Luk 5

A Iesu iv'ara anr dui na tilau arv'a a ti apavsapei

(Matiu 4:18-22; Mak 1:16-20)

1 # Mat 13:1,2; Mak 3:9,10; 4:1. Arna napn iamk, naran ip'tir a p'ak naui lil a Kenesaret, nelnal avsini a ti apavrn v'nenan Atua. 2Laha, ila nauak iru iter a p'ak naui lil. V'eti dui na tilau atvln sarei kavsila nitar. 3Dav'a iv'a al nauak iamk, iv'i nkan a Saimun, kamiman ani a ti ipatp' nauak ipasusupa ipater al nauei. Laha, kalak al nauak kavrp'ep'a v'nen p'as anr nelnal.

4Sarei, naran ihiris a v'nenan, ivr an a Saimun kavr ti a, “Palev' nauak kadav'a a nut nauei ilil, kavsran nitam'i al nauei kavrv' tilau.”

5 # Sun 21:3. V'eti a Saimun ivrprani, kavr ti a, “Tisa, kam'em' nvm'akar ihua lihat iamk v'eti navrv' tilau kinkin. V'eti sena ti Nakm kvri uaki p'esran nit.” 6#Sun 21:6.Naran atvan sera si lera avrv' tilau istudau dav'a ti nitar imaur. 7Kavv'ara anr tv'alr avlak al tv'el nauak hara, a ti apavrama kavsr lm'ar. Sarei, avrama kavlinkar nauak iru lera dav'a ti artpldinei. 8Naran a Saimun P'ita ila si lera, isisihpu kaiaul asn plk tln a Iesu kavr ti a, “Mlin, paruh kaln kana, sena ti nv'i dui stu iamk.”

9Sena ti hin, m'er ardu avlak asnn, avtah istudau, sena tilau udlani avrv'i hara. 10Hir a Sim'is m'ei a Sun, arv'i a natn a Sep'eti ha, karv'i tv'aln a Saimun arna parei, hir udlani avtah. V'eti a Iesu ivr an a Saimun kavr ti a, “Madedrn, hilaha nakm parv' m'ertu.” 11Naran atvtu sera nauakar itmima aut, avln si udlani kavsapei.

A Iesu ien mamh dui iamk lep'ersi iuei

(Matiu 8:1-4; Mak 1:40-45)

12Itauatah a si lera, naran ilak arna v'anu iamk, pavrni, dui iamk lep'ersi iuei istudau, ilei a Iesu kadama kasisihpu kaiaul a nadep' kamiman ani ihua kavr ti a, “Mlin, ipavr ti krni, Nakm krndu ti pani ti kana p'ep'as ml.”

13Laha, ilmlm lm'an kaiari kavr ti a, “Kana nrni, pap'as ml hilaha.” Iv'amk m'a ti lep'ersi nan ihiris. 14#Livai 14:1-32.Kavrkari kavr ti imavrp'ep'a si lera anr m'ertu kinkin, v'eti ivr ani, kavr ti a, “Pav'el kadav'a kav'iv'en p'akm asn pris, katu sei v'nen huan a Musis itaui, sena ti m'etienam lera ithiris, kav'iv'en anr a ti ktp'as ml.”

15V'eti v'nen ivruri iunanut istudau, laha nelnal avrama kavp'lt a ti apavrn v'nenan v'aha a ti ipamhmah anr arna m'etienar. 16V'eti iel Hin iruh asnr kadav'a arna nut kaka katu tamat.

A Iesu ien mamh dui iamk pna p'akn im'a

(Matiu 9:1-8; Mak 2:1-12)

17Arna napn iamk, naran a Iesu iv'iv'en v'nen pas, Varisi kinkin m'er tisa na v'nen hua avlak atlera. Hir avandan arna v'anu udlani a Kalili, a Sutia, m'ei a Serusalem. Nut huan a Mlin Eia iter aranan a ti ipamhmah a m'ertu arna m'etienar. 18Laha, pavrni, dui kinkin avpap dui iamk pna p'akn im'a, kavuirma kavtala a navanel a ti apavuirv'a eim kavtaui ipam'atr asnn. 19V'eti ahavpasla navanel na ti apavuirv'a eim, sena ti m'ertu avstudau. Laha, avrav'a eia arna nmah kavnarla liha nmah kinkin kavulnrhrahei m'a pasan iv'a eim a p't nut nar arna nahn a Iesu.

