Liike 5

Yiezu hán kɛ̀ránzɛ̀ɓɛ̀ venlɔ́

Mat 4.18-22; Mar 1.16-20

1Wurù dɔ̀ zɔn, ɛ́ Yiezu ɛ́ van dɛ̃̀ Zenezarɛɛte ɲun-bɛhɔ́#5.1 Zenezarɛte ɲún-bɛhɔ́ ɛ́ ɓɛ́ wóò bĩní ve nɛ Kalile ɲún-bɛhɔ́. Bĩní vɛ kɛ̀rán Mar 6.53 ɲunù; ɛ́ ɓɛ́ nìzã̀amáa ɛ́ ɓɛrɛ kírie ɔ̀ ǹ ɛ́ ɲiɛ ɓán ɛ́ wɛ ɓɛ ɛ̀ ɲí Dɔfĩn bienù. 2Á mɔn ɲumu wuò bɔ̀nbɔ̀ ɲu dɔ̀ kɛ́ hɔ́ wi hɔ ɲumu ɲunù, kɛ́ ɓàasiè ɛ́ lɔ́ siɛ ɓɛ́ tàahĩ́ ɛ́ tiɛ. 3Hɔ̀pe ɲumu wùo sɔ ɛ́ lé dìcóoní ɛ́ bòo sɛ̃̀ Simɔn. Ɛ́ Yiezu yòó lè à bie lɛ́ ápe Simɔn ǹ nɛ a khɛ̃̀ún vɛ zɔ hɔ ɲumu hũn. Ɛ́ Yiezu wo kɛsí lépe ɲumu wiè hũn á ɛ́ ɓɛ̀ nìzã̀amáa ɛ̀ kɛ̀rán. 4Ɛ́ hɔ́ lɛ á bie àá ɓɛ́ vɔ́, á khie bie lɛ́ Simɔn ɛ́ nɛ làa: «Khɛ̃̀ún vɛ zɔ le viì lɛ ɲumu buò hũn, ɛ̀ kɔ̀pe àá mì ńkɔhĩ́ ɛ̀ táa mi tàahĩ́ kóo ɛ̀ mì pɛ ɓɛ ciè.» 5Ɛ́ Simɔn zɔn bie lɛ́ à ǹ ɛ́ nɛ làa: «Ɲunsɔ, ké tɛ́ hɔ́ sṹnúhṹn míkùi ɛ́ tan kɛ́ ké yí yí bòo dɔ̀ wɛ̀. Kɛ́ hɔ́ lɛ ɛ́ hɔ́ iè kɔ̀pe ɛ́ temu bie, ɛ́ nin táa hɔpe tàahĩ́ ɛ̀ kóo.» 6Ɛ́ ɓɛ́ wo táa hɔ̀ tàahĩ́ ɛ́ kóo, ɛ́ ɓɛ́ ciè lɛ ɛ́ ɓɛ́ yú ɛ́ hɛ̀ buò fúu ɛ́ hɔ́ tàahĩ́ ɛ́ hɛ̀ mii khã̀akɛ. 7Ɛ́ ɓɛ́ khɛ̃́niɛ ɓá ńkɔhĩ́ lɛ wi le ɲumu wiè sí kɛ́ hũn nɛ ɓɛ ɓen sĩiní ɓɛ́. Ɛ́ ɓɛ́ ɓɛrɛ, ɛ́ hɔ́pe ɲumu wuò sɔ mí ɲuunáa ɛ́ hɛ̀ tú tú àá ɓɛ́ ciè fúu ɛ́ hɔ́ hɛ̀ lí siɛ cɔ́ hɔ ɲumu hũn. 8Ɛ́ hɔ́ lɛ ɛ́ Simɔn Piɛre ɛ́ mɔn hɔ̀pe sí, á kùerɛ siɛ mí nunkɛ́yìe lɔ̀n Yiezu híɛhɔ́ à zɔn bie lɛ́ à ɛ́ nɛ làa: «Khɛ̃̀ún vɛ ɛ̀ kɔ̀ kɛ́ mi iè hɔ̀ lɛ ɛ́ ǹ iè bɔ̀konwé.» 9Ɛ́ Simɔn àá ɓá ńkɔhĩ́ ɓɛ́kùi ɛ́ hɛ̀ zɛ́rɛ ɓɛ̀ ciè lɛ ɛ́ ɓɛ́ yú buòrɔ́ bòo hũn. 10Ápe Simɔn ɓà ńkɔhĩ́ Zaake àá Zãn lɛ iè ɔ̀ Zebede nìɛ ɛ́ lò ɓiɛ̀ zɛrɛ. Ɛ́ Yiezu zɔn bie lɛ́ á Simɔn ɛ́ nɛ làa: «Bí zán wɛ̀; ɛ̀ wo dàá mii àá zoòni, ɛ́ ɓɛ́ iè nìnbirìe ɛ́ kɔ́ wóo kɔ vɛ cɛ̀ nɛ ɓɛ ɓen bè nin máahṹ.» 11Ɛ́ ɓɛ́ dàa hɔ̀ ɲumu wuò sɔ ɛ́ dàa ɓen lɔ́ lé sṹsùnù, ɛ̀ ɓɛ̀ fùɛrɛ̀sí hɔ̀ ǹ míkùi ǹ ɛ̀ ɓɛ̀ khie bɔ̀ Yiezu máahṹ.

