Ebhikorwa bhya Jitumwa 10

Koroneeriyo kaabhirikira Peetero

1Mu‑musi gwa Kayisaariya aariga ari‑mo omwangarisi wa abhasirikare, risiina ryaye aatogwaga Koroneeriyo. Oyo aariga eemereeguruuyu abhasirikare egana rimwi, okusooka mu‑chise echinene cha abhasirikare chinu chaatogwaga ati “Echise cha Yitaariya.” 2Ka wone, aariga ˆnaagayuka Nyamuwanga, aamwi na abhaanu bhoone bha iika ewaaye. Aariga ˆnaasabhwa Nyamuwanga bhuri omwanya. Aamwi na ejo, aariga ˆnaasakira abhaanu abhanare.

3Rusuku rumwi wuti saa etaanu na ena mu‑mwisi, Koroneeriyo ˆnaarora ebhiroro. Mu‑bhiroro ebhyo, ꞉aarorere abhwerubhweru maraayika wa Nyamuwanga ˆnaamusoromokera. Maraayika oyo ˆnaamubhirikira ati, “Koroneeriyo!” 4Koroneeriyo ˆnaaroreerera maraayika oyo kwa obhuubha, ˆnaamubhuusya ati, “Mwami waani, chaabha‑wo ki?” Maraayika oyo ˆnaamubhwira ati, “Nyamuwanga oongwa risabhwa ryawo, aarora na kutyo owusakira abhanare. Ejo joone, kaajimenya na okujikondererwa mu‑rwire.#10:4 Kaajimenya na okujikondererwa mu‑rwire. Jinyabhurira ejindi ejaayika ati, risabhwa ryawo na ebhiyaanwa bhyawo bhyakinga inguru rwa orwichukyo imbere ya Nyamuwanga. Obhugajuro bhwagwo ni ati, risabhwa na ebhiyaanwa bhya Koroneeriyo ebhiinganywa na echiyaanwa cha ekisi cha bhuri rusuku cha Abhayawudi. Ringira Abharaawi 2:2. 5Woori, nuutume abhaanu mu‑musi gwa Yoopa, bhabhirikire omuunu umwi risiina ryaye kaatogwa Simooni, risiina erindi, kaatogwa Peetero. 6Eekaaye mu‑nju ya Simooni, omubhambi wa jinjayi. Inju yaaye iri ku‑mbarimbari ya inyanja.”

7Maraayika ejire aamara okubhwira Koroneeriyo ejo, ˆnaasooka‑wo. Awo Koroneeriyo ˆnaabhirikira abhakosi bhabhiri bha iika, na omusirikare umwi unu aamufurubhenderaga, ka wone aariga ˆnaaramya Nyamuwanga. 8Koroneeriyo, ˆnaabheeresya joone jinu ꞉jaakorekeene, ˆnaabhatuma bhagende Yoopa.

Ebhiroro bhya Peetero

9Mwejo yende‑ko wuti saa etaanu na imwi mu‑mwisi, omwanya gunu abhaanu bha Koroneeriyo abho bhaariga nibharebherera omusi gwa Yoopa, Peetero ˆnaariinya ku‑rusara rwa inju#10:9 Ku‑rusara rwa inju. Abhayawudi bhaariga nibhaswika jinju jeebhwe kwa okwanja amatabhi inguru, nibhagabhoya na jimbasi nibhagakaata na rimoga. Awo niwo bhaariga nibheesya omwoyo. okusabhwa Nyamuwanga. 10Mbe ˆnoongwa omweko, ˆneegomba okurya. Omwanya gunu ebhiryo bhyariga bhichaateekwa, ˆnaarora ebhiroro. 11Mu‑bhiroro ebhyo, ꞉aarorere orwire rwigukire, na echiinu wuti isuuka nene, igwatirwe jisonde jaayo ena, niyooromosibhwa ku‑chaaro. 12Mu‑nda yaayo jaariga jiri‑mo jityanyi ja bhuri mbaga, ja amaguru gana, jinu ejiikurura na jinyonyi ja mu‑rutumba.

13Awo Peetero ˆnoongwa obhuraka, nibhumubhwira ati, “Peetero, iimuka, wiite na urye!” 14Peetero ˆnaamubhwira ati, “Wuri, Raatabhugenyi! Nichaariga okurya sirisiri, echiryo choonechoone echijabhi!”#10:14 Echiryo choonechoone echijabhi. Anu Peetero kaasubha ku‑chiraagiro cha Echiyawudi chinu echigaanya ebhiryo bhya bhuri mbaga ya obhujabhi. Ringira Abharaawi 11:1‑47. 15Obhuraka obhwo nibhubhwira Peetero ati, “Nuusige okubhirikira ebhiinu bhinu Nyamuwanga eesiisye, ati ni bhijabhi.” 16Omusango ogwo nigukorekana kasatu, niwo isuuka irya niisubha mu‑rwire.

