JAŊ 19

1Pilad raw riŋ rage ga : Baa we Yeso, jwag we ne de mbreŋ. 2Sooden raw wo tãã klaŋ hõõre, raw wo kaŋge ɓe ne Yeso ti, raw wo laa õõbe ma desẽẽ ne hẽn ti. 3Á raw wo yaʼge see ɓe riŋgi ɓe ga : Wùr hee jag mo waŋ jar Jwif. Mbarn wo haw.

4Pilad raw kalge le go tigriŋ pa, raw riŋ ngaɓan wo ga : Coʼ we sug ɓay, ndi wo bagge ɓe le go siigi la, maga nday mo laa wããre ɓe de sug ɓay lay, ndi bay de daʼ ɓlagge bloo sen mokay ma bawge ɓe de re húulí meʼ wa. 5Yeso raw kalge le go de klaŋ hõõren wo de õõbe ma desẽẽ burbur ti deŋ, Pilad raw riŋ rage ga : Bloon mo deŋ so no. 6Ama de maga waŋre jar siɗ jagn wo de jar gor tiŋ tosgen wo wo koge ɓe mono, á raw wo ngar jag ga : Ɓaln go ti koo ma ɓal jare, ɓaln go ti koo ma ɓal jare. Pilad raw riŋ rage ga : Baa we mbay ne, see mbay ɓalge ɓe go ti koo ma ɓal jar diŋ nday mbay de see ɓay. Werga ndi de see ɓi, ndi bay de daʼ ɓlagge ɓe maga ndi bawn wa. 7Jar Jwif raw wo fer wããre ga : Wããre wùr yaŋ de yerge, day wer wããre sen daga á mo huu, werga á raw wããge ga se diŋ Wel Baa mono.

8Pilad wo laa wããre sen mokay pa so no, hẽẽne raw joŋge ɓe debaŋ pa so yaw. 9Á raw kalge tiŋma, raw riŋ Yeso ga : Ɓa ndo a le gen ɓa? Ama Yeso laa fer wããre ne hẽn gà hase. 10Pilad raw riŋgi ɓe pa ga : Ɓa ndo day wãã re me ga? Ndo bay de koge ga ndi de kããge ma ɓoʼ mo ge noga ma ɓal mo ge go ti koo ma ɓal jar wa yawla? 11Yeso raw fer wããre ne hẽn ga : Egre ɓo bay de kããge ti ɓi meʼ wa hase, say diŋ maga Baa hãn le mo ciŋ. Diŋ wersen bloo maga hã me go mo de ɓlagge daŋ mo ge. 12De sen ni, Pilad raw kiɗ faage ga se mo ɓoʼ Yeso. Ama jar Jwif raw wo ngar jag ga : Hayga ndo ɓoʼ bloo sen mokay we, ni ndo bay diŋ bar Sesar wa so. Wosela ɓuy maga wãã we ga se diŋ waŋ ma kluu no, diŋ je hee Sesare.

13Pilad wo laa wããre sen mokay, raw baa Yeso le go siigi, raw hayge ti paale ma cag re no, ti ngel ma de raʼge de el no. (De jag Hebre ga Gabata.) 14Wur sen hay diŋ wur maga à de kneʼ ge go se few Page, de wur ɗegere. Pilad raw riŋ jar Jwif wo ga : Waŋ ɓayn mokay no. 15Á raw wo tĩĩ wer ngar jag ga : Go ma húulí. Go ma húulí. Ɓaln go ti koo. Ɓaln go ti koo. Pilad raw riŋ rage ga : Ndi mo ɓal waŋ ɓayn go ciŋ ti koo gla? Waŋre jar siɗ jagn raw wo ga : Waŋ wùr ma tigriŋ baywa, say diŋ Sesare. 16Wersen Pilad raw hã Yeso go ne hara ga á mo wo mbaara ɓalge ɓe go ti koon so.

À ɓal Yeso go ti koo ma ɓal jare

(Mat 27.32-44; Mark 15.21-32; Lug 23.26-43)

Á raw wo baa Yeso so. 17Yeso cegaɗ ɓi leege le go de maŋ koo maga à wo go ɓalge ɓe ti ɓe de see ɓe, ma woge ti ngel maga à ɗen ga ngel Hm Ti. (De jag Hebre ga Golgota.) 18Sooden raw wo ɓal Yeso go ciŋ ti koon ni so. Á raw wo ɓal jar po wo ti jeŋ Yeso ni ɓog lay, je la ɓaŋla, je la ɓaŋla lay. Yeso ti gesiɗgi ɓaara.

19Pilad raw wããge ga maŋ koo ma de labrag ga à yer ni le, ɓaln ciŋ ti koo ma ɓal jarn ni, á raw yerge ti ɓe ga : Yeso ma Nasared, waŋ jar Jwif wo no. 20Jar Jwif wo debaŋ jaŋ wo yerge sen de nen ɓaara lay, werga ngel maga à ɓal Yeso go ti koo ni, ɓiŋ ɓi leegen mbaŋ, yergen de yerge de jag Hebre, jag Latẽ, de jag Greg lay. 21Blam sen waŋre jar siɗ jagn raw wo riŋ Pilad ga : Men de yerge ga Waŋ jar Jwif wa, ama yern ga : Bloo sen la wãã ga se diŋ waŋ jar Jwif wo. 22Pilad raw ga : Re maga ndi yern go mono, á go de yerge taw go.