Ɓèré dɔ̀ wiɛnírɔ́

Mat 8.1-4; Mar 1.40-45

12Ɛ́ hɔ́ lɛ ɛ́ Yiezu wi hɔ lóo dɔ̀ hũn; ɛ́ nùún dɔ̀ lɛ tɛkɛ̀a míkùi ɛ́ hɔ́ ɓèrému ɛ́ híɛnin ɛ́ van ɓɛrɛ. Ɛ́ hɔ́ lɛ á mɔn Yiezu, á van ɓúrɛsí lé sṹsùnù piè híɛhɔ́, à ɛ́ ɔ̀ hɛ̃nnin ɛ́ nɛ làa: «Ɲunsɔ, kɛ́ kɔ́ hṹn wɛ, ɛ́ kɔ́ dɛ̀ ɛ́ lɛ́ ɛ́ nín wɛ ɛ́ wé nìnbírɔ lɛ ɛ́ ce.» 13Ɛ́ Yiezu líeniɛ mí núnú ɛ́ lɔ́ han ɔ̀ ǹ à zɔn nɛ làa: «Ń wɛ hɔ, ɛ́ kɔ̀ wo wɛ.» Ɛ́ mí laà hũn á nùún sɔ ɓèrému yòó lɔ́ piè lɔ̀n. 14Ɛ́ Yiezu ɛ́ bie hièniɛ lɛ́ à ǹ ɛ́ nɛ làa: «Bí lɛ́ nɛ nìnbírɔ dɔ̀ ɛ̀ ɲí hɔ́ wɛ̀; kɛ́ kɔ́ vɛ nɛ a khɛ̃́ndàarɔ ɛ̀ húi kɔ, ɛ̀ kɔ̀ lɛ́ hɔ́ bòo lɛ á Moyiize làndɛ́ nɛ kɔ fɔ́ɓán kɔ̀ leń ɛ̀ dàá zɛ̃́ní lɛ́ ɓɛ́ nìnbirìe ɓɛ́kùi ǹ kɛ́ kɔ́ wan.» 15Ɛ́ Yiezu yèrè wo hṹn khie lé cɔ́, ɛ́ ɓɛ́ miikɛ nìzã̀amáa ɛ́ wóò vɛ kóo ɓánlɔ̀n ɛ̀ dàá ɲí piè bòo, à dàá wiɛní peɓɛ̀ duò. 16Kɛ́ Yiezu pe den hṹn ɛ́ wóò mun míte ɛ̀ lé vɛ hɔ vuò lɛ ɛ́ nìnbirìe mí hũn ɛ̀ vɛ hɛ̃un Dɔfĩn.