17Omwanya gunu Peetero aariga acheebhuusya inguru ya obhugajuro bhwa ebhiroro ebhyo, abhaanu abhasatu bhanu ꞉bhaatumirwe na Koroneeriyo bhunu ꞉bhaamenyere inju ya Simooni, nibheemereeguru ku‑muryango. 18Nibheebhuura na okubhuusya ati, “Angu, ari‑wo omugenyi, unu kaatogwa Simooni na risiina ryaye erindi ni Peetero?” 19Peetero achaagenderera okwiganirisya inguru ya ejo, Mwoyo Mweru ˆnaamubhwira ati, “Tegeresya! Bhari‑wo abhaanu bhasatu anu, abhakuronda. 20Yooromoka emwaro, ugende aamwi nabho. Siga okwitimaata, kwa okubha anye omwene naanye nibhatumire kw‑awe.”

21Peetero ˆnooromoka emwaro, ejire aabhakinga‑ko, ˆnaabhwira abhaanu abho ati, “Naanye unu omuyenja. Ni kurwa ki mwaja?” 22Nibhamubhwira ati, “Chaatumwa na omwangarisi umwi wa abhasirikare, risiina ryaye ni Koroneeriyo. Omwene ni muunu wa obhurengeresi na kaagayuka Nyamuwanga, ka wone kaakuuyibhwa na Abhayawudi bhoone ati ni muunu wa ekisi. ꞉Aabhwiriiywe na maraayika omweru ati, akukume iika ewaaye, korereki ategeresye emisango jinu owuja okumubhwira.” 23Ejire eeya Peetero ˆnaabhakuma mu‑nju, bhabhe abhagenyi bhaaye.

Peetero mu‑nju ya Koroneeriyo

Mwejo yende‑ko, Peetero na abhaanu bhasatu bharya nibhaamba orugendo rwebhwe, aamwi na abheekirisya abharebhe okusooka Yoopa. 24Orusuku rwa kabhiri, nibhakinga mu‑musi gwa Kayisaariya nibhagendaga ewa Koroneeriyo. Omwanya ogwo Koroneeriyo aariga akumanyiisye abhaabho, aamwi na abhasaani bhaaye, nibharindiriraga Peetero. 25Omwanya gunu Peetero aariga ˆneengira, Koroneeriyo ˆnaamuramira, ˆneefukama imbere yaaye, ˆneenamya obhusu aasi, korereki amuramye. 26Nawe Peetero ˆnaamwinamusya ˆnaamubhwira ati, “Imereeguru! Anye wone niri omuunu era rwa awe!” 27Ejire eeya Peetero na Koroneeriyo nibheengira mu‑nju enu nibharomaga, nibhasongʼana abhaanu bhaafu bheekumanyiisye. 28Peetero ˆnaabhabhwira ati, “Emwe mumenyere kisi ati eswe Abhayawudi, ebhiraagiro bhyeswe ebhichigaanya okusaasikana na abhaanu bha amaanga. Noorwo okubharibhatira wone, chigaanyiibhwe. Nawe Nyamuwanga aanyeresya ati, nisige okwiganirisya omuunu woonewoone okubha omujabhi. 29Niyo isonga omwanya gunu mwambirikira, naaja nitari na echiikuujuro. Mbe! Ni kurwa ki mwambirikira?”

30Koroneeriyo ˆnaamubhwira ati, “Jisiku esatu jinu jiyitingʼeene, omwanya gwa saa etaanu na ena mu‑mwisi, naariga niri mu‑nju ninsabhwaga Nyamuwanga. Awo nindora omuunu eemereeguuyu imbere yaani afwaye emyenda jinu ejingʼarabhya. 31ˆNaambwira ati, ‘Koroneeriyo, Nyamuwanga oongwa risabhwa ryawo, aarora na kutyo owusakira abhanare. 32Kurwa ejo, woori bhwira abhaanu bhagende mu‑musi gwa Yoopa, bhabhirikire Simooni unu kaatogwa Peetero. Eekaaye iika ewa Simooni, omubhambi wa jinjayi. Inju yaaye iri ku‑mbarimbari ya inyanja.’ 33Niyo isonga, awoawo ꞉naatumire abhaanu bhaaje bhakubhirikire na waakora ja ekisi okuuja. Woori eswe bhoone chiri anu imbere ya Nyamuwanga, korereki chuungwe bhuri omusango gunu Raatabhugenyi akuragiriiye okuchibhwira.”

