Ebhikorwa bhya Jitumwa 8

1-2Bhejire bhaamara okumwita, abhaanu bhanu bhaagayukaga Nyamuwanga nibhasiika Tefwano na okumuririra muno.

Orusuku runu Tefwano ꞉eetirwe, abheekirisya bha Yerusareemu nibhaamba okunyaasibhwa muno. Abhaafu mu‑bheene nibhabhirima, nibhanyaragana mu‑mikoowa ja Yuudeya na Samaariya. Yerusareemu awo ꞉jaasigaaye‑wo jitumwa ja Yeesu. 3Omwanya ogwo Saawuri ˆnaamba okunyaasya abheekirisya bha Yeesu. Omwene aariga ˆneengira mu‑nju jeebhwe, ˆnaagwataga abharume na abhagasi kwa amanaga, ˆnaabhasira mw‑ibhoyero.

Firipo mu‑chaaro cha Samaariya

4Abheekirisya bhanu ꞉bhaanyarageene, bhaariga nibharaasisya abhaanu Emisango ja Ekisi ja Yeesu, bhuri enu bhaajaga. 5Firipo#8:5 Firipo. Aariga umwi wa abhasakisi bhataanu na bhabhiri bharya. Ringira Ebhikorwa bhya Jitumwa 6:5. wone ˆnaagenda mu‑musi gumwi gwa Samaariya, ˆnaamba okuraasisya abhaanu bheende‑yo emisango ja Kirisito. 6Abhaanu bhaafu nibhamutegeresya kisi kwa obhwira bhumwi bhejire bhaarora ebhibharikisyo bhinu aariga ˆnaakora. 7Firipo aariga ˆnaasoosya‑ko amasambwa ku‑bhaanu bhaafu, amasambwa ago gaabhasookaga‑ko nigamwaya. Ka wone aawosyaga abharema bhaafu na bhanu bhaariga bhafuuwe emibhiri. 8Kurwa ejo abhaanu bha mu‑musi ogwo nibhabha na rikonderwa enene.

Peetero kaagonya Simooni owa amawufyo

9Mu‑musi gwa Samaariya ogwo, aariga ari‑mo omuunu owa amawufyo, risiina ryaye aatogwaga Simooni. Kwa omwanya mureera, Simooni aariga ˆnaaruguusya abhaanu bha mu‑chaaro echo kwa okukora ebhiruguusyo, ˆneekuuyaga ati omwene ni chikaaka. 10Abhaanu bhoone, abharera na abhakuru, bhaariga nibhamutegeresya kisi muno, nibhaayikaga ati, “Unu niwe amanaga ga Nyamuwanga, bhunu nibhwo obhutogwa ati, ‘Obhuturo obhukuru’!” 11Abhaanu abho ꞉bhaagendereeye okumutegeresya, kwa okubha ꞉aabharugusiisye kwa omwanya mureera na ebhiruguusyo bhyaye.

12Nawe omwanya gunu Firipo ꞉aabharaasisiisye Emisango ja Ekisi inguru ya obhukama bhwa Nyamuwanga, na inguru ya risiina rya Yeesu Kirisito, abhaanu nibheekirisya emisango jaaye, niwo abharume na abhagasi nibhabhatiijibhwa. 13Noorwo Simooni wone ˆneekirisya Yeesu, ˆnaabhatiijibhwa, ˆnaaruubhana na Firipo bhuri orubhaara. Omwanya gunu ꞉aarorere ebhibharikisyo na ebhiruguusyo bhyafu bhinu Firipo aariga ˆnaakora, ꞉aaruguurire.

14Yerusareemu erya, jitumwa bhejire bhoongwa ati abhaanu bha Samaariya bheekirisya omusango gwa Nyamuwanga, nibhatuma Peetero na Yowana bhabhaje‑ko. 15Bhejire bhaakinga, nibhasabhirwa abhaanu abho korereki bharamire Mwoyo Mweru, 16kwa okubha atari‑wo noorwo umwi agati yeebhwe unu aariga eekiywe na Mwoyo Mweru. Bhaariga bhabhatiijiibhwe era kwa risiina rya Raatabhugenyi Yeesu. 17Peetero na Yowana nibhatuura amabhoko geebhwe ku‑bheekirisya abho, nibharamira Mwoyo Mweru.

18Simooni, ejire aarora ati abhaanu abharamira Mwoyo Mweru kwa okutuurirwa‑ko amabhoko na jitumwa, ˆnaaregeeja okuyaana Peetero na Yowana jipirya, ˆnaabhabhwiraga ati, 19“Munaane anye wone obhuturo bhunu, korereki bhuri muunu unu enija okumuteera‑ko amabhoko gaani, aramire Mwoyo Mweru.”

20Peetero ˆnaamusubhya ati, “Singaarika awe na jipirya jaawo, kwa okubha owitogera ati echiyaanwa cha Nyamuwanga#8:20 Echiyaanwa cha Nyamuwanga. Anu echaayikira Mwoyo Mweru na obhuturo bhwaye. echibhonekana kwa okugurwa na jipirya! 21Awe utari na choonechoone ku‑mirimu ja Nyamuwanga jinu, kwa okubha omwoyo gwawo guteemire mu‑meeso gaaye. 22Nuute chimwi obhunyamuke bhwawo bhunu, na usabhwe Raatabhugenyi echigongo. Amwi kaatura okukufwira echigongo, inguru ya obhwiganirisya bhwawo obhubhiibhi, bhwa omutima gwawo. 23Okubha enikurora awe, wijuuye orwiso na ebhibhiibhi bhyawo bhikubhoyere.” 24Simooni ˆnaamubhwira ati, “Emwe, munsabhirwe ku‑Raatabhugenyi, korereki gwasiga okumbona noorwo omusango gumwi mw‑ijo mwaayika!”

