Luka 9

1Leka akawakemili kumi na wawili pamonga, ni akawapili mbafu ni chengo panani pa madaimon goha, ni kulwasa mautamu. 2Ni akawatumiti wombe kuwandisa utwa wa Mulungu, ni kulwasa wakulwala. 3Ni akajowiti kwa wombe, Musipinda kindu kwa mwanja winu, haka nkongocho, haka lihako, haka nkate, haka ndalama; haka kutama nago malaya gawili. 4Ni mu nyumba yiyi yoha yamuyingile, kukulakula muhwelaye, ni kukulakula mupitaye. 5Na wayi woha wala walema kuwakemelesa, pakupita mu likaya lililalila, mukungundaye lufumbi kuhuma pa njayo sinu kwa ulungamakiso kuwapindika wombe. 6Na wakawukiti, na wakagenditi pa makaya goha, kuwandisa evangel, ni kulwasa payi poha.

7Leka Herode tetrako akayufwini fyoha fila fikakitiki: na akaganaganiti nyahope ndawa kukajowiki na wangi kukita Yohana akasyukiti pa wakufwa; 8leka na wangi, kukita Eliya akawoniki; leka na wangi, kukita wakulweta yumonga wa mwandi ayimakiki kawili. 9Leka Herode akajowiti, Yohana nikandumwili mutu: leka nani uyu, niyufwana fya yombe findu ngati ifi? Na akalonditi kumbona.

10Na apa wakakilawiki maapostolo wakankositi yombe fila wakakiti. Na akawatoliti, na akagwaliti nawo pa mweya ku likaya likemeleka Betsaida. 11Leka mapuga apa wakawalalili wakankisiti: na akawayupiti, na akalongili nawo fya utwa wa Mulungu, na wala wakulonda kulwasika akawalamisi. 12Ni lijuwa likatumbwili kupendama; na kumi na wawili wala wanjichili, nakajowiti kwa yombe, Ulipele mwanja lipuga, nausi wagendaye ku mihali ya kusyungutila ni ku migunda, kwihadisa, ni kupatila mpako: pakuya tiyii apa pandu pa lipululu. 13Leka akajowiti kwa wombe, Muwapele mwenga walye. Na wombe wakajowiti, Tiyilepe ni mikate lema mhano waka ni somba siwili; wona tilemiti kugenda mwanja kuhemela fya kulya kwa wandu awa woha. 14Pakuya wakayili ngati wagosi elfu mhano. Leka akajowiti kwa wanafunsi wake, Muwatamike pasi pasima pasima, makumi mhano makumi mhano. 15Na wakakiti wiwi, na wakawatamiki woha. 16Leka pakatoliti mikate mhano yila ni somba siwili sila, akaloliti kunani, akapili kihomo, na akametwili; na akawapili wanafunsi kuwika palongolo pa lipuga. 17Na wakalili, na wakatupili woha: ni fikatondoliki fya kusigalila fya fimenyumenyu, misenjele kumi ni yiwili.

18Ni yikayili kukita, apa yombe akayili mu kusali wakape, wanafunsi wakayili pamonga nuyombe: ni akawakotiti kujowa, Mapuga wajowa nenga niyii naa? 19Leka wombe pa kuhiga wakajowiti, Yohana Wakubatisa; leka wangi, Eliya; leka wangi, kukita yumonga wa wakulweta wa mwandi ayimakiki. 20Leka akajowiti kwa wombe, Apa mwenga munijowa nenga na naa? Leka Petro akahigiti nakajowiti, Kristo wa Mulungu. 21Na akawalakalili, na akawataukili wasinjowela haka mundu iki; 22kujowa, Mwana wa adam alinganila kuyufwana mahumbuso mingi, na kukaniwa ni wakuluwakulu ni makasisi makulungu ni wa kulembela, ni kukomewa, ni ligono lya kadatu kusyukika. 23Leka akawajowili woha, Wona mundu alonda kuhicha kunyuma kwangu, ikane mwene, na itwike msalaba wake ligono ni ligono, na anikise nenga. 24Pakuya ayi yoha uyu alonda kuyokola wumi wake yautage; na ayi yoha uyu yautage wumi wake ndawa ya nenga, yuyu yauyokole. 25Pakuya mundu yayinogele kiki, wona ayipatila ndima wa mfilimila, leka autaga pangi alipalisa wumi wake mwene? 26Pakuya ayi yoha uyu yakoseke lihamu kwa nenga ni kwa malowe gangu, pa yombe Mwana wa adam yakosewe lihamu, pala yahiche pa kukwisika kwake mwene, ni kwa Dadi, ni kwa wamalaika wawalafu. 27Koma niwajowela fya chakaka, Wayii wangi wa awa wayima apa, awa yawakilose lepa kifwa, mpaka pala yawawone utwa wa Mulungu.