20Naran ila ti avv'ahi, ivr ani, kavr ti a, “Dui, ntlev'la sera si stuam.”

21V'eti ardu na v'nen hua m'er arvarisi avv'hv'ah si lera, kavvr ti a, “?Ak la Hin ra iv'ana stu m'ei Atua inap'i ra? ?Ak ml uraur irndu ti ipalev'la si stu? Atua uaki iamk irndu ti ipalev'lei.”

22V'eti a Iesu irndu v'ahienar kavrpranr kavr ti a, “?Inap'i hin kvv'hv'ah si lera a nlm'i? 23V'ata mau ihua a ti p'evri? ?Ihua a ti p'evr ti a, ‘Ntlev'la sera si stuam,’ v'aha p'evr ti a, ‘Pap'tir kav'el’? 24V'eti nrn ti pavrndu ti Kana, nv'i Net M'ertu, nut huak iak a ti p'elev'la si stu.” Laha, ivr a dui pna p'akn im'a ra, kavr ti a, “Nvr anh, pap'tir kaua pap nam kav'el kadahau.”

25Iv'amk m'a ti ip'tir arna nahr, kaua sei im'atr aranan kalnr kadahau a utan kapatei Atua. 26Laha, hir udlani avtah ani ihuadau, kavpatei Atua kavdedrn istudau, kavvr ti a, “Dika nvla si lil iamk.”

A Matiu, dui na takis

(Matiu 9:9-13; Mak 2:13-17)

27Itauatah a si lera iv'el kala dui na takis iamk, nahan iv'i a Livai. Hin ilak kan parei al nmah na takis. Laha, a Iesu ivr ani, kavr ti a, “Pasapa Kana.” 28Laha, ip'tir kaln si udlani kasapei.

29Sarei, a Livai ien tim'ah lil sanan a Iesu al nmahan. M'ertu na takis istudau avp'lt m'er atlera, m'er m'ertu uraur kavlak kavhatat. 30#Luk 15:1,2.V'eti arvarisi m'er dui na v'nen hua, la avp'lt m'er ha, avvrvr a hir kavmlen m'ertuan a Iesu kavvr ti a, “?Inap'i hin kvhatat kavm'nm'n m'er dui na takis m'er m'ertu stu?”

31A Iesu ivrpranr kavr ti a, “M'ertu p'akn ihua iarn tukta, v'eti m'ertu si iani uaki irni. 32Kana nahma a ti p'ev'ara a m'ertu p'as, v'eti nma a ti p'ev'ara a m'ertu stu, sena ti apavvav nlr.”

Amiman a Iesu kavrur naran apuln tim'ah

(Matiu 9:14-17; Mak 2:18-22)

33Laha, avvr ani ml kavvr ti a, “?Inap'i hin m'ertuan a Sun m'er m'ertuar Varisi avln tim'ah iel kavtu tamat, v'eti Nakm m'ertuam avhatat nakl kavm'nm'n?”

34Ivrpranr kavr ti a, “?Naran dui ien lheien, pavani ti artv'aln apavln tim'ah naran idlak uam asnr? 35V'eti naran nen ipama a ti apalev'la dui nen asnr. Arna naran lera tv'aln apavln tim'ah.”

36Laha, isran v'nen iamk asnr ml, kavr ti a, “M'ertu kinkin ikalev' niv'es kalik m'dah kalilai arna mnu klus. Imahei ti ipaiapr mnu klus lahara, v'aha niv'es kalik m'dah ipuraur arna mnu kalik. 37V'aha m'ertu kinkin ikatv'en naui m'iel m'dah al putel iv'i nila p'ak nani itater dav'a. Imahei ti naui m'iel m'dah ipani ti putel nen ipaspal, nauei ipararev' udlani, laha putel nen ipastu. 38V'eti aktv'en naui m'iel m'dah pr al putel m'dah, sena ti aparru karp'as. 39V'aha m'ertu kinkin itm'n sera naui m'iel trtarep' ikarn ti ikm'n naui m'iel m'dah ml ipatauatah, sena ti ivr ti a, Tertrtarep' nen ip'as kasiv' term'dah.”

Currently Selected:

Luk 5: nmb

Highlight

Copy