Liike 4

Yiezu hàanírɔ́

Mat 4.1-11; Mar 1.12-13

1Ɛ́ Yiezu lɛ ɛ́ lé Mɛkɛ̃n-Sãanu ɛ́ tú ɛ́ van lɔ́ lé Zurudɛ̃n vṹn pɛ̃hɛ̃ hũn ɛ́ ɓɛrɛ, ɛ́ lépe Mɛkɛ̃n-Sãanu ɛ́ khie fɔ́-a ɛ́ dàa van lè ńɲiherà hũn. 2Ɛ́ Sitũanɛ ɛ́ van hàaniɛ ɔ̀ yán fúu wihĩ́ dɛ̀wɛ́ (40) hũn. Á wɔ́ hɔ́pe wihĩ́ dɛ̀wɛ́ sɔ kɛ́ á yí dí bòo dɔ̀ wɛ̀. Ɛ́ hɔ́ van khie vɔ́, ɛ́ hɔ́ hĩ́ní ɛ́ yòó ɔ̀ ɓé. 3Á Sitũanɛ ɛ́ wo zɔn bie lɛ́ à ǹ ɛ́ nɛ làa: «Kɔ́ ɓen iè Dɔfĩn Zuú àá bɔ̀bín ɛ̀ kɔ̀ zɔ bie lɛ́ lépe sɛ̃̀nlè lɛ ǹ ɛ̀ lè wé búrú.» 4Ɛ́ Yiezu ɛ́ zɔn bie lɛ́ à ǹ ɛ́ nɛ làa: «Hɔ̀ ɛ́ wɛ̃́ lé Dɔfĩn bienù vɛ̃hṹ hũn ɛ́ nɛ làa: “Hɔ̀ yí díe mí dòonún ɛ́ nìnbírɔ wóò dí ɛ̀ dàá yìe wé wɛ̀.”» 5Á Sitũanɛ ɛ́ khie fɔ́-a ɛ́ khɛ̃̀nɛ van yòoniɛ, à zɛ̃́niɛ lè dímíɲɛ́ bɛ́záahĩ́ míkùi ɔ̀ ǹ yìn-cóoní lɔ̀n, 6à zɔn bie lɛ́ à ǹ à nɛ làa: «Nin lɛ́ hɔ́pe pànkɛ́ sɔ sí míkùi kɔ ǹ àá hɔ́pe bɛ́záahĩ́ sɔ sí ɓàarɔ́. Hɔ̀pe míkùi ɛ́ bòo sɛ̃̀ mì ǹ, ɛ́ ń dɛ̀ hɔ̀ ɛ́ lɛ́ nìnbírɔ lɛ ɛ́ ń wɛ ǹ. 7Kɛ́ kɔ́ hṹn siɛ hùerɛ̀sí niǹ híɛhɔ́ ɛ̀ kɔ̀ ɓàaniɛ mi ǹ, ɛ́ hɔ́pe míkùi bòo ɛ́ sĩ̀n kɔ̀ ǹ.» 8Ɛ́ Yiezu zɔn kɔ̃́niɛ ɔ̀ ɛ́ nɛ làa: «Hɔ̀ wɛ̃́ lé Dɔfĩn bienù vɛ̃hṹ hũn ɛ́ nɛ: “Ɲunsɔ lɛ iè Dɔfĩn mí dòonún iè pe kɔ́ wóò ɓàanínin, ɛ̀ tɛ́ tɔnlɔ́.”» 9Á Sitũanɛ ɛ́ sĩ̀n khie fɔ́-a ɛ́ dàa van hɔ̀ Zerizalɛɛmu, à yòó van dĩniɛ ɔ̀ lè Dɔfĩn zũ-bɛhɔ́ ɲún lɔ̀n, à zɔn bie lɛ à ǹ ɛ́ nɛ làa: «Kɔ́ ɓen iè Dɔfĩn Zuú àá bɔ̀bín, ɛ̀ kɔ̀ cáa vɛ síɛ, iè hɔ̀ lɛ ɛ́ hɔ́ wɛ̃́ lé Dɔfĩn bienù vɛ̃hṹ hũn ɛ́ nɛ làa: 10“Dɔfĩn ɛ́ ɓén bie lɛ́ mí mɛlɛkɛɓɛ ǹ nɛ ɓɛ dàa kɔ.” 11Ɛ̀ hɔ̀ lò bĩniɛ wɛ̃́ ɛ́ nɛ: “Ɓɛ̀ ɓén zɛ̃nkɛ kɔ ǹ ɓɛ́ níhĩ́ hũn, ɛ́ kɔ́ zeǹ ɛ́ yá kenkení àá sɛ̃̀nlè wɛ̀.”» 12Ɛ́ Yiezu ɛ́ zɔn kɔ́niɛ ɔ̀ ɛ́ nɛ làa: «Ɛ̀ hɔ̀ lò ɓiɛ̀ wɛ̃́ ɛ́ nɛ: “Bí hàaní Ɲunsɔ lɛ iè kɔ̀ Dɔfĩn wɛ̀.”» 13Ɛ́ hɔ́ lɛ á Sitũanɛ hàaní ɛ́ ɔ̀ tan, á fùɛrɛ̀sí-e ǹ à cɔ́ van ɛ́ pɛ̃̀n-ɓuɛ̀ dɔ̀ hìé.