28Leka yikayili kukita panyuma pa malowe aga ngati magono nane, akatolini nuyombe Petro nu Yohana nu Yakobo, nakakweliti ku kidunda kusali. 29Ni apa akayili mu kusali, kihwanakiso kya kyene kyake kikayili kingi, ni nguo yake yikayili kuwalala, ngati kumulika kwa mbamba. 30Na lola, wagosi wawili wakalongili nuyombe, wala wakayili Musa ni Eliya; 31wala wakawoniki pa kukwisika, na wakalongili ya kupita kwake kula ayii nu mwoyo kumalakisa pa Yerusalem. 32Leka Petro na wala pamonga nuyombe wakatopaliki mu lugono: leka pala wakayimwiki muni, wakaweni kukwisika kwake, na wagosi wawili wala wakayimi pamonga nuyombe. 33Ni yikayili kukita, pakupatukana wombe nuyombe, Petro akajowiti kwa Yesu, Bambo, kiyii kinofu kwa tenga kuya apa: na tijenge masakasa gadatu; limonga kwa wenga, ni limonga kwa Musa, ni limonga kwa Eliya: akamanyiti lepa iki ajowa. 34Leka pa kujowa aga, likafiki lifundi, ni likawalekalili kifwili: ni wakayogwipi apa wakayingili mu lifundi. 35Ni njowelo yikapititi kuhuma pa lifundi, kujowa, Uyu ayii Mwanangu wakuhagulika: munjufwanile yombe. 36Ni apa njowelo yikalutiti, Yesu wakape akawoniki. Na wakatemi kinunu, na wakantolili lepa haka mundu ndumi pa magono gala ya kimonga kya fila wafiweni.

37Leka yikayili kukita, lukela lwake, apa wakaselili pa kidunda, lipuga likulungu likampingamili. 38Na lola, ngosi kuhumila pa lipuga akuwiti, kujowa, Mwalimu, nikupembesa undolalele mwanangu; pakuya mwanangu wakape ayii nako: 39na lola, roho yinkamula yombe, ni pa kukenyemukila ang’ahamuka; ni yinkachula ni akita lifulufulu, na kwa makakala yiwuka kundeka yombe, kunfufya. 40Na nikawaluwiti wanafunsi wako nausi wayitage kunja; na wakahotwili lepa. 41Leka Yesu akahigiti nakajowiti, Kihogosi kyangali kiyitakiso ni kya mibidu‐mibidu, mpaka ndali yaniye kwinu, ni kwiselesa nu mwenga? pindila kuni mwanao. 42Leka akona ayii mu kuyicha, daimon yikangwesiti pasi, ni yikankachwili. Leka Yesu akalakalili roho ya wafu, na akandamisi mwana, na akampeliki kwa dadi mundu. 43Na woha wakakangichi nyamhope pa ukulungu wa Mulungu.

Leka pala wakayili mu kuhikalila pa fyoha fila akafikiti, akajowiti kwa wanafunsi wake, 44Muwike malowe aga mu makutu ginu: pakuya Mwana wa adam yafumbulike mu mawoko ga wandu. 45Leka wakawalalili lepa lilowe ili, na likafihiki kwa wombe, nausi wasiliwalalila: na wakayogwipi kunkota yombe ya lilowe ili.

46Leka gakayingili makanangano kwa wombe, kukita nani wa wombe ngayili nkulungu. 47Leka Yesu pakamanyi makanangano ga mioyo yawe, akantoliti mwana nchoko, nakambikiti pa makigi gake, 48nakajowiti kwa wombe, Ayi yoha yuakemelesa mwana nchoko uyu pa lihina lyangu anikemelesa nenga: ni ayi yoha yuanikemelesa nenga ankemelesa yula akanitumiti: pakukita yuyu ayii nchoko pa mwenga mwawoha, yuyu nkulungu ayii.

49Leka Yohana akahigiti nakajowiti, Bambo, tikambweni mundu wa kutaga kunja madaimon pa lihina lyako; na tikambesiti, ndawa akisana lepa pamonga nati. 50Koma Yesu akajowiti kwa yombe, Mumbese lepa: pakuya uyu ayilepe wa kuwapindika mwenga ayii wakuwayimalila.

51Leka yikayili kukita, pa kumalakilana magono gake ga kutoleka yombe kunani, alasiti kyene kyake kipitile ku Yerusalem, 52ni akatumiti watenga palongolo pake: na wakagenditi, na wakayingili pa muhali wa waSamaria, kuwikila ngani kwa yombe. 53Na wakanjupiti lepa, ndawa kyene kyake kikayili kya kugenda ku Yerusalem. 54Na apa wakaweni wanafunsi wake Yakobo nu Yohana, wakajowiti, Bambo, ulonda ati tikemele mwoto kuselela kunani, ni kuwakunga wombe? 55Leka akang’anamwiki nakawalakalili wombe. 56Na wakagenditi kiyingalile pa muhali wungi.

57Na pa kugenda wombe pa ndila, mundu akajowiti kwa yombe, Yanikukise kuyii kwoha uko ubita. 58Nu Yesu akajowiti kwa yombe, Mankewe gayii ni makolo, ni fidege fya kunani fiyii ni fisakasa; koma Mwana wa adam ayilepe na pakuwika mutu. 59Leka akajowiti kwa yungi, Unikise nenga. Koma akajowiti, Bambo, uniyitakile nibite huti kumbika dadi mu manyinja. 60Leka akajowiti kwa yombe, Uleke wa kufwa wawike mu manyinja wa kufwa wawe wene; koma wenga uwuke uwandise utwa wa Mulungu. 61Yungi kawili akajowiti, Yanikukise wenga, Bambo; leka pakutumbula uniyitakile niwalagile wa pa nyumba yangu. 62Koma Yesu akajowiti kwa yombe, Pa waka mundu, pakawikiti kiwoko kyake pa kyakulimila, ni alola munyuma, ayii wakulinganila pa utwa wa Mulungu.

Currently Selected:

Luka 9: MGS1937

Highlight

Copy