Marko 14

1Leka likayili pasaka na nkate wangali kimela panyuma pa magono gawili: ni makasisi makulungu ni wakulembela wakalonditi umu ngawankamulili pa kuchenjela, ni kunkoma: 2pakuya wajowiti, Nukuya pa ligono likulungu, kwali yayiye njwawila pa nsafi.

3Na apa yombe akayili pa Betania mu nyumba ya Simon wa matana, apa akayili mu kutama pa kyakulya, akachiti ndala ayii ni liholoholo lya mafuta ga kubakasila ga nardo ga uhemesi ukulungu; ni akakaywili liholoholo, ni akapungulili pa mutu wake. 4Leka wakayili wangi wakapili mwoyo mugati mwawe, Kwa kiki kuyananga uku kukitiki kwa mafuta aga? 5Pakuya mafuta aga ngagahotwili kuhemeleka madenario mia sidatu, ni kupelewa kwa wagaju. Na wakannung’unakili yombe. 6Leka Yesu akajowiti, Mundeke uyu; kwa kiki mumhumbusa? ahengili lihengo linofu kwa nenga. 7Pakuya magono goha muyii nawo wagaju pamonga nu mwenga, na payi poha yamulonde muhotola kuwakitila finofu: Koma nenga muyii lepa nu nenga magono goha. 8Akikiti kila akahotwili kukita: aubakisi huti mbili wangu palongolo kwa kuwikika pa manyinja. 9Na chakaka niwajowela, Payi poha apa evangel iyi yayiyenesewe haka pa milima yoha, iki kawili akikiti ndala uyu yakilongaleke kwa kikumbukumbu kyake.

10Na Yuda Iskariota, yumonga wa wala kumi na wawili, akabiti kwa makasisi makulungu, nausi amfumbule kwawe. 11Na wombe, apa wakayufwini wakahekalili, na wakalagini nako kumpela ndalama. Na akalonditi‐londiti umu ngamfumbulili pa lukumbi lunofu.

12Na ligono lya kutumbula lya mikate yangali kimela, pala wadumuleye pasaka, wanafunsi wake wanjowela, Ulonda tibite kuliku kuwikila ngani nausi ukalye pasaka? 13Ni awatuma wawili wa wanafunsi wake, na awajowela, Mubitaye ku likaya, ni yawapingamile ngosi wa kupinda kiwiga kya machi: 14munkise yombe; ni pala yayingile yombe, mujowaye kwa mwene nyumba, Mwalimu atawila, Kiyii kuliku kimbetula kyangu, pala yanilye pasaka pamonga na wanafunsi wangu? 15Na yombe mwene yawalase kindemula kikulungu kya kuyalika, kiwikikili ngani: ni kukula muwikile ngani kwa tenga. 16Na wakapititi wanafunsi, na wakachiti ku likaya, na wakakolili umu akajowiti kwa wombe: na wakawikili ngani pasaka.

17Ni pakufika kimihi ayicha pamonga na kumi na wawili wala. 18Na apa wakatemi ni kulya, Yesu akajowiti, Chakaka niwajowela, Yumonga wa mwenga yanifumbule, yuyu yuakulya pamonga nu nenga. 19Wakatumbwili kuniongoneka, ni kunjowela yumonga yumonga, Nenga ati? 20Leka akajowiti kwa wombe, Yumonga wa awa kumi na wawili, yuyu wa kuyina pamonga na nenga pa kisayi. 21Pakuya Mwana wa adam abita, umu yilembeliki ya yombe: leka ling’aho kwa mundu yula Mwana wa adam afumbulika nako! kinofu kwa yombe ngahogoliki lepa mundu yula.

22Ni pa kulya wombe, akatoliti nkate, na apa akapili kihomo, akaumetwili, nakawapili wombe, nakajowiti, Muyupaye: uwu uyii mbili wangu. 23Na akatoliti ntimbo, ni apa akasengwisi, akawapili wombe: na wakanywili woha pa wula. 24Na akajowiti kwa wombe, Uwu uyii mwasi wangu wa kilago, wa kumiminika ndawa wa wingi. 25Chakaka niwajowela, Kitumbulile hino yaninywe lepa kawili kya kupambika kya mbelesa, mpaka pa ligono lila pala yaninywe kya hino pa utwa wa Mulungu.

26Na apa wakayimbili nyimbo, wakapititi ku kidunda kya Miseituni.

27Nu Yesu awajowela, Mwenga mwawoha yamukuwasike: pakuya yilembiki, Yanintowe wa kudima, ni mambelele yagayambanike. 28Koma panyuma pa kusyukika nenga, yaniwalongolele kuyingila mu Galilaya. 29Leka Petro akanjowili, Haka woha yawakuwasike, koma nenga lepa. 30Nu Yesu anjowela, Chakaka nikujowela kukita lilino, kilo iki, lijogolo likona lyangawika kawili, yaunikane nenga padatu. 31Leka yombe akalongili kulutila, haka nganifwili pamonga nu wenga, yanikukane lepa. Na wiwila wakajowiti woha kawili.

