ndzai nǝni wɛ, ama dar ada ndǝghǝi kǝlara sǝ nam tǝ dar kǝri. 33Aka dǝna nam ngga tǝ ndzǝr hya yarɛ tara hamnta sakǝida ata kǝra hyatǝr Thlaku Yɛsu, ba Hyal pukǝr barka ala dar. 34Ndɛ adai akwa ntsa dar nam ada bara su wɛ. Kadǝbar sanga ndzǝ nam tǝ dar aka fwaku ba kǝi, dar ɗǝgǝlnta ka si aka kwapari, 35ala ndzǝr hya yarɛ, ba dar ada ndǝghǝnta ala kǝlara ndǝ apa tǝ dzǝ ada bara.

36Yusufu, ndǝr Lawi akwa Kuburus di nam tǝ yimi dlǝti, nam tǝ ndzǝr hya yarɛ ada kǝga tǝ Barnabas (nam ada nkǝrɛ “Zǝr nǝr Dǝnautsǝnidzi”), 37ndǝ ni ka ɗǝlnta fwakǝrni, ka si aka kwapari ala ndzǝr hya yarɛ.

Currently Selected:

'Ya Su 4: CKL

Highlight

Copy