LUG 6
6
Yeso diŋ Waŋ wur Saba no
(Mat 12.1-8; Mark 2.23-28)
1Ti wurpo, wur Saba no, Yeso raw hee ge ɓi payre po wo, jar ma wer Yeso raw wo hrag coore, raw wo õõrõg ge ɓe doo ɓaara sooge. 2Farisiyẽẽ po raw wo riŋ rage ga : Ɓa joŋre maga go de dig gi ga joŋ wur Saban wa, day nday joŋ le ɓa? 3Yeso raw fer wããre ne Farisiyẽẽ wo ga : Nday bay de jaŋ wããre maga Dafid hay joŋ de kããre ɓe ma wer ɓen wo doo koŋne mo wa yawla? 4Á kal ɓi tiŋ Baa, raw hoo hoole maga de hãge ne Baa, raw rege ɓe, raw hã te ɓe ne kããre ɓe ma wer ɓen wo lay, wããre Baa go de dig jar ga á mo ren hãy wa, say diŋ jar ma siɗ jag wo tawa. 5Yeso raw riŋ rage tigriŋ pa ga : wel je táabay diŋ Waŋ wur Saban no.
Yeso bir doo jobo go wur Saba no
(Mat 12.9-14; Mark 3.1-6)
6Ti wurpo, wur Saba, Yeso raw kalge ɓi tiŋ tosge po, raw had jare. Paga bloo po yaŋ ni doo war ɓe go de húulí. 7Jar ma ndar wer wããre Baa wo de Farisiyẽẽ raw wo lagge cegeɗ Yeso lag ga á fer yaŋ bir doo ɓe go wur Saban yawla, werga á da wo ga saara mo daʼ Yeso joŋ mopo maga bay ti ngel ɓe wa, ni saara mo kii wããre ne hẽn ti. 8Ama Yeso raw ko ɗiggi ɓaara go, raw riŋ bloo ma doo de húulín la ga : Ur go ciŋ oo go deele mo taʼ pel jar ɓuy deŋ. Bloon raw urgi go ciŋ, raw oo ge go ti ngel ni deŋ. 9Blam sen Yeso raw riŋ rage ga : Ndi wii nday ɗa, wããre Baa yaŋ mbe de men faage ma joŋ de el wur Saban yawla, noga joŋ diŋ ɓlagge? Ma pẽẽ jobo go yaw, noga ʼwarn go? 10Á raw ko rage wo ɓuy, raw riŋ bloon tuuseŋ ga : Yaʼ doo ɓo le. Á raw yaʼ doo ɓe le, doo ɓe fer bir gi go de ele. 11Ɓil jar po raw wo sõõ ge debaŋ, á raw wo tĩĩ wer faa kããra ti re maga saara mo joŋ Yeso de ɓe mono.
Yeso far jar peele ɓe wo hwal ti ɓoge
(Mat 10.1-14; Mark 3.13-19)
12Le ti wur sen Yeso raw ɗii gi ciŋ ti húulì tos ge, raw nà ge tos Baa poɗage. 13Day de maga wur wo le go kal ge mokay, á raw ɗe jar ma wer ɓen wo le, raw far jar po wo yoo ɓaara hwal ti ɓog, raw kaŋ ɗúu ne hara ga : Jar peele wo. 14Simoŋ (á kaŋ ɗúu ɓe ga Piyer), wo de hẽn ɓe Aŋdre, Jag wo de Jaŋ, Filip wo de Bartelemi, 15Matiye wo de Toma, Jag jee ni Alfe wo de Simoŋ (ma de baa wùu da wer mani ɓen wo no), 16Judas wel ma Jag, wo de Judas Iskariyod je maga kaŋ taw Yeso go mono.
Yeso had jare, pẽɗ jar cege wo go lay
(Mat 4.23-25)
17Yeso raw wo ɗii gi le go gesiŋ wer kããra, raw daʼ jar ma wer ɓe po wo ti laale ngaɓa, daʼ jar tigriŋ wo ni debaŋ debaŋ lay. Jar sen á wo le ɓi sir Jude, wo de Jerusalem, maapo á wo le ti prog Tir wo de Sidoŋ ma ti jeŋ bii wo no. 18Á hay a wo le laa Wããre ma de Cõõre no, maga á mo pẽɗ saara go lay. Jar maga sõõre wo de joŋ bon ɓaara daɗ wo see ɓaara lay. 19Jar raw wo kiɗ gi ɓuy ga saara mo wo duɗ see ɓe, werga egre po raw kalge le go see ɓe, raw pẽɗ rage go ɓuy.
