MARK 9

1Yeso fer riŋ rage pa ga : Kidolgi, ndi de riŋ nday, jar po yaŋ wo yoo jar ma lag wo la huɗ gi wo go bay ko twaywaŋ mani Baan maga a ge le de egre mo gà.

Se Yeso kol go sara

(Mat 17.1-13; Lug 9.28-36)

2Naw wo nage blam sen hiiraʼ, Yeso raw hoo Piyer, Jag wo de Jaŋ wer ɓe, raw wo raw ge ciŋ ti húulì de see ɓaara tawa. Se ɓe raw cooge go sara. 3Õõbe ɓen kol wo go sagge debaŋ, depuy debaŋ maga jobo boŋ yoo jar ma ti tamsir la wo ɓuy kãã ma yogge ɓe depuy doosen no gà. 4Blam sen jar ma wer ɓe ma swaʼn raw wo ko Eli wo de Moyis wãã wããre de Yeso lagge. 5Wersen Piyer raw riŋ Yeso ga : Waŋ ɓi no, ngel sen la de el maga naa mo lag la ni. Wùr bag mburyug yaŋ swaʼa, boŋ ma ɓo, boŋ ma Moyis, boŋ ma Eli lay. 6Á wãã doosen diŋ werga á daw go, werga hẽẽne caa ra debaŋ. 7Swaare po raw naa ge le, raw kaŋ nencee ne hara ti, gẽẽge po raw wãã ge le nen swaaren ga : Je ma deŋ mo deŋ diŋ Wel da ge ɓi no, yãã we jag ɓe. 8Jar ma wer ɓen raw wo mbuɗ nen go ti ɓaara degar tuuseŋ, ama nen ɓaara laa ko jobo gà so has, say diŋ Yeso gwaʼ ɓiŋ ɓaara ni boŋ tawa.

9De maga á ɗii wo le go ciŋ ti húulìn gesiŋ mono, Yeso raw riŋ rage ga : Sii we re maga nday kon ne jobo wa hase, hãã go ti wur maga Wel je táabay fer ge tenen blam húulí ɓe mo ɗa no. 10Á raw wo yãã wããre maga Yeso riŋ ra de ɓe mo lay, ama á raw wo wii kããra ga : Wer wããre maga á wãã ga se fer ge tenen blam húulí nà gahãy ɓa? 11Blam sen á raw wo wii Yeso ga : Wer may ga jar ma ndar wer wããre Baa riŋ wo ga Eli a ge yaŋ go taŋgu ɗa ɓa?

12Yeso raw fer wããre ne hara ga : Mbe doo sen nono, Eli kãã ma a ge go taŋgu ʼwũy fẽẽren ɓuy ti ngel ɓe ɗa, day wer may ga á de yerge ga à joŋ bon Wel je táabay yaŋ debaŋ, day jar tobn wo yaŋ go lay ne? 13Diŋ wersen ndi de riŋ we ge ga Eli go de a ge yaw, jar yaŋ wo de joŋ bon ɓe doo ga ɓil ɓaara dan no, wããre Baa go de yerge ti ɓe doosen no lay.

Yeso nii sõõ go ne wel po ti

(Mat 17.14-21; Lug 9.37-43)

