Liike 6

Yiezu àá lé ńvũùnín sí bòo

Mat 12.1-8; Mar 2.23-28

1Ɛ́ Zuifuɓɛ ńvũùnín sí dɔ̀ zɔn, ɛ́ Yiezu ɛ́ zɔn hɔ̀ mɛhɛ̃ dɔ̀ ɛ̀ cánkɛ́. Ɛ́ piè kɛ̀ránzɛ̀ɓɛ̀ ɛ́ khie ɛ́ hɔ̀ dínlɔ́ lɛ bɔn dɛ̃̀ ɲúuhɛ̃ ɛ̀ khè ɛ̀ pũ̀mɛ ɓɛ́ níhĩ́ hũn ɛ̀ lɛ̀. 2Ɛ́ ɓɛ́ Farizĩɛɓɛ dɔ̀ lɛ wi yán ɛ́ khie bie àá ɓɛ́ ɛ́ nɛ làa: «Mí wiɛ dàa ɛ́ hɔ̀ bòo lɛ ɛ́ hɔ́ làndɛ́ nɛ hɔ yí fɔ́ɓán ɛ̀ hɔ̀ wé lé ńvũùnín sí zɔn ɛ̀ wé?» 3Ɛ́ Yiezu ɛ́ zɔn kɔ̃́niɛ ɓɛ̀ ɛ́ nɛ làa: «Mí bìe ɛ́ yí kɛ̀rán lè Dɔfĩn bienù vɛ̃hṹ hũn hɔ̀ bòo lɛ á Daviide ɛ́ hàarí wɔ́ pɛ̃̀hṹ lɛ ɛ́ hɔ́ hĩni ɛ́ dàa hàarí ɛ́ ɔ̀pe àá ɓɛ́ niǹbiriè lɛ hàarí bɔ̀ɓán àá ɔ̀ ɓé? 4À hàarí yòó zɔn lè Dɔfĩn zũ-bɛhɔ́, ɛ́ zɔn khuie hɔ̀ búrú lɛ ɓɛ́ bɔ̀sí ɛ́ lɛ́ Dɔfĩn ɛ́ lɛ̀, à khie lɛ́ hɔ́dɔ̀ ɓɛ̀pe lɛ ɛ́ hàarí bɔ̀ɓán àá ɔ́ ǹ ɛ́ ɓɛ́ ɓiɛ̀ lɛ̀; hɔ́rɔsí kɛ́ hɔ́ làndɛ́ ɛ́ lò den nɛ ɓɛ iè ɓɛ̀ khɛ̃́ndàariè ɓɛ́ dòonún ɛ́ temu dɛ̀ hɔ̀ búrú sɔ ɛ́ lɛ̀.» 5Ɛ́ Yiezu ɛ́ bĩniɛ zɔn bie sĩiniɛ ɛ́ nɛ làa: «À nìnbírɔ Zuú ɛ́ iè hɔ̀ ńvũùnín sí ɲúnsɔ.»