Kapɛrɛnayiimu nùún dɔ̀ lɛ tɛkɛ̀a lɛ̀ wiɛnírɔ́

Mat 9.1-8; Mar 2.1-12

17Ɛ́ wurù dɔ̀ zɔn ɛ́ Yiezu ɛ́ ɓɛ̀ nìnbirìe kɛ̀rán. Ɛ̀ ɓɛ̀ Farizĩɛɓɛ dɔ̀ àá ɓɛ́ làndɛ́ kɛ̀ránliè dɔ̀ ɛ́ hàarí wi yán. Ɓɛ̀ hàarí lɔ́ àá hɔ́ Kalile pɛ̃̀hɛ̃ àá hɔ́ Zudee pɛ̃̀hɛ̃ lóoniɛ míkùi àá hɔ́ Zerizalɛɛmu lóo. Ɛ́ Ɲunsɔ Dɔfĩn pànkɛ́ ɛ́ hàarí wi àá Yiezu á dàa ɓɛ̀ dɔriè ɛ̀ wiení. 18Ɛ́ nìnbirìe dɔ̀ ɛ́ van ɓɛrɛ kɛ́ ɓɛ́ dàa nùún dɔ̀ lɛ tɛkɛ̀a lɛ̀ lɛ ɛ́ ɓɛ́ daaniɛsí lé dɛmu dìɛ lɔ̀n. Ɓɛ̀ hṹn cɛ̀ nɛ ɓɛ vɛ zɔ síɛní-ɛ nùún sɔ Yiezu híɛhɔ́. 19Kɛ́ hɔ́ lɛ ɛ́ ɓɛ́ yí yí viì lɛ ɛ́ ɓɛ̀ ɛ̀ bènin ɛ̀ dàá zooní-ɛ ɓɛ̀ nìzã̀amáa buòrɔ́ bòo hũn, ɛ́ ɓɛ́ khie yòó lé lòo, ɛ́ yòó kɛrɛ lè viì dɔ̀ ɛ́ dàa síɛniɛ ɔ̀ nùún sɔ àá mí dɛmu dìɛ ɓɛ̀ nìzã̀amáa tĩ́ihṹ Yiezu híɛhɔ́. 20Ɛ́ hɔ́ lɛ ɛ́ Yiezu mɔn peɓɛ̀ ńdɛsĩ̀nlɔ́, á zɔn bie lɛ́ ápe dɔrɔ ǹ ɛ́ nɛ làa: «Kɔ̀ bɔ̀koohɛ̃ sɛ́wɛ́rí ɛ́ dɔ́ lɛ́ kɔ̀ ǹ.» 21Ɛ́ ɓɛ́ làndɛ́ kɛ̀ránliè àá ɓɛ́ Farizĩɛɓɛ ɛ́ khie ɛ́ khɛ́ ɓán hũn ɛ́ nɛ làa: «Àpe nùún sɔ lɛ iè wie á dàa khɛ́ khe kɛ̀amu ɛ̀ lɛ́ Dɔfĩn? Á wieni temu dɛ̀ bɔ̀koohɛ̃ sɛ́wɛ́rí ɛ́ dé kɛ́ Dɔfĩn mí-dòomú ɛ́ ɓen bòo mí?» 22Ɛ́ Yiezu dũnɛ peɓɛ̀ bòo lɛ ɛ́ ɓɛ́ ɛ́ lieníkɛ á zɔn bie lɛ́ ɓà ǹ nɛ làa: «Mí wiɛ dàa ɛ́ lieníkɛ kɛ̀amu? 23Hɔ̀ hɔ́sɔ temu bierɔ́ wuawi pɔ: “Hɔ̀ ńbie nɛ kɔ bɔ̀koohɛ̃ sɛ́wɛ́rí dɔ́ lɛ́ kɔ̀ ǹ yée, kɛ́ hɔ́ ǹbie nɛ kɔ hĩ́ní vɛ lan?” 24Kɛ́ ń den wɛ nɛ mi dũń kɛ́ á Nìnbírɔ Zuú ɛ́ dɛ̀ bɔ̀koohɛ̃ sɛ́wɛ́rí ɛ́ dé lé sṹsùnù.» À khie ɛ́ bie lɛ́ á dɔrɔ ǹ ɛ́ nɛ làa: «Ń nɛ kɔ hĩ́ní mii kɔ́ dɛmu dìɛ ɛ̀ kɔ̀ lan ɓɔ.» 25Ɛ́ mí laà hũn á nùún siɛ hĩ́nà peɓɛ̀ yìe hũn, ɛ́ mɔ̀ mí dɛmu dìɛ à cɔ́ van mí yíe kɛ́ á ɛ́ Dɔfĩn ɛ̀ ɓàanínin. 26Ɛ́ ɓɛ́pe ɓɛ́kùi ɛ́ hɔ́ yòokɛa lɔ̀n ɛ́ ɓɛ́ hɛ̀ zɛ́rɛ, ɛ́ ɓɛ́ khie ɛ́ Dɔfĩn ɛ̀ ɓàanínin kɛ́ ɓɛ́ ɛ́ bie ɛ́ nɛ làa: «Zoòni ɛ́ ké hɛ̀ mɔn yéréké bòo!»

