Liike 7

Rɔmu sɛ̃̀nɛ̀dɔ́síɓɛ́ ɲúnsɔ dɔ̀ tɔntɛ́ wiɛnírɔ́

Mat 8.5-13

1Ɛ́ bòo lɛ ɛ́ Yiezu bie hɔ̀pe biehĩ́ sɔ sí míkùi ɛ́ lɛ́ ɓɛ́pe nìzã̀amáa lɛ hṹn ɓɛrɛ kírie ɔ̀ ǹ vɔ́, á yòó zɔn Kapɛrɛnayiimu lóo hũn. 2Ɛ́ Rɔmu sɛ̃̀nɛ̀dɔ́síɓɛ́ ɲúnsɔ dɔ̀ hàarí wi yán kɛ́ piè tɔntɛ́ lɛ bòo hie ɔ̀ ǹ cɛ̃̀un ɛ́ dɔ dɔ ɛ́ mii hí. 3Ápe sɛ̃̀nɛ̀dɔ́síɓɛ́ ɲúnsɔ ɛ́ ɲɛ́ kɛ́ ɓɛ́ ɛ́ Yiezu bòo ɛ̀ bie, á tɔrɛ ɓɛ̀ Zuifuɓɛ nìkĩ́ihɛ̃ nìɛ ɓɛ̀ yiɛní dɔ̀ nɛ ɓɛ vɛ hɛ̃un ɔ̀ ǹ nɛ a ɓen wiɛní mí tɔntɛ́ sɔ. 4Ɛ́ ɓɛ́ Zuifuɓɛ nìkĩ́ihɛ̃ sɔ ɛ́ van dɛ̃un Yiezu viì ɛ̀ ɓɛ̀ ɛ́ ɔ̀ hɛ̃nnin pɛ̀pɛ̀ ɛ́ nɛ làa: «À sɛ̃̀nɛ̀dɔ́síɓɛ́ ɲúnsɔ sɔ ɛ́ hɛ̀ iè nìnbírɔ lɛ ɛ́ kɔ́ fɔ́ɓán ɛ̀ kɔ̀ ɛ̀ sĩiní, 5iè hɔ̀ lɛ á wɛ kepe Zuifuɓɛ, à te lepe kìe ńkóoɓánlɔ̀n zũnù ɛ́ tɔn.» 6Ɛ́ Yiezu ɛ́ khie bɔ̀ɓán àá ɓɛ́. Ɛ́ bòo lɛ ɛ́ ɓɛ́ van ɛ́ ɔ̀pe sɛ̃̀nɛ̀dɔ́síɓɛ́ ɲúnsɔ zũnù ɛ̀ lúwinínin, ápe sɛ̃̀nɛ̀dɔ́síɓɛ́ ɲúnsɔ ɛ́ tɔrɛ ɓá páaɓɛ́ dɔ̀ nɛ ɓɛ vɛ bie lɛ́ Yiezu ǹ nɛ làa: «Ɲunsɔ, bí tiɛní kɔ́te kɛ̀amu wɛ̀; ǹpe ɛ́ yí nìnbírɔ lɛ ɛ́ kɔ́ fɔ́ɓán ɛ̀ kɔ̀ ɓen zɔ zũnù wɛ̀. 7Ɛ́ sí lò iè hɔ̀pe ɛ́ ń dàa ɛ́ líi ɛ̀ nɛ niǹ ɲún kɛ fĩ́i àá ńɓenlé niǹte ǹ kɔ̀ viì wɛ̀. Kɛ́ kɔ́ zɔ bie ben-cóoní dɔ̀ ɛ́ niǹ tɔntɛ́ ɛ́ wɛ. 8Iè hɔ̀ lɛ ɛ́ ǹpe lɛ dàa ɓɛ ɲunhɛsiè ɛ́ lò ɓiɛ̀ dàa ɓɛ sɛ̃̀nɛ̀dɔ́síɓɛ́ lɛ iè niǹ tɔntɛ́riè. Ɛ́ ń ɓen bie lɛ́ á dɔ̀ ǹ nɛ a lan, à lan; ɛ̀ ǹ ɓen bie lɛ́ á dɔ̀ ǹ nɛ ɓen, à ɓen; ɛ́ ǹ ɓen khie bie lɛ́ niǹ tɔntɛ́ ǹ nɛ a wé hɔ́ bòo lɛ, à wé hɔ́.» 9Ɛ́ bòo lɛ ɛ́ Yiezu ɲɛ́ hɔ́ biehĩ́ sɔ sí, á hɛ̀ wɛniɛ míte àpe sɛ̃̀nɛ̀dɔ́síɓɛ́ ɲúnsɔ bòo hũn; á bĩniɛ míte ɛ́ khie bie lɛ́ ɓɛ́ nìzã̀amáa lɛ́ bɔ̀ piè máahṹ ǹ nɛ làa: «Nín bie hɔ lɛ́ miɛ ǹ nɛ hɛ̀rí ɓɛ̀ Yizarayɛɛle nìɛ tĩ́ihṹ, ɛ́ ń ɲɛùn yí mi nìnbírɔ lɛ dũmuasɛ̃̀ mi ǹ kɛ̀a ɔ̀pe nùún lɛ wɛ̀.» 10Ɛ́ ɓɛ́ nìnbirìe lɛ á sɛ̀nɛ́dɔ́síɓɛ́ ɲúnsɔ hṹn tɔrɛ ɛ́ khũà van yú piè tɔntɛ́ sɔ kɛ́ á lɔ̀n hie.