Nùún dɔ̀ lɛ núnú hɔn wiɛnírɔ́

Mat 12.9-14; Mar 3.1-6

6Ɛ́ ɓɛ́ Zuifuɓɛ ńvũùnín sí ɓuɛ̀ dɔ̀ zɔn, ɛ́ Yiezu ɛ́ van zɔn peɓɛ̀ ńkóoɓánlɔ̀n zũnù dɔ̀, ɛ́ zɔn ɓɛ̀ nìnbirìe kɛ̀rán. Ɛ́ nùún dɔ̀ ɛ́ hàarí wi yán kɛ́ piè ńdóonín núnú ɛ́ hɔn dɛ̃̀. 7Ɛ́ ɓɛ́ làndɛ́ kɛ̀ránliè àá ɓɛ́ Farizĩɛɓɛ ɛ́ Yiezu ɛ̀ nii nɛ bòo á ɓén wiɛní nìnbírɔ hɔ̀ ńvũùnín sí zɔǹ, ɛ̀ ɓɛ̀ dàá yí benin ɛ̀ bie nɛ a wɔ́ khɔn. 8Kɛ́ Yiezu den dũ peɓɛ̀ hũn bòo á zɔn bie lɛ́ ápe nùún lɛ núnú hɔn ǹ ɛ́ nɛ làa: «Hĩ́ní zɔ dìń hũ̀nún, ɓɛ̀ nìnbirìe tĩ́ihṹ.» Á hĩ́nà zɔn dɛ̃̀. 9Ɛ́ Yiezu ɛ́ zɔn bie lɛ́ ɓà ǹ ɛ́ nɛ làa: «Nin dìe miɛ ǹ: Hɔ̀ làndɛ́ nɛ wɛrɛ̀? Hɔ̀ nɛ ke wé bɔ̀tente lè ńvũùnín sí zɔ̀n yée kɛ́ hɔ́ nɛ ke wé bɔ̀koohɔ́? Hɔ̀ nɛ ke fuení nìnbírɔ ǹ yée kɛ́ ké ɓé ɓàasɔ?» 10À huie ɓɛ̀ ɓɛ́kùi ɛ́ khie fɔ̀ à zɔn bie lɛ́ á nùún ǹ nɛ làa: «Niiní kɔ́ núnú líení.» Á niiniɛ lè ɛ́ líeniɛ ɛ́ lé yòó wan. 11Ɛ́ ɓɛ́ làndɛ́ kɛ̀ránliè àá ɓɛ́ Farizĩɛɓɛ hɛ̀ tĩɛ̀ yòó sun sun ɛ́ ɓɛ́ khie van wũ̀aní ɓán hũn ɛ́ hɔ̀ bòo lɛ ɛ́ ɓɛ wé àá Yiezu ɛ̀ cɛ̀.

Yiezu kɛ̀ránzɛ̀ɓɛ̀ pírú àá nìɛ ɓɛ̀ ɲu leńlɔ́.

Mat 10.1-4; Mar 3.13-19

12Ɛ́ pehɔ̀ pɛ̃̀hṹ hũn ɛ́ Yiezu van yòó lé ɓúkìe dɔ̀ ɛ́ yòó van hɛ̃nnɛ Dɔfĩn fúu ɛ́ cãa yán. 13Ɛ́ bòo lɛ ɛ́ hɔ́ sí van tɛ̃un, á vɔn mí kɛ̀ránzɛ̀ɓɛ̀ à lerɛ peɓɛ̀ pírú àá nìɛ ɓɛ̀ ɲu ɛ́ cɔ́ yèrè nɛ tɔnkɛriè. Ɓàasiè sɔ ɛ́ iè ɓɛ̀ lɛ: 14Simɔn lɛ á cɔ́ yèrè nɛ Piɛre àá ɓá zuú Andere, àá Zaake àá Zãn àá Filiipu àá Batelemii àá 15Matiye àá Toma àá Alife yɛ̀nù Zaake àá Simɔn lɛ ɛ́ ɓɛ́ wóo nɛ Zelɔɔti àá 16Zaake yɛ̀nù Zuude àá Zudaasi Yisikariyɔɔte àpe lɛ ɛ́ ti-e Yiezu máahṹ ɛ́ ɓén bɛ́.

