MARK 8

Jar ndar naa Yeso wùu ra de hoole

(Mat 15.32-39)

1Le ti wur sen jar fer tayge wer Yeso ngaɓa debaŋ pa. Á raw ko rage ga á bay wo de rege doo wa, á raw ɗe jar ma wer ɓen wo, raw wii rage ga : 2Jar se deŋ ko wo decoo nen ɓi debaŋ, werga naw ɓaara wara wer ɓi swaʼa, á bay wo de rege doo wa so lay. 3Hayga ndi fer ra we liŋ koŋne, á yaʼ ge wo go gayge ti faage, werga jar po wo yoo ɓaara debaŋ nduɗ wo le hãã hãã. 4Jar ma wer ɓen raw wo fer wããre ne hẽn ga : À daʼ hoole ma wùu jarn mo deŋ ɓuy go ti puuli lam taʼ gen la? 5Yeso raw wii rage ga : Hoole doo ɓay gãy ne? Á raw wo ga : Rename.

6Á raw wii ngaɓan wo ga : Lag we gesiŋ. Blam sen se raw hoo hoole ma renamn doo, raw joŋ suseʼ wo ne Baa ti hoole no, raw car nen ɓe go, raw hãge ɓe ne jar ma wer ɓen wo ga á mo ɓesn wo go ne ngaɓan wo, saara raw ɓesge ɓe go. 7Cẽẽ hay yaŋ doo ɓaara ni meʼ lay. Yeso raw joŋ suseʼ wo ne Baa ti cẽẽ se no, raw riŋ jar ma wer ɓen wo ga á mo ɓesn wo go lay. 8Wosela ɓuy re, wùu go kiŋ kiŋ. Te hoole maga gwaʼ ni raw bag yããge renam. 9Jar maga re wo hoolen ngaɓa ɓaara go ɓaale ndar naa taʼa. Blam sen Yeso raw ga á mo fer mbaara liŋ so, 10á raw ɗii daage de jar ma wer ɓen wo tuuseŋ, kal rawge ɓi sir Dalmanuta.

Farisiyẽẽ wii wo Yeso ga á mo joŋ fen mbuɗgi

(Mat 16.1-4)

11Farisiyẽẽ raw wo nduugi, raw wo faa kããra de Yeso. Á raw wo wii gi ɓe ga á mo joŋ fen mbuɗgi maga saara mo ko ga hã egre sen le ne hẽn diŋ Baa, ni saara mo baan de wããre. 12Yeso raw ndumgi le ɓil kuɗum, raw riŋgi ga : Wer jar se ma waran wiɗ wo fẽẽre mbuɗgi n a ga le ɓa? Kidolgi ndi riŋ nday, nday ko ge fen mbuɗgi po gà so.

13Blam sen, á raw men rage, raw ɗii daage, kal rawge wo go ti jeŋ maarog ɓaŋla.

Farisiyẽẽ wo de jar ma wer Herod, joŋre ɓaara de ngaɓge doo defõõre nono

(Mat 16.5-12)

14Ti jar ma wer Yeson yõõ wo hoo hoole ma tigriŋ doo ɓaara go, hoole doo ɓaara ɓi daagen ni boŋ tuu. 15Yeso raw wii rage ga : Joŋ we see ɓay de ele, koɗ we see ɓay doo Farisiyẽẽ wo de jar ma wer Herod wo, re ɓaara doo defõõre nono. 16Jar ma wer ɓen raw wo riŋ ɓaaran ga á wii doosen werga saara bay de hoole doo wa mono. 17Yeso raw ko wããre ɓaaran go mono, raw riŋ rage ga : Nday wãɗ ti holaŋ ɓay ga werga nday bay de hoole doo wa ga le la? Nday yaŋ bay laa wer ɓe ɗa? A bay de kal ge we ti wa yawla? Ko ge re ɓay yaŋ go bay bul gi ɗa? 18Nday de nen ti pa lay, day se bay ko ge wa yawla? Nday de sug pa lay, day se bay laa ge wa yawla? Nday bay ɗig ti wa yawla? 19Ti wur maga ndi car nen hoole ma dwee ne jar ma ndar dween wo, nday hay bag yããge de maga gwaʼ ni gãy ne? Á raw wo riŋ gi ga : Hwal ti ɓoge. 20Day de maga ndi hay car nen hoole ma renam ne jar ma ndar naa wo, nday hay bag yããge de maga gwaʼ ni gãy la? Á raw wo wii gi ga : Renam. 21Blam sen Yeso raw riŋ rage ga : Day nday bay go de laa wer wããre sen wa ɗa pa?