Bòo lɛ ɛ́ Yiezu dàa vìeniɛ mɛ-hṹnu dɔ̀ yɛ̀nù Nayiinɛ lóo hũn

11Ɛ́ pehɔ̀ sí lɛ ɛ́ tĩi ɛ́ Yiezu hĩ́nà van lóo dɔ̀ lɛ yèrè ɛ́ ɓɛ́ Nayiinɛ; ɛ́ piè kɛ̀ránzɛ̀ɓɛ̀ àá miikɛ nìzã̀amáa dɔ̀ ɛ́ bɔ̀ɓán àá ɔ̀. 12Ɛ́ bòo lɛ ɛ́ ɓɛ́ van lúwi lè lóo zɔǹlén zĩínù ɲunù ǹ, ɛ́ ɓɛ́ mɔn nìnbirìe dɔ̀ kɛ́ ɓɛ́ dàa nìhen dɔ̀ ɛ́ ɓɛ́ vɛ wũ̀ń ɓɛ́ nìhiè wũ̀nlén. À nìhen sɔ ɛ́ hṹn iè mɛ-hṹnu dɔ̀ yɛ̀-cóoní lɛ á yú mí dòonún, ɛ́ ɓɛ́pe lóo nìɛ bìkuì ɛ́ wo hṹn bɔ̀ɓán àá ɔ́. 13Ɛ́ hɔ́ lɛ ɛ́ Ɲunsɔ ɛ́ mɔn ɔ̀pe mɛ-hṹnu sɔ, ɛ́ piè miinɛ̀ ɛ́ yòó ɓaa ɔ̀, á zɔn bie lɛ́ à ǹ ɛ́ nɛ làa: «Bí wírí wɛ̀.» 14À khie van lúwiniɛ à yòó han lè dìɛ lɛ ɛ́ ɓɛ́ dɔ́ ápe nìhen hũn, ɛ́ ɓɛ́lɛ te le dàa ɛ́ yòó dɛ̃̀. Ɛ́ Yiezu ɛ́ zɔn bie ɛ́ nɛ làa: «Kɔ̀pe zufìɛ, ń nɛ kɔ síɛ hĩ́ní!» 15Á nìhen ɛ́ siɛ hĩ́nà kɛsí ɛ́ bie. Ɛ́ Yiezu ɛ́ khie lɛ́ á ɓà nín. 16Ɛ́ ɓɛ́ nìnbirìe lɛ ɛ́ hàarí wi yán ɓɛ́kùi ɛ́ hɛ̀ zɛ́rɛ ɛ́ Dɔfĩn ɛ̀ ɓàanínin kɛ́ ɓɛ́ ɛ́ bie ɛ́ nɛ làa: «Dɔfĩn bɔ̀háanírɔ wì-bɛhɔ́ dɔ̀ ɛ́ siɛ hĩ́nà kè tĩ́ihṹ, ɛ̀ Dɔfĩn ɛ́ bɛrɛ fɔ́ kie ǹ, kèpe lɛ iè pehɔ̀ nìɛ.» 17Ɛ́ hɔ́pe bòo lɛ ɛ́ Yiezu wɔ́ ɛ́ wo van ɲɛ́ hɔ́ Zudee lóoniɛ míkùi hũn àá hɔ́pe pɛ̃̀hɛ̃́ lɛ lúwikɛ hɔ̀ ǹ míkùi hũn.

