JAŊ 17

Yeso de tos ge ti jar ma wer ɓen wo no

1Blam maga Yeso wãã doosen no wãã, á raw maŋ nen ɓe ciŋ, raw ga : Pããbe no, wur ɓi a we go, naa nen woore Wel go so, nen maga Weln mo naa nen woore ɓon go ne jar lay. 2Ndo hã egre ne ndi wãã re jar téebeere wo ɓuy, maga ndi mo kol jar maga ndo hã ra me mo ɓuy go tenen tiʼ tum. 3Ndi mo kol ra go tenen tiʼ tum, say ni á mo ko wo ndo go ga ndo diŋ Baa ma cwãy no, mo ko wo ndi, ndi Yeso Kris maga ndo ɓoʼ me le mo lay. 4Ndi naa nen woore ɓon we go ti tamsir la, ndi taw joŋre maga ndo hãn le me ga ndi mo joŋ ne we go. 5Pããbe, patalam so no, fer grag mege de woore ɓi maga ndi hay le de gragge de ɓe taŋgu maga ndo hay bay joŋ tamsirn wa ɗa mono.

6Ndi kaŋ nen jar maga ndo hoo ra le go yoo jar ma ti tamsir wo ma hã rage go me we ti ɓo so. Á hay wo diŋ jar ɓo, ndo raw hã rage go me, saara raw yãã wããre ɓon lay. 7Á ko wo we patala lay ga fẽẽre maga ndo hã ra me mo ɓuy a wo le doo ɓo. 8Werga ndi hã wããre maga ndo hay hãn le me we go ne hara, á yããn wo we lay, á fer wo koge we lay ga ndi a le go see ɓo, á yãã wo re ɓi we ga ndo ɓoʼ me le.

9Ndi de wii mo ge ti ɓaara, ndi bay wii mo ge diŋ ti jar ma ti tamsirn wo wa, ama diŋ ti jar maga ndo hã ra me mono, werga á wo diŋ jar ɓo. 10Fẽẽre ma ɓin wo ɓuy, diŋ ɓo wo lay, maga wo ɓo, wo diŋ ma ɓi lay, á ko wo doosen, á raw wo togoɗ ndi. 11Ndi bay patala ti tamsir la wa so hase, ama ɓaaran á wo ti tamsir la ɗa, ma ɓi, ndi de woge wo see ɓo. Pããbe ma bay ɗag no, koɗ ra de egre ɗúu ɓo no, ɗúu maga ndo naa nen egre ɓon go me mono, maga á mo hay wo de tayge boŋ doo ga naa de kããra boŋ no lay no. 12De maga ndi hay seɓaa see ɓaara ɗa mono, ndi hay koɗ rage de egre ɗúu ɓo no, ɗúu maga ndo naa nen ɓe go me mono. Ndi hay koɗ rage, maapo yee go yoo ɓaara boŋ gà say diŋ je maga hay mbe go de bas see ɓe, ma leʼ ge go ti jag wããre maga go de yerge ɓil kefder mono. 13Ama patala ndi de wo ge wo see ɓo, ndi wãã doosen diŋ werga ndi yaŋ yoo jar ma ti tamsir wo la ɗa mono, daga fruygi ɓin mo hay ɓil ɓaara, fruygi sen mo hay go de baa jage. 14Ndi hã wããre ɓon we ne hara, day jar ma ti tamsir raw wo caa hee de ɓaara, werga á bay wo diŋ jar ma ti tamsir la wa, doo ga ndi bay diŋ je jar ma ti tamsir wo la wa no lay no. 15Ndi bay wii mo ge ga ndo mo hoo ra le go yoo jar ma ti tamsirn wo wa, ama maga ndo mo koɗ ra doo Je ma de Ɓlagge no. 16Á bay wo diŋ jar jar ma ti tamsir la wa, doo ga ndi bay je jar ma ti tamsirn wo la wa no lay. 17Kol ra go jar ma ɓo de wããre ɓo ma cwãy no, wããre ɓon ti cwãy ɓe. 18Ndi de laa rage yoo jar ma ti tamsirn wo, doo ga ndo hay ɓoʼ me le yoo jar ma ti tamsir wo no lay no. 19Ma ɓin ndi fãã se ɓi go ti re ɓaara, nen maga á wo de se ɓaara mo hay wo go fããge go wer cwãyn lay.

20Ndi bay wii mo ge diŋ ti ɓaara tawa wa, ama ti jar maga hã ge wo see ɓaara ne ndi wer wããre maga á siin wo go mo lay. 21Ndi wii mo ga á mo tay wo go ɓuy boŋ. Pããbe, á mo hay wo de tayge see naa doo ga ndo diŋ ndi tuu, ndi diŋ ndo tuu no lay no. Daga á mo tay wo go boŋ maga jar ma ti tamsir mo ko wo ga ndo ɓoʼ me le. 22Ndi grag ra we de woore ɓo maga ndo hay grag me de ɓe we, maga á mo hay wo go boŋ doo ga naa de kããra naa go boŋ no lay. 23Ndi go de tayge see ɓaara boŋ doo ga ndo diŋ ndi, ndi diŋ ndo no lay, á mo hay wo go de tayge pah boŋ maga jar ma ti tamsirn mo fer wo koge ga ndo ɓoʼ me le, day ndo de da rage doo ga ndo de da me no lay no.

24Pããbe, ndo hã ra le me, day ndi da ga á mo lag wo ɓiŋ ɓi ti ngel maga ndi de hay ge ni mono, maga á mo ko wo gragge ɓi ma de wooren ga ndo grag mege de woore mono, werga ndo da me go taŋgu maga jar ma ti tamsir hay bay wo wa ɗa mono. 25Pããbe ma joŋ re de deele no, jar ma ti tamsir la bay wo de ko mo ge wa, ama ma ɓi, ndi de ko mo ge, day jar ma lag wo la ko wo we ga ndo ɓoʼ me le. 26Ndi kaŋ nen ɓaara we ti ɓo, ndi kaŋ ge nen ɓaara ti ɓo tum, dage ɓo maga ndo de da mege de ɓe mokay, mo Baa ɓil ɓaara go maga ndi de see ɓi, ndi mo hay de tayge de ɓaara lay.

Currently Selected:

JAŊ 17: TUP

Highlight

Copy