Ebhikorwa bhya Jitumwa 9

Okuchungurwa kwa Saawuri

1Ku‑mwanya ogwo, Saawuri ꞉aagendereeye na ebhikangyo bhyaye, bhya okwita abheeyigisibhwa bha Raatabhugenyi Yeesu. ˆNaagenda ku‑mugabhisi omukuru, 2ˆnaamusabhwa ati, amuyaane jinyarubha ja okumumenyesya, agende najo mu‑nju ja ameekofyanyo ga Abhayawudi#9:2a Mu‑nju ja ameekofyanyo ga Abhayawudi. Jinju ejo jaariga jiri jinju ja Abhayawudi okwikofyanya‑mo inguru ya okuramya Nyamuwanga na okwiyigisyanya Ebhikaame Ebhyeru, chimwichimwi mu‑masangisyo geebhwe ku‑rusuku rwa Isabhaato. Ku‑meeresyo amaafu, ringira Inju ya eriikofyanyo rya Abhayawudi mu‑Meeresyo inguru ya Emisango Emikomeeye. mu‑musi gwa Damaasiko. Jinyarubha ejo ni ja okumwikirisisya ati, akasoongʼana eyo abharuubhirisya bha Injira ya Yeesu,#9:2b Injira ya Yeesu. Ku‑mwanya gwa rikanisa rya okwamba, abheekirisya bhaabhirikirwaga ati, abharuubhirisya bha Injira ya Yeesu. bhabhe abharume amwi abhagasi, abhabhoye na okubhareeta Yerusareemu.

3Niwo, Saawuri ˆnaamba orugendo rwaye rwa okugenda Damaasiko. Omwanya gunu aariga ˆnaarebherera omusi ogwo, obhweru okusooka mu‑rwire, nibhumungʼarabhisya mbaara joone. 4ˆNaagwa aasi, ˆnoongwa obhuraka nibhumubhuusya ati, “Saawuri awe! Saawuri awe! Ni kurwa ki owunnyaasya?” 5Saawuri ˆnaayika ati, “Raatabhugenyi awe, naawe ga?” ˆNaamubhwira ati, “Anye naanye Yeesu, unu awe owunnyaasya. 6Woori, imereeguru! Genda wingire mu‑musi, omwo owuja okubhwirwa jinu ukenerwe okukora.”

7Abhaanu bhanu ꞉bhaagendere na Saawuri nibheemereeguru na okujibhira jibhijibhi nibharuguuraga, okubha abheene wone, ꞉bhoonguuwe obhuraka obhwo, nawe ꞉bhataarorere omuunu woonewoone. 8Saawuri ˆneemuka okusooka aasi, nawe omwanya gunu ꞉aaregeejere okurora, ꞉ataaturire okurora echiinu. Abheejaabho abho nibhamugwata okubhoko na okumutangasya, nibhamwingisya Damaasiko. 9ˆNaabha omwo siku esatu ari muwofu. Omwanya ogwo ꞉ataariiye echiinu noorwo okunywa choonechoone.

10Damaasiko eyo, aariga ari‑wo omwiyigisibhwa umwi wa Yeesu, risiina ryaye aatogwaga Ananiiya. Yeesu ˆnaabhirikira Ananiiya mu‑bhiroro. ˆNaamubhirikira ati, “Ananiiya!” Ananiiya ˆnaasubhya ati, “Anye niri anu, Raatabhugenyi.” 11Raatabhugenyi ˆnaamubhwira ati, “Woori nuugende na injira inu eyitogwa Ingororoke, uje okuyenja inju ya Yuuda, inu iri yeeyi na injira eyo. Bhuusirisya omwo omuunu unu asookere mu‑musi gwa Taariso, risiina ryaye kaatogwa Saawuri. Woori anu kaasabhwa Nyamuwanga, 12na aarora ebhiroro. Mu‑bhiroro ebhyo, aarora omuunu umwi risiina ryaye ni Ananiiya, ˆneengiraga mu‑nju omwo, ˆnaatuura amabhoko inguru yaaye, korereki arore rindi.”

13Nawe Ananiiya ˆnaayika ati, “Raatabhugenyi, abhaanu bhaafu bhaambwira kutyo Saawuri oyo ꞉aakoreeye abheeru#9:13 Abheeru. Ku‑meeresyo amaafu, ringira Iinyeru mu‑Meeresyo inguru ya Emisango Emikomeeye. bhaawo amabhiibhi Yerusareemu eyo! 14Woori ari anu, ari na inyarubha okusooka ku‑bhakuru bha abhagabhisi agwate bhoone bhanu abhasabhwa kw‑isiina ryawo.” 15Nawe Raatabhugenyi ˆnaabhwira Ananiiya ati, “Genda era! Omuunu oyo, naamusora abhe omukosi waani, korereki araasye risiina ryani ku‑bhaanu bhanu bhatari Bhayawudi, ku‑bhakama bheebhwe na ku‑Bhayisirayeeri abheene. 16Anye omwene enija okumweresya kutyo arinyaasibhwa muno inguru ya risiina ryani.”

