Luk 3

A Sun Paptais iendedp' alan a Iesu

(Matiu 3:1-12; Mak 1:1-8; Sun 1:19-28)

1Naran a Taipirias itv'i sera kavman lil a Rum pai inal lman italm' (15), hin a Punsias Pailat iv'i kavman a Sutia. Arna nut a Kalili, a Erut iv'i kavman. Tv'aln, nahan iv'i a P'iliv', iv'i kavman arna nut Aituria m'ei a Trakunaitis. Hin a Lisanias iv'i kavman arna nut Apilin. 2Arna pai lera, naran Anas m'ei a Kaiavas arv'i pris lil, v'nenan Atua ima asn a Sun, iv'i a natn a Sakaraia, arna nut kaka. 3Hin iv'a arna v'anu udlani iter a p'ak nauei a Surtan, kavr ti a, Pavvav nlm'i kavpaptais, a ti Atua ipalev'la si stuam'i. 4#Aisaia 40:3-5.Inep'a nut pruvet, nahan iv'i Aisaia, itulul sarei ani inap'ei, kavr ti a,

“Dui iamk iv'ana eia arna nut kaka kavr ti a,

‘Pavandedp' navanelan a Mlin Lil

Kavan alan ipaviviln mamh.

5 Apatinkar m'ihual udlani,

Ptha m'a mrnut udlani apani ti ipav'i m'lden,

Si udlani ihapr apani ti ipaviviln,

Laha, nut udlani m'ihual papa iak apani ti ipav'i m'lden.

6 Laha, m'ertu udlani apavla ti Atua ilev'la m'ertuan.’ ”

A Sun ivrp'ep'a v'nen p'as anr nelnal

(Matiu 3:7-12; Mak 1:7,8; Sun 1:25-28)

7 # Mat 12:34; 23:33. Laha, ivr anr nelnal avrama a ti ipan paptais anr, kavr ti a, “U, kam'i kvv'i net nmat. ?Hin ak ivr a kam'i a ti pavruh asn nl reran Atua la ipama ha? 8#Sun 8:33.Sena si lera, pavv'iv'en nava silv'ienam'i a ti ktvvav sera nlm'i, mavvrdinei a kam'i kavvr ti a, ‘A Epraham iv'i a tetiam'em'.’ Sena ti kana nvr a kam'i a ti Atua irndu ti ipan nav'et laha apavrama kavv'i a natn a Epraham. 9#Mat 7:19.Hilaha tamiuk itater sarei asnr uar nai. Sena si lera nai udlani navan iap'as apatrusi kasrani al nep'v'en.”

10Laha, nelnal avmiman ani kavvr ti a, “?Hilaha p'van v'ata?”

11Ivrpranr kavr ti a, “M'ertu satan iru, ipatu ki ipamk a tv'aln la nkan ihei ha, m'ertu tim'ah nan iak, ipani ipanap'i lera.”

12 # Luk 7:29. Laha, dui na takis ml avrama a ti ipan paptais anr, kavvr ani kavvr ti a, “?Tisa, p'van v'ata ml?”

13Ivr anr kavr ti a, “Mavlev' takis ipasiv' nki kavman ivr ti pavlav'i.”

14Inap'i lera ml, m'rnur kinkin avmiman ani kavvr ti a, “?Kam'em' p'van v'ata ml?” Ivrpranr kavr ti a, “Mavanp'ilen m'ertu kinkin, kavhap'il kavvr ti avan si stu kinkin. Pavrn ipap'as uaki a ulienam'i.”

15Laha, nelnal avv'rn kavv'hv'ahi arna nlr a ti a Sun iv'i a Kristu v'aha ihei. 16V'eti a Sun ivrp'ep'ei anr udlani, kavr ti a, “Kana nen paptais a kam'i a nauei, v'eti Dui iamk ipama ipalil kasiv' kana. Kana nalil a ti p'ululla sitrav na susan. Hin ipan paptais a kam'i a M'im'iln P'as m'a nep'v'en. 17Hin iua savel na uit aan p'ret ani, kasran uit nen eia a ti nalen ipatvla heia m'at nen, sarei kanen m'at nen kataui al nmah nen, kal heian al nep'v'en ikahiris naran.”

