MARK 7

Yeso faa wo de Farisiyẽẽ ti hadge ɓaaran wo

(Mat 15.1-9)

1Farisiyẽẽ wo de jar ma ndar wer wããre Baa a wo le Jerusalem, raw wo tay ti ɓiŋ Yeso. 2Á raw wo ko jar po wo yoo jar ma wer ɓen wo re hoole doo ɗage, bay wo go de yog doo doo ga hadge ɓaaran wãã no wa.

3Werga Farisiyẽẽ wo de te jar Jwif ma lan see wo diŋ wer re maga moore ɓaara hay wo le joŋ ge ɓe mono, á yog wo doo ɓaara go taŋgu doo maga á wo de had ge ɓe no gà no, á re wo mopo gà. 4De maga á hay wo we le ɓi lumo no, á yog wo doo ɓaara go taŋgu ɗa, lag wo rege kway. Á see wo wer hadge maga á daʼ ra wo le doo moore ɓaara wo joŋ ge debaŋ, de yog ge weere hããre po wo, de temneere, de toɓoole wo de fen suuli wo.

5Wersen Farisiyẽẽ wo de jar ma ndar wer wããre Baa raw wo wii Yeso ga : Jar ma wer ɓon bay wo joŋge doo hadge moore naa wo wa le la? A re wo hoole bay yog doo le la?

6Yeso raw fer wããre ne hara ga : Nday jar bag bii jar no, Esay je ndar nen wããre ma jag Baa go, wãã le go ɓaa diŋ ti ɓay kidolgi, werga á yer ga :

Jar sen togoɗ wo ndi diŋ de jag ɓaara tawa,

Ama ɓil ɓaara go see ɓi hãã.

7Goŋge maga á goŋ wo me go de koɗ koɗe,

Werga á had wo jar diŋ de wããre jar téebeere wo, doo ga wããre á diŋ wããre Baa lay nono.

8Yeso raw riŋ rage ga : Nday men jag liŋgi go, raw seege diŋ wer hadge ma jar téebeere wo.

9Yeso raw riŋ rage pa ga : Nday de see ɓay, nday ɓoʼ jag liŋgi, ma seege diŋ wer hadge ɓay wo de see ɓay wo. 10Moyis wãã ga : hoo sug ti pan ɓo wo de man ɓo, je maga yaŋ ɗar pan ɓe wo de man ɓe, à mo ʼwarn go. 11Ma ɓay, nday had ɓayn ga je maga riŋ pan ɓe noga man ɓe we ga fen maga se hay nen hãge ɓe ne hẽn ma kayge ɓe, diŋ Korbaŋ (wer ɓe ga se hã fen sen go ne Baa), 12nday hã faage ne hẽn ma kay pan ɓe noga man ɓe gà so. 13De joŋge re ma doosen mokay, nday ɓlag de el jag liŋgi go, de hadge ɓay maga nday yaɗ had kããra de ɓe mono. Nday yaŋ joŋ re ma de maŋ sen wo mo deŋ debaŋ pa.

Re maga kaŋ ɗag ne jobo se

(Mat 15.10-20)

14Blam sen Yeso raw ɗe ngaɓan le tigriŋ pa, raw riŋ rage ga : Coʼ we sug ɓay, nday ɓuy. Laa we wããre sen mokay no. 15Fen maga kal wo ɓil jobo faale la, kãã ma kaŋ ɗag ne hẽn see gà. Ama kaŋ ɗag ne hẽn see diŋ wããre maga a le ɓil ɓe mono. [16Je maga yaŋ coʼ sug ɓe de el no, á mo laa wer wããre se no.]

17Yeso raw men ngaɓan go, raw kalge go tiŋma, jar ma wer ɓen raw wo wiigi ɓe ti wããre jagjõõ se no. 18Á raw riŋ rage ga : Nday de see ɓay, nday bay de kããge ma laa wããre sen wa lay? Nday bay de laage ga fen maga kal wo ɓil jobo faale la kãã ma ɓlagge ɓe go gà wa yawla? 19Werga á kal diŋ jiili ɓe gà ama kal diŋ ɓil ɓe, day ẽẽ wo go diŋ glog ɓe. (Yeso wãã doosen mokay, á raw wããge ga regen wo de el ma rege ɓuy.)