23Sooden taw wo ɓal Yeso go ti koon mokay, á raw wo naa õõbe ɓen wo no, raw wo car ɓil ɓe go naa taʼa, ma hãge ne sooden wo boŋ boŋ ɓuy. Á raw wo hoo õõbe ɓe ma kluu maga bay de sããge wa, de ɓoʼ ge diŋ de mbaaraw po boŋ le ciŋ kaʼ hãã go gesiŋ taʼa mono. 24Sooden raw wo riŋ kããra ga : Naa ngar nen õõbe ma kay go wa, ama naa naa wãywáale go ti ɓe, ma koge ga a naa nen diŋ ma wosela. Sen raw leʼ ge go ti jag wããre maga go de yerge ga :

Á ɓes wo õõbe ɓin go ti yoo ɓaara,

Á naa wo wãywáale go ti õõbe ɓi ma kluu no mono.

Mokay diŋ joŋre maga sooden joŋn wo mono.

25Man Yeso raw wo lagge ɓiŋ koo maga à ɓal Yeso go ti ɓe, de maygeman man ɓe, Mari wãy Klopas, de Mari ma Magdala. 26Yeso raw ko man ɓe, raw ko je ma wer ɓe maga á dan de hayle ɓiŋ ɓe ni, Yeso kal riŋ man ɓe ga : Wãy, wel ɓo mo yeʼ no. 27Blam sen se raw riŋ je ma wer ɓe sen ga : Man ɓo mo yeʼ no. De sen ni je ma wer ɓe sen raw baa man ɓe wo go liŋ ni ɓe.

Yeso huu go so

(Mat 27.45-56; Mark 15.33-41; Lug 23.44-49)

28Blam sen, Yeso raw koge ga reen leɗ jag we go patala ɓuy so, á raw wããge ma bir jag wããre maga go de yerge mono, á kal ga : Jwaale kaŋ me. 29Paga toɓoole yaŋ de feneger ɓil ni, sooden raw wo hee fen kor hãn nen feneger no, raw wo ɓeʼ ge ɓe jag koo hisop#19.29 Hisop : Diŋ fen po de maŋ daswaa. coŋ wo ne Yeso jage. 30Yeso wo gus feneger no kay, kal wãã ge ga : Ren leɗ wo jag we go ɓuy so. Blam sen á raw jel ti go gesiŋ, egre ɓe raw hoo ge go.

Soode po soʼ Yeso de jaw yoo

31Wur Saban hay go de kosge mbaŋ, jar Jwif raw wo ga : Daga húulín mo sii wo ciŋ ti koo ma ɓal jar wo wur Saban ni wa, werga wur Saban diŋ wur Saba ma bay ɗag debaŋ. Á raw wo wii Pilad ga à mo hrag ɓaale jar ma de ɓal ge ciŋ wo go, ni à mo far húulí ɓaaran go gesiŋ. 32Wersen sooden raw wo age, raw wo hrag ɓaale je ma taŋgun go, raw wo yaʼge ti je ma de ɓog maga à ɓal ti koo ɓiŋ Yeso ni mono. 33Á wo wo age ti Yeso mokay, daʼ wo la Yeso ig we go de húulí, diŋ wersen saara laa hrag ɓaale Yeso seŋ gà so. 34Ama soode po raw soʼ ge ɓe de jaw yoo, cíi wo de bii raw wo kaa ge le go tuuseŋ. 35Bloo maga ko re sen wo mokay raw sii wããre sen go, re ɓe maga á wããn cwãy doosen no lay. Á de koge ga : Se, se wãã go diŋ cwãy kidolgi, nen maga á mo yãã wo re sen lay. 36Re sen joŋ go doosen ma leʼ ge go ti jag wããre maga go de yerge ga : À haw nen hm ɓe go gà hase. 37Ti ngel ma tigriŋ yergen wãã pa ga : Á ngiɗ gi wo nen yaŋ ko je maga saara hay soʼ ne go yoo mono.

A ɓoʼ Yeso ɓi tuu

(Mat 27.57-61; Mark 15.42-47; Lug 23.50-56)

38Blam sen, Josef ma ɓi leege Arimate, raw wii Pilad ga á mo hã faage ne se ma maŋ húulí Yeso. (Josef diŋ je ma wer Yeso, ama de yoŋre doo hẽẽne jar Jwif wo.) Pilad raw hã faage ne hẽne. Josef raw age maŋ húulí Yeso. 39Nikodem, je maga hay wo see Yeso de suŋ, raw age lay, raw wo age de trusa de tay nen de fen fõõre maga à ɗen ga mir wo de alowes doo nen kilo doo swaʼa. 40Á wo ɓog ɓuy raw wo maŋ húulí Yeso, raw wo kaage ɓe de mblaaga ma depuy, raw wo tag noo trusa ne hẽn see, doo ga jar Jwif ter wo húulí no tum mono. 41Ti ngel maga à ɓal Yeso go ti koo ma ɓal jar ni, pay po yaŋ ni, ɓil pay sen ni mo lay no, tuu húulí yaŋ defay ni, à bay de ɓoʼ jobo ni ti boŋ wa ɗa hase. 42Day wur hay go de kosge maga jar Jwif ʼwũy wo see ɓaara go ma síilí ma iggin lay, day pa tuu húulín ɓiŋ ɓaara ni mbaŋ lay, á raw wo ɓoʼ Yeso go ni.

Currently Selected:

JAŊ 19: TUP

Highlight

Copy