Yiezu tɔnlɔ́ fìi ɓánlɔ́ hɔ̀ Kalile pɛ̃̀hɛ̃ hũn

Mat 4.12-17; Mar 1.14-15

14Ɛ́ Yiezu ɛ́ khie khũ̀a van hɔ̀ Kalile pɛ̃̀hɛ̃ hũn kɛ́ lé Mɛkɛ̃n-Sãanu pànkɛ́ ɛ́ wi àá ɔ́. Ɛ́ piè yèrè ɛ́ wo hṹn lé hɔ́pe pɛ̃̀hɛ̃ sɔ míkùi hũn. 15À hṹn wóò kɛ̀rán ɓɛ́ nìnbirìe ɓɛ̀ Zuifuɓɛ ńkóoɓánlɔ̀n zĩhĩ́ɛ hũn, ɛ́ ɓɛ́ nìnbirìe ɓɛ́kùi ɛ́ hɛ̀ hṹn piè yèrè leń.

Nazarɛɛte nìɛ yí tɛ̀ Yiezu bòo wɛ̀

Mat 13.53-58; Mar 6.1-6

16Ɛ́ Yiezu ɛ́ khie van Nazarɛɛti, lè lóo lɛ á wɔ́ mí zĩncɛ́mu hũn. Ɛ́ kɛ̀a bòo lɛ á dàa wóò wé, ɛ́ ɓɛ́ Zuifuɓɛ ńvũùnín sí zɔn, á van zɔn peɓɛ̀ ńkóoɓánlɔ̀n zunù. Á siɛ hĩ́nà ɛ́ mii kɛ̀rán lé Dɔfĩn bienù. 17Ɛ́ ɓɛ́ khie lɛ́ ɔ́ Dɔfĩn bɔ̀háanírɔ Ezayi vɛ̃hṹ ɔ̀ ǹ. Á yòó bɛrɛ lè à van mɔn lè viì lɛ ɛ́ hɔ́ wɛ̃́ nin ɛ́ nɛ làa:

18 Ɲunsɔ Mɛkɛ̃ni ɛ́ wi niǹ lɔ̀n.

À munɛ mi nɛ n bie le Bentĩnu ɛ̀ lɛ́ ɓɛ́ nìkherà ǹ.

À tɔrɛ mi nɛ n bie lɛ́ ɓɛ́ kɛ̀sí nìɛ ǹ nɛ ɓɛ lɔ̀n ɓén lé,

Ɛ̀ ǹ bie lɛ́ ɓɛ́ muaɓɛ̀ ǹ nɛ peɓɛ̀ yìe ɛ́ ɓén mi bòo,

Ɛ̀ ǹ fuení ɓɛ́lɛ ɛ́ ɓɛ́ lɔ̀n ɛ̀ biení ǹ;

19 Ɛ̀ ǹ buie le lɔ́líe lɛ ɛ́ Ɲunsɔ mii wé mí hiì hũn bòo.