25Omwanya gunu Peetero na Yowana ꞉bhaamarire okuraasya na okubheeyigisya abhaanu bha mu‑musi ogwo, Emisango ja Ekisi inguru ya Raatabhugenyi Yeesu, nibhaamba orugendo rwebhwe okusubha Yerusareemu. Bhunu bhaagendaga, nibhatura mu‑nguuyo nyafu ja Abhasamaariya nibharaasisyaga abhaanu Emisango ja Ekisi ejo.

Firipo kaaraasisya omukuru Emisango ja Ekisi ja Yeesu

26Rusuku rumwi, maraayika wa Raatabhugenyi ˆnaabhwira Firipo ati, “Iimuka ugende ebhurimbe, uroobhe na injira inu eyisooka Yerusareemu na okukinga mu‑musi gwa Gaaja.” Injira inu eyitura mw‑ibhara. 27Mbe, Firipo ˆnaagenda, ari ku‑njira, ˆnaabhugana na omukuru umwi wa echaaro cha Esiyopiya, unu aariga ari omujigaru.#8:27 Omujigaru. Mu‑siku ejo, bhaariga bhari‑wo abhajigaru bhanu ꞉bhaasorerwe bhabhe abhakosi abhakuru bha omukama. Omuunu oyo niwe aariga ari omukuru wa jipirya wa Kandake, omugore wa Esiyopiya. Omukuru unu aariga agendere Yerusareemu okuramya Nyamuwanga, 28woori aariga ari mu‑rugendo rwa okusubha iika. Aariga eenyanjire kw‑ibhirigiti ryaye rya okukururwa na jifwaraasi, ˆnaasomaga echitabho cha omuragi Iisaya.

29Mwoyo Mweru ˆnaabhwira Firipo ati, “Genda bhwangu ufogere kw‑ibhirigiti rirya, uruubhane naryo.” 30Niwo Firipo ˆnaaribhirimira, ˆnaarikinga‑ko. ˆNoongwa omukuru oyo, ˆnaasomaga mu‑chitabho cha omuragi Iisaya, ˆnaamubhuusya ati, “Emisango ejo owusoma, owujisombookerwa?” 31ˆNaamusubhya ati, “Enitura okujisombookerwa kutiki, ataabha‑wo omuunu wa okujinsomboorera?” Kurwa ejo ˆnaakuma Firipo eenyanje aamwi nage kw‑ibhirigiti. 32Ebhikaame Ebhyeru bhinu omukuru oyo aariga ˆnaasoma, nibhyo bhinu,

“꞉Aatangasiibhwe rwa inaama inu eyija okwitwa.

꞉Aajibhiiye jibhijibhi, rwa kutyo omwana wa inaama eyijibhira omwanya gunu eyitemwa‑ko obhufufi.

33꞉Bhaamuswasiisye, nibhamwima rirenga, omwanya gwa okumuramura.

Ni muunu ki unu aritura okwayikira emisango ja orwibhuro rwaye,

okubha obhurame bhwaye bhusoosiibhwe mu‑chaaro chinu.”#8:32‑33 Ringira Iisaya 53:7‑8.

34Omukuru oyo ˆnaabhuusya Firipo ati, “Enisabhwa umbwire, emisango ja omuragi ejo ejaayikira inguru ya ga? Ni inguru yaaye omwene, amwi ni inguru ya omuunu owundi?” 35Firipo ˆnaamba na emisango ejo ja Ebhikaame Ebhyeru, ˆnaamubhwiraga Emisango ja Ekisi inguru ya Yeesu.

36Omwanya gunu bhaariga nibhagenderera na orugendo ku‑njira eyo, nibhakinga anu gaariga gari amanji. Omukuru oyo ˆnaabhwira Firipo ati, “Rora, anu gari‑wo amanji! Niki chinu echinganya okubhatiijibhwa?” [37Firipo ˆnaamubhwira ati, “Ukeekirisya Yeesu Kirisito kwa omwoyo gwawo gwone, owutura okubhatiijibhwa.” ˆNaamubhwira ati, “Eniikirisya ati, Yeesu Kirisito ni Mwana wa Nyamuwanga.”] 38Awoawo ˆnaaragirira ribhirigiti rimereeguru. Niwo bhoone ku‑bhubhiri bhwebhwe nibheeka kw‑ibhirigiti, nibheengira mu‑manji ago, Firipo ˆnaamubhatiija. 39Omwanya gunu ꞉bhaasookere mu‑manji, Mwoyo Mweru wa Raatabhugenyi ˆnaagega Firipo. Omukuru oyo ꞉ataamurorere rindi, ˆnaagenderera na orugendo rwaye ˆnaakonderwaga. 40Firipo ˆneefurwa ari mu‑musi gwa Ajooto. ˆNaamba orugendo rwa okuja mu‑musi gwa Kayisaariya, ˆnaaturaga mu‑misi joone ku‑njira. Mu‑bhuri musi aaraasisyaga abhaanu Emisango ja Ekisi ja Yeesu okukingira mu‑musi gwa Kayisaariya.

Currently Selected:

Ebhikorwa bhya Jitumwa 8: jit

Highlight

Copy