Yiezu ɛ́ ɓɛ̀ nìzã̀amáa ɛ́ kɛ̀rán kɛ́ à ɓɛ̀ dɔriè ɛ̀ wiɛní

Mat 4.23-25

17Ɛ́ Yiezu àá mí kɛ̀ránzɛ̀ɓɛ̀ ɛ́ yòó lɔ́ lé ɓúkìe lɔ̀n ɛ́ ɓen siɛ dɛ̃̀ lè ńkhuè dɔ̀ lɛ ɛ́ piè mɛ́nbèriè nì-kuì dɔ̀ ɛ́ hṹn dɛ̃̀ lɔ̀n. Ɛ̀ miikɛ nìzã̀amáa dɔ̀ ɛ́ lò ɓiɛ̀ hàarí wi yán. Ɓɛ̀ hàarí lɔ́ àá hɔ́ Zudee pɛ̃̀hɛ̃ míkùi àá hɔ̀ Zerizalɛɛmu lóo àá hɔ̀ Tiire àá hɔ́ Sidɔn pɛ̃̀hɛ̃ lóoniɛ̀ lɛ wi hɔ ɲun-bɛhɔ́ ɲunù. 18Ɓɛ́ hàarí ɓɛrɛ ɛ́ ɓɛ́ ɓen ɲí Yiezu bòo lɛ á ɛ́ bie, ɛ̀ ɓɛ̀ lɛ́ à wiɛní peɓɛ̀ duò. Ɛ́ ɓɛ́ nìnbirìe lɛ ɛ́ ɓɛ́ ńɲíkĩ́nìɛ ɛ́ hàarí ɛ́ lɔ̀n ɛ̀ biení ɛ́ wankɛ. 19Ɛ́ ɓɛ́ nìnbirìe ɓɛ́kùi ɛ́ wo hàarí ɛ́ cɛ̀ ɛ̀ ɓɛ̀ ɛ̀ hɛ Yiezu ǹ, iè hɔ̀ lɛ ɛ́ hɔ́ pànkɛ́ lɛ ɛ́ wi è ǹ ɛ́ hàarí wóò zɔ lé ɛ̀ lé wiɛní ɓɛ́ ɓɛ́kùi.

Ɓɛ̀ nìɛ lɛ ɲúuhɛ̃ tĩ àá ɓɛ́lɛ yìi ɓén mi hɔ bòo

Mat 5.1-12

20Ɛ́ Yiezu ɛ́ yòó huie mí kɛ̀ránzɛ̀ɓɛ̀ khieniɛ à zɔn bie ɛ́ nɛ làa:

«Mìpe nìkherà, ń nɛ mi ɲúuhɛ̃ ɛ́ tĩ,

iè hɔ̀ lɛ ɛ́ lé Dɔfĩn bɛ́záanú ɛ́ bòo sɛ̃̀ miɛ ǹ.

21Ɛ̀ mìpe lɛ ɛ́ hɔ́ hĩ́ní ɛ́ ɓé hɔ́ zoòni, mì ɲúuhɛ̃ ɛ́ tĩ,

iè hɔ̀ lɛ ɛ́ mí ɓén dí ɛ́ tì.

Ɛ̀ mìpe lɛ ɛ́ wírí hɔ́ zoòni, mì ɲúuhɛ̃ ɛ́ tĩ,

iè hɔ̀ lɛ ɛ́ yìrí ɛ̀ mì ɓén dĩ.

22Ń nɛ mi ɲúuhɛ̃ ɛ́ tĩ pɛ̃̀hṹ lɛ kɛ́ ɓɛ́ nìnbirìe ɛ́ hɛ́rɛ miɛ, lɛ kɛ́ ɓɛ́ pɛ̃́ miɛ ɛ́ tɛ́viɛniɛ, ɛ́ mì tookɛ, ɛ́ mì yèrè ɛ̀ yáa iè hɔ̀ lɛ ɛ́ mí dũmuasɛ̃̀ ǹpe nìnbírɔ Zuú ǹ. 23Ɛ̀ pehɔ̀ pɛ̃̀hṹ hũn, ɛ̀ mì wɛní míte; ɛ̀ mì hɛ̀ yénkɛ hɔ tĩwiɛ̀ yénkɛà, iè hɔ̀ lɛ ɛ́ mí sàanín ɛ́ yòó ɓàń hɔ́ hóohũn. Sí den iè hɔ̀pe ɓà ńmaà ɛ́ ɓà zĩkĩ́nɓɛ̀ ɛ́ lò ɓiɛ̀ hàarí bieniɛ Dɔfĩn bɔ̀háaníriè lɔ̀n kɛ̀amu.