Yeso ga jar po woo wo yaŋ, jar po jo wo bon yaŋ lay
(Mat 5.1-12)
20Yeso raw ko jar ma wer ɓen wo, raw riŋ rage ga :
Nday jar coo, nday woo we
werga twaywaŋ mani Baan diŋ ma ɓay!
21Nday jar maga koŋne de cee we ge patala, nday woo we,
werga nday daʼ ge rege yaŋ debaŋ debaŋ.
Nday jar maga nday de rag ge patala, nday woo we,
werga nday feg ge yaŋ.
22Hayga jar yaŋ wo car hee de ɓay, tob wo nday go, ɗar wo nday, mbuɗ wo foo ɗúu ɓay doo ga nday diŋ jar ma de ɓlagge, wer ɓi wel je táabay no, ni nday woo we. 23Ɓil ɓay mo hay go feh ti maga re sen mokay a wo we ti ɓay mono, fruy we, werga poɗge ɓay yaŋ le gor we ge ciŋ debaŋ debaŋ. Pããre ɓaara hay joŋ wo bon jar ndar nen wããre Baa go wo le taŋgu doo sen no lay.
24Ama re ti ɓay jar horog debaŋ no,
werga ɓayn nday go de daɗ see ɓay.
25Re ti ɓay jar ma de hurma patala mono,
koŋne cee ge nday yaŋ lay so.
Re ti ɓay jar ma ti feg patala mono,
nday kol ge yaŋ law see ɓay rag ge lay so.
26Hayga jar yaŋ wo keɗ we ge ga nday diŋ jar ma de el de el no, ni re ti ɓay, moore ɓay hay joŋ wo jar geteʼ maga wãɗ wo ga saara diŋ jar ndar nen wããre Baa go lay wo we doo sen no lay.
Wosela mo da je hee ɓe
(Mat 5.38-48; 7.12)
27Ndi de riŋ nday jar coʼ sug wããre ɓi no, da we jar hee ɓay wo, joŋ we jar maga car wo hee de ɓay de ele. 28Jar faɗ nday we ni nday joŋ ɓay diŋ bosaʼa, tos we ti jar joŋ bon ɓay wo. 29Jobo maʼ ndo we haw no, mbuɗ ɓaŋ lan ne hẽn pa, jobo hoo õõbe ɓo ma kluu we de waŋ mo, men semis ɓon go hẽn pa. 30Wosela ɓuy á we wii mopo doo ɓo hã mo sen ne hẽne, jobo hoo fen ɓo we de waŋ no, men mbo wo go, fer yãã ge ɓe wa so. 31Joŋre maga nday da ga jar mo joŋ wo ne nday mo ɓuy no, joŋ we ne hara doo sen no degaʼ lay.
32Nday yaŋ da ge diŋ jar maga da wo nday mo taw taw no, ni nday de gor ge ga nday mo daʼ poɗge po le ti ɓe pa le? Hay bà jar maga jobo bay kee rage jag wa, wo de joŋge doo sen no lay. 33Nday yaŋ joŋge de el diŋ jar maga joŋ wo nday de el mo tawa no, ni nday de gor ge ga nday mo daʼ poɗge po le ti ɓe pa le? Hay bà jar maga jobo bay kee rage jag wa, wo de joŋge doo sen no lay. 34Nday yaŋ taɗ ɓèere diŋ ne jar maga nday ɗig ga á poɗ wo nday yaŋ go taw taw no, ni nday de gor ge ga nday mo daʼ poɗ ge po yaŋ le ti ɓe pa le? Hay bà jar maga jobo bay kee rage jag wa taɗ wo solay ne kããre ɓaara jar maga jobo bay kee rage jag wa maga á mo fer ge wo solay ɓaaran ne saara keɗed ɓuy lay. 35Ɗawa ɓen da we jar hee ɓay wo, joŋ ra we de el de ele, nday taɗ ɓèere we ne jar mokay, ni nday mo ɗig ga á fern ge wo yaŋ le we wa so, ni nday daʼ poɗge yaŋ ge debaŋ, nday kol ge go diŋ weere Baa ma ciŋ no, werga á joŋ jar ma debaycõõren wo de ma de ɓlaggen wo ɓuy de ele. 36Ko we de coo jar doo ga Pan ɓay ma ciŋ ko decoo jar no lay no.