20Ɛ́ pehɔ̀ máahṹ, ɛ̀ Yiezu ɛ́ bun lè vɛ̃hṹ ɛ́ khie lɛ́ á lɛ te pelè bòo ɛ́ húi ǹ, à siɛ kɛsí. Ɛ́ ɓɛ́ nìnbirìe lɛ wi le ńkóoɓánlɔ̀n zũnù hũn ɓɛ́kùi ɛ́ mɔ̀ ɓɛ́ yìe fɛ́ à ǹ ɛ́ húi. 21Á wo zɔn ɓɛ́ lé bienù fìi ɛ́ bie àá ɓɛ́ ɛ́ nɛ làa: «Lèpe Dɔfĩn bienù lɛ ɛ́ mí ɲɛ́ hɔ́pe sáalɛ ɛ́ ɲunù ɛ́ tú hɔ́pe zoòni lɛ.» 22Ɛ́ ɓɛ́pe ɓɛ́kùi ɛ́ hɛ̀ ɛ́ hɔ̀ bɔ̀berà ɛ̀ bie piè bòo hũn; ɛ̀ hɔ̀pe hìi biehĩ́ lɛ ɛ́ lé àá piè ɲunù ɛ́ hɛ̀ yòokɛa peɓɛ̀ lɔ̀n, ɛ́ ɓɛ́ wo ɛ́ biekɛ ɛ́ nɛ làa: «À sũǹ yí é pe Zozɛɛfu zuú?» 23Ɛ́ Yiezu zɔn bie lɛ́ ɓà ǹ nɛ làa: «Ń dũ sãaniɛ kɛ́ mí ɓén wĩ̀ lè wĩ̀i sɔ lɛ ɛ́ lɛ́ mi ǹ: “Dɔkɔtɔrɔ wiɛní kɔ́te kɔ̀teǹ”. Ɛ̀ mì lò pɛ́ ɛ́ ɓén zɔ bie ɛ́ lɛ́ mi ǹ nɛ làa: “Ké ɲɛ́ hɔ́ bòo lɛ ɛ́ kɔ́ wɔ́ Kapɛrɛnayiimu lóo hũn míkùi, ɛ́ kɔ́ wé hɔ́ ɓà ńmà mì kùrú lóo hũn hũ̀nún”.» 24À bĩniɛ zɔn bie lɛ́ ɓà ǹ nɛ làa: «Nin bie hɔ lɛ́ miɛ ǹ àá bɔ̀bín nɛ Dɔfĩn bɔ̀háanírɔ lɛ ɛ́ ɓɛ́ wóò tɛ̀ bòo, ɓà kùrú lóo hũn ɛ́ mí wɛ̀. 25Nín bie hɔ lɛ́ miɛ ǹ nɛ a Dɔfĩn bɔ̀háanírɔ Elii pɛ̃̀hṹ hũn, lɛ ɛ́ hɔ́ hóo ɛ́ dàa wɔ́ lɔ́líe bɔ̀nbɔ̀ tĩ àá mí tĩ́ihṹ kɛ́ hɔ́ yí tè, ɛ́ hɔ́ hĩn-bɛhɔ́ dàa lɔ́, ɛ̀ mɛ-hã́à bìkuì ɛ́ hàarí wi Yizarayɛɛle cɛ̃̀mɛ̀nɛ́ hũn. 26Kɛ́ Dɔfĩn ɛ́ yí tɔn Elii nɛ a vɛ ɓɛpe mɛ-hã́à sɔ dɔ̀ viì, kɛ́ á ɓen yí-e pe mɛ-hṹnu lɛ hàarí wi hɔ Sarapeta lóo hũn mí-dòonún, hɔ̀ Sidɔn cɛ̃̀mɛ̀nɛ́ hũn ɛ́ ɓen bòo mí. 27Ɛ̀ Elisee pɛ̃̀hṹ hũn ɛ́ ɓèríe bìkuì ɛ̀ hàarí wi Yizarayɛɛle cɛ̃̀mɛ̀nɛ́ hũn. Kɛ́ hɛ̀rí nìcóoní dɔ̀ á yí wiɛní kɛ́ á ɓen yí é Naaman lɛ lé hɔ́ Siiri cɛ̃̀mɛ̀nɛ́ ɛ́ ɓen bòo mí.»