24Kɛ́ hɔ́ ɓen kɛ́ mípe bòo ɓàasiè, ɛ̀ mì yìi ɓén mi hɔ,

iè hɔ̀ lɛ ɛ́ mí iè pe wo yú mí tĩɛ̀ hĩ̀iníkɛlán bòo vɔ́.

25Ɛ̀ mìpe lɛ ɛ́ ɲɛ̀ àá hɔ́ bòo míkùi hɔ̀ zoòni, mì yìi ɓén mi hɔ,

iè hɔ̀ lɛ ɛ́ hɔ́ hĩni ɓén ɓé miɛ.

Ɛ̀ mìpe lɛ ɛ́ dĩ hɔ zoòni, mì yìi ɓén mi hɔ,

iè hɔ̀ lɛ ɛ́ mí tĩɛ̀ ɛ́ ɓén yaa ɛ́ mí wo ɛ́ wírí.

26Mí yìi ɓén mi hɔ, pɛ̃̀hṹ lɛ kɛ́ ɓɛ́ nìnbirìe ɓɛ́kùi ɛ́ mì yèrè leń, iè hɔ̀ lɛ ɛ́ sí lò ɓiɛ̀ iè hɔ̀pe ɛ́ ɓà zĩ́kĩ́nɓɛ̀ ɛ́ hàarí dàa ɓɛ̀ ɓúo Dɔfĩn bɔ̀háaníriè sãàniɛ kɛ̀amu.