Zãn Batiisi bòo lɛ á tɔrɛ mí kɛ̀ránzɛ̀ɓɛ̀ nɛ ɓɛ vɛ dìe Yiezu ǹ bòo

Mat 11.2-19

18Ɛ́ Zãn Batiisi kɛ̀ránzɛ̀ɓɛ̀ ɛ́ van bie hɔ̀ bòo lɛ ɛ́ Yiezu ɛ́ wé míkùi ɛ́ lɛ́ à ǹ. Ɛ́ Zãn ɛ́ vɔn mí kɛ̀ránzɛ̀ɓɛ̀ nìɛ ɓɛ̀ ɲu dɔ̀ ɛ́ ɓen 19tɔrɛ nɛ ɓɛ vɛ Ɲunsɔ Yiezu viì ɛ̀ vɛ dìe ɔ̀ ǹ nɛ làa: «Kɔ́ iè ɔ̀pe lɛ ɛ́ Dɔfĩn hàarí bie bòo nɛ mí ɓén tɔn á ɛ́ ɓen yée kɛ́ ké fɔ́ɓán ɛ̀ kè hìé nì-ɓuɛ̀?» 20Ɛ́ ɓɛ́ van dɛ̃un Yiezu viì ɛ̀ ɓɛ̀ bie lɛ́ à ǹ nɛ làa: «À Zãn lɛ wóò líikɛ ɓɛ nìnbirìe hɔ̀ ɲumu hũn ɛ́ tɔrɛ kie nɛ ke ɓen kɔ̀ viì ɛ̀ ɓen dìe kɔ ǹ nɛ kɔ́ iè ɔ̀pe fuenírɔ lɛ fɔ́ɓán à ɓen yée kɛ́ ké fɔ́ɓán ɛ̀ kè hìé nì-ɓuɛ̀?» 21Ɛ́ pehɔ̀ yìi hũn, ɛ́ Yiezu wiɛniɛ nìnbí-kuì duò àá peɓɛ̀ sɛ̃́-ɲíi, à ɲɛun ńɲíkĩ́nnìɛ ɛ́ líeniɛ ɓɛ̀ dɔ̀ ǹ, à lɛ́ ɛ́ ɓɛ́ muaɓɛ̀ bìkuì ɛ́ yìe loo bòo. 22Ɛ́ pehɔ̀ máahṹ, à wo khie bie lɛ́ ɓɛ́lɛ á Zãn ɛ́ tɔrɛ ǹ ɛ́ nɛ làa: «Mì vɛ bie hɔ bòo lɛ ɛ́ mí mɔn àá hɔ́lɛ ɛ́ mí ɛ́ ɲɛ́ ɛ̀ lɛ́ á Zãn: ɓɛ̀ muaɓɛ̀ ɛ́ yìe ɛ́ bòo ɛ̀ mi, ɛ̀ ɓɛ̀ lóohĩ́ ɛ́ vɛ, ɛ̀ ɓɛ̀ ɓìríe ɛ́ wɛ, ɛ̀ ɓɛ̀ bikie ɲɛkɛ̃̀a ɛ́ bòo ɲí, ɛ̀ ɓɛ̀ nìhiè ɛ́ vìekɛ, ɛ̀ lè Bentĩnu ɛ́ buie ɛ̀ lɛ́ ɓɛ́ nìkherà ǹ. 23Álɛ kɛ́ á yí fùansí hɔ́ lɛ á dũmuasɛ̃̀ mi ǹ, ɛ̀ ɓàasɔ ɲún ɛ́ tĩ.»

