Marko 13
13
1Na kugenda yombe mwanja kupita pa hekalu, yumonga wa wanafunsi wake anjowela, Mwalimu, lola, maganga wuli na majengeko maki! 2Nu Yesu akajowiti kwa yombe, Ulola majengeko makulungu aga ati? yagalekewe lepa liganga limo panani pa liganga liyini, lila yalibomoleke lepa.
3Na pa kutama yombe pa kidunda kya Miseituni pa kipula ni hekalu, Petro nu Yakobo nu Yohana wakankotiti ku mweya, 4Utawile kwa tenga ifi yafiye ndali? na kiki kiwalalilo mwaka ifi yafiye papipi kumemeseka? 5Nu Yesu akatumbwili kuwajowela, Mulolaye kukita mundu asiwasowesa. 6Wingi yawayiche pa lihina lyangu, kujowa, Nenga niyii; na yawasowese wingi. 7Leka mwaka yamuyufwane ngondo nu mbili sya ngondo, musihumbusika: ifi ngafipatiti kuya; koma pa kumalakisa pakona. 8Pakuya mhuku yauwuke kupindika mhuku, ni utwa kupindika utwa: yafiye finyukunyuku pandu pangi pangi; yauye ulali: ifi fifi ndumbulo ya mahumbuso.
9Leka mwenga mwilolele pa mwawene: pakuya yawawafumbule pa machengo; ni pa masunagoge yamutoweke; na yamuyime pa miho ga manduna na watwa ndawa ya nenga, kwa ulungamakiso kwawe. 10Na evangel nakulekeka pakutumbula kuwandasika pa mihuku yoha. 11Na pala yawawatole kuwafumbula, mukotoke kuholangana palongolo kiki yamulongele: koma kiyi kyoha yakipelewe kwinu saa yiyila, iki yamulongelage: pakuya nukuya mwenga wa kulongela, koma Roho Mbalafu. 12Na ndongo yamfumbule ndongo mundu kwa kifwa, nu dadi wana mundu; na wana yawawayimile wakwahogola, ni yawawafwise. 13Ni yamuye wakuwipilika ni woha ndawa ya lihina lyangu: leka wakuyumalakila mpaka pa kumalakila, yuyu yayokoleke.
14Leka mwaka yamuwone kihepeko kya mahame njwe kiyima pala ngayimakiki lepe (yula asoma awalalile), bahalapala wala wa pa Yudaya wakimbilile ku fidunda: 15na yula panani pa nyumba asiselela, haka kuyingila, kutola kindu pa nyumba yake: 16ni uyu mu ngunda asikilawukila munyuma kutola mwingila wake. 17Leka ling’aho kwa wala wayii nu luleme ni kwa wala wakuyongesa pa magono gagalagala! 18Leka musali nausi isipata kuya pa lukumbi lwa kipepo. 19Pakuya pa magono gagalagala yagaye mahumbuso, gala gakayili lepe ga ntundu uwu kitumbulile kupanga kula Mulungu akupangiti mpaka hino, ni yagapate lepa kuya kawili. 20Na ngati Bambo akalemiti kukepekesa magono gala, nyama iyi yoha ngayiyokwiki lepa: koma ndawa ya wakuhagulika, wala awahagwili, akakepisi magono. 21Na bahalapala wona nunuyu yajowe kwa mwenga, Lola, apa Kristo; pangi, Lola, uku; musikela: 22pakuya yawawuke waKristo wa mageya, ni wakulweta wa mageya, na yawalase fiwalalilo ni finyantiti, mpaka kuwasowesa, ngati ihotoleka, haka wala wakuhagulika. 23Leka mwenga mulolaye wicho; lola, natawili fyoha kwa mwenga palongolo.
24Leka pa magono gagalagala, panyuma pa mahumbuso gala, lijuwa yalipilale, nu mwesi yaupeleke lepa lulangalila lwake, 25ni ndondo kigwilile kuhumila kunani, ni mbafu sya kunani yasinyukunyuke. 26Na bahalapala yawambone Mwana wa adam ayicha pa mafundi pamonga ni mbafu yikulungu ni kukwisika. 27Na bahalapala yatume wamalaika wake, ni yawawunganise wa kuhagulika wake kuhumila mbepo ncheche, kuhumila lusongo lwa ndima mpaka lusongo lwa kunani.
28Leka pa nkuyu mwiyigalise ngongo: pala lutafi lwake luyii luyengulila, na mahamba gake gatuka, muwalalila kukita kifuku kiyii papipi; 29wiwila nu mwenga kawili, apa muwona findu ifi yafipate kuya, mumanye kukita ayii papipi, pa ndyango pene. 30Chakaka niwajowela, Kihogosi iki nakulutila ngani lepa, mpaka findu ifi fyoha yafipate kuya. 31Kunani nu ndima yakulutile ngani: koma malowe gangu yagalutile ngani lepa. 32Leka ligono lililalila na saa yiyilayila pa waka mundu amanya, haka wamalaika kunani, haka Mwana, lema Dadi. 33Mulolaye wicho, mutame miho ni kusali: pakuya mumanya lepa lukumbi lwake. 34Ngati mundu, wa kuhama, pa kuleka nyumba yake, na awapela wawanda mundu chengo, ayi yoha lihengo lyake, na wa pa ndyango akantaukili atame miho. 35Mumu mutame miho: pakuya mumanya lepa lukumbi wuli mwene nyumba yayiche, pangi kimihi, pangi kilo pagati, pangi ngunguluko, pangi lukela; 36asihicha pa kupwitukila ni kuwakolela mugona lugono. 37Leka iki niwajowela mwenga niwajowela woha, Mutame miho.
Currently Selected:
Marko 13: MGS1937
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1937.
