JAŊ 18

À baa Yeso

(Mat 26.47-56; Mark 14.43-50; Lug 22.47-53)

1Blam maga Yeso wãã go doosen no wãã mono, á kal rawge de jar ma wer ɓen wo, kal rawge wo go faale por bii ma Sedroŋ no, pay po yaŋ wo ni, á raw wo laage de jar ma wer ɓen wo ni. 2Judas je maga de sãy kaŋ taw ɓe go la, de ko ngel sen lay, werga Yeso tay wo de jar ma wer ɓen wo ni tum tum. 3Judas kal rawge wo ɓi pay sen ni, hoo soode wo wo wer ɓe ngaɓa, de jar gor tiŋ tosgen wo, waŋre jar siɗ jag maga Farisiyẽẽ hã ra wo ne hẽn were, á wo de gragge go de fẽẽre durgi, de doɗ gér doo, de wùu de doɗge doo ɓuy. 4Yeso de see ɓe go de ko re maga daʼ se ge mono, á raw yaʼ ge wo ɓiŋ ɓaara, raw wii rage ga : Nday kiɗ wo ɓa? 5Á raw wo fer wããre ga : Wùr kiɗ Yeso ma Nasarede. Yeso raw riŋ rage ga : Á diŋ ndi la yaw.

Judas, je maga kaŋ taw ɓe go la le de oole yoo ɓaara deŋ. 6De maga Yeso raw riŋ rage ga : Á diŋ ndi la yaw mono, saara raw dagge wo go de gloge, laa wo gesiŋ ligidi. 7Yeso fer riŋ rage pa ga : Nday kiɗ wosela? Á raw wo ga : Wùr kiɗ Yeso ma Nasarede. 8Yeso raw fer wããre ne hara ga : Ndi hay riŋ we we go la ga á diŋ ndi la yaw. Hayga yaŋ ga nday kiɗ diŋ ndi no, ni nday men we jar ma lag mo raw wo. 9Re sen raw leʼ ge go ti jag wããre maga Yeso wãã ga : Se mo yee go yoo jar maga Pan se hã ra ne se boŋ wa mono. 10Simoŋ Piyer de moslam doo, raw naage ɓe go, raw caa wejõõ je kluu ma sii jagn de ɓe, caa sug ɓe ɓaŋ war go. (A ɗe wejõõ sen ga Malkus.) 11Yeso raw riŋ Piyer ga : Hee moslam ɓon ɓi fra ɓe ni, ndo da ga ndi mo jo bon maga Pan ɓi hãn me joge mo wa yawla?

À wo de Yeso pel Ane wo de Kayfe

12Ngaɓa sooden wo de waŋre ɓaaran wo de jar gor tiŋ tosge jar Jwif raw wo yoʼ ge de Yeso, baŋ wo ne. 13Á raw wo rawge de ɓe taŋgu ni Ane. Ane diŋ yaa Kayfe maga diŋ je kluu ma siɗ jagn ti kal sen mono. 14Paga Kayfe diŋ je maga hay riŋ jar Jwif wo keɓaa ga : De el ɓen diŋ maga daga jobo boŋ mo huu go ti ngaɓa ma ɓuyn mono.

Piyer kaŋ kiŋ go ga se bay diŋ je ma wer Yeso wa

(Mat 26.69-70; Mark 14.66-68; Lug 22.55-57)

15Simoŋ Piyer wo de je ma wer Yeso ma tigriŋ raw wo maŋ blam Yeso. Je ma sen mono je kluu ma siɗ jagn de koge ɓe, á kal wo wer Yeso de maga Yeso kal wo liŋ ni je kluu ma siɗ jagn mono. 16Ama ma Piyer raw gwaʼ ge le go faale, de oole jagjiŋ deŋe. Blam sen je ma lan ga je kluu ma siɗ jagn de koge ɓe la, raw kalge le go, raw wii wãy ma gor jagjiŋ no, raw Baa Piyer le. 17May po maga de gor jagjiŋ raw riŋ Piyer ga : Ɓa ndo de see ɓo ndo bay diŋ je ma wer bloo sen wa ane? Piyer raw ga : Ndi bay je ma wer ɓe wa.

18De sen ni ceere de joŋ jar lay. Weere jõõre wo de jar gor tiŋ tosgen raw wo fug wùu, lag wo jag ɓe borge. Piyer raw hayge ɓiŋ ɓaara bor wùu ni lay.

Je kluu ma siɗ jagn wiɗ jag Yeso

(Mat 26.59-66; Mark 14.55-64; Lug 22.66-71)

19Je kluu ma siɗ jagn raw wii jag Yeso ti jar ma wer ɓen wo, ti re ɓe maga á hadn mo lay. 20Yeso raw riŋgi ɓe ga : Ndi hay go wãã wããre Baa go seɓaa tinoo nen jar wo ɓuy deŋ tum, ndi yaŋ had jar ɓi tiŋ Baa wo de tiŋ tosge, maga jar Jwif tay wo ti ni mo ɓuy lay, ndi bay de wãã mopo ti boŋ de yoŋre wa hase. 21Day ndo wii jag ɓi wer may? Wii jar maga hay wo laa wããre ɓi maga ndi hay siɗgi ɓe ne hara mono. Á yaŋ wo de ko wããre maga ndi hay siɗgi ɓe ne hara go de ele. 22Yeso de wãã re sen deŋ ɗa, jobo yoo jar gor tiŋ tosgen wo boŋ, hay de oole ti jeŋ Yeso, raw maʼ ge ɓe haw mbuŋ ga : À ga ndo mo fer wããre ne je kluu ma siɗ jagn doosen no? 23Yeso raw riŋgi ɓe ga : Hayga ndi wãã we ni ndaŋ gà kaŋ nen ɓi ti fen maga ndi wãã ni ndaŋ gà mono, hayga ndi wããn we ti ngel ɓe, day diŋ wer ga ndo raw maʼ ndi tuu seŋ ne?