14Á wo wo age see jar ma wer ɓe ma lan wo mono, saara raw ko ngaɓan debaŋ go de yiŋ ti ɓaara cwẽẽ deŋ ɓuy. Jar ma ndar wer wããre Baa wo de faage de jar ma wer ɓen wo. 15Á wo wo ko Yeso mokay tuu, á raw wo ngrisgi debaŋ, raw wo hoo ɗeere le hee jag ne hẽne. 16Yeso raw wii jar ma wer ɓen wo ga : Nday faa de ɓaara ti may ɓa? 17Jobo yoo ngaɓan wo ni raw ɗege ɓe ga : Waŋ ɓi no, ndi hay a de wel ɓi, werga á de sõõ ti, sõõn maŋ jag ɓe go ti wããre lay. 18Sõõn leʼn we mokay á ɓoɗ ne gesiŋ, wel bag defõõre go jage, soo saŋ ɓe, see ɓe fũy gà has. Ndi wii jar ma wer ɓon wo ga á mo nii wo sõõ sen go ne hẽn ti, ama saara laa kããge gà. 19Yeso raw ga : Oh, nday jar ɓi ma bay hã ɓil ɓay me no, ndi mo ig see ɓay naw kmay la? Á le de weln me. 20Á raw age de ɓe ne hẽne. Je ma de sõõ tin wo ko Yeso mokay, sõõn raw gejag wel debaŋ, wel raw leʼge gesiŋ, raw lagad ge, bag defõõre go jage. 21Yeso raw wii pan ɓe ga : Á joŋ naw go de ɓe gãy ne? Pan ɓe raw riŋgi ɓe ga : Le ti klee ɓe ɓaa. 22Sõõn hay ɓoɗge ɓe nen wùu, nen bii tum lay, maga se mo ʼwarn go. Ama hayga ndo kãã yaŋ no, ni ndo ko decoo wùri. 23Yeso raw riŋgi ɓe ga : Ndo ga hayga ndi kãã yaŋ no? Ama ma ɓi, ndi joŋ maysela ɓuy go diŋ ne je maga hã ɓil ɓe we go me mono. 24Pan weln raw ngar jag deparday ga : Ndi hã ɓil ɓi we mo, kay ndi maga ndi mo hã ɓil ɓi go mo paha.

25Yeso raw koge ga ngaɓan le de hragge see saara mono, á raw caa põõ ne sõõ no, raw riŋ sõõn ga : Sõõ se ma ndigriŋ, de mbululum no, ndi de riŋ ndo, kal le go, men wel go, fer le kalge ɓil ɓe wa so hase. 26Sõõn raw ngar jag wel no, gejag weln de egre, raw kalge go. Wel raw kolge doo ga se huu go nono, hãã ngaɓa maga wo ni mo deŋ ɓuy raw wo ga á huu we go. 27Ama Yeso raw maŋ doo ɓe go ciŋ, weln raw ooge go deele.

28Yeso raw ferge liŋ, jar ma wer ɓen raw wo gwaʼge ɓiŋ ɓe ni tawa, á raw wo wiigi ɓe ga : Ɓa wùr kãã ma nii sõõ sen go gà an le ɓa? 29Yeso raw fer wããre ne hara ga : À kãã ma nii te sõõ ma se doosen go no kay, diŋ de tosge tawa.

Yeso fer wii gi go ti húulí ɓe wo de kal ge ɓe go ciŋ tigriŋ pa

(Mat 17.22-23; Lug 9.43-45)

30Á raw wo rawge le, raw wo cegaɗge go Galile. Yeso hay da ga jar mo ko se ga se hay le genla wa, 31werga á hay had jar wo ga : À hã ge Wel je Táabay yaŋ go ne jar wo doo, á iin gi wo yaŋ go, wur síilí ma de swaʼa se fer ge yaŋ go tenen pa. 32Ama jar ma wer ɓen laa wo laa wer wããre sen gà hase, day raw wo joŋ hẽẽne ma wiigi ɓe ti wããre sen lay.

Jar ma wer Yeso wo ga wose diŋ je kluu ma pel saara yoo saara la

(Mat 18.1-5; Lug 9.46-48)

