LUG 7

Yeso pẽẽ wejõõ waŋ soode po go

(Mat 8.5-13)

1Yeso wo taw sii gi wããre ɓen go ne jar taw, á kal rawge Kapernam. 2Wejõõ je kluu soode po yaŋ ni de cegè go nen húulí, á diŋ wejõõ ɓe maga á dan debaŋ mono. 3Waŋ sooden wo laa re Yeso mokay, á raw laa jar kluuri jar Jwif po wo wo wii gi ɓe ga á mo a le pẽẽ wejõõ sen go. 4Á raw wo age see Yeso, raw wo kam ge ɓe kam ge ga : Bloo sen mbe de kããge maga ndo kay ne mbo. 5Á da kawre naan wo debaŋ lay, boo tiŋ tosge wùr ne wùr diŋ se lay. 6Blam sen Yeso kal rawge wer ɓaara. Á wo kos tiŋ le mokay, waŋ sooden raw laa bar ɓen wo wo see ɓe, á raw wo riŋ gi ɓe ga : Waŋ sooden ga ndi gay mo gà Waŋkluu, ndi bay de kããge maga ndo kal liŋ ni ɓi wa. 7Diŋ wersen ga ndi raw ko see ɓi ga ndi bay nen wo ge see ɓo de see ɓi wa mono. Ama wãã mbo de jag ɓo tawa, ni wejõõ ɓin pẽẽ yaŋ go. 8Werga ndi de see ɓi ndi diŋ jobo maga ndi nen doo jar ma de egre de daŋ ndi wo lay, ndi yaŋ wãã re soode po wo lay, ndi riŋ maapo we ga : See no, á kal rawge, ndi riŋ maapo we pa ga : a le, á raw age lay, ndi raw riŋ wejõõ ɓi ga : Joŋ mo ma kay no, á raw joŋge ɓe lay. 9Yeso wo laa wããren mokay, raw ngrisgi ti waŋ soode no, á raw mbuɗ nen ɓe wo ti ngaɓa maga hay á wo le wer ɓe mono, raw riŋ rage ga : Hay bà le Israyel ndi bay de ko jobo de hã ɓil ɓe ne Baa de egre doo kay ti boŋ wa ɗa. 10Jar maga à hay laa ra le raw wo ferge liŋ, wo wo daʼ wejõõ ɓen go de pẽẽ ge de ele.

Yeso bir wel wãy dwur po go

11Blam sen Yeso kal rawge ɓi leege maga à ɗen ga Nayn, jar ma wer ɓen wo ngaɓa debaŋ raw wo maŋ blam ɓe. 12Á wo day ge jagjiŋ ma kal ge wo ɓi leegen mokay, ko nen ɓe la jar de maŋ húulí sugi. Weln mbe go doo man ɓe ni no boŋ no, wãyn dwuri, ngaɓa ma ɓi leegen ni wo see ɓe ni lay. 13Yeso wo ko ge ɓe mokay, á raw ko decoo nen ɓe debaŋ, á raw riŋgi ɓe ga : ra wa. 14Blam sen á raw yaʼ ge wo, raw duʼ fen maga á maŋn wo ti ɓe mono, jar maŋ ge ɓen raw wo lagge. Yeso raw ga : Wejõõ, ndi de riŋ ndo, ur go ciŋ. 15Je húulín raw hayge go tiwere, raw wãɗ wããre, Yeso raw hãge ɓe ne man ɓe.

16Hẽẽne raw joŋ jar ma ti ngel wo ni ɓuy, á raw wo togoɗ Baa raw wo ga : Je ndar nen wããre Baa go ma de egre debaŋ naa nen we yoo naa. Baa a we kay jar ɓen wo.

17Wããre Yeso raw dus gi wo go ɓi leege Jude wo de sir ma ɓiŋ ɓen wo ni mo ɓuy no.