28Ɛ́ hɔ́ lɛ ɛ́ ɓɛ́ nìnbirìe lɛ wi lè ńkóoɓánlɔ̀n zũnù hũn ɓɛ́kùi ɛ́ ɲɛ́ hɔ́pe lɛ ɛ́ Yiezu ɛ́ bie, ɛ́ ɓɛ́ tĩɛ̀ siɛ hĩ́nà ɔ̀ ǹ. 29Ɛ́ ɓɛ́ siɛ hĩ́nà ɓaa ɔ̀ ɛ́ dàa van lɔ́ hɔ́ Nazarɛɛte lóo lɛ wi le ɓúkìe lɔ̀n máahṹ, ɛ́ van dĩ̀niɛ ɔ̀ lè ɓúkìe ɲunù, ɛ̀ ɓɛ̀ nɛ ɓɛ́ lún ɔ́ vɛ siɛní. 30Kɛ́ Yiezu den zɔn lɔ́ àá peɓɛ̀ tĩ́ihṹ ɛ́ khie lɔ́ cɔ́.

Yiezu ɛ́ ɲɛun ńɲíkĩ́rɔ dɔ̀ ɛ́ lieniɛ nùún dɔ̀ ǹ

Mar 1.21-28

31Ɛ́ Yiezu ɛ́ siɛ van lóo dɔ̀ lɛ ɛ́ ɓɛ́ nɛ Kapɛrɛnayiimu hɔ̀pe Kalile pɛ̃̀hɛ̃ hũn; ɛ́ ɓɛ́ Zuifuɓɛ ńvũùnín sí dɔ̀ zɔn, á van zɔn peɓɛ̀ ńkóoɓánlɔ̀n zunù, ɛ́ zɔn ɓɛ̀ nìnbirìe ɛ̀ kɛ̀rán. 32Ɛ́ piè kɛ̀ránlɔ́ ɛ́ hɛ̀ zɔn ɓà ǹ, iè hɔ̀ lɛ ɛ́ piè bienù ɛ́ hɛ̀ pànkɛ́ wi. 33Ɛ́ nùún dɔ̀ ɛ́ hṹn wi lepe ńkóoɓánlɔ̀n zũnù sɔ hũn kɛ́ ńɲíkĩ́rɔ dɔ̀ ɛ́ wi-è ǹ. Á zɔn bérɛ ɛ́ nɛ làa: 34«Hɔ ńɓùo ɛ́ kɔ́ ɛ́ cɛ̀ àá kie, Nazarɛɛte Yiezu? Kɔ́ wie ɓɛrɛ ɛ́ kɔ́ ɓen vĩ́iní kie? Ń dũ kɔ, kɔ́ iè Dɔfĩn nùún lɛ Hɔ́ munɛ.» 35Ɛ́ Yiezu ɛ́ zɔn tĩ́nɛ à ńɲíkĩ́rɔ sɔ ɲún hũn ɛ́ nɛ làa: «Hĩì, ɛ̀ kɔ̀ lí-e pe nùún lɛ hũn!» Á ńɲíkĩ́rɔ ɛ́ mɔ̀ à nùún siɛ lɔ̀rɛ̀sí ɓɛ́ nìnbirìe ɓɛ́kùi yìe hũn à lɔ́ à ǹ kɛ́ á yí wũmɛ-a wɛ̀. 36Ɛ́ ɓɛ́pe ɓɛ́kùi ɛ́ hɛ̀ bɔ̀dũmunù vũnun ɛ́ ɓɛ́ khie ɛ́ biekɛ lɛ́kɛ ɓá ǹ nɛ làa: «Lè sí ɛ́ hɛ̀ iè pe bienù àá bɔ̀bín! Àpe nùún sɔ lɛ ɛ́ dàa ɲunù lɛ wóò tĩnkɛ ɓɛ ńɲíkĩ́nìɛ ɲún hũn àá pànkɛ́ ɛ̀ ɓɛ̀ lé.» 37Ɛ́ ɓɛ́ wo khie ɛ́ Yiezu bòo bie viì míkùi, hɔ̀pe pɛ̃̀hɛ̃ sɔ hũn.