24Ɛ́ hɔ́ lɛ á Zãn kɛ̀ránzɛɓɛ̀ lɛ á hṹn tɔrɛ ɛ́ khũ̀a cɔ́ vɔ́, Ɛ́ Yiezu ɛ́ khie ɛ́ ɔ̀pe Zãn bòo ɛ̀ bie àá ɓɛ́ nìzã̀amáa ɛ́ nɛ làa: «Hɔ̀ lɛ ɛ́ mí van lè ńɲiherà hũn, ɛ́ hɔ́ iè ńɓuò ɛ́ mí van huie yán? Bòo á iè nìnbírɔ lɛ cũ̀kṹ mí kɛ̀a ie kã́anú lɛ hɔ́ pinpinù ɛ́ zɛ̀kɛ̀níkɛ yée? Ńɓùé lò! 25Ɛ́ hɔ́ wo iè ńɓuò ɛ́ mí ɛ́ mí van huie? Bòo á iè nìnbírɔ lɛ ɛ́ zɔn hɔ̀ tĩ̀ɛ lɛ sãa sãa yée? Ɛ́ ɓɛ́pe lɛ ɛ́ wóò zɔ hɔ tĩ̀ɛ lɛ yàamu hie hie kɛ́ ɓɛ́ lò ɛ́ ɓɛ́ mɛkɛ̃nì ɛ̀ wé hɔ́ bòo lɛ yàamu hie hũn ɛ́ wóò kań àá ɓɛ́ bɛ́zɛ̀ɓɛ̀ zĩhĩ́ɛ hũn lò! 26Ɛ́ hɔ́ den wo iè ńɓuò ɛ́ mí van huie? Bòo á iè Dɔfĩn bɔ̀háanírɔ yée? Ũun, nin khɛ́ hɔ́ lɛ́ miɛ ǹ, kɛ́ á lò den pɛ́wi pɔ Dɔfĩn bɔ̀háanírɔ. 27Iè hɔ̀ lɛ á Zãn iè ɔ̀pe lɛ ɛ́ Dɔfĩn ɛ́ bie bòo mí bienù vɛhṹ hũn ɛ́ nɛ làa:

“Húi, ń nɛ niǹ tɔnkɛrɔ ɛ̀ dí kɔ́ híɛhɔ́,

Ɛ̀ ɓen wookɛ kɔ wṹn ɛ̀ lɛ́ kɔ ǹ.”»

28Ɛ́ Yiezu ɛ́ bĩniɛ zɔn bie ɛ́ nɛ làa: «Nín khɛ́ hɔ́ lɛ́ miɛ ǹ nɛ ɓɛ nìnbirìe lɛ ɛ́ tɔntɔnlɔ́ ɓɛ́kùi hũn, ádɔ̀ lɛ ɛ́ ɓàń pɔ Zãn ɛ́ mí wɛ̀. Hɔ́rɔsí kɛ́ álɛ mìniɛ pɔ ɓɛlɛ kɛ́ ɓɛ́kùi lè Dɔfĩn bɛ́záanú hũn ɛ́ lò den ɓàń pɔ ape Zãn. 29Ɛ́ ɓɛ́ nìnbirìe lɛ́ ɛ́ ɲɛ́ hɔ́pe bòo lɛ á bie ɓɛ́kùi, hɛ̀rí ɓɛ̀pe lànpó-fériè, ɛ́ dũnɛ kɛ́ Dɔfĩn ɛ́ cã̀aní, ɛ́ ɓɛ́ wo lɛ́ ɓɛ́te àpe Zãn ǹ á líiníkɛa hɔ̀ ɲumu hũn. 30Kɛ́ ɓɛ́ Farizĩɛɓɛ àá ɔ́ Moyiize làndɛ́ kɛ̀ránliè ɛ́ den pɛ̃́ hɔ́ Dɔfĩn bòo lɛ ɛ́ Hɔ́ hṹn nɛ mii wé ɛ̀ lɛ́ ɓà ǹ, ɛ́ ɓɛ́ dàa yí tɛ̀ ɛ́ yí lɛ́ ɓɛ́te à Zãn ǹ à líiníkɛ hɔ ɲumu hũn wɛ̀.» 31Ɛ́ Yiezu bĩniɛ zɔn bie ɛ́ nɛ: «Ɓɛ̀ iè biɛ ɛ́ nin dàá màaní hɔ́pe zoòni lɛ nìɛ? Ɓɛ̀ lɔ́ɓán àá bɛ́sɔ? 32Ɓɛ̀ lɔ́ɓán àá zĩncãahɛ̃ dɔ̀ lɛ ɛ́ kɛsí lé yàa khúie hũn, lɛ ɛ́ ɓɛ́dɔ̀ ɛ́ wóò khíi bie ɛ̀ lɛ́ ɓɛ́lɛ kɛ́ ǹ nɛ làa:

“Ké ɓɛ́ hɔ́ yɔrɔ́ tĩ̀ɛ ɛ́ mí yí yɔ,

Ɛ̀ kè tɛ̀ lè yúrú yèrè ɛ́ mí lò yí wírí wɛ̀.”