Yeso ga wosela mo car re ne kẽẽ se wa
(Mat 7.1-5)
37Ko we see ɓay diŋ jar cag re jar lan wo wa, ni Baa cag ge re ɓay ga lay, ɓoɗ we re ne jar po wo ti wa, ni Baa ɓoʼ ge re we ti ga no lay, men we ɗig re ɓlagge go ne jar lan wo ti, ni Baa men ɗig re ɓlagge ɓay yaŋ wo go ne nday ti lay. 38Hã we fẽẽre maga jar lan wo de sãy ɓe ti ne hara, ni Baa hã yaŋ ne nday lay. Baa lag ge fẽẽre ma de ngaɓ ge ti mundoore de el de jeb ge go de baa ge fẽẽfẽẽ yaŋ ne nday ɓi ndar õõbe ɓay ma kluurin wo no. Baa ngaɓ ge fen maga á hãn ge ne nday yaŋ de mundoore maga nday ngaɓ ne jar lan wo de ɓe mo lay.
39Yeso raw riŋ rage de jagjõõ ma tigriŋ pa ga : Je rẽw kãã ma ɗaw kan ɓe je rẽw seege gà. Hayga á ɗaw wo kããra we seege no, á wo wo go laa ge ɓi tuu ɓog ɓuy. 40Wel maga á de had ge ɓe ɗa, daŋ je had ge ɓen ga ɗa kway, ama hayga hadge ɓen wo we go taw ge ɓuy no, á raw kol ge go doo je had ge ɓen no kway lay so.
41Ndo go de mbal taale nen kigrig tiʼ, ɓon ko doo ɓo ga : day ndo kãã ma ko ti fíi ma nen hẽn ɓon ko ge yaw ne? 42Ndo de mbal taale nen kigrig tiʼ yaw, ɓon ko doo ɓo ga, ndo raw riŋ hẽn ɓon ga : Ɗaw ndi maŋ ti fíi go mo nen maŋ ge yawla? Ndo je bag bii jar sen mo deŋ no, maŋ mbal taale ma nen ɓon go taŋgu ɗa, ni nen ɓo ko yaŋ go de el ma maŋ ti fíi go ne hẽn ɓon nen kway.
Leʼge koo
(Mat 7.16-20; 12.33-35)
43Koo ma de el leʼ de ɓlagge ga, koo ma de cege leʼ de el ga lay. 44Á ko koo mayla ɓuy ga á bay ɗag diŋ se leʼge ɓe. Koore ma de hõõre leɗ wo mbèere gum ti ɓaara ni lay ga : mborgway leɗ wo mbèere tlalum ti ɓaara ni lay ga lay. 45Je ma de el naa nen go joŋ joŋre ma de el werga ɓil ɓe de ele. Je ma de ɓlagge naa nen go joŋ joŋre ma de ɓlagge werga ɓil ɓe de ɓlagge. Jag wosela wãã go diŋ fen maga le go de baa ɓil ɓe mono.
Tiŋri po wo ɓoge
(Mat 7.24-27)
46Wer may ga nday ɗe me ga Waŋkluu, Waŋkluu, day nday bay joŋ re maga ndi riŋ we ti ɓaara wa ne? 47Jar maga á wo see ɓi, coʼ wo sug wããre ɓin de ele, joŋ wo doo ga ndi wããn no, fen maga jar sen wo de maŋ ge ɓe, ndi siin go ne nday paha. 48Á doo je maga tĩĩ wer boo tiŋ we, raw tee tuu gesiŋ kuɗum, raw ɓoʼ wer ɓe ciŋ ti húulì. Bii raw maŋ ge le, bii ma ɓi pyew raw wo dug gi le fĩɗ tiŋ se no, á raw ẽgge, leʼ go gesiŋ gà, werga tiŋ de boo ge ngiŋ ngiŋ. 49Ama je maga coʼ sug wããre ɓin mbe, day day ge joŋ ge doo ga ndi wããn no gà mono, je ma sen doo je maga raw boo tiŋ ɓen mbe ti ngel bii tããlãy tuuseŋ, ɓoʼ wer ɓe ɓi tuu ga, bii ma ɓi pyew wo wo dug gi le fĩɗ tiŋ mokay, á raw laa ge go deparday hrif tuu.
Currently Selected:
LUG 6: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