20Á raw wãã ge pa ga : Kaŋ ɗag ne jobo see diŋ fen maga kal le go ɓil ɓe mono. 21Diŋ ɓil je tabay ga ɗiggi ma de ɓlaggen laa wo le go ni, kol ne wo go joŋ fen maga bay ti ngel ɓe wa, joŋ freŋ, id jare, 22lengãɗge de naare jare, lig koŋne ti fẽẽre jare, joŋ hãã, hãy nen jare, joŋ re sõõre, joŋ de huni, car wããre ne jar see, kol jobo wããge ga riŋ ga se, loɗ jobo go. 23Fẽẽre se ma de ɓlaggen ɓuy laa wo le go diŋ ɓil je tabay no, day kaŋ wo ɗag ne hẽne.

Wãy jar Kanan po hã ɓil ɓe ne Yeso

(Mat 15.21-28)

24Blam sen Yeso kal rawge ɓi sir po see Tir mbaŋ, á raw kalge liŋ ni jobo, á hay da ga jobo mo ko ga se yaŋ ni wa, ama se kãã ma hayge de yoŋre gà. 25Blam sen wãy po may ɓe hay de sõõ ti, raw laa wããre Yeso. Á raw age ɓiŋ ɓe deparday, leʼ monɗra pel ɓe. 26Wãy sen bay may jar Jwif wa, á biŋ ɓi leege Fenisi ɓi sir Siri. Á raw wii Yeso ga á mo nii sõõn go ne may sen ti. 27Ama Yeso raw riŋgi ɓe ga : Men weere kleere wo go wuɗgi ɗa. Hoole kamliiri, à ɓodn go ne wayre wo mokay sen bay de el wa. 28Wãyn raw fer wããre ne hẽn ga : Mbe doosen no cwãy Waŋ ɓi no, de sen ɓuy wayren re wo diŋ nen hoole maga ray go gesiŋ doo kamliiri wo mono. 29Blam sen Yeso raw riŋgi ɓe ga : Ti ferge wããre ɓo maga ndo fer mokay, fer mbo liŋ so, sõõn naa we go ne may ɓon ti. 30Wãyn raw ferge mbe liŋ ni ɓe so, wo daʼ may ɓen go de suuli ti fen suuli de el tiʼ i, sõõn go de naage ne hẽn ti.

Yeso bul jag je ndigriŋ po go

31Blam sen Yeso raw men sir Tir go, raw heege go Sidoŋ, raw ferge le jag maarog ma Galile, hee le ɓi sir Dekapol taw. 32Á raw age de je ndigriŋ po, jag ɓe bay wãã wããre go de el wa, à raw wii Yeso ga á mo kaŋ doo ne hẽn ti. 33Yeso raw men ngaɓan wo go, raw yaʼ ge go de ɓe fentray ɓe boŋ. Á raw hee wedoo ɓe ne bloon sugi, raw tuf sããre, raw duʼ gi ɓe ne hẽn trum. 34Blam sen á raw maŋ nen ɓe ciŋ, ndum, raw wii bloon ga : Efata, wer ɓe ga : Bul go. 35Sug je ndigriŋ raw bulgi go ti ngel ni tuuseŋ, trum ɓe raw budgi go, se raw tĩĩ wer wãɗ wããre go de el pah paha. 36Yeso raw riŋ jar wo ɓuy ga : Siin we go ne jobo wa. Ama de maga Yeso riŋ ra ga á mo sii wo go ne jobo wa has mokay, á raw wo yaʼ wer siigi ɓe go ne jar daŋge yaw. 37Jar raw wo ngrisgi debaŋ doo fen maga saara kon mono, raw wo riŋgi ga : Fẽẽre maga á joŋ ra mo ɓuy de ele, á bul sug jar ndigriŋ wo go, wal jag jar mbululum wo go lay ɓuy.

Currently Selected:

MARK 7: TUP

Highlight

Copy