33Iè hɔ̀ lɛ á Zãn lɛ wóò líiníkɛ ɓɛ nìnbirìe hɔ̀ ɲumu hũn ɛ́ ɓɛrɛ, à hṹn yáà dí bɔ̀díe, à lò hṹn yáà ɲu hɔ́ divɛ̃n wɛ̀, ɛ́ mí nɛ a iè ńɲíkĩ́rɔ ɛ́ temu wi-è ǹ. 34Á nìnbírɔ Zuú ɛ́ ɓɛrɛ, à wóò dí, à ɲu; ɛ́ mí nɛ a iè nùún lɛ ɛ́ wɔ́ hɔ́ díe àá hɔ́ divɛ̃n ɲunlɔ́ á bɔ̀ máahṹ, ɛ̀ ɓɛ̀ lànpó-fériè àá ɓɛ́ bɔ̀konwériè ɛ́ temu wɔ́ ɓà pàáɓɛ́. 35Kɛ́ ɓɛ́ nìnbirìe ɓɛ́kùi lɛ tɛ̀ Dɔfĩn bɔ̀dũmunù bòo ɛ́ pe dũnɛ kɛ́ hɔ́ ɛ́ cã̀aní.»

Hṹnu bɔ̀konwé dɔ̀ lɛ ɛ́ Yiezu dɔ́ sɛ́wɛ́rí lɛ́ nin bòo

36Ɛ́ Farizĩɛ dɔ̀ ɛ́ khie vɔn Yiezu nɛ a ɓen nɛ mí peń ɔ̀ ǹ mí yíe. Ɛ́ Yiezu khie van ɔ̀ nùún sɔ yíe ɛ́ van zɔn kɛsí ɛ́ dí. 37Hɔ́rɔsí ɛ̀ hṹnu dɔ̀ ɛ́ wi lepe lóo sɔ hũn, kɛ́ á iè bɔ̀konwé. Á ɲɛ́ ɛ̀ ɓɛ́ nɛ Yiezu ɛ́ zɔn kɛsí ɛ́ dí é Farizĩɛɓɛ nùún zũnù hũn. Á van dàa sɛ̃̀nlè ɓùe dɔ̀ kɛ́ lé tú àá yurɔ́ lɛ tũnù tĩ ɛ́ dàa ɓɛrɛ, 38ɛ́ ɓen dɛ̃̀ Yiezu máahṹ àá piè zehĩ́ viì#7.38 Zuifuɓɛ ɛ́ hàarí wóo ɓen ɓɛ ɛ̀ dí, ɛ̀ ɓɛ̀ síɛ kansí ɛ̀ yàndɛ́kɛ, ɛ̀ kunkɛ ɓɛ́ zehĩ́ ɛ̀ lé viɛní àá ɓɛ́ máahṹ., à ɛ́ wírí, ɛ́ Yiezu zehĩ́ ɛ̀ tiení àá mí yìncuò, kɛ́ á ɛ́ hɔ̀ sùukɛ àá mí ńɲiihĩ́ kɛ́ á lò ɛ́ hɔ̀ fɔ̀nfɔ̀níkɛ́, à koo hɔ̀ yurɔ lɛ tũnù tĩ pehɔ̀ lɔ̀n. 39Ɛ́ hɔ́ lɛ á Farizĩɛ nùún lɛ perɛ Yiezu ǹ ɛ́ mɔn hɔ̀, á ɛ́ bie mí tĩì hũn ɛ́ nɛ làa: «Kɛ́ ápe nùún sɔ lɛ ɛ́ hṹn iè Dɔfĩn bɔ̀háanírɔ àá bɔ̀bín, á hṹn ɓén dũń ɔ́pe hṹnu sɔ lɛ ɛ́ ɔ̀ hɛkɛnin bòo lɛ á te dàa wi, à hṹn ɓén dũń kɛ́ á iè bɔ̀konwé.» 40Ɛ́ Yiezu ɛ́ zɔn bie lɛ́ á Farizĩɛ nùún ǹ ɛ́ nɛ làa: «Simɔn, ń dàa bienù dɔ̀ ɛ́ nin bie àá kɔ.» Ɛ́ Simɔn zɔn tɛ̀ ɛ́ nɛ làa: «Kɛ̀ránlɔ, bie.» 41Ɛ́ Yiezu ɛ́ zɔn nɛ làa: «Nìnbirie bìɛ ɲu dɔ̀ ɛ́ hàarí dúkɛ kehĩ́ àdɔ̀ viì. À wìcóoní kiè ɛ́ hàarí iè denie khĩɛ́-hɔ̀nú (500), àlɛ kɛ́ dìɛ ɛ́ iè denie dɛ̀wɛ́ àá pírú (50). 