'Ya Su 5

Hananiya aka Safiratu

1Ndǝ laka adai tǝ thlǝmari Hananiya, nam aka mwalarni Safiratu ka ɗǝlnta laka kariyir dar. 2Aka zǝndǝr mwalarni, dzǝ ka ɗǝwanta laka kwapari ala kǝrni, ama dzǝ ka si aka lakari ala ndzǝr hya yarɛ.

3Antǝ Bitrusu nkǝrɛ, “Hananiya, mǝmi tǝ Satan tara ghǝiyati ɗǝfa gɛ nam tǝ gǝ hawi ala Mambǝl Kartǝ, ba kwapa nam tǝ gǝ ɓui akwa fwakari, gǝ ɗǝwar lakari ala kǝrngɛ? 4Kabutu gǝ ta ɗǝlnta kari ni, adi nǝngɛ wɛ? Ba aghǝla tǝ gǝ ɗǝlnta, kwapari adi nǝngɛ wɛ? Kami tǝ gǝ ɗǝnga ka 'ya sǝ ahani? Gǝ ta hawi ala ndǝ wɛ, gǝ hawi ala Hyal!”

5Sakatǝ Hananiya ngati labar ni, dzǝ dla ka nti. Ba hyivǝr nam ɓwaltasang ka ngǝti sanga ndǝ nam tara ngati sǝ nam tara 'ya. 6Antǝ madar dakurai yarɛ ka hyati, ka pǝrti tǝni akwa bakta, ka kǝtǝ tǝni alǝba ka harnta.

7Aghǝla tǝ awur makǝr kwatsǝni ba mwalarni ka sǝmbwa, dzǝ ta zǝndi sǝ nam tara 'ya wɛ. 8Bitrusu yu tǝni, “Gha alai, ǝni ani kwapa tǝ gɛ ba Hananiya ɓui ka fwaku ni ya?”

Dzǝ nkǝrɛ, “A, ǝnda ani kwapari.”

9Ani Bitrusu ka nkǝrɛ alari, “Kami tǝ gǝri aka salǝr ngɛ mbwai nya ka hau Mambǝlǝr Thlaku akwa nkǝrti? Ndzǝ nam tara har salǝr ngɛ kulini dar anyavǝr, ba dar ata kǝtǝ tǝngɛ alǝba gǝ ma!”

10Kura aka santa saka dzǝ dla ata dai ka nti. Sakatǝ madar dakurai yarni sǝmbwa ka wula apǝri dzǝ nti, dar kǝtǝ tǝni alǝba ka harnta ata ngwama salǝrni. 11Hyivǝr nam ɓwaltasang ka ngǝti sanga ikǝlizǝya nam akwandari, kaka sanga ndzǝ nam tara ngati sǝ nam tara 'ya.

Ndzǝr Hya Mbǝti Ndzǝ Hang

12Ndzǝr hya yarɛ 'ya parsu nǝr ndatǝdzi yarɛ hang ba sǝr kudǝra yarɛ akwa ntsa ndzi. Ba sanga ndzǝ nam tara mbǝrsa ada kǝɓai atakǝmaduku akwi dǝrǝyir Sulaimanu. 13Ndǝ duku adai nam tara yiɗɛ ka paktsǝnikǝr aka dar wɛ, wala ahani ndzǝ ada vǝkǝr sǝlai ala dar ka hang. 14Ka hang tǝ sǝli kaka mwahyi ada mbǝrsa akwa Thlaku ba ndǝ ada dzagǝkǝr tǝ dar ala ndzǝ ni. 15Ata vuiya ǝni, ndzǝ ada si aka ndzǝ kura kalang ata kǝra whalɛ ka panyi tǝ dar ata dǝgǝl ba butsi, ani ka ma Bitrusu ada kwatsǝni, ka sangurari tsǝkwar laka dar. 16Dlamiyir ndzi si akwa mǝlmɛ yarɛ nam adzǝ Ursalima, ka si aka ndzǝ nam kura kalang wala ndzǝ nam tǝ mambǝl yarɛ nam kulɗa ada la dar bwanai; ba dar sang ka mbǝtǝdzi.

