Marko 15

1Na hino apa lukelakela wakapangiti malango makasisi makulungu pamonga na wakulu‐wakulu na wa kulembela, ni chengo kya mfilimila, na wakankungiti Yesu, na wakantoliti, na wakamfumbukisi kwa Pilato. 2Nu Pilato akankotiti, Wila wenga uyii Mutwa wa waYehudi? Leka pakahigiti anjowela, Wenga ujowa. 3Ni makasisi makulungu wakandungamakili fingi. 4Leka Pilato akankotiti kawili, Uhiga lepa kindu? lola umu fifulukila fila wakulungamakila. 5Leka Yesu kitumbulile pala akahigiti lepa kindu; mpaka Pilato akaganaganiti.

6Leka pa ligono likulungu awawopolileye yumonga wa mu migoyi, yula wakiluwili kwa yombe. 7Leka akayili bahala wa kukemeleka Barabbas, akungiki pamonga na wakubalamuka, wala nawombe wakakomiti mundu pa kubalamuka kula. 8Ni lipuga likakweliti ni likatumbwili kwiluwila umu akiteye kwa wombe. 9Leka Pilato akawahigiti, kujowa, Wila mulonda niwawopolele Mutwa wa waYehudi? 10Pakuya akawalalili kukita kwa wifu makasisi makulungu wakamfumbukisi yombe. 11Leka makasisi makulungu wakawusiti lipuga, nausi mbanga awawopolele Barabbas. 12Leka Pilato akapinditi kuhiga, nakawajowili, Mumu kiki yaninkitile yula munjowa Mutwa wa waYehudi? 13Leka wakapinditi kukuwa, Mumbambaye pa msalaba. 14Leka Pilato akawajowili, Ndawa kiki, kiwifu kiki akakiti? Leka wakakuwiti kawili kulutila, Mumbambaye pa msalaba. 15Nu Pilato, pa kulonda kuliganisa lipuga, akawawopolili Barabbas, na akamfumbwili Yesu, pala antowiti, nausi awambike pa msalaba.

16Leka askari wakabiti nako kuhyetu ku lihegele, ili lili Pretorio; na wakakemili pamonga libanja lya mfilimila. 17Na wamfwatika yombe kinyong’onyi, ni wakalukiti njingwa ya mifwa, na wakawikiti panani pake; 18na wakatumbwili kundamusa, Tikulamusa, Mutwa wa waYehudi. 19Ni wakantowiti pa mutu ni lidete, ni kumfunyila, ni pa kumfugamila mafugamilo wangwilikimbo. 20Na apa wakankitili mihenje, wakamfuliti kinyong’onyi kila, na wakamfwatiki nguo syake. Ni wampisa kunja nausi wambambe pa msalaba.

21Ni wankikisa mundu, wa kulutangana, Simon mKurene, ahichaga kuhumila pa ngunda, dadi wawe Alexandro ni Rufo, kubita nawo nausi atole msalaba wake. 22Ni wampinda mpaka pandu pa Golgotha, bahala kukokoseka, Pandu pa kitunga. 23Ni wakampeliki mvinyo wa kuhasangana ni muro: leka akayupiti lepe. 24Ni wambamba pa msalaba, kugawana mingila yake, kulondolela pa aga, kukita nani yatole kiki. 25Ni yikayili saa ya kadatu, ni wakambambiti pa msalaba. 26Ni lilembo lya panani lya nyimu yake likalembiki kunani, mutwa wa wayedudi. 27Na pamonga nuyombe wawamba walugu wawili; yumonga kiwoko kya ndilo, ni yumonga kiwoko kya mangigi. 28Ni lilembo limemasiki lila lijowa, Na akawalangiki pamonga na wakuhoka. 29Na wa kulutangana wakandogiti, kutikisa mitu yawe, nu kujowa, Ha! wakubomola hekalu, kuyijenga kwa magono gadatu, 30mwiyokole, ni uselele pa msalaba. 31Wiwila makasisi makulungu kunkitila mihenje yungi ni njini pamonga na wakulembela, kujowa, Wangi awayokoleye; mwene ahotola lepa kwiyokola. 32Kristo uyu, Mutwa wa Israel, aselele hino pa msalaba, nausi tikawone, tikakele. Na wala wakawambiki pa msalaba pamonga nuyombe wakandogiti.

33Ni pakufika saa sita, lukayili lwisi pa ndima woha mpaka saa kenda. 34Ni pa saa kenda Yesu akakuwiti lilowe likulungu, Eloi, Eloi, lama sabakthani? yiyi kukokoseka, Mulungu wangu, Mulungu wangu, kwa kiki unilekiti ngani? 35Na wangi wakuyima baha, pala wakayufwini, wakajowiti, Lola, ankemela Eliya. 36Leka nunuyu akakimbili, na akamemisi sponge ni mvinyo wa kuwawa, nakawikiti pa lidete, nakampili kunywesa, kujowa, Muleke; tiwone ngati ahicha Eliya kunselesa yombe. 37Nu Yesu akakuwiti lilowe likulungu, na akakungwiki. 38Ni nguo ya kindemula ya hekalu yikakachwiki fibambali fiwili kitumbulile kunani mpaka pasi. 39Nu kenturion, yula akayimi baha pa kipula nayombe, pakaweni kukita akakungwiki wila, akajowiti, Chakaka mundu uyu akayili Mwana wa Mulungu. 40Leka wakayili baho kawili wadala wakulolela patali: wa wombe Maria Magdalene, nu Maria nyina wa Yakobo nchoko nu wa Yoses, ni Salome; 41wala, baha akayili pa Galilaya, wakankisiti yombe, ni wakantumakili; ni wangi wangi wa wadala wala wakakweliti nuyombe ku Yerusalem.

42Na apa kimihi kimaliti kufika, ndawa likayili ligono lya Kuwikila ngani, ili liyii lya palongolo pa sabato, 43akachiti Yosefu wa Arimathaya, nkamba mwene chengo, yula kawili akayili kulindalila utwa wa Mulungu; uyu pa kusindimala akayingili kwa Pilato kwiluwila ntufi wa Yesu. 44Na Pilato akakangichi kwali ngati amaliti kufwa: na apa akikemalili kenturion, akankotiti yombe ngati mwandikati afwili. 45Na apa akawalalili kuhuma pa kenturion, akampili Yosefu ntufi wula. 46Na akahemili nguo ya nkunja, na kunselesa yombe, akaniembiti pa nguo ya nkunja, nakambikiti pa manyinja ya kuhongoleka ya liganga; ni akabilusili liganga pa ndyango wa manyinja. 47Nu Maria Magdalene nu Maria nyina wa Yoses wakalolalili pakawikiki pala.

Currently Selected:

Marko 15: MGS1937

Highlight

Copy