42Kɛ́ hɔ́ lɛ ɛ́ ɓɛ́pe ɓɛ́ ɲuunáà ɛ́ yí dɛ̀ ɓɛ́ kehĩ́ sɔ ɛ́ yá sàaní, ápe kedé ɛ́ nɛ ɓɛ́pe ɓɛ́ ɲuunáà ɛ̀ fùansí ɛ̀ bí sàaní bòo wɛ̀. Ɛ́ ɓɛ́pe ɓɛ́ ɲuunáà tĩ́ihṹ á hɔ́sɔ ɛ́ temu ɛ́ wɛní-ɛ kedé ɛ́ pɔní?» 43Ɛ́ Simɔn zɔn nɛ làa: «Ǹpe ɛ́ lieníkɛ ɛ̀ ǹ nɛ a iè ɔ̀lɛ ɛ́ kie hṹn ɓàń pɔ, lɛ à kedé ɛ́ nɛ a bí sàaní bòo wɛ̀.» Ɛ́ Yiezu ɛ́ zɔn bie lɛ́ à ǹ nɛ làa: «Kɔ̀ bòo bɔn.» 44À bĩniɛ míte ɛ́ khíiniɛ àá ɔ́ hṹnu viì, à zɔn bie lɛ ápe Simɔn ɛ́ nɛ làa: «Simɔn, kɔ́ loo ɔpe hṹnu lɛ? Ń ɓɛrɛ zɔn kɔ̀ zũnù, ɛ́ kɔ́ yí lɛ́ ɲumu mi ǹ nɛ n tiɛ niǹ zehĩ́ wɛ̀; àpe ɛ́ tiɛ niǹ zehĩ́ àá mí yìncuò, à sùukɛa hɔ̀ àá mí ńɲiihĩ́. 45Ɛ̀ hɔ̀ lɛ ɛ́ ń ɓɛrɛ zɔn, ɛ́ kɔ́ yí zɔ sìí mí kɔ̀ bàanì hũn wɛ̀; kɛ́ ápe, àá bòo lɛ ɛ́ ń dàa ɓɛrɛ zɔn, á niǹ zehĩ́ ɛ̀ fɔ̀nfɔ̀níkɛ. 46Kɔ́ yí ɓàaní mi ǹ ɛ̀ kóo yurɔ́ niǹ ɲún lɔ̀n wɛ̀; àpe ɛ́ koo hɔ̀ yurɔ́ lɛ tũnù tĩ niǹ zehĩ́ lɔ̀n. 47Ɛ́ sí iè hɔ̀pe ɛ́ ń dàa nin bie hɔ lɛ́ kɔ̀ ǹ nɛ piè bɔ̀koohɛ̃ bɔ̀kùi sí míkùi sɛ́wɛ́rí ɛ́ dɔ́ lɛ́ à ǹ, iè hɔ̀ lɛ á hɛ̀ wɛniɛ mi cɛ̃̀un. Kɛ́ nìnbírɔ lɛ ɛ́ ɓɛ́ dɔ́ sɛ́wɛ́rí fĩi ɛ́ lɛ́ nin ɛ́ ɓiɛ̀ wóò wɛní fĩi.» 48Ɛ̀ Yiezu ɛ́ khie bie lɛ́ á hṹnu ǹ ɛ́ nɛ làa: «Kɔ̀ bɔ̀koohɛ̃ sɛ́wɛ́rí ɛ́ dɔ́ lɛ́ kɔ̀ ǹ.» 49Ɛ́ ɓɛ́ nìnbirìe lɛ ɛ́ páaníɛ kɛsí ɛ́ dí àá Yiezu ɛ́ bie ɓɛ́ tĩɛ̀ hũn ɛ́ nɛ làa: «Àpe nùún sɔ lɛ iè wie á dàa hɛ̀ hɛ̃̀ mí tĩì ɛ́ hɔ̀ bɔ̀koohɛ̃ sɛ́wɛ́rí ɛ̀ dé?» 50Kɛ́ Yiezu ɛ́ den zɔn bie lɛ́ á hṹnu ǹ ɛ́ nɛ làa: «Kɔ̀ ńdɛsìnlɔ́ ɛ́ fuieniɛ kɔ ǹ, ɛ́ kɔ́ wo hĩ́ní lan àá hũn-wiɛ̀.»

Currently Selected:

Liike 7: bwj

Highlight

Copy