Luk 4

A Sitan ihlhalei a Iesu

(Matiu 4:1-11; Mak 1:12,13)

1A Iesu ilini a M'im'iln P'as kaln nauei iv'i Surtan, kam'alet ml. Laha, M'im'iln P'as iv'av'ei iv'a arna nut kaka. 2Arna nut lera a Sitan ihlhalei napn inelv'a (40). Arna napn nen iahan si kinkin, sarei irn nam'er.

3Laha, a Sitan ivr ani, kavr ti a, “Ipavr ti Nakm kv'i a Natn Atua, pavr a nav'et laha a ti ipama kav'i p'ret.”

4 # TVH 8:3. A Iesu ivrprani, kavr ti a, “Paivul ivr ti a, ‘M'ertu ikasilv' a tim'ah uaki, v'eti ipasilv' a v'nen udlanian Atua.’ ”

5Dav'a, a Sitan ilav'i kauirv'a arna ptha lil iamk. Iv'amk m'a ti iv'iv'en v'anu udlani iter arna nadep' ani. 6Laha, a Sitan ivr ani, kavr ti a, “Kana p'etu v'anu udlani lera m'a si p'sp'asar arna lm'am, sena ti attu sarei arna lm'ak. Nrndu ti p'etau a m'ertu kana nrni uaki. 7Sena si lera, ipavr ti papata kana, si udlani lera ipav'i Nkam.”

8 # TVH 6:13. V'eti a Iesu ivrprani, kavr ti a, “Sitan, paruh asnk, sena ti Paivul ivr ti a, ‘Papatei a Mlin Eia iv'i Atuam, kan parian uaki.’ ”

9Laha, a Sitan ilav'i ml kauirv'a a Serusalem kataui arna drl nmah tamat, kavr ani, kavr ti a, “Ipavr ti Nakm kv'i a Natn Atua, pasranh a nadep' atlaha. 10#Npin 91:11,12.Sena ti Paivul ivr ti a, ‘Hin ipatu v'nen anr enselan sanam a ti apavp'aurh,’ 11kavri ml, kavr ti a, ‘Apavrmanh arna lm'ar, imahei paspan tlm arna nav'et.’ ”

12 # TVH 6:16. V'eti a Iesu ivrprani, kavr ti a, “Paivul ivr ti a, ‘Mahlhalei a Mlin Eia iv'i Atuam.’ ”

13Naran a Sitan ithlhala sarei arna navanel udlani, iln dei ipaier naran kinkin ipaviviln ani.

A Iesu ivrp'ep'adina v'nen p'as arna nut a Kalili

(Matiu 4:12-17; Mak 1:14,15)

14Sarei, a Iesu ihum'alet ml a Kalili arna nut hua M'im'iln P'as. Laha, v'nen ivruri iunanut kaier v'anu udlani itertalu atlera. 15A Iesu iv'iv'en v'nen p'as anr al nmah tamatar, laha m'ertu udlani avpatei.

M'ertu arna nut a Nasaret avrnp'lei a Iesu

(Matiu 13:53-58; Mak 6:1-6)

16Kaier a Nasaret, iv'i nut Hin ima kalil, kadav'a al nmah tamat arna Sapat, inep'a nut iani inap'ei iel, kap'tir a ti ipav'ana arna Paivul. 17Laha, atu puk iamk ani iv'i v'nenan Aisaia, iv'i pruvet. Ilena puk lera kala nut ivri kavr ti a,

18 # Aisaia 61:1,2. “M'im'iln a Mlin Eia ima aranak,

Sena ti ittu sera Kana a ti p'evrp'ep'a v'nen p'as anr m'ertu siar ihei.

Katep'a Kana a ti p'emhmah a m'ertu avrn istu istudau arna nlr,

Katep'a Kana a ti p'evrp'ep'ei anr m'ertu avp'resin a ti apavruh.

Katep'a Kana a ti m'etapis apavledu sei ml,

Katep'a Kana a ti p'elev'la m'ertu der istudau iarr arna derar.

19 Itep'a Kana a ti p'evrp'ep'a ti pai na ti a Mlin Eia ipamhmah a m'ertu ipastudau hilaha ra”.

20Sarei, ip'leskar puk lera katau a dui ml ip'aur nmah tamat, kalak. Laha, m'ertu udlani avlak al nmah tamat hara avklau kavp'ei mau. 21Laha, ivr anr kavr ti a, “Dika, Paivul la kvv'rn ani ra, itama kattu sera hin.” 22Laha, nelnal avtah ani kavvr ti ivrdaui kav'ana ip'as, kavvr ti a, “?Inap'i? Aulera iv'i a natn a Susev' uaki.”