Bòo lɛ ɛ́ Yiezu dàa vɔn Levi

Mat 9.9-13; Mar 2.13-17

27Ɛ́ pehɔ̀ máahṹ, ɛ́ Yiezu zɔn lɔ́ lé zũnù hũn, á van lɔ́ mɔn lànpó-férɔ dɔ̀ lɛ yèrè ɛ́ ɓɛ́ nɛ Levii#5.27 Lévii ɛ́ iè pe Yiezu Kɛ̀ránzuú lɛ ɛ́ ɓɛ́ wóò bĩní ve nɛ Matiye (Mat 9.9, Mar 2.13). kɛ́ á kɛsí mí tɔnlɔ́ tánlén, ɛ́ Yiezu zɔn bie lɛ́ à ǹ ɛ́ nɛ làa: «Hĩ́ní bè niǹ máahṹ!» 28Ɛ́ Levii ɛ́ fùɛrɛ̀sí mí bòo míkùi à siɛ hĩ́nà bɔ̀ piè máahṹ.

29Ɛ́ Levii ɛ́ van tɛ́ hɔ́ díe bɔ̀kùi mí yíe à perɛ Yiezu ǹ. Ɛ́ ɓɛ́ lànpó-fériè bìkuì dɔ̀ àá ɓɛ́ nìnbirìe dɔ̀ ɛ́ hàarí páaníɛ kɛsí ɛ́ dí àá Yiezu àá mí kɛ̀ránzɛ̀ɓɛ̀. 30Ɛ́ ɓɛ́ Farizĩɛɓɛ àá ɓán ńkóoɓánlɔ̀n nìɛ làndɛ́ kɛ̀ránliè ɛ́ khĩ́ ɓɛ́ ɲihĩ́ɛ hũn, ɛ̀ ɓɛ̀ khie ɛ́ bie àá Yiezu kɛ̀ránzɛ̀ɓɛ̀ ɛ́ nɛ làa: «Mí wiɛ dàa ɛ́ dí kɛ́ mí ɛ́ ɲu àá ɓɛ́ lànpó-fériè àá ɓɛ́ bɔ̀konwériè?» 31Ɛ́ Yiezu ɛ́ zɔn bie lɛ́ ɓà ǹ ɛ́ nɛ làa: «Ɓɛ̀ yí ɓɛ́ nìnbirìe lɛ lɔ̀n hie ɛ́ temu mɛ̀kóo wi Dɔkɔtɔrɔ ǹ wɛ̀, kɛ́ ɓɛ́ iè ɓɛ̀ dɔriè. 32Ɛ́ ɓɛ́ yí ɓɛ́ nìnbirìe lɛ tĩì ɛ̀ ɓɛ̀ nɛ ɓɛ́ cã̀aní ɛ́ ń ɓɛrɛ ɛ́ nín ɓen ve wɛ̀; kɛ́ ɓɛ́ iè ɓɛ̀lɛ ɛ́ dũ kɛ́ ɓɛ́ iè ɓɛ̀ bɔ̀konwériè; bòo lɛ ɛ́ wé ɛ̀ ɓɛ̀ zɛ̀ní ɓɛ́ tĩɛ̀ àá ɓɛ́ bɔ̀werà.»