33Á raw wo nduugi Kapernam. Yeso wo kalge liŋ mokay, á raw wii jar ma wer ɓen wo ga : Nday hay faa kããra ti faage ti may ɓa? 34Á raw wo lagge seɗem werga á hay wo faa kããra ti faage diŋ ga je kluu ma wãã re jarn ɓuy yoo saara diŋ wo la. 35Yeso raw hayge gesiŋ, raw ɗe jar ma wer ɓe ma hwal ti ɓogn wo le, raw riŋ rage ga : Hayga jobo da we ga se mo hay diŋ je kluu ma pel ɓay no, á mo kol see ɓe diŋ je ma blam kããra ɓuy no, á mo kol diŋ wejõõ ɓay ɓuy lay. 36Blam sen á raw baa weklee, raw ooge ɓe pel ɓaara, raw hayge ɓe kũũni ɓe raw riŋ rage ga : 37Wosela maga yãã wããre weklee ma doo kay we see ɓe werga á diŋ je ɓi we no, ni á yãã diŋ ndi tuu. Day wosela maga yãã wããre ɓi we see ɓe lay no, ni á yãã diŋ wããre ɓi tawa gà ama diŋ je maga ɓoʼ me le mo lay.

Je maga bay sõõ ɓil ne naa ti wa diŋ je naa

(Lug 9.49-50)

38Jaŋ raw ɗe Yeso ga : Waŋ, wùr daʼ jobo le nii sõõre wo go de ɗúu ɓo la, wùr hay leʼ ga wùr dig ne, werga á bay diŋ je naa wa. 39Ama Yeso raw fer wããre ga : Dign we wa, werga jobo kãã ma joŋ fen mbuɗgi de ɗúu ɓi, day fer ɗar mege blam deparday tuu pa gà. 40Je maga bay sõõ ɓil ne naa ti wa diŋ je naa. 41Day je maga hã ge bii we we joge meʼ werga nday diŋ jar mani Kris no, kidolgi ndi riŋ nday, je sen daʼ ge poɗge yaŋ.

Je ma kaŋ wer jar joŋ ɓlagge, re ma de hãã ti ɓe

(Mat 18.6-9; Lug 17.1-2)

42Wosela maga yaŋ joŋ see ɓe ma kaŋ wer wel po go boŋ yoo weere kleere ma de hã ɓil ɓaara men mo lag we nen ɓlagge no, ɗawa ɓen à mo saʼ man niini ne je sen soole, à mo ɓoʼn wo go nen maaroge. 43Hayga ndo ko we ga doo ɓo go de kaŋ wer ɓo no, caan go. Ɗawa ɓen wo mbo kalge wurpo ti ngel ma de eln kolge go tenen caw de doo boŋ mbo, sen de el daŋ maga á wo ge go ɓoʼ moge go nen wùu maga huu gà de doo ɓo ti ɓog ɓuy, ti ngel maga bon ni debaŋ. [44Cogcõõre ɓe huɗ wo go gà wùu ɓe huu go gà has lay mono.] 45Hayga jobo ko we ga ɓaale se go de kaŋ wer se joŋ ɓlagge no, á mo caan go. Ɗawa ɓen á mo wo mbe kalge wurpo ti ngel ma de eln kolge go tenen caw de ɓaale boŋ mbe, sen de el daŋ maga se wo ge go ɓoʼ ge ɓe nen wùu maga huu gà de ɓaale ɓe ti ɓog ɓuy, ti ngel maga bon ni debaŋ. [46Cogcõõre ɓe huɗ wo go gà wùu ɓe huu go gà has lay mono.] 47Hayga ndo ko we ga nen ɓo go de kaŋ wer ɓo no, naan go. Ɗawa ɓen wo mbo kalge wurpo ti twaywaŋ mani Baan nen boŋ sen daŋ maga à wo ge go ɓoʼ moge go nen wùu maga huu gà de nen ɓo ti ɓog ɓuy, ti ngel maga 48cogcõõre ɓe huɗ wo go gà wùu ɓe huu go gà has lay mono. 49Werga jar téebeere ɓuy, wùu ʼwũy rage doo cuu nono.

50Cuu diŋ fen ma de ele, ama hayga cõõre cuun ãã we go no, à fer ferge ɓe de cõõre gà so. Hay we de cõõre jag jare, lag we ti se kããra jam.

Currently Selected:

MARK 9: TUP

Highlight

Copy