18Laha, iv'ana ml m'er nelnal kavrur sei istudau kavrp'ep'a v'nen p'as anr. 19#Mat 14:3,4; Mak 6:17,18.V'eti a Sun iv'ana hua m'ei a Erut, iv'i mlin na nut iv'a, sena ti a Erut iualei a Erutias, iv'i a nau tv'aln, nahan iv'i a P'iliv', kav'ana hua m'ei ml sena si stu uraur udlani a Erut iani. 20Laha, ien si stu uraur aranan ml kap'leskar a Sun al p'resin.

A Sun ien paptais an a Iesu

(Matiu 3:13-17; Mak 1:9-11)

21Naran iten sera paptais anr m'ertu udlani, ien paptais an a Iesu ml. Naran nen, a Iesu itu tamat, nut eia iela hin. 22#Ap'u 22:2; Npin 2:7; Aisaia 42:1; Mat 3:17; Mak 1:11; Luk 9:35.Laha, M'im'iln P'as ima a nadep' kadap's aranan kanep'a sera navimar. Laha, nadl iamk idan eia kavr ti a, “Nakm kv'i a Natk. Nlap'as anh karn ip'as anh istudau.”

Nl nam'elan a Iesu Kristu

(Matiu 1:1-17)

23Arna naran nen a Iesu paian ihih ineltl (30). Av'ah ti iv'i a natn a Susev', hin iv'i a natn a Eli. 24Hin iv'i a natn a Matat, hin iv'i a natn a Livai, hin iv'i a natn a Melki, hin iv'i a natn a Sana, hin iv'i a natn a Susev', 25Hin iv'i a natn a Matataias, hin iv'i a natn a Emus, hin iv'i a natn a Neiam, hin iv'i a natn a Esli, hin iv'i a natn a Nakai. 26Hin iv'i a natn a Mat, hin iv'i a natn a Matataias, hin iv'i a natn a Semai, hin iv'i a natn a Susev', hin iv'i a natn a Suta. 27Hin iv'i a natn a Suana, hin iv'i a natn a Resa, hin iv'i a natn a Serupapel, hin iv'i a natn a Salatiel, hin iv'i a natn a Neri. 28Hin iv'i a natn a Melki, hin iv'i a natn Ati, hin iv'i a natn a Kusam, hin iv'i a natn a Eimutam, hin iv'i a natn a Er. 29Hin iv'i a natn a Susua, hin iv'i a natn a Eliesa, hin iv'i a natn a Surim, hin iv'i a natn a Matat, hin iv' a natn a Livai. 30Hin iv'i a natn a Simiun, hin iv'i a natn a Susev', hin iv'i a natn a Sunan, hin iv'i a natn a Eliakim. 31Hin iv'i a natn a Melea, hin iv'i a natn a Menam, hin iv'i a natn a Matata, hin iv'i a natn a Netan, hin iv'i a natn a Divt.

32Hin iv'i a natn a Sesi, hin iv'i a natn a Uvet, hin iv'i a natn a Puas, hin iv'i a natn a Salmun, hin iv'i a natn a Nasun, 33Hin iv'i a natn Aminatap, hin iv'i a natn Aram, hin iv'i a natn a Esrum, hin iv'i a natn a Peres, hin iv'i a natn a Suta. 34Hin iv'i a natn a Sikup, hin iv'i a natn Aisak, hin iv'i a natn a Epraham, hin iv'i a natn a Tera, hin iv'i a natn a Nahur. 35Hin iv'i a natn a Seruk, hin iv'i a natn a Riu, hin iv'i a natn a Pelek, hin iv'i a natn a Hipa, hin iv'i a natn a Sala. 36Hin iv'i a natn a Kainan, hin iv'i a natn Arvaksat, hin iv'i a natn a Sem, hin iv'i a natn a Nua, hin iv'i a natn a Lameh. 37Hin iv'i a natn a Metusala, hin iv'i a natn a Inuk, hin iv'i a natn a Saret, hin iv'i a natn a Malelel, hin iv'i a natn a Kainan. 38Hin iv'i a natn a Inus, hin iv'i a natn a Set, hin iv'i a natn Atam, hin iv'i a natn Atua.

Currently Selected:

Luk 3: nmb

Highlight

Copy