Luka 8

1Ni yikayili kukita panyuma pake pachokope, akagenditigenditi pa makaya ni mihali, kuwandisa ni kutola evangel ya utwa wa Mulungu, nu pamonga nuyombe wala kumi na wawili, 2na wadala wangi wangi wala wakalamasiki kulekana ni roho siwifu ni fya ulegelefu, Maria wakukemeleka Magdalene, pa yula madaimon saba gapititi, 3ni Yoanna mhanu wa Kusa kapitao wa Herode, nu Susanna, na wangi wa mahele, wala nawombe wawatumakili kihapulile pa findu fyawe.

4Na pala lipuga likulungu likakokini pamonga, na wa pa likaya liyi lyoha wakawunganiki kwake, akajowiti kwa ngongo: 5Wa kumicha akapititi kumicha mbeyu yake: na pa kumicha, yingi yikagwili mu makigi mwa ndila; ni yikaliwatiki pasi, na madege ga mu nyingalila gakayilili. 6Ni yingi yikagwili pa liganga; ni hino apa yikameliti, ni yikayunditi, ndawa yikayili lepa ni kinyesi. 7Ni yingi yikagwili pagati pa mifwa, ni mifwa yikameliti pamonga ni yombe, ni yikiniongiti. 8Ni yingi yikagwili pa lidupi linofu, ni yikameliti, ni yikapambiki fipambiko mamia. Pa kujowa aga, akakwesiti, Uyu ayii ni makutu gakuyufwanila, ayufwanaye.

9Leka wanafunsi wake wakankotiti ngongo iyi ngayili kiki. 10Nakajowiti, Kwinu kupeliwi kumanya fyakuhyetu fya utwa wa Mulungu: leka kwa wakusigala pa ngongo; nausi pakulola wasiwona, na pa kuyufwana wasiwalalila. 11Na ngongo yiyi iyi: Mbeyu yiyii lilowe lya Mulungu. 12Na wala wa mu makigi mwa ndila wawa wala wayufwini; bahalapala ayicha diabolo, na anyaka lilowe pa mioyo yawe, nausi wasikela ni kuyokoleka. 13Leka wala wa pa liganga wawa wala, pala wayufwini, wayupa lilowe ni kiheko; ni awa wayilepe ni milela, wala kwa lukumbi wakela, na pa lukumbi lwa kugeseka wapatuka. 14Na yila yikagwili pa mifwa, wawa wala wayufwini, na pa mwanja wawe waniongeka na maholalelo na kyuma na fya kuniambisa fya kulamila apa, na wapambika lepa kwa kumalakisa. 15Leka yila pa lidupi linofu, wala nawombe wayufwini lilowe, na walikamula pa mwoyo wa kuniamba ni unofu, ni wapambika fipambiko pa kwisinga.

16Ni pa waka mundu, apa apambiti nyali, ayifunakila ni kiwiga, haka kwiwika pasi pa kitala; koma ayiwika pa kuwikila nyali, nausi wawayingila walole lulangalila. 17Pakuya payilepe kyakufihika kila yakileme kuya pa lulanga; haka kyakuyuwalika, kila yakileme kumanyika ni kuyicha pa lulanga. 18Mumu mulolaye umu muyufwana: pakuya ayi yoha uyu ayii nakyo, yakupelewe kwa yombe; na ayi yoha uyu ayii nakyo lepa, pa yombe yanyakike haka kila ahola kukita ayii nakyo.

19Leka wakanjichili nyina na walongo mundu, na wakahotwili lepa kumfikila ndawa ya lipuga. 20Leka wakambuliti, Nyoko nu walongowo wayima kunja, na walonda kukuwona. 21Na akahigiti, nakajowiti kwa wombe, Mao na walongo wangu wayii wala wayufwana lilowe lya Mulungu, ni kulikita.

22Leka yikayili kukita pa limonga lya magono gala, akayingili pa liboti, yombe mwene na wanafunsi wake; nakajowiti kwa wombe, Tiyombokaye kwisi kwa nyanja: na wakakulwili. 23Leka pa wakalutiti wombe ni matanga, akagoniti yombe lugono: na likaselili pa nyanja limbupulu lya mbepo; na wakayili mu kumema na machi, na wakayili mu ulugu. 24Na apa wakamhichili yombe, wakansisimwisi, kujowa, Bambo, Bambo, titagika. Leka pakayimwiki, akalakalili mbepo nu mayiga ga machi: na gakakotwiki, na lukagwili lumbwela. 25Leka akajowiti kwa wombe, Kiliku kiyitakiso kinu? Na wakayogwipi na wakaganaganiti, kujowana, Nani uyu, kukita ataukila haka mbepo ni machi, ni sinjufwanila yombe?