Jaŋ laa jar po wo wo see Yeso

(Mat 11.2-19)

18Jar ma wer Jaŋ raw wo sii wããre sen ne Jaŋ ɓuy lay, Jaŋ raw ɗe jar po yoo ɓaara ɓog, 19ma laa ge wo see Yeso wii gi ɓe ga : Ɓa ndo mbo diŋ je maga wùr de gor ge ɓe mbe mo yaw, noga wùr mo gor je tigriŋ ɗa pa yawla? 20Á wo wo day ge see Yeso mokay, á raw wo riŋ gi ɓe ga : Jaŋ ma joŋ batem jar laa wùr le ga wùr mo á wii moge ga : Ndo mbo diŋ je maga wùr de gor ge ɓe mbe mo yaw noga wùr mo gor je tigriŋ ɗa pa yawla? 21Ti wur sen Yeso hay pẽɗ jar cege wo go debaŋ, niɗ sõõre wo go ne jar ti debaŋ, car nen jar rẽwre wo go debaŋ ko ge lay. 22Yeso raw fer wããre ne hara ga : See we riŋ Jaŋ de re maga nday ko ra, nday laɗ ra wo de sug ɓay mo lay, ndi car nen jar rẽwre wo go, ndi kol jar leŋre wo go seɗge, ndi de fãɗ jar cíi wo go, ndi bul sug jar ndigriŋ wo go laɗge, ndi fer bir jar ma de húulí wo go, ndi siɗ Wããre ma de Cõõren go ne jar coo wo lay. 23Ama woo ge diŋ je maga ndi kol foo go nen ɓe gà mono.

24Jar ma wer Jaŋ raw wo rawge, Yeso raw tĩĩ wer riŋ ngaɓan wo ti Jaŋ ga : Nday hay ko wose ti puuli mo la? Fíiri-bii po maga leege de fidgi ɓe yawla? 25Nday hay wo ko may la? Ko je ma de laa õõbe ma de woore ti yawla? Ko we nen ɓay, jar maga lag wo õõbe ma de woore ti, daɗ wo fẽẽre ti werga yeɗ yeɗe, wo de lagge diŋ liŋ ni waŋre wo lay. 26Day nday hay wo wo ko ge diŋ may la? Je ndar nen wããre Baa go? Ndi de riŋ nday ga á de daŋ je ndar nen wããre Baa go yaw. 27Werga bloo maga à yer go ti ɓe ga :

Coʼ sug ɓo ndi de ɓoʼ je soole ɓin wo pel ɓo,

Ma kneʼ faagen wo mo pele.

Jaŋ diŋ je se no. 28Ndi de riŋ we ge ga : Yoo wer jar téebeere wo ɓuy á bay de biŋ jobo kluu de daŋ Jaŋ wa, ama je maga go depẽẽre yoo jar ma ti twaywaŋ mani Baan, sen de daŋge ɓe kluu ane.

29Ngaɓa jarn ɓuy de jar tar lumon raw wo laa wããre se no, á raw wo ko ge lay ga Baa diŋ je joŋ re de deele diŋ de hã ɓil ɓaara ne Jaŋ ga á mo joŋ batem saara go. 30Ama Farisiyẽẽ wo de jar ndar wer wããre Baa laa wo da fen maga Baa hay ɗig ga se joŋ see ɓaara mo gà ti maga saara laa hã ɓil ɓaara ne Jaŋ ga á mo batem saara gà mono.

31Yeso raw riŋ rage tigriŋ pa ga : Ndi mo ngaɓ jar ma waran wo de wo se ne? Á wo de maŋ wose ne? 32Á wo de ngaɓ ge doo weere kleere maga tay wo joŋ hragge ti ngel hrag ge po, day raw wo riŋ jar lan ga : Wùr ʼwad síilí ne nday ga nday dag jõõ, nday laa dag jõõ gà. Day wùr raw ʼwad war húulí, nday laa rag ge ga pa. 33Wersen Jaŋ ma joŋ batem jar raw age, á re hoole ga lay, jo yii ga lay, nday raw ga : Á de sõõ ti. 34Wel je tabay wo nduu ɓen, á re lay, á jo lay, nday raw ga : Ko we je ɓil, je taɗ ge de yii de koɗ koɗ mo caw ɗa, bar jar tar lumo wo de jar maga jobo bay kee rage jag wa wo. 35De sen ɓuy jar maga yãã wo wããre Baa mo ɓuy, raw wo daʼ wer ko ge re Baa see ɓe ga á de ele.