Yeso caa nen je rẽw go ɓi leege Betsayda

22Á raw wo nduugi Betsayda, á raw age de je rẽw ne Yeso, á raw wiigi ɓe ga á mo duʼ doo ne hẽn se. 23Yeso raw baa doo je rẽw no, á kal rawge wo go de ɓe jag leege. Blam sen, á raw duʼ sããre ne bloo nene, raw kaŋ doo ne hẽn ti, raw wiigi ɓe ga : Nen ɓo leʼ ko ge we? 24Je rẽw maŋ nen ɓe ciŋ, raw riŋgi ga : Ndi yaŋ ko jare, ndi ko ra doo koore wo no, ama á wo de seɗ ge. 25Yeso raw kaŋ doo ne hẽn nen tigriŋ pa. Bloo raw ko nen wo pel ɓe de deele ɗeger, nen ɓe raw caa ge go, nen ɓe raw koge go de el ɓuy. 26Blam sen Yeso raw ga : Fer mbo liŋ so, raw riŋgi ɓe ga : Kal go ɓi leege wa.

Piyer ɓoʼ wer Yeso go ga á diŋ Mesi

(Mat 16.13-20; Lug 9.18-21)

27Blam sen Yeso wo de jar ma wer ɓen raw wo ɓi leege ma ɓi sir Sesare ma ni Filip no. Á raw wii rage ti faage ga : Jar wii wo ti ɓi ga ndi diŋ wo ɓa? 28Á raw wo fer wããre ne hẽn ga : Jar po wãã wo ga ndo diŋ Jaŋ ma yog jare, jar lan wo ga ndo diŋ Eli, jar ma la wo pa ga ndo diŋ jobo yoo jar ndar nen wããre Baa go wo. 29Yeso raw wii rage ga : Nday de see ɓay lay, nday wii ti ɓi ga ndi diŋ wo lay? Piyer raw fer wããre ne hẽn ga : Ndo diŋ Mesi. 30Blam sen Yeso raw wii rage ga : Siin we go ne jobo wa hase.

Yeso de ɓoʼ wer húulí ɓe wo de kal ge ɓe go ciŋ

(Mat 16.21-28; Lug 9.22-27)

31Blam sen Yeso raw tĩĩ wer had jar ma wer ɓen wo ga : Nen da ga á mo joŋ bon Wel je táabayn debaŋ. Jar kluuri wo de waŋre jar ma siɗ jag wo, de jar ma ndar wer wããre Baa mo tobn wo go, mo iin wo go lay, wo day ge wur síilí ma de swaʼa, á mo fer go bir gi. 32Á wii ra go de re sen mokay paha. Ama Piyer raw yaʼ ge go de ɓe boŋ raw ruu gi ɓe. 33Yeso raw mbuɗ nen le ko jar ma wer ɓen wo, raw ruu Piyer le de egre ga : Yaʼ wo go see ɓi hãã, ndo diŋ Manhúulí, werga ndo bay ɗig gi doo Baa no wa, ama ndo ɗig diŋ doo jar téebeere won no.

34Blam sen Yeso raw ɗe ngaɓan wo de jar ma wer ɓen wo le see ɓe, raw riŋ rage ga : Je maga da we ga se maŋ blam ɓi no, ni á mo men ɗig ti see ɓe go, á mo hay go de gragge ga se mo huu mbe go ti re ɓi, ni á mo maŋ blam ɓi so. 35Je maga da ga se mo ʼwar se se go ti re ɓi wa mono, je sen diŋ je maga bas ge see ɓe gom so no. Ama je tabay maga yãã wããre ɓi, da ʼwar see ɓe mbe go wer ɓi mono, sen diŋ je maga joŋ ge tenen caw tum mo so no. 36Je tabayn mo daʼ bà horogre ma ti tamsirn wo go la ɓuy ma ɓe layblaʼ, hayga á bas see ɓe we go, day horogre se ma ti tamsirn la day joŋ wo may yaŋ ne hẽn ne? 37Fen po bay maga je tabayn kãã ma hãge ɓe ma coo see ɓe wa so. 38Wersen, wer jar ma waran wo ga day wo yãã jag Baa gà joŋ wo diŋ ɓlagge mo tiʼ, wosela joŋ sõõre we ti ɓi yoo ɓaara, joŋ sõõre ti wããre ɓin we go yoo ɓaara lay no, Wel je táabayn joŋ ge sõõre ti ɓe ti wur maga á wo fer ge le de gragge de woore mani Pan ɓen wo de jar peele mani Pan ɓen wo doosen no lay.

Currently Selected:

MARK 8: TUP

Highlight

Copy