Ndzǝ La Bwanai ala Ndzǝr Hya yarɛ

17Antǝ kuhyir fǝrist ba sanga ndzǝr kǝthlǝrǝrni, dar nam ndzǝr Saduki, ka ghǝi aka sǝlku. 18Dar ka ngǝti ndzǝr hya yarɛ ka pu tǝ dar akwa fǝrsǝna. 19Ama avǝrvǝri ndǝr hyantǝr Thlaku mburnta nyavǝr fǝrsǝna nda dzǝ ka mwari aka ndzǝr hya yarɛ ni abǝla ka nkǝrɛ ala dar, 20“Mwaramɛ ka gǝri hyati akwa fǝr Hyal ka gǝri nkǝrɛ ala ndzi sanga su ata kǝra mpikǝ bǝlin ni.”

21Ani dar ka mwari akwa fǝr Hyal kabutu tsǝtsi ta sǝti, apa tǝ ndǝ nkǝrɛ ala dar, dar ka baditsǝni hyipɛ ala ndzi.

Sakatǝ tǝ kuhyir fǝrist kaka ndzǝrni si, dar kǝgati atakǝmaduku, Ndzǝr Hakar Yahudi ni—sangkur tsaɓtsǝnidzi nǝr ndzǝ ngganggar Izǝraila—antǝ dar hya ka ndǝ lǝka faba ala dar ndzǝr hya yarɛ ni akwa fǝrsǝna. 22Ama sakatǝ ndǝr ɓǝla fǝr Hyal yarni si, dar ta ɓui ndzǝr hya yarni akwa fǝrsǝna wɛ. Ani dar ka ɓitasi adzǝ bǝlama yarɛ ka nkǝrɛ, 23“Yar ɓui nyavǝr fǝrsǝnari dǝldǝli tsu tsip, ndzǝr ɓǝla yarari tsip ada hyati anyavǝrari, ama sakatǝ yar mburnta nyavǝrari, yar ta ɓui waima ambwa wɛ.” 24Sakatǝ katsala nǝr ɓǝla fǝr Hyal tara ngati ǝni, ba nggar fǝrist yarni ka yakatsǝnidzi, tǝ dar ada ndatǝdzi ka yu kǝr dar mǝ tǝ sǝ ǝni ata yai alǝkǝma?

25Antǝ ndǝ laka ka si ka nkǝrɛ ala dar, “Siyamɛ thlǝmɛ! Ndzǝ ni tǝ gǝri pumbwa akwa fǝrsǝna ni, dar akwa fǝr Hyal ada hyipɛ ala ndzi!” 26Ndǝ ngga ka mwari kaka ndzǝr ɓǝla fǝr Hyal ni, ka ngǝti ndzǝr hya yarɛ. Ama adi aka dǝna wɛ, kadǝbar dar hyivǝr apǝri ndzi ata ɗǝgal tǝ dar aka paya.

27Dar ka si aka ndzǝr hya yarni ambwa, ka hyantani tǝ dar akǝma Ndzǝr Hakar Yahudi ni, ba kuhyir fǝrist ni ka yu tǝ dar, 28#Mat 27:25“Yar ta nkǝrɛ ala gǝri ta gǝri ta hyipɛ akwa thlǝma ndǝ ni kadamwa wɛ? Ata vuiya ǝni, gǝri ghǝiyati sanga Ursalima aka hyipǝr gǝri ata kǝrari, ba gǝri ada bara mǝrti tǝ yar apǝri yar aka tsai akwa ntǝrni!”