Yeso liŋ ni Farisiyẽẽ po maga à ɗen ga Simoŋ

36Jobo yoo Farisiyẽẽ wo boŋ raw ɗe Yeso ga á mo wo rege ni se, Yeso raw kalge liŋ ni je se no, raw hayge rege. 37Paga wãy ma de ɓlagge po yaŋ ɓi leege sen ni, á wo laa ge ga Yeso yaŋ rege liŋ ni Farisiyẽẽ mokay, á raw maŋ trusa le doo ɓe ɓi klobo de baa ge go par, 38raw oo ge nen faale ɓe ti jeŋ ɓaale ɓe mbaŋ. Á raw rage, ɓaale Yeso raw taŋ ge go de mberbe ma nen wãy no, wãyn raw sadge ɓe go de riŋ ti ɓe, raw klew ge ɓe ɓaale, raw kag trusan ne hẽn ti. 39Farisiyẽẽ maga ɗe Yeso le rege la wo ko sen mokay, raw wãã ge de ɓil ɓe ga : Bloon mo yeʼ mo hay we diŋ je ndar nen wããre Baa go cwãy no, á de hay ko yaŋ ga wãy maga de klew se mo deŋ diŋ wãy ma de ɓlagge. 40Wersen Yeso raw ɗe Farisiyẽẽ ga : Simoŋ, ndi yaŋ de wããre maga ndi wãã mo. Simoŋ raw ga : Wãã mbo Waŋ.

41Yeso raw ga : Jar po wo ɓog ɓèere jobo ti ɓaara. Ma po boŋ ɓèere ti ɓe solay kis kis dwee, je lan ɓèere ti ɓe solay doo dwee lay. 42Ama á wo ɓog ɓuy mopo maga á mo poɗ wo de ɓe bay doo ɓaara wa, je maga ɓèere ɓe ti ɓaara la raw men ɓèeren go ne hara ɓog ɓuy. Yeso kal ga sii me ɗa so, yoo jar ma ɓogn wo mo lag, maga á dan de daŋ kẽẽ diŋ ma hon ne? 43Simoŋ raw ga : Ndi ɗig ga diŋ je maga á men solay go ne hẽn pur mo deŋ no. Yeso raw riŋgi ɓe ga : Ndo wãã mbo we ni. 44Á raw mbuɗ nen ne wãyn ti, raw ga, Simoŋ, ndo yaŋ de ko wãy se deŋ no? Ndi kal le liŋ ni ɓo, ndo hã bii me ma yog ɓaale ɓi ga, ama ma wãyn á yog ɓaale ɓi go de mberbe ɓe, tagn go de riŋ ti ɓe. 45Ndo klew me ga, ama ma wãyn hãã keɓaa á bay men klew ɓaale ɓi go wa. 46Ndo kaa noo me ti ga, ama ma wãyn á kag trusa me ɓaale. 47Wersen ndi de riŋ moge ga : dage maga wãy da me debaŋ mo deŋ kaŋ nen jar go ga Baa men ɗig re ɓlagge ɓen wo we go ne hẽn ti fẽd ɓuy. Ama ma je maga dage ma ɓen depẽẽre diŋ werga à de men ɗig re ɓlagge ma ɓen go ne hẽn ti depẽẽre koɗ mo lay. 48Yeso raw riŋ wãyn ga : Ndi men ɗig re ɓlagge ɓon wo we go mo ti. 49Jar maga hay wo rege ɓiŋ ɓe raw wo wãã ge de ɓil ɓaara ga : Bloo se deŋ diŋ wose ga men ɗig re ɓlagge go ne jar ti ɓlagge ɓaaran wo lay ɓuy mo ɓa? 50Yeso raw riŋ wãyn ga : hãge ɓil ɓo ne Baa yãã mo we go, see mbo jam so.

Currently Selected:

LUG 7: TUP

Highlight

Copy