17Mbe, Ananiiya ˆnaagenda, ˆneengira mu‑nju eyo. ˆNaamutuura‑ko amabhoko, ˆnaayika ati, “Saawuri waasu, Raatabhugenyi aantuma kw‑awe, korereki urore na wijusibhwe Mwoyo Mweru. Raatabhugenyi oyo niwe Yeesu, unu ꞉aakusoromokeeye ku‑njira omwanya gunu waajaga enu.” 18Awoawo ebhiinu rwa amakanda nibhigwa okusooka mu‑meeso ga Saawuri, ˆnaarora rindi. Niwo ˆneemereeguru, ˆnaabhatiijibhwa. 19Ejire eeya ˆnaarya ebhiryo, ˆnaabhona amanaga rindi.

Saawuri kaakora emirimu ja Yeesu Damaasiko

Kwa omwanya omurebhe, Saawuri ꞉eekaaye aamwi na abheeyigisibhwa bha Yeesu Damaasiko eyo. 20Awoawo ꞉aambire okugenda mu‑nju ja ameekofyanyo ga Abhayawudi, ˆnaabharaasisyaga ati, Yeesu ni Mwana wa Nyamuwanga.#9:20 Mwana wa Nyamuwanga. Ku‑meeresyo amaafu, ringira Omwana wa Nyamuwanga mu‑Meeresyo inguru ya Emisango Emikomeeye. 21Omwanya gunu abhaanu bhoone ꞉bhoonguuwe Saawuri, nibharuguura muno, nibhabhuusyanya ati, “Atari niwe unu aariga ˆnaanyaasya noorwo okukingira okwita abhaanu bha Yeesu Yerusareemu eyo? Atari ati eejire anu, abhagwate korereki abhasire ku‑bhakuru bha abhagabhisi eyo?” 22Nawe Saawuri ˆnaagenderera okubhona obhuturo na okuruguusya Abhayawudi bhanu bhaariga bheekaaye Damaasiko, ˆnaabhakomeeresyaga kwa okweresya Ebhikaame Ebhyeru ati, Yeesu niwe Kirisito.

23Mbe, jejire jaatura siku nyafu, Abhayawudi nibharomera Saawuri iniku. 24Nawe Saawuri ˆnaabhwirwa inguru ya iniku eyo. Abhayawudi bhaariga nibhamwiteganira mu‑ngeta na mu‑mwisi, ku‑marango ga omusi ogwo, korereki akawuruka‑mo bhamwite. 25Mu‑ngeta imwi, abharuubhirisya bhaaye nibhamwingisya mw‑itukuru rinene rinu ryariga ribhoyerwe na jingoye, nibhatusya ritukuru eryo mw‑iwundu rinene ku‑ndugu ya omusi, nibhooromosya ritukuru na jingoye jirya anja ya omusi, niwo Saawuri ˆnaagenda.

Saawuri kaagenda Yerusareemu

26Mbe, Saawuri ejire aakinga Yerusareemu, aaregeejaga okubha aamwi na abheeyigisibhwa bha Yeesu. Nawe bhoone ꞉bhaamuubhayire, kwa okubha bhaariga bhatakwikirisya ati ni mwiyigisibhwa. 27Nawe Bharinaabha ˆnaamugega, ˆnaamusira ku‑tumwa ja Yeesu. ˆNaabhabhwira kutyo Saawuri ꞉aarorere Raatabhugenyi ku‑njira ˆnaagendaga Damaasiko, na kutyo Raatabhugenyi ꞉aaromere nage. ˆNaabheeresya wone kutyo Saawuri ꞉eeyigisiisye abhaanu bheende‑yo inguru ya Yeesu kwa ribhaasi. 28Mbe, Saawuri ˆneekara na abheeyigisibhwa bha Yeesu Yerusareemu. Aariga ˆneeyinda Yerusareemu, ˆneeyigisyaga abhaanu inguru ya omusango gwa Raatabhugenyi kwa ribhaasi. 29Omwanya ogundi aariga ˆnaasimura na okubhambasyanya na Abhayawudi bhanu bhaaromaga Echiyunaani,#9:29 Abhayawudi bhanu bhaaromaga Echiyunaani. Ku‑mwanya ogwo, bhwariga bhuri‑yo obhusaasikeene bhwa Abhayawudi. Abharebhe mu‑bheene ꞉bhaaruubhire emisiro ja Echiyawudi. Abhandi ꞉bheebhuriiywe na okwikara mu‑bhyaro ebhindi bhinu bhitari Yisirayeeri na abho bhaaromaga Echiyunaani na okuramira emisiro emirebhe ja Echiyunaani. nawe abho bhaariga nibharegeeja okumwita. 30Omwanya gunu abheekirisya abheejaabho ꞉bhaamenyere omusango ogwo, nibhamuyeregesya nibhamukingya mu‑musi gwa Kayisaariya, nibhamusiga agende mu‑musi gwa Taariso ewaabho.

