'Ya Su 3

Bitrusu Mbǝti Ndǝr Kǝgyɛ Ngurngudi

1Vǝr laka Bitrusu ba Yawhana ada mwari akwa fǝr Hyal sakar 'ya aduwa, saka makǝr nǝr tsǝtsi. 2Ndǝ laka adai nam tǝ ndɛ ada kǝl tǝni ka mwara vi tǝni anyavǝr fǝr Hyal; dzǝ ngurngudi tsu akwa kuta angǝri. Tatang vǝri ndɛ ada vi tǝni anyavǝr nam tǝ ndǝ ada ka tǝ Nyavǝr Dakwai, ka dzǝ kǝgyɛ aka ndzǝ nam ada lǝmbwa akwa fǝr Hyal. 3Sakatǝ dzǝ wula Bitrusu aka Yawhana angwa mwara lǝmbwa akwa fǝr Hyal, dzǝ ka kǝgyǝ sataka aka dar. 4Bitrusu ada wul tǝni daɗu dar gyapu aka Yawhana, Bitrusu nkǝrɛ, “Wul tǝ yar!” 5Ani ba dzǝ ka puti hankalari ata dar, dzǝ ada ɗǝnga apǝri dzǝ ata ɓui sǝ laka adzǝ dar.

6Ama Bitrusu nkǝrɛ alari, “Dinar aka lipǝla Yi adi akǝri wɛ, ama sǝ nam tǝ Yi akǝri ani tǝ Yi ata la gɛ: akwa thlǝma Yɛsu Kǝrsti ndǝr Nazarat, hyati ka gǝ mwari.” 7Ba dzǝ ka ngǝzi tsisǝmari ka hyanti tǝni; tsu ata sakari thlǝlari aka wuyar thlǝlari ka kǝtǝ dǝna. 8Dzǝ ka ɗǝghǝti parap aka thlǝlari ba dzǝ ka baditsǝni mwari! Antǝ dzǝ ka lǝmbwa vwam kaka dar akwa fǝr Hyal, dzǝ ada mwari ka fǝgǝli kaka hǝm Hyal. 9Sanga ndzi wula tǝni tǝ dzǝ ada mwari dzǝ ada hǝm Hyal; 10dar ka ngikǝba tǝni ɗa apǝri ani ndǝ nam ada ndzai anyavǝr Dakwai nǝr fǝr Hyal ada kǝgyǝ sataka nda. Ba dar ghǝi aka sǝr ndati ata kǝra sǝ nam tara 'ya alari.

Bitrusu Nkǝr Labar akwa Babalǝr Fǝr Hyal

11Sakatǝ ndǝr kǝgyǝ ni ngǝzi Bitrusu aka Yawhana akwi dǝri Sulaimanu, ani sanga ndzi ka whuiya sǝngui adzǝ dar, ka 'ya sǝr ndati ala dar dzǝr dzǝri. 12Sakatǝ Bitrusu tara wula ahani, dzǝ ka nkǝrɛ ala dar, “Gǝri ndzǝr Izǝraila, kami tǝ sǝni tara 'ya ala gǝri sǝr ndati? Kami tǝ gǝri ada sǝzǝr ntsɛ? Gǝri ada ɗǝnga apǝri yar 'yati ndǝ ni ka mwari aka dǝnar yar wala ɗakur yar ya? 13#Sǝb 3:15Hyalǝr Ibrahim ni, Isaku ba Yakubu, Hyalǝr Tada muri yarɛ ni, dzǝ haɓǝtǝ zǝr kǝiyirni Yɛsu. Gǝri hamnta tǝni ka ndǝ tsi tǝni, ba gǝri ngǝla tǝni akǝma Pǝlatus, wala ahani Pǝlatus nkǝrɛ apǝri dzǝ ata sǝntá tǝni. 14#Mat 27:15-23; Mar 15:6-14; Luk 23:13-23; Yaw 19:12-15Ama gǝri ngǝla Yɛsu, Ndǝ nam Kal-kal ba dzǝ ada 'ya kǝthlǝr ala Hyal ɗiɗi, ba gǝri ada yuwɛ ka ndǝ sǝntá ala gǝri ndǝr tsa ndɛ. 15Gǝr tsi ndǝ nam tǝ dzǝ ani baditsǝniyir mpikɛ ama Hyal hyanti tǝni akwa ntǝnti, yar tsuwɛ yar sakǝidar ǝni. 16Atar hamnta dzǝri akwa thlǝma Yɛsu, ndǝ ni nam tǝ gǝri ada wulɛ ba zǝndi tǝni ni, dzǝ mǝrtǝdzi aka dǝna. Akwa thlǝma Yɛsu ba hamnta dzǝri nam ada si atarni, ndǝ ni 'ya kalang, apa tǝ sanga gǝri wula.

17“Madar mama kulini Yi zǝndi apǝri akwa bǝlkǝkur ani tǝ gǝri 'ya sǝ yarni apa tǝ ndzǝ ngganggar gǝri tara 'ya. 18Ama Hyal ghǝiyaba sǝ nam tǝ sanga nabi yarɛ tara nkǝrɛ ata kǝra Kǝrsti, nam kǝ ndzai ntsakǝr apǝri dzǝ ata ɗar bwanai. 19Tubiyamɛ ka gǝri mbaltǝdzi adzǝ Hyal, ani ka bikǝr gǝri kǝtsǝntadzi. 20Antǝ sakar dzakti ɓui dǝna bǝlin ata si aka Thlaku, ba dzǝ ata dzakti hyanti Yɛsu ala gǝri, Kǝrsti tǝ dzǝ tsarba ala gǝri. 21Ama kǝ ndzai ntsakǝr ka Yɛsu ndzai atahyal ka la saka nǝr dǝnta nam tǝ Hyal ata ɓǝla si aka sanga su apa tǝ dzǝ 'ya alkawal tsu din atar nabiyirni yarɛ. 22#Mab 18:15,18Akuya Musa nkǝrɛ, ‘Hyal Thlakǝr gǝri ata hyanti ala gǝri nabi apa Yi akwa ntsa ndzǝr gǝri; kǝ ndzai ntsakǝr gǝri ata sǝthlǝmɛ ala kǝlara sǝ tǝ dzǝ gha ala gǝri. 23#Mab 18:19Kǝlara ndzǝ nam kura ta sǝthlǝmɛ alari nda ata ndǝghǝba tǝni sang-sang akwa ntsa ndzǝr Hyal.’

24“Dzǝri, sanga nabi yarɛ baditsǝni ata Samaila, kǝlara nabi yarɛ ndǝrɛ ata kǝra sǝ nam tara 'ya asǝna. 25#Bad 22:18Alkawalǝr Hyal atar nabiyirni yarɛ ani nǝgǝri, ba gǝri ndǝghǝi akwa sǝ mbwa-mbwa nam tǝ Hyal mǝrti kaka kakár gǝri. Apa tǝ dzǝ nkǝrɛ ala Ibrahim, ‘Atar whulfǝr ngɛ, Yi ata vǝdzǝ barka ala sanga ndzi akwa dunya.’ 26Sakatǝ Hyal hyanti zǝr kǝiyirni tsartsari dzǝ hyanti tǝni tangkǝma ala gǝri kadǝbar dzǝ ada bara ka dzǝ vǝdzǝ ala gǝri barka ba mǝrti kǝlara ndɛ akwa ntsa gǝri ka dzǝ mbalntadzi ta whalǝr bikǝrni.”

Currently Selected:

'Ya Su 3: CKL

Highlight

Copy