Yiezu àá ɲunù lìnlɔ́ bòo

Mat 9.14-17; Mar 2.18-22

33Ɛ́ ɓɛ́ Farizĩɛɓɛ zɔn bie lɛ́ Yiezu ǹ ɛ́ nɛ làa: «Zãn kɛ̀ránzɛ̀ɓɛ̀ àá képe kè bán ɛ́ tan wóò lì ɓɛ́ ɲihĩ́ɛ fúu ɛ̀ ɓɛ̀ hɛ̃un Dɔfĩn, kɛ́ kɔ́pe kɔ̀ kɛ̀ránzɛ̀ɓɛ̀ pe wóò dí kɛ́ ɓɛ́ ɛ́ ɲu.» 34Ɛ́ Yiezu ɛ́ zɔn ɓɛ̀ dìenin ɛ́ nɛ làa: «Mí bìe dɛ̀ ɛ́ bie nɛ a yaamu ɓàasɔ ɓà pàáɓɛ́ ɛ̀ lì ɓɛ́ ɲihĩ́ɛ kɛ́ á lò wi yán àá ɓɛ́? 35Kɛ́ yìi dɔ̀ ɛ́ vaá-ɓen à yaamu ɓàasɔ ɛ́ ɓɛ́ ɓén leń; ɛ́ pehɔ̀ yìi hũn ɛ́ ɓɛ́ den wo ɛ́ lì ɓɛ́ ɲihĩ́ɛ lò.»

36Ɛ́ Yiezu ɛ́ khie ɛ́ lè wĩ̀ lɛ ɛ̀ wĩ̀ lɛ́ ɓà ǹ nɛ làa: «Nìnbírɔ yáà khã̀á pɔnkɔ̀-núnú dɛ̀fĩì ɛ̀ dàá khíi lɛ pɔnkɔ̀-kĩ́i wɛ̀. Kɛ́ dàa bòo mí, ɛ́ lé pɔnkɔ̀-fĩì ɛ́ lò khã̀á kansí yán, ɛ̀ lèpe pɔnkɔ̀-núnú dɛ̀fĩì àá lé pɔnkɔ̀-kĩ́i ɛ́ lò yá féɓán wɛ̀. 37Ɛ̀ nìnbírɔ ɛ́ yáà kóo dìvɛ̃-fĩɛ̀ po-kĩ́ɛ hũn wɛ̀. Kɛ́ dàa bòo mí, kɛ́ hɔ́ dìvɛ̃-fĩɛ̀ ɛ́ ɓén ɛ́ be, ɛ́ hɔ́ ɛ́ wúa hɔ può ɛ̀ hɔ̀ ɛ́ kóosí, ɛ́ hɔ́pe può ɛ́ lò ɛ́ vɛ ɲumu. 38Kɛ́ hɔ́ dìvɛ̃-fĩɛ̀ ɛ́ wóò kóo po-fĩɛ̀ hũn. 39Ɛ̀ nìnbírɔ ɛ́ ɓen ɲun divɛ̃-kĩɛ, à yáà bĩní bie nɛ mii ɲu dìvɛ̃-fĩɛ̀ wɛ̀. Iè hɔ̀ lɛ ɛ́ ɓɛ́ den wóò nɛ hɔ divɛ̃-kĩɛ ɛ́ temu tĩ.»

Currently Selected:

Liike 5: bwj

Highlight

Copy