31Mbe abheekirisya nibhabha na omurembe mbaara joone ja Yuudeya, Gariraaya na Samaariya. Abheekirisya nibhagenderera okukomeera na okuyaanwa amanaga na Mwoyo Mweru. Ka wone, bhaagayukaga Raatabhugenyi Yeesu na obhukumi bhwebhwe nibhugenderera okwiyongesya.

Ayineeya kaawosibhwa

32Peetero aariga ˆnaagenda mbaara nyafunyafu. Rusuku rumwi mu‑rugendo rwaye, ˆnaakinga mu‑musi gwa Ruuda okuribhatira abheeru bha Nyamuwanga bhanu bhaariga bheekaaye eyo. 33Mu‑musi omwo, ˆnaabhugana na omuunu, risiina ryaye aatogwaga Ayineeya. Oyo aariga afuuwe omubhiri, amaamire kw‑iraro omwanya gwa emiguuga etaanu na esatu. 34Peetero ˆnaamubhwira ati, “Ayineeya, Yeesu Kirisito aakuwosya. Iimuka! Funya riraro ryawo.” Awoawo Ayineeya ˆneemereeguru! 35Abhaanu bhoone bhanu bhaariga bheekaaye Ruuda na mw‑itina rya Sarooni, bhejire bhaarora Ayineeya ˆnaaribhataga, nibhayindukira Raatabhugenyi Yeesu.

Tabhiija kaasuururwa

36Mu‑musi gwa Yoopa aariga ari‑mo omugasi umwi, omwiyigisibhwa wa Raatabhugenyi Yeesu, risiina ryaye aatogwaga Tabhiija, mu‑nyaayika ya Echiyunaani, risiina rinu ni Dorikaasi.#9:36 Tabhiija amwi Dorikaasi. Obhugajuro bhwaryo ni ati, ipara. Tabhiija aariga ˆnaasakira abhanare, na okukora ebhikorwa ebhindi bhya ekisi. 37Mu‑siku ejo Tabhiija ˆnaarwara, ku‑bhuteero ˆnaafwa. Abhaanu nibhoosya omubhiri gwaye, nibhamumaamya mu‑chisago chinu chaariga chiri mu‑bhutingo. 38Omusi gwebhwe gwa Yoopa gwariga guri yeeyi na Ruuda. Kurwa ejo, bhunu abheeyigisibhwa ꞉bhoonguuwe ati Peetero ari Ruuda nibhatuma abhaanu abhabhiri ku‑Peetero. Eyo nibhabhwira Peetero ati, “Echikwirembeeresya, nuuwuuje kw‑iswe enu woori anu kutya!”

39Mbe, Peetero ˆneemuka, ˆnaagenda aamwi nabho. Omwanya gunu ꞉bhaakingire Yoopa, nibhamusira mu‑chisago echo. Omwo abhatumbagasi bhaafu nibhabha ayeeyi nage nibhariraga na okumweresya emingiro na emyenda ejindi jinu Tabhiija aariga abhabhaririiye omwanya gwa obhuwanga bhwaye.

40Peetero ˆnaabhawurusya anja bhoone bhanu bhaariga bhari mu‑chisago omwo, ˆneefukama, ˆnaasabhwa Nyamuwanga. Niwo ˆnaayindukira omutumbi gurya, ˆnaayika ati, “Tabhiija, imereeguru!” Tabhiija ˆnaafumbura ameeso gaaye, ejire aarora Peetero, ˆneemuka ˆneenyanja. 41Peetero ˆnaamugwata okubhoko, ˆnaamwimereegusyu. ˆNaabhirikira abhatumbagasi bharya na abheekirisya abhandi, ˆnaamutuura imbere yeebhwe, ari muwanga kerechu. 42Emisango ja echikorwa echo nijiswirana muno mu‑musi gwone gwa Yoopa, abhaanu bhaafu nibheekirisya Raatabhugenyi Yeesu. 43Peetero ˆneekara Yoopa awo siku nyafu, ari ewa omubhambi wa jinjayi, risiina ryaye aatogwaga Simooni.

Currently Selected:

Ebhikorwa bhya Jitumwa 9: jit

Highlight

Copy