32Na wahicha pandu pakukemeleka Gethsemane: na awajowela wanafunsi wake, Mutame apa, mpaka yanisali. 33Na atola pamonga nako Petro nu Yakobo nu Yohana, na akatumbwili kuya nu mwoyo teeke, ni kutenguka mwoyo. 34Na awajowela, Wumi wangu uyii mu kuniongoneka nyamhope mpaka kufwa: muhwele apa, ni mutame miho. 35Na akagenditi palongolo pachokope, na akagwili pasi, na akasaliti kukita, wona yihotoleka, saa iyi yindutalile. 36Na akajowiti, Abba, Dadi, fyoha fihotoleka kwako; wusa ntimbo uwu pa nenga: koma nukuya kila nilonda nenga, koma kila ulonda wenga. 37Na ahicha, na awakolela wombe wagoniti lugono, ni anjowela Petro, Simon, uyii mu lugono? uhotola lepa kutama miho saa yimonga? 38Mutamaye miho ni kusali, nausi musiyingila pa kugeseka: roho yilonda muni, koma nyama yilegaliki. 39Na akabiti kawili, nakasaliti, kujowa malowe gagalagala. 40Na akachiti kawili, na akawakolili wagoniti lugono, ndawa miho gawe gatopiti nyamhope; na wakamanyiti lepa kila ngawamhigiti. 41Na ayicha pa kadatu, na awajowela, Mugonaye hino, mupumulilaye: basi; saa yichiti; lola, Mwana wa adam afumbulika mu mawoko ga wene sambi. 42Muyimukaye, tiwuke: lola, yombe wa kunifumbukisa awandamila.

43Na hino apa, akona yombe kulongela, ahicha Yuda, yumonga wa kumi na wawili wala, na pamonga nuyombe lipuga na maupanga ni ndonga, kuhumila pa makasisi makulungu na wakulembela ni wakulu‐wakulu. 44Leka uyu wa kumfumbukisa awapili kiwalalilo, kujowa, Yuyu yanimnune pa ndomo, yuyu mwene; munkamulaye, na mubitaye nako kingohile. 45Na pakachiti, hino apa akamhichili yombe, na anjowela, Rabbi; na akamnuniti pa ndomo nyamhope. 46Leka wakambikili mawoko, na wakankamwili. 47Leka yumonga wa wala wakuyima baha akaholomwili upanga, nakankechiti mbanda wa kasisi nkulungu, nakandumwili likutu. 48Nu Yesu akahigiti nakajowiti kwa wombe, Wila mukapititi ni maupanga ni ndonga kunikamula ngati na mwifi? 49Ligono ni ligono nikayili kwinu pa hekalu kuyigalisa, na munikamwili lepa: koma nausi malembo gamemeseke. 50Na wakandekiti woha na wakakimbili.

51Na nunuyu mpalo akakisini nuyombe, wa kufwata nguo pa ukengele wake: 52na wakankamwili; koma akalekiti nguo yila, nakakimbili ukengele.

53Na wakabiti nako Yesu kwa kasisi nkulungu: na wawungana pamonga nuyombe woha makasisi makulungu na wakulu‐wakulu na wakulembela. 54Nu Petro akankisiti yombe patali, mpaka kuhyetu, mu lihegele lya kasisi nkulungu; na ayili mu kutama pasi pamonga na wa polisi, ni kuyotela pa lulangalila. 55Ni makasisi makulungu ni chengo kya mfilimila wakalonditi ulungamakiso wa kumpindika Yesu nausi wankome; ni wakaukolili lepa. 56Pakuya wingi wandungamakili yombe kwa mageya, na ulungamakiso wawe wayitikisini lepa. 57Na wa nunuyu wakayimiti, kundungamakila kwa mageya, 58kujowa, Tenga tikanjufwanili uyu kujowa, Nenga yanibomole hekalu iyi ya kukitika ni mawoko, na kugona magono gadatu yanijenge yingi yangali kukitika ni mawoko. 59Na haka wiwi ulungamakiso wawe wayitikisini lepa. 60Nu kasisi nkulungu akayimiti pagati nakankotiti Yesu, kujowa, Uhiga lepa kindu? kiki iki wakukitila ulungamakiso awa? 61Leka akatemi kinunu, akahigiti lepa kindu. Akapinditi kawili kasisi nkulungu nakankotiti, kunjowela, Wila wenga uyii Kristo, Mwana wa Wakuhikalika yula? 62Leka Yesu akajowiti, Nenga niyii: ni yamuwone Mwana wa adam wakutama kiwoko kya kigosi kya mbafu, ni kuhicha pamonga na mafundi ga kunani. 63Leka kasisi nkulungu akakachwili mingila yake nakajowiti, Utisowa wuli ulungamakiso wungi? 64Muyufwini blasfemia: muwona wuli? Leka wakampisiti mbifu woha kukita alinganila kufwa. 65Na wangi wakatumbwili kumfunyila, ni kunsiwa ku miho, ni kubwakatula, ni kunjowela, Ulwete: na wa polisi wakanjupiti ni kuntowa ni nupi.

66Ni pakuya Petro pasi pa lihegele, ahicha yumonga mwali wa kasisi nkulungu; 67na pakambweni Petro ayota mwoto, pakandolakisi, ajowa, Wenga kawili ukayili pamonga nu mNazareti, Yesu yula. 68Leka akakaniti, kujowa, Haka kumanya, haka kuwalalila iki ujowa wenga nimanya lepa: ni akapititi kunja pa lufuka lwa pa ndyango; nu lijogolo likawikiti. 69Nu mwali akambweni, nakatumbwili kujowa kawili kwa wala wakuyima baha, Uyu ayii wa wombe. 70Koma akakaniti kawili. Na panyuma pachokope wala wakuyima baha wakapinditi kunjowela Petro, Chakaka uyii wa wombe; pakuya uyii mGalilaya. 71Leka akatumbwili kulapalakisa ni kuliga, kujowa, Nimmanya lepa mundu uyu munjowa. 72Na hino apa pa kawili lijogolo likawikiti. Na Petro akakumbukili lilowe, umu akajowili Yesu kwa yombe, Palongolo lijogolo likona lyangawika kawili, yaunikane kadatu. Na apa akaholalili akaliliti masoli.

Currently Selected:

Marko 14: MGS1937

Highlight

Copy