29Ama Bitrusu kaka laka ndzǝr hya yarɛ ni sǝnau, “Kǝ ndzai ntsakǝr ka yar ngandǝrǝr Hyal, ta nǝr ndzi! 30Hyalǝr Tada yar hyanti Yɛsu akwa ntǝnti, aghǝla tǝ gǝri kǝ tsi tǝni atar hai tǝni ata undzum kadlǝkadlɛ. 31Antǝ Hyal vi tǝni ata vui nam ngga tǝbwar tsisǝmari apa Zǝr Kuhyi ba Ndǝr Mbati. Dzǝ 'ya ǝni ani ka ndzǝr Izǝraila tubi ka bikǝr dar ba ka ndǝ kyifǝnta ala dar. 32Yar dza sakǝidar sǝ ǝni yarni, ba tsuwɛ Mambǝl Kartǝ, nam tǝ ndǝ hamnta atar Hyal ala ndzǝ nam ada kǝlǝngkǝr alari.”

33Sakatǝ albwar ndzǝ ngga-ngga tara ngati sǝ yarni, ɗǝfa dar sǝwa dzǝr dzǝri dar ɗǝmhǝ ka dar tsi tǝ dar. 34Ama ndǝr Farisi laka tǝ thlǝmari Gamaliyal, dzǝ malǝmǝr mabari nam tǝ sanga ndzi ada vǝkǝr sǝlai alari, ka hyati akwa ntsa Ndzǝr Hakar Yahudi ni. Dzǝ hau ka ndǝ kǝtǝ ndzǝr hya yarɛ alǝba nǝr saka nkyiɗǝ laka. 35Antǝ dzǝ nkǝrɛ ala albwar ndzǝ ngga-ngga, “Ndzǝr Izǝraila, 'yamɛ hankal aka sǝ nam tǝ gǝri ada ɗǝnga ka 'ya ala ndzǝ ni. 36Saka laka ndǝ laka adai tǝ thlǝmari Thliyudas tǝ dzǝ mǝrti kǝrni apa ndǝ ngga. Kudzǝghɛ aka ndzǝ kumthlani fwaɗu tara nu tǝni, ama ndǝ tsi tǝni, ba sanga ndzǝr nu tǝni ka tǝrar dar. Ənda ani sanga dǝntar dar kura paida. 37Aghǝlari, akwa sakar rǝbwa kǝra ndzi ndǝ laka adai ndǝr Yahuda akwa Galili. Dzǝ ɓui ndzi ada nu tǝni, ama ndǝ tsi tǝni dzǝ ma, ba sanga ndzǝ nam ada nu tǝni ka kikilntadzi. 38Kadǝbar ǝni kulini, sawariyirna ala gǝri ani apani: ngyaramɛ ndzǝ ni! Ngyaramɛ tǝ dar ka dar tǝra. Ma dar ada ɗǝmhǝ ka 'ya sǝ yarni aka kǝr dar, adi ata lǝkǝma wɛ. 39Ama ma nǝr Hyal, gǝri adi ata mǝzi whuzanta tǝ dar wɛ. Gǝri ata ɓui kǝr gǝri ada mpa aka Hyal!”

40Albwar ndzǝ ngga-ngga dlutsi sawariyirni. Dar ka kǝgambwa ndzǝr hya yarni ka la dar kwangyang. Antǝ dar tsanya mabari ala dar, apǝri ta dar ta ɓǝla ndǝrɛ akwa thlǝma Yɛsu, ba dar ka ngyar tǝ dar ka tǝra.

41Ndzǝr hya yarni ka ngyar Ndzǝr Hakar Yahudi ni, ada kutsari ka tǝ Hyal tsu tǝ dar apǝri dar mǝzi ka dar sa bwaniyir kǝl sǝlai akuya thlǝma Yɛsu. 42Tatang vǝri akwa fǝr Hyal ba kǝi ka kǝi dar ada lǝkǝma aka hyipɛ ba nkǝr ndǝrǝr Hyal nam sǝɗa: “Yɛsu dzǝ dza Kǝrsti.”

Currently Selected:

'Ya Su 5: CKL

Highlight

Copy