34Niwo Peetero ˆnaamba okwayika ati, “Woori niwo naamenya ati ni chimari, Nyamuwanga atari na isoroore mu‑bhaanu! 35Tari keekirisya abhaanu bha bhuri mw‑iyanga, bhanu abhamuramya na okukora obhurengeresi imbere yaaye. 36Emwe abheene, mumenyere omusango gunu Nyamuwanga ꞉aasiriiye Abhayisirayeeri. Nibharaasibhwa Emisango ja Ekisi korereki bhabhe na omurembe na Nyamuwanga ku‑njira ya Yeesu Kirisito. Yeesu oyo niwe Raatabhugenyi wa abhaanu bhoone. 37Omumenya emisango jinu ꞉jaakorekeene mu‑chaaro choone cha Yuudeya okwambira Gariraaya, Yowana ejire aamara okuraasisya abhaanu ati, bhabhatiijiibhwe. 38Ka wone omumenya ati, Nyamuwanga ꞉aasorere Yeesu wa Najareeti kwa okumuyaana Mwoyo Mweru na obhuturo. Yeesu oyo aagendaga enu na erya, aakoraga ja ekisi na okuwosya bhoone bhanu bhaariga nibhanyaasibhwa na amanaga ga Syetaani, kwa okubha Nyamuwanga aariga ari aamwi nage.

39“Eswe chiri abhabhambaasi bha joone jinu Yeesu ꞉aakorere mu‑chaaro cha Abhayawudi na Yerusareemu. Omwanya okutura abhaanu nibhamwita kwa okumusunga ku‑musarabha, 40nawe ku‑rusuku rwa kasatu, Nyamuwanga ˆnaamusuurura, ˆnaamubhuurisya ku‑bhaanu. 41꞉Ataabhonekeene ku‑bhaanu bhoone, tari ku‑bhanu Nyamuwanga aariga aamarire okwawura okubha abhabhambaasi okumurora. Abhabhambaasi abho ni eswe, ꞉chaamurorere, ꞉chaariiye na okunywa aamwi nage, ejire aamara okusuuruka okusooka mu‑bhafuuwe. 42ˆNaachiragirira okwiyigisya abhaanu Emisango ja Ekisi, na okusoosya obhubhambaasi ati omwene niwe ꞉aasorerwe na Nyamuwanga, aramure bhoone, abhaanga na abhafuuwe. 43Yeesu oyo, abharagi bhoone ꞉bhaayikire inguru yaaye ati, omuunu woonewoone unu arimwikirisya arifwirwa echigongo ebhibhiibhi bhyaye ku‑njira ya risiina ryaye.”

44Omwanya gunu Peetero aariga achaayika emisango ejo, bhoone bhanu bhaariga nibhategeresya, Mwoyo Mweru ˆnaabheekira. 45Abhayawudi bhanu ꞉bheekirisiisye Kirisito#10:45 Abhayawudi bhanu ꞉bheekirisiisye Kirisito. Jinyabhurira ejindi ejaayika ati, abhaanu bhanu ꞉bhaatenderwe bhanu bheekirisiisye Kirisito. bhanu ꞉bheejire na Peetero, ꞉bhaatangʼangʼaaye muno okurora ati, Nyamuwanga ꞉aayaaye noorwo abhaanu bhanu bhatari Bhayawudi echiyaanwa cha Mwoyo Mweru. 46Okubha ꞉bhoonguuwe abhaanu abho nibhaayikaga mu‑nyaayika jingenyi na okukusya Nyamuwanga.

Niwo Peetero ˆnaayika ati, 47“Abhaanu abho bharamiiye Mwoyo Mweru rwa eswe kutyo ꞉chaamuramiiye. Angu ari‑wo omuunu unu kaatura okugaanya abhaanu abho, bhasige okubhatiijibhwa mu‑manji?” 48Niwo Peetero ˆnaaragirira ati, Koroneeriyo na abheejaabho bhabhatiijiibhwe na risiina rya Yeesu Kirisito. Ejo jejire jaawa, nibhasabhwa Peetero abhe nabho kwa siku nooto.

Currently Selected:

Ebhikorwa bhya Jitumwa 10: jit

Highlight

Copy