23V'eti ivr anr kavr ti a, “Nsarei kvrn ti pavvr a Kana v'nen avri nakl kavr ti a, ‘Tukta, pamhmah a p'akm. Pari lil nvrn ti kani a Kapaniam, pani arna v'anuam atlaha.’ ” 24#Sun 4:44.Ivri ml, kavr ti a, “Nvrdaui nvr a kam'i, arna v'anuan, m'ertu ahavani ti naha pruvet iahmk ipav'a eia naran kinkin. 25#1 Armlin 17:1.V'eti Kana nvr v'nen dau a kam'i, arna naranan a Ilaitsa, tvtanu istudau avlak a Isrel. Arna naran nen Atua ip'leskar p'knaran pai itl nal ilm'sei, kani ti m'em'erien lil iak arna v'anu udlani a Isrel. 26#1 Armlin 17:8-16.V'eti Atua iatap'ei a Ilaitsa asnr hir kinkin, v'eti itap'ei iv'a a Sarevat uaki, arna nut a Saitun, asn tav'et iamk iv'i tvtanu. 27#2 Armlin 5:1-14.V'aha arna naranan a Ilaisa, iv'i pruvet, m'ertu a Isrel avstudau lep'ersi iuar, v'eti a Ilaisa iamhmah a hir kinkin, v'eti a Neman uaki, iv'i dui a Siria.”

28Sarei, naran m'ertu udlani avlak al nmah tamat hara avrn v'nen lera, nlr irer ani istudau. 29Kavp'tir kavtp'i iv'a aut arna v'anu, kavlav'i kavrav'a eia arna ptha v'anuar iter aranan a ti apavtp'i ipars a nadep'. 30V'eti hin iv'siau a p't nut nar kav'el.

A Iesu isran m'im'iln stu iamk

(Mak 1:21-28)

31Kadav'a auei a Kapaniam, iv'i v'anu iter arna nut a Kalili, kav'iv'en v'nen p'as anr arna Sapat nakl. 32#Mat 7:28,29.Laha, avtah ihuadau a v'nenan, sena ti naran iv'ana avrla ti nut huan iak. 33Laha, dui iamk ilak al nmah tamat, m'im'iln stu ilak a nln. Hin iv'ara eia ihua kavr ti a, 34“U, Iesu a Nasaret, paln kam'em'. ?Kma a ti pan v'ata a kam'em'? ?Kma a ti putakm a kam'em'? Kana nrndauh, kv'i Dui P'asan Atua.”

35V'eti a Iesu iv'ana hua m'ei kavr ti a, “Pap'nh, karuh a nln aulera.” Laha, m'im'iln stu ikasr dui lera irs a p't nut na nelnal karuh a nln, v'eti iutakm ani. 36Laha, nelnal avtah ani ihuadau kavmimiman a hir kavvr ti a, “?V'nen lera inap'i? Sena ti hin nut huan iak a ti ipav'ana hua m'er m'im'iln stu kani ti apavruh.” 37Laha, v'nen ivruri ier v'anu udlani itertalu a nut lera.

A Iesu ien mamh a rinan a P'ita

(Matiu 8:14,15; Mak 1:29-31)

38Sarei, iln nmah tamat hara kadav'a al nmahan a Saimun. V'eti a rinan a Saimun im'at istudau. Laha, avmiman ani a ti ipamhmah ani. 39Laha, iv'a kap'tir asn tav'et kap'ei kav'ana hua m'a m'etienan, laha m'etien lera ilni. Iv'amk m'a ti hin ithal kap'aurr.

A Iesu ien mamh m'ertu inelnal

(Matiu 8:16,17; Mak 1:32-34)

40Dav'a naran neiel itpl, nelnal avuirma tv'alr kinkin asnn, m'etien ururaur iuar. Laha, a Iesu itu lm'an aranar udlani kamhmah anr. 41Si uraur, m'im'iln stu avruh a nlr nelnal, kavv'ara eia kavvr ti a, “Nakm kv'i a Kristu, a Natn Atua.”

V'eti iv'ana hua m'er kavrkarr a ti amavv'ana, sena ti avrndu ti iv'i a Kristu.

A Iesu ivrp'ep'a v'nen p'as arna nut a Kalili

(Mak 1:35-39)

42Dav'a naran neiel itpeia, iln nut lera kadav'a arna nut kaka. V'eti nelnal avtala ani kavrama asnn, kavvrkari a ti imalnr. 43V'eti ivr anr kavr ti a, “Kana nkvrp'ep'a v'nen p'as na v'anuan Atua pr arna v'anu uraur ml, sena ti Atua itep'a Kana sanan.” 44Laha, ivrp'ep'a v'nen p'as al nmah tamat inelnal a Kalili.

Currently Selected:

Luk 4: nmb

Highlight

Copy