24Doo kay nono, Ane raw ɓoʼ Yeso wo ne Kayfe je kluu ma siɗ jagn de baŋge caw.

Piyer fer kaŋ kiŋ go ga se bay je ma wer Yeso wa

(Mat 26.71-75; Mark 14.69-72; Lug 22.58-62)

25De sen ni, Simoŋ Piyer mbe de hayle bor wùu yeʼe, à raw riŋgi ɓe ga : Ɓa ɓon ndo bay diŋ je ma wer bloo sen wa an ge? Piyer raw kaŋ kiŋ ga : Ndi bay je ma wer ɓe wa. 26Jobo yoo weere jõõre je kluu ma siɗ jagn wo, je sen diŋ kaw je maga Piyer hay caa sug ɓe ɓaŋ war go lam, raw ga : Ndi hay kon we le wer ɓe ɓi payn la. 27Piyer raw kaŋ kiŋ tigriŋ pa, kag raw rage tuu.

Yeso pel Pilade

(Mat 27.1-2,11-14; Mark 15.1-5; Lug 23.1-5)

28Blam sen á raw wo baa Yeso le go ni Kayfe, raw wo rawge de ɓe ɓi tiŋ mani goforne no. Ngel hay de jag toŋ crum. Jar Jwif laa wo laage liŋ ni gà ga day la saara kaŋ ɗag ne see saara see, maga á mo maŋ jag saara go ti rege hoole few Pag wa. 29Diŋ wersen Pilad gofornen kal rawge wo ɓiŋ ɓaara, raw riŋ rage ga : Nday ʼwaa war ne bloo sen ti ti re may la? 30Á raw wo ferge ne hẽn ga : Á mo hay we diŋ je joŋ ɓlagge gà wùr de hay a de ɓe mo gà. 31Pilad raw riŋ rage ga : De ele, baa we ne, wo we cag re ɓen wer jag liŋgi ɓay no. Jar Jwif raw wo riŋgi ɓe ga : Faage bay de hãge ne wùr ma ii húulí wa. 32Re sen raw leʼ ge go ti jag wããre maga Yeso hay wããn ma kaŋ nen jar go ti húulí ɓe maga se wo ge huu gi mono. 33Pilad fer kalge wo tiŋma tigriŋ pa, kal ɗe Yeso le, raw wiigi ɓe ga : Ndo mbo diŋ waŋ jar Jwifn wo ge? 34Yeso raw riŋgi ɓe ga : Ndo wãã sen mokay diŋ ndo de see ɓo tuu yaw, noga diŋ jar po go kar fer wo wããre mo ti re ɓi doosen nono? 35Pilad raw ga : Ndi, ndi diŋ je Jwif lay? Diŋ kawre ɓon wo de waŋre ma siɗ jagn nduu wo de ɓo me. Day ndo joŋ diŋ mayse so ne? 36Yeso raw riŋgi ɓe ga : Twaywaŋ ɓin bay diŋ ti tamsir sen la wa. Hayga twaywaŋ ɓin de hay we diŋ ti tamsir la no, weere jõõre ɓin de hay dur wo yaŋ wer ɓi, maga à mo hã me go iigi ne jar Jwif wo doo wa, ma patanlam no, twaywaŋ ɓin bay ti tamsir la wa. 37Pilad raw riŋgi ɓe ga : Ndo mbo diŋ waŋ an so yawla? Yeso raw fer wããre ne hẽn ga : Doo maga ndo wãã mbo nono, ndi mbi diŋ waŋ. Koɗa doo ga gahãyla ndi biŋ go, day ndi nduu go ti tamsir la diŋ ma wãã cwãyn go. Wosela ɓuy maga yaŋ diŋ je ma wãã cwãy no, coʼ sug wããre ɓi no. 38Pilad raw wiigi ɓe ga : Cwãyn diŋ maysela?

Ngaɓan ga ʼwar Yeso go

(Mat 27.15-31; Mark 15.6-20; Lug 23.13-25)

De maga á wo wããge doosen mokay, Pilad raw kalge go siigi tigriŋ pa, raw woge ɓiŋ jar Jwif wo, kal riŋ rage ga : Ndi bay de daʼ ɓlagge bloo sen mokay ma bawge ɓe de wããre wa. 39Ama wer hadge ɓay maga ndi ɓoɗ daŋgay go ne nday tum tum ti few Pag mono, nday da yaŋ ga ndi mo ɓoʼ waŋ jar Jwifn le go ne nday yawla? 40Á raw wo ngar jag ga : Bay diŋ se wa, wùr da diŋ Barabas. (Barabas diŋ je leɗ faage yaw.)

Currently Selected:

JAŊ 18: TUP

Highlight

Copy