26Na wakaselili ku ndima wa waGeresa, wula uyii kulosana ni Galilaya. 27Leka ngosi wa kuhumila pa likaya lila akawonangini nuyombe, pakapititi pa ndima, ayii ni madaimon; ni kitumbulile mwandi akafwatiti lepa nguo, na mu nyumba akahweliti lepa, koma mu manyinja. 28Leka pakambweni Yesu, akakuwiti nyahope, na akagwili pasi palongolo pake, ni njowelo yikulungu akajowiti, Kiki kwa nenga ni wenga, Yesu, Mwana wa Mulungu wa kunani nyamhope? Nikuluwa, usinihumbusa. 29Pakuya ataukili roho ya wafu kupita pa mundu yula. Pakuya kawili kawili akamuliki nayo yombe: ni akakungiki ni minyololo ni findawatila, pakugoheka; na kukachula fya kunkungila, akasakiki ni daimon ku mapululu. 30Nu Yesu akankotiti, Lihina lyako nani? Leka akajowiti, Legion: pakuya madaimon mingi gakayingili pa yombe. 31Na gakampembisi asigataukila kuwuka mwanja ku china. 32Leka likayili bahalapala lipuga lya maguluwe mingi galyaga pa kidunda kila: na gakampembisi nausi agayitakile gayingile pa gala. Na akagayitakili. 33Leka madaimon gakapititi pa mundu yula, na gakayingili pa maguluwe: ni lipuga likakimbili maliayu kuselela pa ligema kuyingila pa nyanja, na gakiniongiti. 34Leka pakaweni wakudima kila kikakitiki, wakakimbili, ni wakatoliti ndumi pa likaya ni pa migunda. 35Na wakapititi kuwona kila kikitiki; ni wakanjichili Yesu, na wakambweni mundu yula, pa uyu gakapititi madaimon, atemi pasi, afwikiki ni wa pa luhala lwake, pa magulu ga Yesu: na wakayogwipi. 36Leka wala wakaweni wakawatawalili umu akayokoliki yula wakukamulika ni madaimon. 37Na wandu woha wa ndima wa waGeresa wakusyungutila mumu wakankotiti kukita awuke pa wombe; pakuya wakakamuliki ni woga ukulungu: nuyombe akayingili pa liboti, ni akakilawiki. 38Leka ngosi yula madaimon gakampititi akanduwiti kukita aye pamonga nuyombe: leka akampili mwanja, kujowa, 39Ukilawukile ku nyumba yako, ni ukokose fila fikulungu ifi Mulungu akukitili. Nakawukiti, kuwandisa mu likaya lya mfilimila fikulungu fila akankitili Yesu.

40Leka pa kukilawuka Yesu, lipuga likampingamili; pakuya woha wakayili mu kundolalela yombe. 41Na lola, akachiti ngosi lihina lyake Yairo, nuyombe nkulungu wa sunagoge: na akagwili pa magulu ga Yesu, na akampembisi ayingile mu nyumba yake; 42ndawa akayili ni mwana ndala wakape, wa miaka kumi ni yiwili, ni akayili mu kufwa. Leka pa kubita yombe mapuga gakamfinyikisi.

43Nu ndala pakuya ni kuhulula mwasi miaka kumi ni yiwili, yula akatagini kya wumi wake kyoha kwa waganga, koma akahotwili lepa kulwasika kwa ayi yoha, 44akachiti panyuma, ni akakwafiti lupeto lwa malaya gake: na hino apa kuhulula mwasi kwake kukandekiti. 45Na Yesu akajowiti, Nani akanikwafiti? Na apa wakakaniti woha, Petro akajowiti, na wala wakayili pamonga nuyombe, Bambo, mapuga gakuwandamila ni kukufinyikisa kwingi. 46Leka Yesu akajowiti, Anikwafiti nenga mundu: pakuya niwalalili namwene mbafu yinipititi. 47Leka ndala pakaweni nukufihalika lepa, akachiti ni kudigida, nakagwili palongolo pake, nakakokwisi pa miho ga wandu woha ndawa yiyi akankwafiti yombe, ni kukita akalamasiki hino apa. 48Leka akajowiti kwa yombe, Mwana ndala, kiyitakiso kyako kikuyokwili; genda pa kindamba.

49Akona yombe kulongela, ahicha nunuyu kuhumila pa nyumba ya nkulungu wa sunagoge, kujowa, Mwanao ndala afwili; ukotoke kumfwahisa Mwalimu. 50Koma pakayufwini Yesu, akamhigiti, Usiyogopa: kelaye waka, na yayokoleke. 51Na pakachiti ku nyumba, akayitakili lepa mundu kuyingila pamonga nuyombe, lema Petro, nu Yohana, nu Yakobo, ni dadi wa mwana yula, nu nyina. 52Na woha wakayili mu kulila ni kwipumundila pa kifua: leka akajowiti, Musilila; pakuya afwili lepa, koma agona lugono. 53Na wakankitili mihenje, pakumanya kukita afwili. 54Leka yombe, pa akankamwili kiwoko kyake, akakemili, kujowa, Mwana ndala, yimukaye. 55Ni roho wake ukankilawukili, nakayimi hino apa: na akataukili wampele alye. 56Na wakumhogola wake wakakangichi nyamhope: leka akawataukili wombe wasintawila mundu iki kyakitiki.

Currently Selected:

Luka 8: MGS1937

Highlight

Copy