Nìnbírɔ ɓà ńbíyanliè wɛnírɔ́ bòo

Mat 5.38-48; 7.12a

27Kɛ́ ń den nin bie lɛ́ mípe lɛ ɛ́ tɛ́ mí ɲɛkɛ̃̀a ɛ̀ mì ɛ́ hɔ̀ bòo lɛ ɛ́ nín bie ɛ̀ ɲí nɛ mi wɛní mì ńbíyanliè, ɛ̀ mì wóo wé bòo lɛ sãa àá ɓɛ́ nìnbirìe lɛ hɛrɛ miɛ. 28Mì wóo dúɓɛ́ ɓɛ́ nìnbirìe lɛ ɛ́ mì dánkɛ́nikɛ ǹ, ɛ̀ mì hɛ̃un Dɔfĩn ɛ̀ lɛ́ ɓɛ́ lɛ ɛ́ mì ɲínkɛ ǹ. 29Nìnbírɔ kɛ́ á laa kɔ̀ kekerè dí-cóoní ɛ̀ kɔ̀ bĩní lé sí kɛ́ ɛ̀ lɛ́ à ǹ nɛ a bĩní láa; nìnbírɔ kɛ́ á vúa kɔ̀ mùakú ɛ̀ kɔ̀ fùansí nɛ a mii kɔ́ ńkánɓù sĩiní. 30Kɛ́ nìnbírɔ hɛ̃nnɛ bòo kɔ̀ viì, ɛ̀ kɔ̀ lɛ́ hɔ́ ɔ̀ ǹ, ɛ̀ nìnbírɔ kɛ́ á mɔ̀ kɔ̀ bòo ɛ̀ kɔ̀ bí vɛ bie nɛ a lɛ́ hɔ́ wɛ̀. 31Hɔ̀ bòo lɛ ɛ́ mí wɛ nɛ ɓɛ nìnbirìe wóò wé lɛ́ miɛ ǹ iè pe ɛ́ mí ɓiɛ̀ wóo wé lɛ́ ɓà ǹ. 32Kɛ́ mí wɔ́ ɓɛ́ nìnbirìe lɛ wɛ miɛ ɛ́ mí wɛ, ɛ̀ mì bí nùún ɛ̀ mì bie nɛ mí ɛ́ bòo dɔ̀ lɛ wɔ̀sɔ̀kɔ̀ ɛ̀ wé lɛ ɛ́ Dɔfĩn ɛ́ ɓén dàá sàaní miɛ dɛ́! Hɛ̀rí ɓɛ̀ bɔ̀konwériè ɛ́ ɓiɛ̀ wɛ ɓɛ́ nìnbirìe lɛ wɛ ɓɛ lò! 33Kɛ́ mí ɓen ɛ́ wɔ́ ɓɛ́ nìnbirìe lɛ ɛ́ wóò wé hɔ́ bɔ̀tente àá miɛ ɛ́ mí ɓiɛ̀ wóò wé àá hɔ́ bɔ̀tente, ɛ̀ mì bí nùún ɛ̀ mì bie nɛ mí ɛ́ bòo dɔ̀ lɛ wɔ̀sɔ̀kɔ̀ ɛ̀ wé lɛ Dɔfĩn ɛ́ ɓén dàá sàaní miɛ dɛ́! Sí ɓiɛ̀ iè hɔ̀pe lɛ ɛ́ ɓɛ́ bɔ̀konwériè ɛ́ wóò wé lò! 34Kɛ́ mí ɓen wóò wé ɓɛ́ nìnbirìe lɛ ɛ́ mí dũmuasɛ̃̀ kɛ́ mí ɓén yí hɔ́ bòo viì ɛ́ mí wóò ke hɔ bòo ɛ̀ lɛ́ nin, ɛ̀ mì bí nùún ɛ̀ mì bie nɛ mí ɛ́ bòo dɔ̀ lɛ wɔ̀sɔ̀kɔ̀ ɛ̀ wé lɛ Dɔfĩn ɛ́ ɓén dàá sàaní miɛ dɛ́! Ɓɛ̀ bɔ̀konwériè ɛ́ ɓiɛ̀ wóò ke hɔ bòo ɛ̀ lɛ́ ɓɛ́ bɔ̀konwériè ǹ ɛ̀ dàá yìrí yí hɔ́ ɓà ńmà peɓɛ̀ viì lò! 35Kɛ́ mí den wɛní mì ńbíyanliè, ɛ̀ mì wóo wé hɔ́ bɔ̀tente àá ɓɛ́, ɛ̀ mì wóo ke hɔ bòo ɛ̀ lɛ́ ɓɛ́ nìnbirìe ǹ kɛ́ mí yá bòo lieníkɛ nɛ ɓɛ dɛ̀ hɔ̀ ɓén sàaní ɛ́ lɛ́ miɛ ǹ wɛ̀. Ɛ́ mí den ɓén yí sàanín lɛ ɓàń, ɛ̀ mì lò ɛ́ wé hɔ́ Dɔfĩn lɛ yòó van wi hɔ hóohũn lɛ sɔ́nsɔ́n nìɛ iè hɔ̀ lɛ ɛ́ hɔ́pe Dɔfĩn ɛ́ wóò wé bɔ̀tente àá ɓɛ́ nìnbirìe lɛ ɛ́ yí dũ yìrí ɛ̀ Hɔ̀ lò wóò wé bɔ̀tente àá ɓɛ́ mɛkɛ̃nɲiì ɓàasiè. 36Mì wé miinɛ̀ dũnliè kɛ̀a bòo lɛ ɛ́ mì Yàá ɛ́ dàa iè miinɛ dũnlɔ.