Dɔriè bìkuì wiɛnírɔ́

Mat 8.14-17; Mar 1.29-34

38Ɛ́ Yiezu ɛ́ zɔn lɔ́ lé ńkóoɓánlɔ̀n zũnù hũn ɛ́ lɔ́ van Simɔn yíe. Á van yú Simɔn ɓà he-hṹnu kɛ́ ńhĩ́nlɔ́ kuànù dɔ̀ ɛ́ ɓaa ɔ̀; ɛ́ ɓɛ́ nìnbirìe khie hɛnɛ Yiezu ǹ nɛ a wiɛní-ɛ. 39Ɛ́ Yiezu siɛ lúnluosí pie ɲún hũn, à tĩ́nɛ hɔ̀ ńhĩ́nlɔ́ ɲún hũn ɛ́ nɛ hɔ lé, ɛ́ hɔ́ yòó lɔ́ à ǹ. Ɛ́ mí laà hũn, á siɛ hĩ́nà ɛ́ khie ɛ́ peɓɛ̀ bòo ɛ̀ húi.

40Ɛ́ hɔ́ lɛ ɛ́ lé wurù ɛ́ van siɛ ɛ́ lí, ɛ́ ɓɛ́ nìnbirìe lɛ dàa ɓɛ dɔriè lɛ hɔ́ duò àá ɓɛ́ ɲúuhɛ̃ ɲúuhɛ̃ ɛ́ wi nin, ɛ́ van dàa ɓɛ̀ dàa ɓɛrɛ Yiezu viì. Á bɔ̀kɛ mí níhĩ́ peɓɛ̀ lɔ̀n ɓɛ̀pe àá nì-cóohɛ̃ ɛ́ wiɛníkɛa ɓɛ̀ ɓɛ́kùi. 41Ɛ̀ ɓɛ̀ ńɲíkĩ́nìɛ lò hṹn lé ɓɛ́ nìnbirìe bìkuì ǹ kɛ́ ɓɛ́ ɛ́ bénkɛ ɛ́ nɛ: «Kɔ́ iè Dɔfĩn Zuú.» Kɛ́ Yiezu den wóò tĩ́nkɛ peɓɛ̀ ɲún hũn nɛ ɓɛ hĩì iè hɔ̀ lɛ ɛ́ ɓɛ́pe ɛ́ dũ kɛ́ ápe ɛ́ temu iè ɔ̀pe Masiya, lɛ iè ɔ̀pe fuenírɔ.

Yiezu ɛ́ lè Bentĩnu ɛ̀ buie ɓɛ́ Zuifuɓɛ ńkóoɓánlɔ̀n zĩhĩ́ɛ hũn

Mar 1.35-39

42Ɛ́ bòo lɛ ɛ́ hɔ́ sí ɛ́ van ɛ́ tĩ, ɛ́ Yiezu zɔn lɔ́ lé lóo hũn ɛ́ van lɔ́ lé viì lɛ ɛ́ nìnbírɔ ɛ́ mí hũn. Ɛ́ ɓɛ́ nìzã̀máa ɛ́ khie ɔ̀ cɛ̀. Ɛ́ hɔ́ lɛ ɛ́ ɓɛ́ van mɔn ɔ̀, ɛ́ ɓɛ́ hṹn cɛ̀ nɛ a dìń àá ɓɛ́, à bí lan à kɛ́ ɓɛ́ wɛ̀. 43Kɛ́ Yiezu ɛ́ den zɔn bie lɛ́ ɓà ǹ ɛ́ nɛ làa: «Ń fɔ́ɓán ɛ̀ ǹ ɓiɛ̀ bie le Dɔfĩn bɛ́záanú Bentĩmù bòo hɔ̀ lóoniɛ̀ lɛ kɛ́ hũn, iè hɔ̀ lɛ ɛ́ hɔ́ iè hɔ̀pe yènsénín ɛ́ Dɔfĩn dàa tɔrɛ mi ɛ́ ń ɓɛrɛ.» 44À wo khie ɛ́ lè Bentĩnu ɛ̀ buie ɓɛ Zuifuɓɛ ńkóoɓánlɔ̀n zĩhĩ́ɛ hũn, hɔ̀ Zudee pɛ̃̀hɛ̃ hũn.

Currently Selected:

Liike 4: bwj

Highlight

Copy