Mì bí wóo lè ɓán lìe wɛ̀

Mat 7.1-5

37Mì bí wóo lè ɓɛ̀lɛ kɛ́ lìe, ɛ́ Dɔfĩn ɛ́ ɓiɛ̀ yá lè mì lìe wɛ̀. Mì bí wóo bie nɛ ɓɛlɛ kɛ́ ɛ́ wɔ́ khɔn, ɛ́ Dɔfĩn ɓiɛ̀ yá bie nɛ mí wɔ́ khɔn wɛ̀. Mì wóo dé sɛ́wɛ́rí ɛ̀ lɛ́ ɓɛ́lɛ kɛ́ ǹ, ɛ́ Dɔfĩn ɛ́ ɓiɛ̀ ɓén dé sɛ́wɛ́rí ɛ́ lɛ́ miɛ ǹ. 38Mì wóo dé bùuɲɛ́ àá ɓɛ́ nìnbirìe ɛ́ Dɔfĩn ɓiɛ̀ ɓén dé bùuɲɛ́ àá miɛ. Ɓɛ̀ ɓén màatɛ̃́ hɔ́ bòo ɛ́ zɛ̀kɛ̀ní sãàní ɛ́ yòó tíiní ɛ́ hɔ́ cáa ɛ́ síɛ ɛ́ kóo mí lùkùo hũn, iè hɔ̀ lɛ ɛ́ lé dìɛ lɛ ɛ́ mí wóò dàa màatɛ̃́ hɔ́ bòo ɛ̀ lɛ́ ɓɛ́ nìnbirìe ǹ iè pe ɛ́ Dɔfĩn ɛ́ ɓiɛ̀ ɓén dàá màatɛ̃́ ɛ́ lɛ́ miɛ ǹ.»

39Ɛ́ Yiezu ɛ́ lò zɔn wɛ̃̀ lè wĩ̀i dɔ̀ ɛ́ lɛ́ ɓà ǹ ɛ́ nɛ làa: «Bòo ɛ́ mui ɛ́ sũǹ dɛ̀ mui lànlè ɛ́ zɛ̃nkɛnin? Ɛ́ ɓɛ́pe ɓɛ́ ɲuunáa ɛ́ yá vɛ́ páaní ɛ́ kùén zɔ ńkɔ̀nkṹn? 40Kɛ̀rázuú lɛ pɔ ɓɛ́ kɛ̀ránlɔ ɛ́ mí wɛ̀; kɛ́ kɛ̀ránzuú lɛ kerɛ ɲunu tú ɛ́ pe ɛ́ dìń kɛ̀a ɓɛ́ kɛ̀ránlɔ. 41Kɔ́ wiɛ dàa loo le kã́a-cíì lɛ wi mì zuú yìi hũn kɛ́ kɔ́ den yí loo le zúie lɛ wi kɔpe kɔ̀ yìi hũn? 42Ɛ́ kɔ́ wiɛ dàá dɛ̀ ɛ́ bie ɛ́ lɛ́ mì zuú ǹ nɛ a dìń nɛ kɔ leń lé kã́a-cíì lɛ wi piè yìi hũn, hɔ́rɔsí kɛ́ kɔ́pe ɛ́ lò den yí loo le zúie lɛ ɛ́ wi kɔpe kɔ̀ yìi hũn wɛ̀? Nìhĩ́dé lɛ! Leń lé zúie lɛ wi kɔ yìi hũn vé, ɛ́ kɔ́ den yìe ɛ́ mi bòo ɛ́ dàá leń le kã́a-cíì lɛ wi mì zuú yìi hũn.

Lè vɛ̃̀hṹ biè temu wóò lɛ́ ɛ̀ ɓɛ̀ dàá dũń lé

Mat 7.16-20; 12.33-35

43Vɛ̃̀n-sãanù ɛ́ yáà hɛ bie lɛ ɛ́ yí sãa wɛ̀, ɛ̀ vɛ̃̀n-koohɔ́ ɛ́ ɓiɛ̀ yáà hɛ bie lɛ sãa wɛ̀. 44Iè hɔ̀ lɛ ɛ́ dúrɔ ńvɛ̃̀hṹ ɛ́ wóò dũń àá pelè bie lɛ lé wóò hɛ ǹ. Nìnbírɔ ɛ́ yí dɛ̀ vuà ɛ́ yá vɛ́ ɲuà ńɲinlɛ̀a vɛ̃̀hṹ lɔ̀n wɛ̀; ɛ̀ nìnbírɔ ɛ́ yáà vɛ khé ńɲiɛ̀ ńsãamú vɛ̃̀hṹ lɔ̀n wɛ̀. 45À nìcã̀anírɔ ɛ́ wóò wé hɔ́ bɔ̀tente lɛ ɛ́ lé àá piè yírɛ́ bìsílén lɛ iè piè tĩì lɛ sãa, à nìkoohɔ́ ɛ́ ɓiɛ̀ wóò wé hɔ́ bɔ̀koohɔ́ lɛ ɛ́ lé àá piè yírɛ́ bìsílén koohɔ́ lɛ iè piè tĩì lɛ ɛ́ yí sãa. Ɛ́ hɔ́ bòo lɛ ɛ́ zɔn tú lé tĩì iè pe ɛ́ lé ɲunù ɛ́ wóò bie.»

Lè wĩ̀i lɛ ɛ́ Yiezu ɛ́ wɛ̃̀ hɔ̀ zĩhĩ́ɛ bɔ̀nbɔ̀ ɲu bòo hũn

Mat 7.24-27

46Ɛ́ Yiezu ɛ́ bĩniɛ zɔn ɛ́ bie àá ɓɛ́ nìnbirìe ɛ́ nɛ làa: «Mí wiɛ dàa wóò ve mi nɛ Ɲunsɔ, Ɲunsɔ kɛ́ mí lò yá hɔ̀ bòo lɛ ɛ́ ń wóò bie ɛ̀ wé? 47Nìnbírɔ yée nìnbírɔ́ lɛ wóò ɓen niǹ viì, ɛ̀ ɓen ɲí niǹ biehĩ́ à tɛ̀ ɛ́ vɛ bè hɔ̀ ǹ, ɛ́ nín zɛ̃́ní nìnbírɔ lɛ á dàa lɔ́ɓán ɛ̀ lɛ́ miɛ ǹ: 48À lɔ́ɓán àá nìnbírɔ lɛ ɛ́ mii te mí zũnù, á cɛ̃́ cɛ̃́ fúu ɛ́ van siɛ dɛ̃un lè lɛnù ɛ́ dàa siɛ ɲɛ̀ mí zũnù fìi ɛ́ tɔn yòó ɓooniɛ. Ɛ́ hɔ́ lɛ lé vṹn ɛ́ tú tú ɛ́ cáa, ɛ́ hɔ́ ɲumu lɛ ɛ́ vĩ̀ àá pànkɛ́ ɛ́ ɓen lɔ́ hérɛ lè zũnù sɔ, kɛ́ hɔ́ yí dàń lé ɛ́ yí zɛ̀kɛ̀ní iè hɔ̀ lɛ ɛ́ lé fɛ́sí dɛ̃̀ sãa. 49À nìnbírɔ lɛ ɛ́ wóò ɲí niǹ biehĩ́ à pɛ̃́ ɛ́ yá vɛ bè hɔ̀ ǹ ɛ́ pe lɔ́ɓán àá nìnbírɔ lɛ ɛ́ tɔn mí zũnù tĩ́ní lɔ̀n, kɛ́ á yí cĩ́ ɛ́ yí vɛ síɛ ɛ̀ dàá síɛ ɲì pelè fìi wɛ̀. Ɛ́ hɔ́ lɛ ɛ́ hɔ́ ɲumu lɛ ɛ́ vĩ̀ àá pànkɛ́ ɛ́ ɓɛrɛ hérɛ lè, ɛ́ fùa fùa ɛ̀ lè ɓúo khie siɛ; ɛ́ lépe zũnù sɔ ɛ́ wo wúa cɔ́ míkùi.»

Currently Selected:

Liike 6: bwj

Highlight

Copy